Alma 42, Bahin 1

“Usa ka Mahingpit, Makiangayon nga Dios, ug usa ka Maluloy-on nga Dios Usab”

Ang pagpuyo sa napukan nga kalibotan gamit ang atong limitado, mortal nga panglantaw makapalisod sa pagsabot sa kompleto ug hingpit nga kinaiyahan sa atong Langitnon nga Amahan ug sa Iyang laraw. Naglisod usab si Corianton sa pagsabot sa kamatuoran sa kaangayan ug kaluoy sa Dios. Gitabangan siya ni Alma sa pagpalapad sa iyang panglantaw sa atong mahigugmaong Langitnong Amahan ug sa Iyang laraw alang kanato. Kini nga leksiyon gituyo aron sa pagtabang kanimo nga mas makasabot sa kinaiyahan sa Langitnong Amahan isip usa ka makiangayon ug maluloy-on nga binuhat.

Pag-ampo alang sa imong mga estudyante. Usa ka paagi aron madugangan ang imong gugma alang sa mga estudyante mao ang pag-ampo alang kanila. Sama nga ang Manluluwas personal nga nag-ampo alang kang Pedro (tan-awa sa Lucas 22:32), mahimo kang mag-ampo ngadto sa Langitnong Amahan alang sa indibidwal nga mga estudyante gamit ang ngalan. Dapita Siya sa pagtabang kanimo nga mas makasabot sa ilang mga panginahanglan ug sa mga paagi nga imo silang matabangan.

Pagpangandam sa estudyante: Ikonsiderar ang pagdapit sa mga estudyante nga makig-istorya sa usa ka sakop sa pamilya o sa higala mahitungod sa pipila ka nagkalainlaing mga ideya nga aduna ang mga tawo bahin sa kinaiya sa Dios.

Mga Posibleng Kalihokan sa Pagkat-on

Sa pagsugod niini nga leksiyon, ikonsiderar ang pagpares-pares sa mga estudyante. Ihatag ang usa sa mosunod nga mga senaryo ngadto sa matag pares. Dapita silang duha sa pagbasa sa ilang mga senaryo ug dayon sa paghisgot kon unsa kaha ang sayop sa mga pangagpas nila ni Gabe ug ni Elsie.

Ang kaangayan ug kaluoy sa Dios

Basaha ang mosunod nga mga senaryo:

• Si Gabe naghimo og mga pagpili sa paglapas sa mga sugo sa Dios. Sa sinugdanan mibati siya og gamay nga pagkasad-an, apan nakahukom siya nga kon ang Langitnong Amahan nahigugma pag-ayo sa Iyang mga anak, dili Niya silotan si Gabe sa iyang mga sala.

• Si Elsie anaa sa usa ka kahimtang sa pagkawalay paglaom tungod kay siya mihinulsol sa usa ka sala nga iyang nabuhat, mibati nga gipasaylo, unya nakasala pag-usab. Nagtuo siya nga walay paglaom alang kaniya tungod kay gibati niya nga namakak siya sa Dios mahitungod sa iyang paghinulsol.

Adunay daghan nga nasayop sa pagsabot sa mahigugmaon ug mahingpit nga balanse sa kaangayan ug kaluoy sa Langitnong Amahan ug ni Jesukristo. Samtang magtuon ka sa leksiyon karon, hunahunaa kon sa unsang paagi ka napanalanginan tungod kay ang Dios makiangayon ug maloloy-on.

Gitabangan ni Alma si Corianton nga makasabot sa laraw sa Dios

Ikonsiderar ang pagdapit sa mga estudyante sa pagrebyo sa mga kabalaka ni Corianton sa Alma 40–41. Kon sila dili makahinumdom, idirekta sila ngadto sa Alma 40:1; 41:1. Mahimo nimong ilista diha sa pisara ang mga kabalaka ni Corianton samtang hisgotan kini sa mga estudyante.

Samtang si Alma nagpadayon sa pagtambag ni Corianton, si Alma nakamatikod nga ang iyang anak adunay kabalaka mahitungod sa Dios ug sa Iyang laraw.

Basaha ang Alma 42:1 ug pangitaa ang kabalaka ni Corianton.

