Хиламан 3; 6

“Бид ийн үзлээ”

Олон зуун жилийн дараах ирээдүйд амьдарч буй хүмүүст туслахаар захиа бичиж байна гээд төсөөл. Үндсэндээ бошиглогч Мормон яг л үүнийг хийсэн. Тэрээр нифайчуудын түүхийг хураангуйлж, алтан ялтаснууд дээр сийлэх үедээ “бид ийн үзлээ” гэх зэрэг мэдэгдлүүдийг ашиглан, чухал үнэнүүдийг хааяа нэг цохон тэмдэглэж байв. Түүний онцолсон үнэнүүд өнөө үед тулгарч буй сорилт бэрхшээлийг даван туулахад маань бидэнд тусалж чадна. Энэ хичээл судруудаас үнэнүүдийг олж тодорхойлох, тэдгээр үнэн таны амьдралд хэрхэн нөлөөлж болохыг задлан шинжлэхэд тань тусалж чадна.

Суралцагчдадаа түлхүүр үг, хэллэгээс суралцахад нь тусал. Судрууд дээрх тодорхой үг, хэллэг нь уншигчдад агуулгатай холбоотой сэжүүрүүдийг өгч чадна. Суралцагчдад өнөө үед хамааралтай чухал сургаал, зарчмуудыг заасан үгсийг таньж мэдэхэд тусал.

Суралцагчийн бэлтгэл: Суралцагчдыг хувиараа эсвэл гэр бүлээрээ судраас судлах үедээ нэг эсвэл хоёр чухал үнэнийг олж мэдэхэд урь. Судруудаас хэрхэн утга учиртай үнэнийг олж мэдсэнээ тайлбарлахад бэлдэхийг тэднээс хүс.

Боломжит суралцах үйл ажиллагаа

Эсэн мэнд гарах гарын авлага

Суралцагчдад судрууд амьдралд нь хэрхэн хэрэг болдог талаар бодоход туслах үйл ажиллагаагаар хичээлээ эхэл. Энэ нь судруудаас сургаал, зарчмуудыг илүү хичээнгүйлэн хайх тэдний хүсэл эрмэлзэлд туслах болно. Дараах нь үүнийг хийж гүйцэтгэх нэг арга зам юм.

• Хэрэв танаас 12, 13 настнуудад зориулсан сургуулийн эсэн мэнд гарах гарын авлагыг бичихийг хүсвэл та юу юуг багтаах байсан бэ?

Ерөнхийлөгч Рассэлл М.Нэлсон таны амьдралд зориулсан эсэн мэнд гарах гарын авлагын талаар юу хэлснийг уншина уу.

[Мормоны номын] бошиглогчид Их Эзэнээр өдөөгдөн бидний энэ цаг үеийг харсан ба бидэнд хамгийн их ач тустай гэсэн сургаал, үнэнүүдийг сонгожээ. Мормоны Ном бол хожмын өдрүүдэд зориулсан бидний эсэн мэнд гарах гарын авлага юм. (Рассэлл М.Нэлсон, “Ирээдүйгээ итгэлээр хүлээн ав,” 79)

• Судруудаас олж мэдсэн сургаал, үнэнүүд нь таныг сүнслэг байдлын хувьд эсэн мэнд гарахад хэрхэн тусалдаг вэ? Үүнтэй холбоотой саяхны жишээ танд байна уу?

Та Хиламан 3, Хиламан 6-г судалж байхдаа судрууд дахь сургаал, зарчмуудыг олж тодорхойлох дадлага хийх боломжтой болно. Энэ нь судраас илүү утга учиртай суралцахад мөн таныг, таны гэр бүлийг Христэд ойртуулахад тусалж чадна.

