Alma 41

Gipahiuli ni Jesukristo ang Tanang mga Butang

Human matudloi si Corianton mahitungod sa mga kapeligroso sa iyang mga sala, si Alma naningkamot sa paghusto sa sayop nga mga pagtulun-an. Iyang gitudloan si Corianton og importante nga mga kamatuoran aron sa pagtabang kaniya nga makasabot sa laraw sa Langitnong Amahan sa pagpahiuli ug sa pagtabang kaniya sa paghinulsol. Kini nga leksiyon makatabang kanimo nga makita kon sa unsang paagi ang pagkadaotan dili mosangpot sa kalipay.

Itudlo ang mga kasulatan sa mga paagi nga makapalig-on sa hugot nga pagtuo kang Jesukristo. Usa ka katuyoan sa mga kasulatan mao ang pagtabang kanato nga mas maduol ngadto sa Langitnong Amahan ug ni Jesukristo (tan-awa sa 1 Nephi 6:4). Paggahin og panahon sa pagtabang sa mga estudyante nga makakita kon sa unsang paagi ang mga indibidwal diha sa mga kasulatan napanalanginan pinaagi sa gahom, kaluoy, ug gugma sa Dios. Dasiga ang mga estudyante sa pag-ila sa susama nga mga panalangin diha sa ilang kaugalingong mga kinabuhi samtang ilang gamiton ang ilang hugot nga pagtuo diha kang Jesukristo.

Pagpangandam sa estudyante: Dapita ang mga estudyante sa paghunahuna kon sa unsang paagi ang pagsunod sa mga sugo nakahatag kanila og kalipay ug nakatabang kanila nga mobati nga andam nga makahimamat ang Manluluwas ug ang Langitnong Amahan human niini nga kinabuhia.

Mga Posibleng Kalihokan sa Pagkat-on

Mga pagtuo mahitungod sa kinabuhi human sa kamatayon

Ang mosunod makatabang sa mga estudyante sa paghunahuna mahitungod sa mahangtorong mga sangpotanan sa ilang mga pagpili. Ikonsiderar ang paghunong human sa matag pamahayag aron matugotan ang mga estudyante sa pagtubag.

Hunahunaa kon sa unsang paagi maimpluwensiyahan ang imong mga binuhatan kon mituo ka sa bisan hain sa mosunod nga sayop nga mga pamahayag:

Walay kinabuhi human sa kamatayon.

Human kita mamatay, kita mahimaya dili igsapayan unsa man ang atong mga binuhatan dinhi sa yuta.

• Ngano nga importante nga adunay husto nga pagsabot kon unsay mahitabo kanato human kita mamatay?

• Unsa ang imong nahibaloan mahitungod sa kinabuhi human sa kamatayon nga nakaimpluwensiya sa imong mga binuhatan dinhi ug karon?

Ang kahulogan sa pagpahiuli

Hinumdomi nga si Alma nagtudlo sa iyang anak nga lalaki nga si Corianton, kinsa nakahimo og bug-at nga mga sala (tan-awa sa Alma 39), ug adunay mga pangutana mahitungod sa ebanghelyo. Sa Alma 41 atong nakat-onan nga si Corianton naglibog sa mga pagtulun-an sa mga tawo kinsa nahisalaag gikan sa ebanghelyo ni Jesukristo.

Basaha ang Alma 41:1, mangita sa wala masabti ni Corianton. (Sa mga pagtulun-an ni Alma, ang pulong nga pagpahiuli nagpasabot sa usa ka butang nga gibalik o gibalik sa kanhi nga kahimtang. Mahimong makatabang usab nga makahibalo nga ang pagtuis sa mga kasulatan mao ang paglubag, paglusngo, o pag-usab sa kahulogan niini.)

• Unsa ang wala masabti ni Corianton?

Aron matabangan si Corianton nga maghinulsol, mitudlo si Alma kaniya sa tinuod nga doktrina. Nasayod siya nga ang “tinuod nga doktrina, [nga] nasabtan, makapausab sa mga kinaiya ug pamatasan” (Boyd K. Packer, “Ayaw Kahadlok,” Liahona, Mayo 2004, 79). Ang pagsabot sa doktrina sa pagpahiuli makatabang kanato nga makasabot kon nganong ang mga pagpili nga atong gihimo niini nga kinabuhia importante kaayo.

Ikonsiderar ang pagbasa sa mga bersikulo 2–9 isip usa ka klase ug mohunong panagsa aron matabangan ang mga estudyante nga makasabot unsay ilang gibasa. Human mabasa, mahimong makatabang ang pagsukod kon unsay nasabtan sa mga estudyante mahitungod sa pagpahiuli nga gipasabot ni Alma. Ikonsiderar ang pagsulat sa pulong nga pagpahiuli diha sa pisara ug dapita ang klase sa paghimo ug pagklaro sa kahulogan samtang nagtuon niini nga leksiyon.