Ikonsiderar ang pagdugang niini nga kabalaka ngadto sa lista diha sa pisara. Ubos niini nga kabalaka, mahimo nimong ilista ang mga tubag sa mga estudyante sa mosunod nga mga pangutana.

• Unsa ang pipila ka mga pangagpas nga mahimong mosangpot sa usa ka tawo sa paghunahuna nga dili makiangayon alang sa Dios ang pagsilot sa mga makasasala?

• Unsa ang kapeligro niining klase sa sayop nga pagsabot?

• Sa unsang paagi nakita nimo karon ang susamang mga sayop nga pagsabot?

Mahimong usa kini ka maayong kahigayonan alang sa mga estudyante nga ipakigbahin unsa ang ilang nakat-onan sa ilang pagpangandam alang sa klase.

Si Alma misulay sa pagtabang kang Corianton pinaagi sa pagpakigbahin kaniya og mas lapad nga panglantaw kabahin sa Dios ug sa Iyang laraw. Nagsugod siya pinaagi sa pagpasabot nga ang Pagkapukan ni Adan ug Eva sa Tanaman sa Eden nagdala og espirituhanon nga kamatayon (pagkabulag gikan sa Dios) ug temporal nga kamatayon (ang kamatayon sa mortal nga lawas) (tan-awa sa Alma 42:2–8). Dayon iyang gitudloan si Corianton kon sa unsang paagi ang Pagkapukan may kalabotan sa kaangayan ug kaluoy sa Dios.

Basaha ang Alma 42:9–12 ug pangitaa ang mga epekto sa Pagkapukan.

• Unsa nga mga epekto sa Pagkapukan ang imong nakaplagan?

Ang mga tubag sa mga estudyante sa miaging pangutana makapatino kon unsa ang ilang nasabtan ug unsa kaha ang ilang gikinahanglan nga tabang nga masabtan. Tabangi ang mga estudyante nga makasabot nga tungod sa Pagkapukan, ang katawhan nahimong “kalibotanon, mahilayon, ug yawan-on” (Alma 42:10) ug “gipahimulag gikan sa atubangan sa Ginoo” (Alma 42:11). Dili nato mabuntog kining pagkahilayo gikan sa Ginoo nga kita lamang.

Dayon, aron andamon ang mga estudyante nga makat-on pa og dugang kabahin sa kaangayan ug kaluoy sa mosunod nga seksiyon sa leksiyon, ikonsiderar ang pagdapit kanila sa pagsulat og ilang kaugalingon nga usa- o duha- ka kapahayag nga mga kahulogan sa duha ka mga pulong. Dayon basaha ang mosunod nga mga kahulogan ug ipatandi sa mga estudyante ang ilang mga kahulogan ngadto sa mga kahulogan diha sa Gospel Topics. Tugoti ang mga estudyante nga mangutana og bisan unsang mga pangutana nga mahimong anaa sila.

• Kaangayan: “Sa mga termino sa kasulatan, ang kaangayan mao ang dili mausab nga balaod nga nagdala sa mga sangpotanan sa mga binuhatan. Tungod sa balaod sa kaangayan, makadawat kita og mga panalangin kon kita mosunod sa mga sugo sa Dios. Ang balaod sa kaangayan nagbungat usab nga adunay usa ka silot nga ibayad sa matag sala nga atong mabuhat” (Gospel Topics, “Justice,” topics.ChurchofJesusChrist.org).

• Kaluoy: “Ang kaluoy mao ang maluloy-on nga pagtagad sa usa ka tawo nga labaw pa sa angay, ug kini nahimong posible pinaagi sa Pag-ula ni Jesukristo” (Gospel Topics, “Mercy,” topics.ChurchofJesusChrist.org).

Basaha ang Alma 42:13–15, mangita sa unsay gitudlo ni Alma mahitungod sa Dios ug sa Iyang laraw.

• Unsa ang imong makat-onan mahitungod sa laraw sa Dios?

• Unsa nga mga kamatuoran ang imong makat-onan mahitungod sa Dios gikan niini nga mga bersikulo?