“Бид ийн үзлээ …”

Хиламан 1–6-д цэдэглэгдсэн бүх зөрчилдөөний дунд хэсэг зуур амар амгалан ноёрхжээ. Хиламан 3 дээр олон мянган хүн Сүмд баптисм хүртэж, Сүм өсөж хөгжсөн. Хиламан 6 дээр олон лемен хүнийг хөрвөгдсөний дараа нифайчууд, леменчүүд бүгд нэгдэн, Их Эзэн рүү эргэж, амьдарч байв. Эдгээр хоёр бүлэг дээр Мормон чухал сургаал, үнэний зарчмуудыг онцлон харуулахын тулд нифайчуудын түүхийг өгүүлэхээ түр зогсоов. Тэрээр “бид ийн үзлээ” гэсэн мэдэгдлийг ашиглан, үүнийг хийсэн билээ.

Дараах үйл ажиллагаа нь суралцагчдыг сургаал, зарчмыг олж тодорхойлоход туслах үг юм уу хэллэгийг олж мэдэхэд мөн тэдгээр үнэн нь тэдний амьдралд хэрхэн нөлөөлөхийг харахад сургах зорилготой.

Суралцагчдыг хоёр хоёроор нь эсвэл жижиг бүлгүүдэд хуваарилж, тэдэнд дагаж мөрдөх зааварчилгааг харуул.

“Бид ийн үзлээ” гэсэн үнэний мэдэгдлийг олж тодорхойлохоор Хиламан 3:27–30; 6:34–36-г унш. Судар дээрээ тэдгээр үнэнийг тэмдэглэж, мөн өөрийн үгээр судлах тэмдэглэлдээ бичиж болно.

Хэдийгээр суралцагчид өөр өөр үг хэрэглэж болох ч дараахтай ижил төстэй зарчмуудыг тодорхойлж болох юм. Тухайлбал:

Зүрх сэтгэлийнхээ гүнээс Өөрийг нь дуудах бүгдэд Их Эзэн нигүүлсэнгүй байдаг (Хиламан 3:27-г үзнэ үү).

Есүс Христэд итгэдэг хэн бүгдэд тэнгэрийн хаалга нээлттэй (Хиламан 3:28-ыг үзнэ үү).

Бурханы үгийг судлахыг хүсэх хэнд ч боломжтой бөгөөд энэ нь тэднийг Бурханы хаант улс руу хүргэх болно (Хиламан 3:29–30-ийг үзнэ үү).

Бид Бурханаа илүү сайн мэдэх тусам Түүний зарлигуудыг илүү сахина (Хиламан 6:34 -ийг үзнэ үү).

Хэрэв бид зүрх сэтгэлээ ёс бус болгох хийгээд хатууруулбал Их Эзэний Сүнс биднээс холдоно (Хиламан 6:35-ыг үзнэ үү).

Хэрэв бид Их Эзэний үгэнд өөрсдийн хүслээр итгэвэл Тэрээр бидэн дээр Өөрийн Сүнсийг юүлэх болно (Хиламан 6:36-г үзнэ үү).

Хэрэв суралцагчдад эдгээр зарчмаас нэгийг эсвэл олныг илүү гүнзгий судлах нь тустай бол Сайн мэдээний номын сангийн аппликэйшн эсвэл онлайн сайн мэдээний номын сангаас олж болох санаануудыг харахын тулд “Тайлбар ба нөхцөл байдлын талаарх мэдээлэл” ба “Нэмэлт суралцах үйл ажиллагаа” хэсгийг үзнэ үү.

Өөр нэг сонголт бол үнэнүүдийг тодорхойлох дадлага хийхэд илүү их цагийг суралцагчдад олгох юм. Тэднээс төгс эзэмших сургаалын шүлгээс өөр нэг “бид ийн үзлээ” гэсэн мэдэгдэл, тэдний саяхан гэртээ судалсан зүйлээ эсвэл тэдний сонгосон өөр нэг дуртай шүлгээ бичихийг хүс.

