“Hilamani 7–10: Ko e Palōfita ʻa e ʻEikí,” Tohi ʻa Molomoná – Tohi Lēsoni ʻa e Faiakó (2024)
“Hilamani 7–10,” Tohi ʻa Molomoná – Tohi Lēsoni ʻa e Faiakó
Hilamani 7–10
Ko e Palōfita ʻa e ʻEikí
ʻI ha māmani ʻoku fonu ʻi he ngaahi leʻo fepakipakí, ko e fē te tau lava ʻo tafoki ki ai ki ha fakahinohino mo ha moʻoní? Ko e founga ʻe taha ʻoku feinga ai ʻa e ʻEikí ke tataki mo tokoniʻi kitautolu ʻi he moʻui fakamatelié ko hono uiuiʻi ha palōfita. ʻE lava ke tokoni ʻa e lēsoni ko ʻení ke mahino kiate koe ʻa e fatongia mahuʻinga ʻo e kau palōfitá ʻi he palani ʻa e Tamai Hēvaní.
ʻOfa ʻi he niʻihi ʻokú ke akoʻí. Feinga ke fakahaaʻi ʻa e ʻofá ki hoʻo kau akó. Fakahaaʻi ʻokú ke mahuʻingaʻia moʻoni ʻi heʻenau moʻuí, fakafanongo lelei ki heʻenau ngaahi fehuʻí mo e fakamatalá, fakakau kinautolu ʻi he lēsoní, pea talitali lelei kinautolu ʻi he ʻofa ʻi hoʻo sio kiate kinautolú. Fakahaaʻi hoʻo loto-falala ʻe lava ke ako mo moʻui ʻaki ʻe hoʻo kau akó ʻa e ongoongolelei ʻo Sīsū Kalaisí.
Teuteu ʻa e tokotaha akó: Fakaafeʻi a e kau akó ke nau aleaʻi mo ha kaungāmeʻa pe mēmipa ʻo e fāmilí ʻa e founga kuo liliu ai ʻe he kau palōfita moʻuí ʻenau moʻuí.
Ngaahi ʻEkitivitī Ako ʻOku Ala Fakahokó
Ko e hā ‘oku ui ai ‘e he ‘Otuá ha kau palōfitá?
Ke kamata ʻa e kalasí, fakakaukau ke fakaafeʻi ʻa e kau akó ke akoako ʻenau tali ki he tūkunga ko ʻení. Te ke lava ʻo hoko ko e kaungāmeʻa ʻoku ʻikai ko ha mēmipá. Fakangofua ha kau ako ke vahevahe ʻa e founga te nau ala tali aí. Fakapapauʻi ʻoku ʻiloʻi ʻe he kau akó ʻe toe aleaʻi ʻa e tūkunga ko ʻení ʻi he fakaʻosinga ʻo e kalasí.
Fakakaukauloto ʻoku ʻohovale ha taha ho ngaahi kaungāmeʻa ʻoku ʻikai ko ha mēmipa ʻo e Siasí ke ʻilo ʻokú ke tui ʻoku ui ʻe he ʻEikí ha kau palōfita ʻi hotau kuongá. ʻOku fifili ho kaungāmeʻá pe ko e hā ʻoku fiemaʻu ai ha kau palōfita ʻi hotau kuongá.
-
Ko e hā ha ngaahi founga ʻe niʻihi ʻe lava ke ke fakahoko ai ha tali ki ho kaungāmeʻá?
Fakakaukau ki hoʻo ngaahi ongo fekauʻaki mo e kau palōfita ʻa e ʻEikí pea mo hoʻo loto-fiemālie ke fakafanongo mo muimui kiate kinautolú. ʻI hoʻo ako ʻi he ʻaho ní, te ke maʻu ha ngaahi faingamālie ke ʻiloʻi ha ngaahi moʻoni mahuʻinga fekauʻaki mo e kau palōfitá.
Hiki ʻi ha peesi ʻoku ʻatā ʻi hoʻo tohinoa akó, ʻa e ʻuluʻi fakamatala ko ʻení: Ngaahi moʻoni fekauʻaki mo e Kau Palōfita ʻa e ʻEikí. ʻI he lēsoní kotoa, hiki ʻa e ngaahi moʻoni ʻokú ke ako fekauʻaki mo e kau palōfitá ʻi lalo ʻi he ʻuluʻi fakamatala ko ʻení.