Taliwala sa ubang mga kamatuoran, tabangi ang mga estudyante nga makasabot sa kamahinungdanon sa pagkahibalo nga Ang Dios mahingpit, makiangayon, ug maluloy-on. Bisan og ang importante nga mga kamatuoran gihisgotan niini nga mga bersikulo mahitungod sa Pag-ula ni Jesukristo ug sa tahas sa paghinulsol, kadto nga mga hilisgotanan mas tukion pa sa sunod nga leksiyon.

Ang kaangayan ug kaluoy sa Dios

Si Elder D. Todd Christofferson sa Korum sa Napulog Duha ka Apostoles mitudlo mahitungod sa kaangayan ug kaluoy sa Dios:

Ang kaangayan usa ka mahinungdanong kinaiya sa Dios. Kita makabaton og [hugot nga] pagtuo sa Dios tungod kay hingpit Siyang masaligan. Ang kasulatan nagtudlo kanato nga ang “Dios dili molakaw sa hiwi nga mga dalan, ni siya moliko ngadto sa tuo nga dapit ni ngadto sa wala, ni siya mag-usab-usab gikan niana diin iyang gipamulong, busa ang iyang mga dalan tul-id, ug ang iyang tumong usa ka walay kataposan nga nagsunod-sunod nga buhat” [Doktrina ug mga Pakigsaad 3:2] ug ang “Dios wala diay pinalabi sa mga tawo” [Mga Buhat 10:34]. Kita mosalig sa balaanong kinaiya sa kaangayan para sa [hugot nga] pagtuo, pagsalig, ug paglaom.

Apan isip sangpotanan sa hingpit nga pagka-makiangayon, adunay pila ka butang nga dili mahimo sa Dios. Dili siya makabuot sa pagluwas sa pipila ug sa paghingilin sa uban. Siya “dili makatan-aw diha sa sala uban sa labing gamay nga matang sa pagtugot” [Doktrina ug mga Pakigsaad 1:31]. Siya dili makatugot sa kaluoy nga mohikaw sa kaangayan [tan-awa sa Alma 42:25].

Kini hugot nga ebidensiya sa Iyang kaangayan nga ang Dios mimugna og kaubang baroganan sa kaluoy. Kay Siya makiangayon nga Siya mihimo og paagi nga ang kaluoy may mahinungdanong bahin sa atong mahangturong kapaingnan. (D. Todd Christofferson, “Gawasnon sa Kahangtoran, nga Molihok alang sa Ilang Kaugalingon,” Liahona, Nob. 2014, 17–18)

• Unsa ang matabang niini nga pamahayag kanimo nga makasabot mahitungod sa Dios?

Ikonsiderar ang pagdapit sa mga estudyante sa pagsulat sa ilang mga tubag sa mosunod nga pangutana ug sa pagkompleto sa mosunod nga mga pamahayag sa ilang kaugalingon ug dayon hangyoa sila sa pagpakigbahin ngadto sa usa ka pares, sa gagmay nga grupo, o sa klase.

Handurawa nga ikaw adunay usa ka higala nga adunay sama nga kabalaka ni Corianton. Gipangutana ka niya kon unsa ka makiangayon nga silotan sa Dios ang mga makasasala.

• Unsa ang imong masulti sa imong higala aron matabangan siya nga makasabot sa kaangayan ug kaluoy sa Dios? (Paglakip og mga bersikulo o mga hugpong sa mga pulong gikan sa Alma 42:9–15.)

Tiwasa ang mosunod nga mga pamahayag:

• Ang kaangayan sa Dios nagpanalangin kanako tungod kay

• Ang kaluoy sa Dios nagpanalangin kanako tungod kay

Ikonsiderar ang pagpakigbahin sa imong pagpamatuod sa kaangayan ug kaluoy sa Dios.

Komentaryo ug Background nga Impormasyon

Sa unsang paagi pa kaha nga ang kaangayan ug kaluoy sa Dios mahimong makapanalangin kanato?