Олсон үнэнүүдээсээ нэгийг нь сонгож, тухайн үнэнээр дамжуулан даван гарах сүнслэг аюул, сорилт, итгэлд нөлөөлөх дайралтуудыг жагсаан бич Жишээлбэл: Та хэрэв бид Их Эзэний үгэнд өөрсдийн хүслээр итгэвэл Тэрээр бидэн дээр Өөрийн Сүнсийг юүлэх болно (Хиламан 6:36-г үзнэ үү) гэсэн үнэнийг ашиглаж байгаа бол та сударт итгэхээсээ өмнө шинжлэх ухааны нотолгоо хэрэгтэй болох, бошиглогчдод итгэхээс илүү дэлхийн мэргэжилтнүүдэд итгэх эсвэл сүнслэг сэтгэгдэлд итгэхээс илүү логикт итгэх зэрэг аюулуудыг жагсаан бичиж болно.

Хичээлийн эхэнд Мормоны Ном бол хожмын өдрүүдэд бидний эсэн мэнд гарах гарын авлага болох тухай ерөнхийлөгч Нэлсоны хэлсэн мэдэгдлийг эргэн сана.

Боломжтой бол нэг хуудас “эсэн мэнд гарах гарын авлага” хийхийн тулд суралцагчдад тосон харандаа, өнгийн харандаа, маркер зэргийг өг. Тэд дараахыг ганцаарчлан эсвэл бүлгээрээ хийж болно.

Цаасан дээр “… үед хэрхэн эсэн мэнд гарах вэ?” гэж бичээд, өөрийн жагсааж бичсэн аюул, сорилт, халдлагаас нэгийг нөхөж бичин, мэдэгдлийг гүйцээ. Жишээлбэл: Хэрэв та өмнө тодорхойлсон үнэнийг ашиглаж байгаа бол “Сүнслэг сэтгэгдэл рүү дайрах үед хэрхэн эсэн мэнд гарах вэ?” гэж бичиж болно.п Нэг хуудас эсэн мэнд гарах гарын авлага хийхдээ сонгосон нэг үнэнээ ашигла. Энэ үнэн нь өсвөр насныханд сүнслэг байдлын хувьд эсэн мэнд гарахад хэрхэн тусалж чадахыг зургаар эсвэл үгээр тайлбарла. Дараах санаануудын дор хаяж хоёрыг нь эсэн мэнд гарах гарын авлагадаа оруул.

• Энэ үнэн нь таны жагсааж бичсэн бэрхшээлээс хэн нэгнийг сүнслэгээр эсэн мэнд гарахад яаж тусалж чадах вэ?

• Энэ үнэнтэй холбогдох эсвэл таны жагсааж бичсэн бэрхшээлд туслах бусад судар

• Энэ үнэн нь таныг болон бусдыг Есүс Христэд авчрахад эсвэл Түүний хүчийг хүлээн авахад хэрхэн туслах вэ?

• Хэрэв энэ үнэн мэдэгдээгүй эсвэл дагаж мөрддөггүй бол хүмүүст юу тохиолдох вэ?

• Хэрэв хүн бүр энэ үнэнийг дагаж амьдрахыг сонгосон бол дэлхий хэр өөр байх байсан бэ?

Суралцагчдыг өөрийн эсэн мэнд гарах гарын авлагыг бусад бүлэгт эсвэл нийт ангийнхандаа хуваалцахад урь. Ингэхдээ тэднийг онцолсон үнэнтэйгээ холбоотой хувийн туршлагаасаа хуваалцахад урь. Жишээлбэл: Суралцагч хэрэв бид Их Эзэний үгэнд өөрсдийн хүслээр итгэвэл Тэрээр бидэн дээр Өөрийн Сүнсийг юүлэх болно (Хиламан 6:36-г үзнэ үү) гэсэн үнэнийг ашиглаж байгаа бол та тэднээс Мормоны Ном дахь Түүний үгийг судалж, хэрэгжүүлж байхдаа Түүний Сүнсийг хэрхэн мэдэрсэн талаар асууж болно.

Суралцагчдыг судар судалж байхдаа чухал сургаал ба үнэнийг олж хайхад урамшуулан дэмж. Бурханы үгний хүчийг гэрчил.

Эсэн мэнд гарах гарын авлагаа байршуул.