Te ke lava foki ʻo hiki ʻa e ʻuluʻi fakamatala ko ʻení ʻi he palakipoé pea tānaki ki ai mo e ngaahi fakakaukau ʻa e kau akó ʻi he kotoa ʻo e lēsoní.
ʻE nofotaha ha konga lahi ʻo e ngaahi meʻa te ke ako ki ai ʻi he uiké ni (Hilamani 7–12) pea mo e uike ka hokó (Hilamani 13–16) ʻi he kau palōfitá. Fakakaukau ke fakahinohinoʻi ʻa e kau akó ke fakaʻatā ha feituʻu feʻunga ʻi heʻenau tohinoa akó ke nau lava ʻo tānaki atu ki heʻenau lisí ʻi he uike ʻe ua ka hokó.
Ko e palōfita ko Nīfaí
Te ke ako ʻi he ʻahó ni fekauʻaki mo Nīfai, ko e foha ʻo Hilamaní. Naʻe foki ʻa Nīfai ki hono ʻapi ʻi Seilahemalá, hili hono fakafisingaʻi ia ʻe he kau Nīfaí ʻi he fonua fakatokelaú. Naʻe faiangahala ʻaupito ʻa e kakai ʻi aí. ʻI he tengihia ʻe Nīfai ʻenau faiangahalá, naʻá ne ʻalu ki he taua ʻi heʻene ngoué ʻo tangi ki he ʻOtuá (vakai, Hilamani 7:1–11).
Lau ʻa e Hilamani 7:12–22, ʻo kumi ʻa e meʻa naʻe lea ʻaki ʻe Nīfai hili ʻene ʻiloʻi kuo fakatahataha mai ʻa e kakaí ke fanongo ki heʻene ngaahi tangí.
-
Ko e hā ha foʻi moʻoni te ke lava ʻo ʻilo fekauʻaki mo e kau palōfita ʻa e ʻEikí ʻo makatuʻunga ʻi he meʻa naʻe lea ʻaki ʻe Nīfai ʻi he ngaahi veesi ko ʻení?
Ko e moʻoni ʻe taha mahalo kuó ke ʻiloʻí ʻoku fakaafeʻi ʻe he kau palōfita ʻa e ʻOtuá ʻa e kakaí ke nau fakatomala. Hiki ʻa e foʻi moʻoni ko ʻení ki he lisi ʻi hoʻo tohinoa akó.
-
Ko e hā ʻokú ne akoʻi atu fekauʻaki mo e ʻOtuá te Ne ui ha kau palōfita ke kalanga ʻaki ʻa e fakatomalá?
Naʻe ʻita ha kakai tokolahi ʻi he pōpoaki ʻa Nīfaí. Ke tokoni ke mahino ki he kakaí naʻá ne lea ʻaki ʻa e moʻoní, naʻe fakahā ange ʻe Nīfai ʻi ha founga fakaofo ʻa e ngaahi meʻa naʻe hoko lolotonga ʻene malanga kiate kinautolú.
Fakakaukau ke fakaafeʻi ha tokotaha ako ke ne lau ʻa e fakamatala fakanounou ko ʻeni ʻo e Hilamani 8:25–28; 9:1–36. ʻE lava foki ke fakaafeʻi ha tokotaha ako ke ne lau ʻa e ngaahi veesi ko ʻení kimuʻa pea kamata ʻa e kalasí pea teuteu ke fakamatalaʻi fakanounou ʻa e talanoa ko ʻení ʻi he lea pē ʻaʻana. Pe ko hoʻo vahevahe ʻa e foʻi vitiō “Ko Hono Fakapoongi ʻo e Tuʻi Fakamaau Lahí” mei he taimi 1:25 ki he 4:01, maʻu ʻi he ChurchofJesusChrist.org.
