“Alma 42, Bahin 2: ‘Ang Kaluoy Moangkon sa Mahinulsolon,’” Manwal sa Magtutudlo sa Basahon ni Mormon (2024)

“Alma 42, Bahin 2,” Manwal sa Magtutudlo sa Basahon ni Mormon

Alma 42, Bahin 2

“Ang Kaluoy Moangkon sa Mahinulsolon”

painting ni Jesukristo nga nagtunol sa usa ka maluloy-on nga kamot

Aron matabangan ang iyang anak nga lalaki nga si Corianton nga maghinulsol, gitudloan siya ni Alma mahitungod sa kaangayan ug kaluoy sa Dios ug sa unsang paagi nga “walay lain kon dili ang tinuod nga mahinulsolon mao ang maluwas” (Alma 42:24). Kon kita makasabot sa laraw sa kaluoy sa Langitnong Amahan, kita madasig sa paghinulsol. Kini nga leksiyon makatabang nimo nga masabtan kon sa unsang paagi ang Pag-ula ni Jesukristo nagtugot kanimo nga makadawat sa kaluoy nga gisaad sa laraw sa Langitnong Amahan.

Dapita ang mga tigkat-on sa pagpamatuod kang Jesukristo. Ang kasingkasing sa mga tigkat-on mausab samtang sila mobalhin gikan sa yanong paghisgot mahitungod ni Jesukristo ngadto sa pagpamatuod Kaniya isip ilang personal nga Manunubos nga ilang nailhan, gihigugma, ug gisaligan. Pangita og epektibo nga mga paagi sa pagdapit sa mga estudyante sa pagpakigbahin sa ilang mga pagpamatuod ni Jesukristo ngadto sa usag usa.

Pagpangandam sa estudyante: Dapita ang mga estudyante sa pagpangita og ehemplo diha sa mga kasulatan sa usa ka tawo o sa grupo sa mga tawo nga nagpakita og sinsero nga paghinulsol.

Mga Posibleng Kalihokan sa Pagkat-on

Ang balaod mopahamtang sa silot

Ang mosunod gituyo aron sa pagtabang kanimo sa pagsukod sa pagsabot sa mga estudyante sa kaangayan ug kaluoy sa Dios. Kon gikinahanglan, rebyoha ang mga kahulogan sa kaangayan ug kaluoy gikan sa leksiyon sa “Alma 42, Bahin 1.”

Unsa ang pipila ka mga kahimtang diin ang kaangayan tinguhaon? Unsa man usab kaha ang kaluoy?

Napanalanginan kitang tanan tungod kay ang Langitnong Amahan parehong makiangayon ug maluloy-on. Tungod sa laraw sa Langitnong Amahan, kitang tanan pagadad-on pagbalik ngadto sa presensiya sa Dios aron pagahukman (tan-awa sa Alma 42:23). Sa iyang makasasala nga kahimtang, si Corianton dili andam alang sa paghukom. Milaom si Alma nga ang pagtudlo kaniya mahitungod sa laraw sa Langitnong Amahan mogiya ni Corianton sa paghinulsol ug pag-alagad sa Dios. Samtang magtuon ka sa Alma 42, pangitaa kon unsay gitudlo ni Alma kang Corianton nga iyang mahimo aron makadawat sa kaluoy sa Dios.

Mahimong makabenepisyo ang mga estudyante gikan sa paghisgot sa nagkalainlaing mga balaod sa katilingban, kon sa unsang paagi ang katilingban makabenepisyo kon ang balaod gipatuman, ug ngano nga mahinungdanon nga adunay mga sangpotanan sa paglapas sa balaod. Makaandam kini sa mga estudyante sa pagbasa sa Alma 42:17–21.

Sama nga ang mga balaod adunay importante nga papel sa katilingban, ang mga balaod usa ka mahinungdanon nga bahin sa laraw sa Langitnong Amahan.

Basaha ang Alma 42:17–21, mangita sa pipila ka mga katuyoan sa balaod diha sa laraw sa Langitnong Amahan (tan-awa usab sa 2 Nephi 2:13).

Unsa ang imong nakat-onan mahitungod sa balaod sa laraw sa Langitnong Amahan?

Pagdrowing og mga timbangan nga susama sa mosunod diha sa pisara. Ikonsiderar ang paggamit sa drowing aron sa pagtabang sa mga estudyante nga makasabot sa relasyon tali sa kaangayan, balaod, ug kaluoy. Dasiga ang mga estudyante sa pagpangutana samtang nagpadayon ang leksiyon.

Samtang adunay mga pangutana ang mga estudyante, mahimong makatabang ang pagpakigbahin og usa o daghang mga pamahayag gikan sa seksiyon sa “Komentaryo ug Background nga Impormasyon”.

Sulati [label] ang timbangan og “Kaangayan.”

Sumala sa balaod sa kaangayan makadawat kita og mga sangpotanan sa atong mga binuhatan. Kita makadawat og mga panalangin kon kita mosunod sa balaod ug silot kon kita makalapas sa balaod.

