Alma 43–52

Kinatibuk-ang Pagpasabot

Ang kataposang bahin sa basahon ni Alma naghulagway sa panahon sa panagbingkil ug gubat. Sa dihang nakita ni Moroni nga daghan sa mga Nephite ang misugod sa pagkalimot sa Ginoo, siya nabalaka sa espirituhanon ug pisikal nga kaayohan sa iyang katawhan. Siya mibuhat og bandila sa kalingkawasan, ug dinhi niini iyang gilista ang importante nga mga butang alang sa iyang mga katawhan aron kanunay nga hinumdoman. Ang iyang mga pulong midasig kanila sa pagpalig-on sa ilang pasalig ngadto sa Dios. Ang mga estratehiya nga ilang gigamit sa ilang mga gubat batok sa mga Lamanite makatabang kanato sa pagpalambo og mga estratehiya nga atong magamit sa atong inadlaw nga mga pakig-away batok ni Satanas.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang kinahanglan nga andamon daan alang sa matag leksiyon.

Alma 43, 48–50

Katuyoan sa leksiyon: Kini nga leksiyon makatabang sa mga estudyante sa pagpahisama sa mga kasulatan ngadto sa ilang kaugalingon aron makadawat sa panalipod sa Ginoo gikan sa makanunayon ug nagkadaghang pag-atake sa kaaway.

• Pagpangandam sa estudyante: Dapita ang mga estudyante sa pagtuon sa Alma 43:18–21, 37–38, mangita sa mga leksiyon nga makatabang kanila sa ilang pakiggubat batok ni Satanas.

• Sulod [Content] nga ipakita: Ang upat ka mga lakang aron ipahisama ang mga kasulatan sa atong kaugalingon

• Sugyot sa pagtudlo pinaagi sa videoconference: Ipakita ang upat ka mga lakang sa pagpahisama sa mga kasulatan. Pahibaloa daan ang mga estudyante nga gamiton nila kini nga mga lakang sa ilang kaugalingon human buhaton ang usa ka ehemplo isip usa ka klase. Kini mahimong makadasig kanila sa pagpabilin sa ilang mga kamera nga nag-on ug sa pagpaminaw pag-ayo atol sa unang bahin sa leksiyon aron mahimo silang andam sa pagtrabaho nga mag-inusara sa mas epektibong paagi.

Alma 45–46

Katuyoan sa leksiyon: Kini nga leksiyon makatabang sa mga estudyante nga masabtan ang mga paagi nga ilang mapakita ang ilang pasalig sa Dios.

• Pagpangandam sa estudyante: Dapita ang mga estudyante sa paghimo og listahan sa mga butang nga makapadasig o makapahinumdom kanila sa pagtuman sa mga sugo sa Dios.

• Handout: “Modernong-Adlaw nga mga Pagtulun-an nga may Kalabotan sa Bandila sa Kalingkawasan”

• Sugyot sa pagtudlo pinaagi sa videoconference: Ikonsiderar ang pagpakita sa matag pamahayag gikan sa kinatibuk-ang mga lider sa Simbahan aron ang mga estudyante makasubay samtang basahon nimo kini og kusog.

Alma 47–48

Katuyoan sa leksiyon: Kini nga leksiyon makatabang sa mga estudyante sa pagbatok sa mga pagsulay ni Satanas sa pag-angkon og gahom ibabaw kanila.

• Pagpangandam sa estudyante: Dapita ang mga estudyante sa pagbasa sa 2 Nephi 28:7–8, 21–22 ug sa paghunahuna og mga ehemplo kon giunsa paggamit ni Satanas kini nga mga taktika sa atong panahon.

• Hulagway: Usa ka bingwit sa pagpangisda ug usa ka paon

• Dayagram: Lehonti ug Amalickiah sa Bungtod sa Antipas

• Sugyot sa pagtudlo pinaagi sa videoconference: Ikonsiderar ang paggamit sa whiteboard nga feature aron ipakita ang drowing kang Lehonti sa tumoy sa bukid. Dapita ang mga estudyante nga dungan nga magbuhat sa kalihokan sa pagdrowing diha sa whiteboard. Dasiga ang matag usa kanila sa pagsalmot.

Sukda ang Imong Nakat-onan 6

Katuyoan sa leksiyon: Kini nga leksiyon gituyo aron sa pagtabang sa mga estudyante sa pagsukod sa mga tumong nga ilang gitakda ug sa paglambo nga ilang nasinati atol sa ilang bag-ohay lang nga pagtuon sa Basahon ni Mormon.

• Pagpangandam sa estudyante: Dapita ang mga estudyante sa pagtambong nga andam sa pagpakigbahin sa unsay ilang nakat-onan o sa mga paagi nga sila espirituhanong milambo sa miaging pipila ka mga semana. Mahimong makatabang nga iparebyo sa mga estudyante ang ilang journal sa pagtuon o mga mubo nga sulat diha sa ilang mga kasulatan.

• Mga Hulagway: Mga himan nga gigamit sa pagsukod sa pisikal nga kahimsog o paglambo

• Sugyot sa pagtudlo pinaagi sa videoconference: Alang sa seksiyon nga “Ipasabot ang mahinungdanon nga mga kamatuoran bahin sa laraw sa kaluwasan o ang papel ni Jesukristo,” mahimo nimong bahinon ang mga estudyante ngadto sa duha ka grupo ug ibutang ang matag grupo ngadto sa usa ka breakout room. Ang usa ka grupo mahimong i-assign aron sa paghisgot sa kalihokan 1, ug ang lain mahimong maghisgot sa kalihokan 2. Human ang panaghisgotan, usa ka boluntaryo gikan sa matag grupo ang mahimong mopamubo sa tubag sa ilang grupo ngadto sa tibuok klase.

Rebyo 15 sa Doktrinal nga Kahanas

Katuyoan sa leksiyon: Kini nga leksiyon makatabang nga madugangan ang pagsabot sa mga estudyante ug ang ilang abilidad sa pagpasabot sa mga kamatuoran nga makita diha sa mga tudling sa doktrinal nga kahanas gikan sa Basahon ni Mormon.

• Pagpangandam sa estudyante: Dapita ang mga estudyante sa paghunahuna og usa ka butang nga ilang nasabtan pag-ayo, sama sa usa ka kalingawan, paugnat sa kusog [sport], o asignatura [subject] sa eskwelahan. Ipahunahuna nila kon unsa ang nakatabang kanila nga makabaton og ingon ka lawom nga pagsabot ug dapita sila sa pagpakigbahin sa ilang mga hunahuna.

• Mga Bidyo: “Bisan Unsa ang Mahitabo, ug Dawata Kini” (13:29; tan-awa gikan sa time code 4:50 hangtod sa 5:44); “Ang Pagkatakos Dili ang Pagkawalay Tatsa” (10:52; tan-awa gikan sa time code 0:00 hangtod sa 0:27)

• Sulod [Content] nga ipakita: “Doktrinal nga Kahanas sa Basahon ni Mormon: Alma–Moroni”

• Sugyot sa pagtudlo pinaagi sa videoconference: Sa dili pa magsugod ang leksiyon, ikonsiderar ang paggamit sa whiteboard nga feature sa pagsulat sa pulong nga sayop nga pagsabot ug dapita ang mga estudyante sa pagpakigbahin kon unsay mosantop sa ilang hunahuna kon sila maghunahuna niini nga mga pulong. Dayon ipakigbahin ang mga pamahayag nga gihatag diha sa leksiyon. Isip alternatibo, ikonsiderar ang pagpakigbahin og personal nga kasinatian sa sayop nga pagsabot.