Naʻe ʻuluaki fakahā ʻe Nīfai ki he kakaí kuo fakapoongi honau tuʻi fakamaau lahi ko Sisolamí (vakai, Hilamani 8:27–28). Naʻe ongoʻi ʻe he kakaí “kuo pau ne alea ʻa e Nīfaí ni mo ha taha ke ne tāmateʻi ʻa e fakamāú” (Hilamani 9:16). Naʻe talaange leva ʻe Nīfai ki he kakaí ke nau kumi ʻa Seianitumi, ko e tokoua ʻo Sisolamí, pea ʻeke kiate ia ha ngaahi fehuʻi pau. Naʻe fakahā ʻe Nīfai ki he kakaí ʻa e meʻa tonu pē ʻe tali ʻaki ʻe Seianitumí (vakai, Hilamani 9:26–36). Naʻe iku ʻeni ke vetehia ai ʻa Seianitumi ko ia ʻa e tokotaha fakapoó pea naʻe taʻehalaia ʻa Nīfai (vakai, Hilamani 9:37).
Lau ʻa e Hilamani 9:37–41, ʻo kumi ʻa e meʻa naʻe fai ʻe he kakaí hili ʻenau mamata tonu ʻi he ngaahi meʻa ko ʻeni naʻe hokó.
-
Ko e hā ha foʻi moʻoni ʻokú ke ako mei he aʻusia ʻa Nīfaí te ke lava ʻo tānaki ki hoʻo lisí?
Ko e moʻoni ʻe taha mahalo kuó ke ʻiloʻí ʻe fakahoko ʻa e ngaahi lea ʻa e kau palōfitá.
-
ʻOkú ke pehē ko e hā ʻoku mahuʻinga ai ke ʻiloʻi ʻa e foʻi moʻoni ko ʻení fekauʻaki mo e kau palōfitá?
-
Ko e hā ha ngaahi sīpinga kehe ʻoku fakahoko ai e lea ʻa e kau palōfitá?
Fakakaukau ke vahevahe ha sīpinga fakataautaha ʻokú ne fakatātaaʻi ʻa e founga kuo fakahoko ai ʻa e ngaahi lea ʻa e kau palōfitá ʻi hoʻo moʻuí. Hangē ko ʻení, mahalo naʻá ke maʻu ha tāpuaki naʻe talaʻofa mai ʻi he muimui ki he faleʻi ʻa ha palōfita.
Ngaahi moʻoni lahi ange fekauʻaki mo e kau palōfitá
Makehe mei he ngaahi moʻoni kuo ʻosi ʻiló, ʻoku fakahaaʻi ʻe Nīfai mo ʻene fengāueʻaki mo e kakaí ha ngaahi moʻoni lahi ange fekauʻaki mo e fatongia mo e taumuʻa ʻo e palōfita ʻa e ʻEikí. Hokohoko atu hono akoako ʻa e taukei ʻo hono ʻiloʻi ʻa e ngaahi moʻoní ʻi hoʻo ako ʻa e ngaahi potufolofola ko ʻení. Tānaki ʻa e ngaahi meʻa naʻá ke maʻú ki hoʻo lisí.
Fakakaukau ke fakaʻaliʻali ʻa e ngaahi potufolofola ko ʻení pea vahe ʻa e kau akó ke nau ako tauhoa ʻa e potufolofola takitaha pe ʻi ha fanga kiʻi kulupu iiki. ʻE lava foki ke vahe ki he kau akó ha ngaahi potufolofola kehekehe ke nau ako pea feakoʻiʻaki.
-
Hilamani 7:29: Ko e lea ʻa Nīfai ki he kakai naʻa nau fakataha mai hili ʻenau fanongo ki heʻene lotú
-
Hilamani 8:1–4: Ko e tali ʻa e kau fakamāú ki he ngaahi lea ʻa Nīfaí
-
Hilamani 8:22–23: Ko e tali ʻa Nīfai ki he kakai naʻa nau lauʻikoviʻi ia mo ʻene ngaahi leá
-
Hilamani 10:5–7: Ko e fefolofolai ʻa e ʻEikí mo Nīfai hili ʻene akoʻi ʻa e kakaí
-
Ko e hā ha ngaahi moʻoni fekauʻaki mo e kau palōfitá naʻá ke maʻu ʻi he ngaahi veesi ko ʻení?
Tānaki ʻa e tali ʻa e kau akó ki he lisi ʻi he palakipoé. Mahalo naʻa nau ʻiloʻi ha ngaahi moʻoni hangē ko ʻení.
