Human siya gidapit sa iyang amahan sa paghinulsol, adunay pipila ka mga pangutana si Corianton mahitungod sa laraw sa Dios, lakip ang unsay mahitabo kanato human kita mamatay. Ang iyang amahan, si Alma, mitubag sa iyang mga pangutana ug mipamatuod sa mahinungdanon nga tahas ni Jesukristo sa laraw sa Langitnong Amahan. Kini nga leksiyon makatabang kanimo sa pagpalawom sa imong pasalamat sa unsay nahimo sa Manluluwas alang kanimo ug makahatag kanimo og kahigayonan sa pagpasabot kon unsay mahitabo human kita mamatay.
Tabangi ang mga estudyante nga makatutok kang Jesukristo. Mahimong sa dili tinuyo ang mga magtutudlo mogahin og dakong panahon sa paghulagway sa mga detalye nga nagpalibot sa mga kamatuoran sa ebanghelyo. Mahimong moresulta kini sa pagkawala sa mga kahigayonan nga matabangan ang mga tigkat-on nga mas hingpit nga makaila ug mahigugma sa Manluluwas. Paggahin og panahon sa pagtudlo ug pagpamatuod sa gahom, gugma, ug kaluoy ni Jesukristo ug sa Iyang mahinungdanon nga tahas sa plano sa Langitnong Amahan sa kaluwasan.
Pagpangandam sa estudyante: Dapita ang mga estudyante sa pagpamalandong sa ilang mga pangutana mahitungod sa unsay mahitabo human kita mamatay ug sa pagtambong nga andam sa pagpakigbahin.
Mga Posibleng Kalihokan sa Pagkat-on
Mga Pangutana
Ang mosunod nga istorya gikan sa kinabuhi ni Sister Aburto makatabang sa mga estudyante nga maandam sa pagtuon sa Alma 40. Sa laing paagi, mahimong ilista sa mga estudyante diha sa pisara ang pipila sa ilang mga pangutana mahitungod sa kinabuhi human sa kamatayon.
Si Sister Reyna I. Aburto, usa ka magtatambag sa Kinatibuk-ang Kapangulohan sa Relief Society, mipakigbahin og personal nga kasinatian nga naghulagway sa mga pangutana nga tingali aduna kita mahitungod sa unsay mahitabo human kita mamatay. Tan-awa ang bidyo nga “Ang Lubnganan Walay Kadaogan,” anaa sa ChurchofJesusChrist.org, gikan sa time code 4:21 hangtod sa 5:13, o basaha ang mosunod nga pamahayag:
Imahe
Sister Reyna I. Aburto
Sa dihang nuwebe anyos pa ko, ang akong magulang nga lalaki namatay atol sa usa ka grabe nga linog. Tungod kay nahitabo kini nga wala damha, dugay-dugay pa nako nga nasabtan ang reyalidad sa unsay nahitabo. Grabe ang akong gibati nga kasub-anan, ug mangutana ko sa akong kaugalingon, “Unsay nahitabo sa akong igsoon? Asa siya? Diin siya miadto? Makita ba nako siya pag-usab?”
Nianang higayona wala pa ko makahibalo kabahin sa plano sa Dios sa kaluwasan, ug ako adunay tinguha nga makahibalo diin kita gikan, unsa ang katuyoan sa atong kinabuhi, ug unsa ang mahitabo nato human kita mamatay. Dili ba aduna kita niana nga mga pangandoy kon kita mawad-an og minahal sa kinabuhi o kon kita makasinati og mga kalisod sa atong mga kinabuhi? (Reyna I. Aburto, “Ang Lubnganan Walay Kadaogan,” Liahona, Mayo 2021, 86)
Ang anak ni Alma nga si Corianton aduna usab mga kabalaka mahitungod sa kinabuhi human sa kamatayon.
Basaha ang Alma 40:1, mangita sa unsay gikabalak-an ni Corianton.
Ngano sa imong hunahuna nga tingali nabalaka siya bahin niini?