Basaha ang Alma 41:2–9 aron makita kon unsay gitudlo ni Alma aron matubag ang kabalaka ni Corianton.

• Sa unsa kita ipahiuli human kita mamatay?

• Sumala ni Alma, sa unsang paagi kini nga pagpahiuli nahimong posible?

• Sa unsang paagi nga kini nga kahibalo sa pagpahiuli makapadasig sa usa ka tawo sama ni Corianton sa pagbalik ngadto sa dalan sa pakigsaad?

“Ang pagkadaotan dili mahitabo nga kalipay”

Basaha ang Alma 41:10, mangita sa unsay gitudlo ni Alma mahitungod sa pagpahiuli, pagkadaotan, ug kalipay.

• Unsa nga sayop nga pagsabot ang gihusto ni Alma alang kang Corianton?

Gikan sa Alma 41:10, atong nakat-onan nga ang pagkadaotan dili mahitabo nga kalipay.

• Samtang imong ikonsiderar ang mga pagtulun-an ni Alma mahitungod sa balaod sa pagpahiuli, ngano sa imong hunahuna kini tinuod nga “ang pagkadaotan dili mahitabo nga kalipay”?

Mahimong makatabang ang pagpasabot nga ang ubang mga tawo naghunahuna nga sila makabalik sa pagpuyo uban sa Dios nga dili modawat og personal nga responsibilidad sa ilang mga binuhatan. Mahimong moingon sila nga ang ilang makasasala nga mga pagpili makalingaw. Usahay pa gani kadtong mopili sa pagpakasala mahimong makita nga malipayon.

Pagsabot sa kinaiyahan sa Dios

Ang laraw sa Dios sa pagpahiuli labaw pa kay sa usa ka plano aron kita mabuhi pag-usab. Usa kini ka laraw sa pagtabang kanato nga mahimong mahisama Kaniya ug makasinati sa Iyang kalipay.

Basaha ang Alma 41:11, mangita kon nganong imposible nga tiunay nga magmalipayon kon mohimo og sayop nga mga pagpili. Mahimong makatabang ang pagkahibalo nga ang “apdo sa kapaitan” (bersikulo 11) nagpasabot nga makasinati og hilabihan nga kasubo o grabe nga emosyonal nga kalisod isip resulta sa sala.

• Unsa nga mga kalainan ang imong nakita tali sa kalipay nga gitanyag sa Dios ug sa kalipay sa kalibotan?

• Unsa ang sayop nga mga ideya nga imong nakita nga gituboy apan dili makahatag og kalipay, bisan kon kini makatental?

Si Elder Marcus B. Nash sa Seventy mipasabot sa relasyon tali sa kinaiyahan sa Dios ug sa kalipay:

Timan-i nga ang mahimong walay Dios dinhi sa kalibotan––sa laing pagkasulti, ang pagdumili sa pagsunod sa Iyang ebanghelyo ug busa kulang sa pakig-uban sa Espiritu––mao ang maanaa sa kahimtang nga sukwahi sa kinaiyanhon sa kalipay. Ang ebanghelyo ni Jesukristo mao sa pagkatinuod ang—timan-i nga kini nag-inusara, nagpasabot nga kini mao lamang—“ang mahinungdanon nga laraw sa kalipay” (Alma 42:8). Kon kamo mopili og lain nga paagi sa kinabuhi o mosulay sa pagsunod og kabahin lamang sa ebanghelyo nga mao ra og sayon, ang ingon nga pagpili maoy mokawang kanimo sa puno, masilakon nga hingpit nga kalipay ug kamaya diin kamo gi-desinyo sa atong Amahan sa Langit ug sa Iyang Anak. (Marcus B. Nash, “Ang Mahinungdanong Plano sa Kalipay,” Liahona, Nob. 2006, 49–50)

Tabangi ang mga estudyante nga makasabot nga ang kinaiyahan sa Langitnong Amahan mao ang kalipay ug nga kita makasinati og tinuod nga kalipay samtang kita maningkamot nga mahimong mahisama Kaniya.

Usa ka paagi sa pagtudlo niini mao ang pagsulat sa mga pulong nga Kalipay ug Kasubo diha sa pisara. Dapita ang mga estudyante sa pagsulat og mga kinaiya sa Langitnong Amahan ubos sa pulong nga Kalipay ug sa pagpasabot nganong kini nga mga kinaiya mosangpot sa kalipay. Sama pananglitan, mahimo nimong hisgotan kon sa unsang paagi nga ang mas dakong kabalaan, pailob, o kakugi mosangpot ngadto sa mas dakong kalipay. Mahimo dayon nga mosulat ang mga estudyante og mga binuhatan ug mga kinaiya nga mosangpot sa kasubo ug ipasabot kon sa unsang paagi kini sukwahi sa kinaiya sa Dios.