-
Ko e pōpoaki ʻa ha palōfita ʻoku ʻikai ʻaʻana ia. ʻOku haʻu ia mei he ʻEikí. (Hilamani 7:29)
-
ʻOku ʻikai manakoa ʻa e kau palōfitá ʻe he kau faiangahalá. (Hilamani 8:1–4)
-
ʻOku fakamoʻoni ʻa e kau palōfitá kia Sīsū Kalaisi. (Hilamani 8:22–23)
-
ʻOku foaki ʻe he ʻEikí ki Heʻene palōfitá ʻa e mālohi ke faisilá. (Hilamani 10:5–7)
ʻE maʻu ʻe he kau akó ha ngaahi faingamālie ke ako lahi ange fekauʻaki mo e ngaahi moʻoni takitaha ko ʻení ʻi he ngaahi lēsoni hoko maí. ʻE fakaloloto ange ʻa e ako ki he ongo ʻuluaki foʻi moʻoni ʻoku hiki atú ʻi he Hilamani 13–16. ʻE fakaloloto ange ʻa e ako ki he moʻoni fika tolu mo e faá ʻi he ngaahi lēsoni ʻamui ange ʻi he uike ní.
Ko e mahuʻinga ʻo e kau palōfita moʻuí
Fakaʻaliʻali ʻa e ngaahi fakahinohino ko ʻení, pea ʻoange ha taimi feʻunga ki he kau akó ke faʻu ha tali ki he tūkungá mei he kamataʻanga ʻo e lēsoní.
Ke tokoni ki hono teuteuʻi e kau akó ke faʻu ʻenau ngaahi talí, ʻe ala tokoni ke kole ki he kau akó ke talaatu ha niʻihi ʻo e ngaahi faingataʻa angamaheni ʻoku fehangahangai mo e toʻu tupú ʻi he ʻaho ní. ʻE lava ke hiki ʻenau ngaahi talí ʻi he palakipoé ʻi he tafaʻaki ʻo e ngaahi moʻoni kuo nau ʻilo fekauʻaki mo e kau palōfitá. ʻE lava leva ke vahevahe ʻe he kau akó ʻa e founga ʻe lava ke tokoni ai ha niʻihi ʻo e ngaahi moʻoni naʻa nau ʻiloʻi ʻi he ʻaho ní ki he ngaahi faingataʻa naʻa nau fakakaukau ki aí.
Fakakaukau ki he tūkunga mei he konga kimuʻa ʻo e lēsoní fekauʻaki mo ho kaungāmeʻa naʻá ne fifili pe ko e hā ʻoku fiemaʻu ai ha kau palōfita ʻi hotau kuongá.
Hiki ha tali ki ho kaungāmeʻá ʻokú ne fakamatalaʻi ʻa e ʻuhinga ʻoku mahuʻinga ai ke ui ʻe he ʻEikí ha kau palōfita ʻi hotau kuongá. ʻOku totonu ke ʻoua naʻa toe siʻi hifo he palakalafi ʻe tahá ʻa hoʻo talí.
ʻE lava ke tokoni atu ʻa e ongo fehuʻi ko ʻení ki hoʻo talí:
-
ʻE tokoniʻi fēfē nai kitautolu ʻe ha taha ʻo e ngaahi moʻoni naʻá ke ʻiló pe ngaahi moʻoni lahi ange ʻi he ngaahi faingataʻa ʻoku tau fehangahangai mo iá?
-
Ko e hā ha ngaahi aʻusia kuó ne tokoniʻi koe ke ke fakatokangaʻi ʻa e tāpuaki ʻo hono maʻu ha kau palōfita moʻui ʻi he māmaní?
Fakaafeʻi ʻa e kau akó ke vahevahe ʻenau ngaahi talí mo ha hoa. ʻE lava foki ke fakaafeʻi ʻa e niʻihi tatau naʻa nau fakatātaaʻi ʻa e tūkungá ʻi he kamataʻanga ʻo e kalasí ke nau omi ki muʻa ʻi he lokí pea toe tulamaʻi ʻa e tūkungá.
Fakamoʻoni ki he ngaahi moʻoni kuo mou aleaʻí pea poupouʻi ʻa e kau akó ke nau ngāueʻi ha faʻahinga ongo fakalaumālie pē ne nau maʻu lolotonga ʻa e lēsoní.