Hinumdomi nga si Corianton nakalapas sa mga sugo sa Dios, lakip ang balaod sa kaputli. Tungod sa iyang mga pagpili, tingali nabalaka siya sa iyang kahimtang human niining kinabuhia. Aron matubag ang mga kabalaka ni Corianton ug matabangan siya sa paghinulsol, gitudloan siya ni Alma og doktrina. Ang tubag ni Alma sa mga kabalaka ni Corianton makatabang usab sa usa ka tawo nga adunay mga pangutana sama ni Sister Aburto.
Si Sister Aburto sa wala madugay gitudloan sa mga misyonaryo kinsa mitabang kaniya sa pagpangita og mga tubag sa iyang mga pangutana. Handurawa nga usa ka niadtong mga misiyonaryo ug nangandam sa pagtudlo kaniya. Gamita ang mosunod nga mga kapanguhaan aron mangandam og mubo nga pagpasabot nga makatabang sa pagtubag sa mga pangutana ni Sister Aburto.
Bahina ang klase ngadto sa mga paresan aron sa pagpangandam sa pagtudlo ingon og sila ang mga misiyonaryo. I-assign ang matag pares sa pagtuon kabahin sa kalibotan sa espiritu o sa pagkabanhaw, ug hatagi ang matag pares sa katugbang nga handout.
Isip alternatibo sa pag-andam nga daw ilang tudloan si Sister Aburto, mahimong mangita ang mga estudyante og mga tubag sa mga pangutana sa mga sakop sa klase.
Ang Kalibotan sa Espiritu
Manwal sa Magtutudlo sa Basahon ni Mormon (2024)—”Alma 40: Ang Kalibotan sa Espiritu ug ang Pagkabanhaw”
Basaha ang Alma 40:6–7, 11–14 aron makita kon unsay gitudlo ni Alma kang Corianton. Dayon gamita ang mosunod nga mga kapanguhaan aron sa pagtabang kanimo sa pag-andam pa gayod sa unsay imong itudlo.
Giya ngadto sa mga Kasulatan, “Paraiso,” scriptures.ChurchofJesusChrist.org
Si Presidente Dallin H. Oaks sa Unang Kapangulohan mitudlo:
Imahe
Presidente Dallin H. Oaks
Kita nasayod gikan sa mga kasulatan nga human mamatay ang atong mga lawas magpadayon kitang magpuyo isip mga espiritu didto sa kalibotan sa espiritu. Ang mga kasulatan nagtudlo usab nga kining kalibotan sa espiritu gibahin tali sa mga “matarong” o “makiangayon” samtang buhi pa ug niadtong mga nagpakadaotan. Naghulagway usab kini giunsa sa ubang matinud-anong mga espiritu pagtudlo sa ebanghelyo ngadto sa mga daotan o masinupakon (tan-awa sa 1 Pedro 3:19; Doktrina ug mga Pakigsaad 138:19–20, 29, 32, 37). (Dallin H. Oaks, “Salig sa Ginoo,” Liahona, Nob. 2019, 26)
Pangandam kon unsaon nimo pagpasabot ang mga tubag sa mosunod nga mga pangutana:
Unsay mahitabo sa atong mga espiritu kon kita mamatay?
Sama sa unsa kaha ngadto sa paraiso? Sama sa unsa ang dapit nga gitawag ni Alma nga “kawanangan sa kangitngit,” apan gitawag usab nga bilanggoan sa espiritu (1 Pedro 3:19) o impyerno (2 Nephi 9:12)?
Sa unsang paagi nga ang pagkat-on mahitungod sa paraiso ug bilanggoan makadugang sa atong pagpasalamat alang sa Manluluwas?
Sa unsang paagi nga ang atong kahibalo kabahin sa kalibotan sa espiritu makapanalangin kanato atol sa atong mortal nga mga kinabuhi?