Тайлбар ба нөхцөл байдлын талаарх мэдээлэл

Хиламан 3:27–28. Би маш олон зүйлтэй тэмцдэг. Тэнгэрийн хаалга үнэхээр надад нээлттэй болов уу?

Далын ахлагч Ж.Дэвн Корниш ийн заасан.

Манай гишүүд ихэвчлэн “Би хангалттай сайн хүн мөн үү?” эсвэл “Би үнэхээр селестиел хаант улсад орж чадах уу?” гэж асуудаг. Мэдээж, “хангалттай сайн байна” гэж байдаггүй. Бидний хэн ч авралаа “олж авч” эсвэл “хүртэж” хэзээ ч чадахгүй. Гэхдээ миний ойлгож байгаагаар бид Их Эзэний өмнө хүлээн авагдах эсэхэд гайхах нь хэвийн үзэгдэл юм. …

… Тэнгэрийн Бурхан бол биднийг тоглоомоос хасахын тулд ямар нэгэн шалтаг хайж буй зүрх сэтгэлгүй шүүгч биш юм. Тэр бол бүх хүүхэд нь гэртээ эргэн ирж, гэр бүлийнхэнтэйгээ Өөртэй нь хамт үүрд амьдраасай хэмээн юу юунаас илүү хүсэж тэмүүлдэг, төгс хайраар дүүрэн бидний Эцэг билээ. Тэрээр үнэхээр биднийг мөхөөхгүй, харин мөнх амьтай болгохын төлөө Төрсөн Ганц Хүүгээ өгсөн! [Иохан 3:16-г үзнэ үү]. Энэхүү мөнхийн үнэнд итгэж, эндээс итгэл найдвар, тайтгарлыг авна уу. Тэнгэрлэг Эцэг маань биднийг Өөр лүү нь буцаж ирнэ гэж хүлээдэг юм шүү! Энэ бол Түүний ажил бөгөөд алдар суу бөлгөө [Мосе 1:39-ийг үзнэ үү].

… Есүс Христийн сайн үйл, нигүүлслээр дамжуулан аврагдахгүй л бол бидний хэн маань ч хэзээ ч “хангалттай сайн” болж чадахгүй [2 Нифай 2:6–8-ыг үзнэ үү]. Гэхдээ Бурхан бидний сонгох эрхийг хүндэтгэдэг болохоор бид хичээл оролдлого хийгээгүй үедээ аврагдаж чадахгүй. (Ж.Дэвн Корниш, “Би хангалттай сайн байна уу? Би хаант улсад орж чадах уу?” 19)

Хиламан 6:35–36. Их Эзэний Сүнс холдож эхэлнэ гэдэг нь юу гэсэн утгатай вэ?

Арван хоёр төлөөлөгчийн чуулгын ахлагч Дэвид A.Бэднар бидний сонголт, мөн үйлдлүүд Их Эзэний Сүнсийг холдуулахад хүргэж болно гэдгийг заасан.

Тодорхой хэлэхэд [баптисмын болон ариун ёслолын] адислалууд амлагдсан учир бид Түүний Сүнсийг үргэлж өөрсөдтэйгөө байлгаж болохын тулд Ариун Сүнснээс биднийг холдуулагч сонголт болон нөлөөг анхааралтай сонсож, суралцах ёстой.

Жишиг нь маш тодорхой юм. Хэрэв бодож, харж, сонсож эсвэл хийж байгаа зүйл маань биднийг Ариун Сүнснээс холдуулж байгаа бол бид тэдгээрийг бодох, харах, сонсохоо эсвэл үйлдэхээ зогсоох ёстой. Хэрэв тэр нь зугаацуулах зориулалттай бол жишээлбэл, биднийг Ариун Сүнснээс хөндийрүүлэхээр бол тийм төрлийн зугаа цэнгээний зүйлс бидэнд зориулагдаагүй нь тодорхой. Сүнс бүдүүлэг, балмад эсвэл эрээ цээргүй зүйлийг тэвчиж чадахгүй учраас ийм зүйлс бидэнд зориулагдаагүй нь ойлгомжтой. Бид тохирохгүй гэж мэдэж байгаа үйл ажиллагаанд оролцох нь биднээс Их Эзэний Сүнсийг холдуулдаг учраас иймэрхүү зүйл ямар ч эргэлзээгүйгээр бидэнд тохирох зүйл биш юм. (David A. Bednar, “That We May Always Have His Spirit to Be with Us,” Liahona, May 2006, 30)