Si Elder D. Todd Christofferson sa Korum sa Napulog Duha ka Apostoles mitudlo:

Kay gitubag ang gipangayo nga kaangayan, si Kristo anaa na sa dapit sa kaangayan; o ingnon nato nga Siya mao ang kaangayan, ingon nga Siya mao ang gugma [tan-awa sa 1 Juan 4:8]. Ingon man, gawas sa pagka- “hingpit nga makiangayon nga Dios,” Siya usa ka hingpit nga maluloy-on nga Dios [Alma 42:15; tan-awa usab sa Mosiah 15:8–9]. Busa, ang Manluluwas mihimo sa tanang butang nga matarong. Walay inhustisya sa mortalidad nga permanente, bisan ang kamatayon, kay Siya mipahiuli sa kinabuhi pag-usab. Walay mga kasakit, kakulangan, pagluib, o pang-abuso nga dili kabayran sa kataposan tungod sa Iyang walay kinutoban nga kaangayan ug kaluoy. (D. Todd Christofferson, “Ang Pagkabanhaw ni Jesukristo,” Liahona, Mayo 2014, 112)

Si Elder Gerrit W. Gong sa Korum sa Napulog Duha ka Apostoles mitudlo:

Uban sa pagpasalamat, makasalig kita sa hingpit nga hustisya ug sa hingpit nga kaluoy sa paghukom sa Dios sa hingpit nga paagi sa atong mga tuyo ug mga lihok. (Gerrit W. Gong, “Salig Pag-usab,” Liahona, Nob. 2021, 99)

Si Elder Richard G. Scott (1928–2015) sa Korum sa Napulog Duha ka Apostoles mipasabot:

Ang gipangayo sa hustisya tungod sa nasupak nga balaod mahatag pinaagi sa kaluoy, nga maangkon sa inyong makanunayon nga paghinulsol ug pagsunod sa mga balaod sa Dios. Ang mao nga paghinulsol ug pagkamasulundon importante kaayo aron ang Pag-ula makahatag og kompleto nga milagro sa inyong kinabuhi. Ang Manunubos makahusay sa inyong indibidwal nga kinabuhi pinaagi sa hustisya ug makahatag og kapasayloan pinaagi sa maluloy-ong dalan sa inyong paghinulsol. Pinaagi sa Pag-ula makapuyo kamo sa kalibotan diin ang hustisya mosiguro nga magpabilin unsay inyong naangkon pinaagi sa pagkamasulundon. Pinaagi sa Iyang kaluoy inyong masulbad ang mga resulta sa nasupak nga mga balaod. (Richard G. Scott, “Ang Pag-ula Makasiguro sa Inyong Kalinaw ug Kalipay,” Liahona, Nob. 2006, 42)

Dugang nga mga Kalihokan sa Pagkat-on

Mga ulohan sa laraw sa Langitnong Amahan

Ang laing paagi sa pagtabang sa mga estudyante nga mas makasabot sa kinaiyahan sa Dios mao ang pagtuon sa mga ulohan sa Iyang laraw. Dapita ang mga estudyante sa pagtan-aw sa Alma 42:5, 8, 11, ug 15 ug sa pag-ila sa upat ka mga paagi nga ginganlan ni Alma ang laraw sa Dios. Ikonsiderar ang pagdapit sa mga estudyante sa pagmarka niini diha sa ilang mga kasulatan. Pangutan-a ang mga estudyante kon unsa ang gitudlo kanato niining nagkalainlaing mga paagi sa pagngalan sa laraw sa Dios mahitungod Kaniya ug sa Iyang laraw. Ikonsiderar ang pagdapit sa mga estudyante sa paghunahuna og mga sitwasyon nga ang pagkahibalo niining nagkalainlaing mga ulohan sa laraw mahimong makatabang sa mga tawo sa pagpadayon sa ilang kinabuhi nga may paglaom.

Asa pa man ang Basahon ni Mormon nagtudlo mahitungod sa kaangayan ug kaluoy sa Dios?

Mahimong makatabang ang paggamit sa mosunod nga mga cross-reference aron sa pagtabang sa mga estudyante nga mas makasabot pa sa kaangayan ug kaluoy sa Dios: 2 Nephi 9:17, 19; Jacob 4:10; Mosiah 5:15; Alma 34:15–16; 41:14.