Aron matabangan ka nga makita kon sa unsang paagi ang kinaiyahan sa Dios mao ang kalipay, paghimo og lista sa pipila sa Iyang mga kinaiya o mga hiyas. Kon nakahimo na ka og lista, hunahunaa kon sa unsang paagi kini nga mga kinaiya makahatag og kalipay alang sa Langitnong Amahan ug sa uban. Pananglitan, ang Dios maluloy-on. Tungod kay ang Dios maluloy-on, Siya adunay kalipay sa mga kalag kinsa naghinulsol ug mohatag sa kalipay sa kapasayloan ngadto sa uban (tan-awa sa Doktrina ug mga Pakigsaad 18:13). Pagpili og bisan usa ka kinaiya o sugo sa Dios ug ihulagway kon sa unsang paagi ang pagpuyo niana nga kinaiya o ang pagsunod niana nga sugo makahatag og kalipay.

Gipahiuli sa maayo

Nagdaghom si Coriantion nga mahimo siyang magpuyo nga daotan ug mabanhaw sa himaya. Sumala sa balaod sa Dios, dili kini mahitabo (tan-awa sa Taga-Galicia 6:7–8). Gikorehian ni Alma si Corianton ug gidapit siya sa pagsugod og buhat sa mga lakang aron makabalik ngadto sa Dios ug sa kataposan sa kalipay. Basaha ang Alma 41:12–15, mangita kon giunsa ni Alma pagdasig si Corianton sa pagpakabuhi aron siya mapahiuli ngadto sa kaayo ug kalipay.

• Gikan sa imong nabasa, unsa ang “[mapadala]” sa usa ka tawo kon gusto niya og mas dakong kalipay nga “mobalik nganha [kaniya] pag-usab”? (Alma 41:15).

• Kanus-a ka nakasinati og tinuod nga kalipay gikan sa pagsunod sa ebanghelyo ni Jesukristo?

Ang mosunod makatabang sa mga estudyante sa paglihok sa mga impresyon nga aduna sila.

Hunahunaa ang imong nakat-onan diha sa Alma 41 ug ang imong tinguha nga magmalipayon. Ang mosunod nga mga pangutana makatabang kanimo sa paghimo og plano sa pagkaplag og mas dakong kalipay:

• Unsa ang usa ka butang nga akong masugdan sa pagbuhat nga makatabang kanako nga magmalipayon ug mapahiuli sa maayo?

• Unsa ang usa ka butang nga akong mahunong sa pagbuhat nga makatabang kanako nga magmalipayon ug mapahiuli sa maayo?

Dapita ang Espiritu Santo sa paggiya sa imong mga hunahuna ug mga pagbati. Ikonsiderar ang pagrekord sa imong mga impresyon diha sa imong personal nga journal o sa mga kasulatan diin mahimo nimong rebyohon kini. Paghimo og plano sa paglihok, lakip na kon kanus-a ka magsugod ug unsaon nimo pagsukod ang imong pag-uswag.

Komentaryo ug Background nga Impormasyon

Unsa ang ipahiuli kanato sa sunod nga kinabuhi?

Si Presidente Dallin H. Oaks sa Unang Kapangulohan mitudlo:

Isip laing bahin sa “[plano] sa pagpahiuli” (Alma 41:2), ang Pagkabanhaw mopahiuli sa “tanan nga mga butang … ngadto sa ilang tukma ug hingpit nga bayanan” (Alma 40:23). Naglakip kini sa pagkahingpit sa atong tanang kakulian sa pisikal ug dili maayong pagkaporma nga kuha sa pagka-mortal, lakip sa pagkahimugso o sa truma o sakit. (Dallin H. Oaks, “Malimpyo Pinaagi sa Paghinulsol,” Liahona, Mayo 2019, 94)

Sa unsa nga paagi nga ang paghinulsol makaandam kanako nga mapahiuli ngadto sa maayo?