Нэмэлт суралцах үйл ажиллагаа

Хиламан 3:27–28. “… бүгдэд Их Эзэн нигүүлсэнгүй байдаг”

“Түүний ариун нэрийг дууддаг” эсвэл “Есүс Христийн нэрд итгэдэг” (Хиламан 3:27–28) хүн бүрийг хүлээн авахдаа өгдөг Их Эзэний өршөөл нигүүлслийг онцлон тэмдэглэ.

Суралцагчид Хиламан 3:24–26-г уншаад, Сүм гэмшигчдийг хэрхэн хүлээн авсныг мөн тэдний Бурханаас авсан адислалыг олж мэдэж болно. Бурхан яагаад бүх хүнийг Өөрийн Сүмийн нэг хэсэг болгохыг хүсдэгийг мөн бид бусдыг эелдэгээр угтан авч, тэдэнд хайрлагдсан мэдрэмж төрүүлэхэд хэрхэн тусалж чадах талаар ярилц.

Хиламан 3:28. Есүс Христэд итгэдэг хэн бүгдэд тэнгэрийн хаалга нээлттэй

Суралцагчдыг Хиламан 3:28-ыг 2 Нифай 31:17–20-той холбогдох эшлэл болгоход урь. Бид баптисм, гишүүний баталгааны ёслолоор дамжуулан тэнгэрийн хаалгыг хэрхэн нээдэг талаар ярилц. Та мөн “мөнхийн амьдралд хүргэдэг зам” (2 Нифай 31:18)-ын талаар болон үүнийг хэрхэн Есүс Христэд итгэх итгэлээр дагаж болох талаар ярилц. Суралцагчид эдгээр шүлгийн гол тэмдгийг зурж, юу илэрхийлж байгааг нь тайлбарлаж болно.

Хиламан 6:34. Бид Бурханаа илүү сайн мэдэх тусам Түүний зарлигуудыг илүү сахина

Суралцагчдыг мөн Хиламан 6:34-ийг Мозая 5:13; Иохан 14:15 эсвэл Иохан 15:13–15-тай холбогдох эшлэл болгоход урь. Леменчүүдийн жишээнээс болон эдгээр судрын хэсгээс бид юу сурч мэдэж болох талаар ярилц.

Хиламан 6:35–36. “Их Эзэний Сүнс холдож эхэлсэн”

Дараах диаграммыг самбар дээр зур.

Суралцагчид Хиламан 6:34–36-г уншаад, Ариун Сүнсний нөлөөг нэмэгдүүлэхэд эсвэл бууруулахад хүргэж болох үйлдлийг эсвэл хандлагыг олж мэд. Тэдгээр үйлдэл эсвэл хандлага нь биднийг Бурхантай ямар арга замаар холбож байгаагаас хамааран тэд эдгээр санааг диаграммын дээр эсвэл доор бичиж болно.

“Тайлбар ба нөхцөл байдлын талаарх мэдээлэл” хэсэг дэх Ахлагч Дэвид А.Бэднарын мэдэгдэл-ийг ашигла.

Самбарын дээд талын хэсэгт бичсэн үйлдлүүд нь хэрхэн Ариун Сүнсний нөлөөнд илүү их мэдрэмжтэй болоход нь тусалсныг сайн дураараа хуваалцахад урь. Хиламан 6:1–3, 34–36 дахь зөв шударга нифайчууд, леменчүүдийн жишээнээс бид өөр юу сурч мэдэж болох талаар ярилц.