Sulati ang usa ka bahin sa timbangan og “paglapas sa balaod” ug ang pikas nga bahin “silot nga gipas-an sa makasasala.”

Kon kita makalapas sa usa ka balaod, ang timbangan mahimong dili balanse. Ang kaangayan nagkinahanglan nga ang timbangan mahimong balanse. Ang bayad (o silot) gikinahanglan aron mabalanse ang timbangan (tan-awa sa Alma 42:22).

Unsa ang mahitabo kanato kon ang timbangan sa kaangayan mabalanse lamang pinaagi sa atong silot?

Ang silot sa sala mao ang espirituhanon nga kamatayon, “ingon nga gipahimulag gikan sa atubangan sa Ginoo” (Alma 42:11).

Ang kaluoy moangkon niadtong naghinulsol

Tungod kay ang Dios “usa ka mahingpit, makiangayon nga Dios, ug usa ka maluloy-on nga Dios usab” (Alma 42:15), Siya nag-andam og laraw aron kita makadawat og kaluoy kon kita makasala.

Basaha ang Alma 42:15, 22–25, mangita kon unsay gihatag sa laraw sa Langitnong Amahan sa pagbalanse sa mga timbangan sa kaangayan.

Ipahiuyon ang mga sulat sa mga timbangan diha sa pisara sumala sa mosunod nga mga instruksiyon.

Butangi og ekis o papasa ang pulong nga makasasala gikan sa mga timbangan sa kaangayan ug pulihi kini og Manluluwas.

Aron matabangan ang mga estudyante nga makatutok kang Jesukristo ug makabaton og makahuluganong panaghisgotan, ikonsiderar ang pagbasa sa pipila o sa tanan sa mosunod nga mga kasulatan nga gilista diha sa parentesis. Hisgoti kon sa unsang paagi ang gisugyot nga mga tudling makatabang sa pagtubag sa mga pangutana.

Unsaon nimo pagpasabot ang dayagram sa mga timbangan sa kaangayan sa imong kaugalingong mga pulong?
Unsa ang gibuhat ni Jesukristo aron ang kaluoy mahatag? (tan-awa sa Doktrina ug mga Pakigsaad 19:16–19).
Unsa ang gikinahanglan gikan kanato aron makadawat sa kaluoy sa Manluluwas? (tan-awa sa Alma 12:32–34; 34:15–16).

Usa ka baroganan nga atong makat-onan mao nga kon kita tinud-anay nga mahinulsolon, makadawat kita og kaluoy pinaagi sa Pag-ula sa Manluluwas.

Aron masabtan kon unsay buot ipasabot sa “tinuod nga mahinulsolon,” mahimong basahon sa mga estudyante ang pipila sa mga kasulatan nga gisugyot sa ubos. Mahimo usab nilang hinumduman ang pagpangandam sa estudyante ug ipakigbahin ang mga ehemplo gikan sa mga kasulatan sa mga indibidwal nga tinuod nga mahinulsolon.

Ang mahinulsolon nagpasabot nga magmapainubsanon ug mopadayag og kasubo alang sa sala (tan-awa sa 2 Mga taga-Corinto 7:10; 2 Nephi 2:7; Mosiah 4:10)

Ngano sa imong hunahuna nga ang tinuod nga mahinulsolon lamang ang maluwas?

Hunahunaa nga ikaw si Corianton ug wala pa makahinulsol sa tanan nimong mga sala. Basaha ang Alma 42:26–30, mangita sa mga pulong o mga hugpong sa mga pulong nga makapadasig kanimo sa paghinulsol.

Unsa nga mga pulong o mga hugpong sa mga pulong ang mahimong makadasig kanimo sa paghinulsol? Ngano man?

Human matudloi si Corianton mahitungod sa laraw sa Langitnong Amahan (tan-awa sa Alma 40–42), gipahinumdoman ni Alma si Corianton nga siya “tinawag sa Dios sa pagsangyaw sa pulong” aron sa “pagdala og mga kalag ngadto sa paghinulsol” (Alma 42:31). Si Corianton naghinulsol sa iyang mga sala ug mituman sa iyang calling (tan-awa sa Alma 49:30).

Pamalandong sa imong panginahanglan sa paghinulsol, ug hunahunaa kon sa unsang paagi ka mahimong tinuod nga mahinulsolon. Hinumdomi nga ang Langitnong Amahan mopasaylo kanimo kon ikaw maghinulsol (tan-awa sa Mosiah 26:30; Isaias 1:18).

Pagsulat og tulo o upat ka mga kapahayag nga nagpasabot sa papel sa Pag-ula ni Jesukristo diha sa laraw sa Langitnong Amahan. Ilakip ang mga papel sa kaangayan ug kaluoy ug unsa ang gikinahanglan natong buhaton aron makadawat og kaluoy. Irekord ang bisan unsang mga pagbati nga gusto nimong ipahayag mahitungod sa Manluluwas.