Si Presidente Dallin H. Oaks sa Unang Kapangulohan mipahayag:

Kini nga pagpahiuli molimpyo ba ug mohingpit sa atong tanan nga pagkadili balaan o wala maangkon nga mga tinguha o mga pagkaadik? Kana dili mahimo. Nasayod kita gikan sa modernong pagpadayag nga kita pagahukman sigon sa atong mga tinguha maingon man usab sa atong mga buhat (tan-awa sa Alma 41:5; Doktrina ug mga Pakigsaad 137:9) ug gani ang atong mga hunahuna mohimaraot kanato (tan-awa sa Alma 12:14). Dili gayod kita “maglangay sa adlaw sa [atong] paghinulsol” hangtod sa kamatayon, mitudlo si Amulek (Alma 34:33), tungod kay ang mao gihapon nga espiritu nga misulod sa atong lawas niining kinabuhia—sa Ginoo man o sa yawa—“adunay gahom sa pagsulod sa [atong] lawas didto sa walay kataposang kalibotan” (Alma 34:34). Ang atong Manluluwas dunay gahom ug andam nga molimpyo kanato gikan sa pagkadaotan. Karon ang panahon sa pagtinguha sa Iyang tabang alang sa paghinulsol sa atong daotan o dili maayong mga tinguha ug mga hunahuna aron malimpyo ug maandam sa pagbarog atubangan sa Dios sa Kataposang Paghukom. (Dallin H. Oaks, “Malimpyo Pinaagi sa Paghinulsol,” Liahona, Mayo 2019, 94)

Unsa kaha kon ako nagsunod sa mga sugo apan wala mobati og kalipay?

Si Elder Quentin L. Cook sa Korum sa Napulog Duha ka Apostoles mipasabot:

Akong nakita nga, bisan sa naghingapin nga kalipay diha sa balaang plano sa Dios, usahay morag nalayo na kini ug nabaliwala na sa atong kasamtangang kahimtang. Daw dili na nato kini makab-ot isip nanlimbasog nga mga disipulo. Gikan sa limitado natong panglantaw, ang kasamtangang mga tentasyon ug babag ingon og madanihon. Ang mga ganti sa pagbatok niana nga mga tentasyon, sa laing bahin, daw layo ug dili makab-ot. Apan ang usa ka tinuod nga pagsabot sa plano sa Amahan nagpakita nga ang mga ganti sa pagkamatarong makuha karon dayon. Ang pagkadaotan, sama sa imoral nga binuhatan, wala gayoy apil sa tubag. (Quentin L. Cook, “Sama sa Barko ug Sama sa Bristol: Pagpakatakos sa Templo—sa Maayo ug sa Lisod nga mga Panahon,” Liahona, Nob. 2015, 40–41)

Dugang nga mga Kalihokan sa Pagkat-on

Pagpamalandong sa kasamtangan nga mga tinguha

Samtang basahon sa mga estudyante ang Alma 41:5, mahimo nilang mahibaloan ang kamahinungdanon sa ilang mga tinguha sa pag-angkon og maayong pagpahiuli. Kon ang mga estudyante nagkinahanglan nga makasabot og dugang mahitungod sa mga tinguha, mahimo silang mangita diha sa mga kasulatan alang sa ubang mga bersikulo mahitungod sa mga tinguha (pananglitan, Alma 29:5; Doktrina ug mga Pakigsaad 11:8, 14, 17; o Doktrina ug mga Pakigsaad 137:9). Dayon mahimo nimo silang dapiton sa paghunahuna mahitungod sa ilang kasamtangan nga mga tinguha ug sa unsang paagi kaha sila mahiuyon sa mga tinguha sa Dios.

Pag-ila sa sayop nga mga pagtuo mahitungod sa pagpahiuli human niini nga kinabuhi

Gitudloan ni Alma si Corianton nga ang uban nagtuis sa mga kasulatan mahitungod sa pagpahiuli (tan-awa sa Alma 41:1). Sa Alma 41:10 iyang giila ang usa ka sayop nga pagtuo—nga ang usa ka tawo mahimong mapahiuli gikan sa sala ngadto sa kalipay. Human makatuon ang mga estudyante mahitungod sa kinaiyahan sa Dios, ikonsiderar ang pagpakigbahin sa mosunod nga mga pananglitan ug dapita ang mga estudyante sa paggamit sa unsay ilang nakat-onan sa pagkorehir sa sayop nga pagsabot o sayop nga pagtulun-an:

• “Nasayod ko nga dili husto ang akong gibuhat, apan sa kanunay mahimo ra kong maghinulsol ug mamaayo ra ang tanan.”

• “Gihigugma sa Dios ang tanan Niyang mga anak, busa dili niya ipadala bisan kinsa kanato sa impyerno.”

Leksiyon nga naggamit og usa ka butang [Object lesson]: Boomerang

Ipakita sa mga estudyante ang usa ka boomerang o pagdrowing og usa ka hulagway niini diha sa pisara. Pangutan-a ang mga estudyante kon unsay mahimo sa usa ka boomerang kon sakto ang pagkalabay. (Kini mobalik sa dapit kon diin kini gilabay.)

Dapita ang mga estudyante sa pagpasabot kon sa unsang paagi ang boomerang sama sa doktrina sa pagpahiuli nga gipasabot diha sa Alma 41:12–15.