Kon magtudlo, siguroha nga ipaklaro nga tali sa kamatayon ug pagkabanhaw, ang mga espiritu sa mga matarong nagpuyo sa paraiso ug ang mga espiritu sa mga daotan nagpuyo sa bilanggoan sa espiritu. Ipakigbahin kon sa unsang paagi ang imong pagsabot niini nga kamatuoran makaimpluwensiya sa mga pagpili nga imong gihimo niini nga kinabuhi.
Manwal sa Magtutudlo sa Basahon ni Mormon (2024)—”Alma 40: Ang Kalibotan sa Espiritu ug ang Pagkabanhaw”
Basaha ang Alma 40:2–5, 23–24 aron makita kon unsay gitudlo ni Alma kang Corianton. Dayon gamita ang mosunod nga mga kapanguhaan aron sa pagtabang kanimo sa pag-andam pa gayod sa unsay imong itudlo.
Giya ngadto sa mga Kasulatan, “Pagkabanhaw,” scriptures.ChurchofJesusChrist.org
Si Presidente Dallin H. Oaks sa Unang Kapangulohan mitudlo:
Imahe
Presidente Dallin H. Oaks
Atong gisaulog ang ka tinuod sa Pagkabanhaw niining panahon sa Pasko sa Pagkabanhaw. Kini naghatag nato sa panglantaw ug kalig-on sa paglahutay sa mortal nga mga hagit nga giatubang sa matag usa kanato ug niadtong atong gihigugma, mga butang sama sa pisikal, mental, o emosyonal nga kakulangan nga atong makuha gikan sa pagkatawo o masinati atol sa atong mortal nga kinabuhi. Tungod sa Pagkabanhaw, kita nasayod nga kining mortal nga mga kakulangan temporaryo lamang! (Dallin H. Oaks, “Ang Dako nga Laraw,” Liahona, Mayo 2020, 95)
Pangandam kon unsaon nimo pagpasabot ang mga tubag sa mosunod nga mga pangutana:
Unsa ang pagkabanhaw? Kinsa ang mabanhaw?
Sumala sa Alma 40:2–3, unsay nakapaposible sa Pagkabanhaw?
Sa unsang paagi nga ang atong kahibalo kabahin sa Pagkabanhaw makapanalangin kanato atol sa atong mortal nga mga kinabuhi?
Kon magtudlo, siguroha nga ipaklaro nga tungod kay si Jesukristo nabanhaw, kitang tanan mabanhaw usab. Ipakigbahin ang usa ka rason nga ikaw mapasalamaton sa saad sa pagkabanhaw.
Kon mahuman na ang mga estudyante sa pagpangandam, dapita sila sa pagtudlo ngadto sa usa ka paresan sa mga estudyante kinsa nag-andam og laing hilisgotanan. Ikonsiderar ang paghatag og tabang kon gikinahanglan samtang sila magtudlo.
Human matudlo sa mga estudyante ang ilang mga leksiyon, ikonsiderar ang pagpangulo og mubo nga panaghisgotan sa klase gamit ang pipila o ang tanan sa mosunod nga mga pangutana.
Ngano nga ang unsay imong nakat-onan mahitungod sa kalibotan sa espiritu ug sa pagkabanhaw importante diha kanimo?
Sa unsang paagi kini nga kahibalo makaapekto sa imong mga pagbati ngadto sa Langitnong Amahan ug ni Jesukristo?
Unsa ang pipila ka mga pangutana nga anaa nimo nga natubag karon?
Unsa nga mga pangutana ang gusto nimong ipadayon sa pagpangita og mga tubag?
Pahinumdomi ang mga estudyante nga wala pa nato ang tanang mga tubag ug OK ra nga adunay wala matubag nga mga pangutana. Dapita sila sa pagsunod sa mga baroganan sa pag-angkon og espirituhanong kahibalo samtang mangita sila og mga tubag.
Ikonsiderar ang pagpakigbahin sa imong pagpamatuod sa gasa sa Pagkabanhaw ug sa kalinaw nga atong madawat sa kalibotan sa espiritu tungod sa Pag-ula ni Jesukristo.