Ikonsiderar ang pagdapit sa mga estudyante sa paglakaw palibot sa lawak [room] ug sa pagpasabot ngadto sa nagkalainlaing mga klasmeyt ang papel sa Pag-ula ni Jesukristo diha sa laraw sa Langitnong Amahan. Dasiga sila sa paghisgot sa kaangayan ug kaluoy, sa kamahinungdanon sa tinuod nga mahinulsolon, ug sa unsang paagi si Jesukristo mihimo sa kaluoy nga posible.

Laing kapilian mao ang pagtan-aw og balik sa mga senaryo nga gigamit sa sinugdanan sa leksiyon sa “Alma 42, Bahin 1.” Dapita ang mga estudyante sa pagtubag niadtong mga senaryo gamit ang unsay ilang nakat-onan diha sa ilang pagtuon sa Alma 42.

Ipakigbahin ang imong pagpamatuod sa kaluoy ug katubsanan nga nahimong posible pinaagi ni Jesukristo ug sa Iyang Pag-ula.

Komentaryo ug Background nga Impormasyon

Unsay buot ipasabot sa tinuod nga mahinulsolon?

Si Elder D. Todd Christofferson sa Korum sa Napulog Duha ka Apostoles mitudlo:

Aron maapil sa hugpong sa tinuod nga mahinulsolon, dili igo nga mobuhat og sinalagma nga pagkamasinugtanon. Kita kinahanglan gayod nga mosulod sa mga pakigsaad ug magpadayon sa pagtuman niini ngadto sa punto nga ang atong gipaabot nga kaluwasan gipamatud-an sa Balaang Espiritu sa Saad (tan-awa sa D&P 132:7, 19). (D. Todd Christofferson, “Justification and Sanctification,” Ensign, Hunyo 2001, 24)

Makabayad ba ko sa akong kaugalingong mga sala ug maluwas?

Si Elder Bruce C. Hafen sa Seventy mipasabot:

Ang kaluoy ug paghinulsol kay motabang sa pagpahiuli sa maayong kahimtang, dili kay mopahamtang sa unsay silot. Ang Manluluwas mihangyo kanato sa paghinulsol dili lamang aron mobayad kita sa Iyang pagbayad sa atong utang sa kaangayan, apan usab sa pagdasig kanato sa pagpaubos ngadto sa personal nga kalamboan nga makaputli sa atong kinaiya. Ang “kinaiyanhon nga tawo” magpabilin nga kaaway sa Dios sa kahangtoran—bisan human sa pagbayad sa iyang kaugalingong mga sala—gawas kon siya usab “mahimo nga usa ka santos pinaagi sa pag-ula ni Kristo ang Ginoo” (Mosiah 3:19). (Bruce C. Hafen, “Beauty for Ashes: The Atonement of Jesus Christ,” Ensign, Abr. 1990, 9)

Unsa ang gitanyag ni Jesukristo isip atong Tigpataliwala?

Si Elder D. Todd Christofferson sa Korum sa Napulog Duha ka Apostoles mitudlo:

Tungod kay ang Manluluwas mibayad sa atong mga sala ug mitagbaw sa kaangayan alang kanato, kita nahimong mga utangan ngadto Kaniya kay sa ngadto sa kaangayan. Busa kinahanglan natong tumanon ang mga gitakda nga Iyang gitukod alang sa kapasayloan ug paghinlo. Kay kon dili, Iyang bawion ang Iyang gitanyag nga pagpataliwala, ug kita pasagdan nga mag-inusara sa pag-atubang sa mga gipangayo sa kaangayan, nga kulang sa paagi aron mahimong putli. Kinahanglang pilion sa usa si Kristo aron makadawat sa gitanyag ni Kristo. (D. Todd Christofferson, “Justification and Sanctification,” Ensign, Hunyo 2001, 23)

Unsa ang relasyon tali sa gugma sa Dios ug sa Iyang balaod?

Si Presidente Dallin H. Oaks sa Unang Kapangulohan mitudlo:

Ang gugma sa Dios dili makapuli sa Iyang mga balaod ug sa Iyang mga sugo, ug ang epekto sa mga balaod ug sa mga sugo sa Dios dili makapakunhod sa katuyoan ug epekto sa Iyang gugma. …

Ang uban mora og mohatag og bili sa gugma sa Dios tungod sa ilang paglaom nga ang Iyang gugma talagsaon kaayo ug walay kinutuban nga kini maluloy-on nga mopalingkawas kanila gikan sa pagtuman sa Iyang mga balaod. Ang kalainan, kadtong kinsa nakasabot sa plano sa Dios alang sa Iyang mga anak nasayod nga ang mga balaod sa Dios makanunayon, nga maoy lain nga dakong ebidensiya sa Iyang gugma alang sa Iyang mga anak. Ang kaluoy dili mohikaw sa kaangayan, ug kadtong kinsa makaangkon og kaluoy mao “sila kinsa naghupot sa pakigsaad ug naghupot sa sugo” (D&P 54:6). (Dallin H. Oaks, “Gugma ug Balaod,” Liahona, Nob. 2009, 26–27)