Vahe 38
Ko Hono Fakapoongi ʻo e Tuʻi Fakamaau Lahí
Naʻe hoko ha kau tangata fai angahalá ko ha kau fakamaau ʻi he kau Nīfaí. Pea naʻa nau tauteaʻi ʻe kinautolu ʻa e kau māʻoniʻoní kae tuku pē ʻa e kau angahalá.
Naʻe loto mamahi lahi ʻa Nīfai koeʻuhí ko ʻene mamata ki he fuʻu angahalá ni ʻi hono kakaí.
Naʻá ne ʻalu ʻi ha ʻaho ʻe taha ki he tuʻaʻā ʻi heʻene ngoueʻangá ke lotu. Naʻe tuʻu ʻene ngoué ʻi he veʻe hala lahi ʻoku fou atu ki he māketi ʻo Seilahemalá.
Naʻe fanongo ʻa e kakai ko ia naʻe fononga hake ʻi he halá ki he lotu ʻa Nīfaí. Pea naʻe kātoa mai ha kakai tokolahi ko e fie ʻilo pē ko e hā ʻoku fuʻu loto mamahi pehē aí.
Ka ʻi he taimi naʻe mamata ai ʻa Nīfai kia kinautolú, naʻa ne fakahā ange ʻoku tuʻunga ʻene loto mamahí koeʻuhí ko ʻenau fai angahalá. Ko ia naʻá ne fakahā ange ai ke nau fakatomala.
Naʻá ne fakatokanga ange kia kinautolu kapau he ʻikai ke nau fakatomala ʻe faʻao ʻa honau ngaahi tofiʻá pea mo honau ngaahi koló, pea ʻe ʻikai ke tokoniʻi kinautolu ʻe he ʻEikí ke tauʻi honau ngaahi filí.
Naʻe fakahā ange ʻe Nīfai ʻoku fai angahala lahi ange ʻa e kau Nīfaí ʻi he kau Leimaná, koeʻuhí he ʻoku nau ʻiloʻi ʻa e ngaahi fekaú ka ʻoku ʻikai te nau tauhi ki ai.
Naʻá ne pehē kapau he ʻikai ke fakatomala ʻa e kau Nīfaí, ʻe fakaʻauha kinautolu.
Naʻe ʻi ai foki ha niʻihi ʻo e kau fakamaau angakoví. Pea naʻa nau fie maʻu ke hanga ʻe he kakaí ʻo puke ʻa Nīfai ʻi heʻene valokiʻi kinautolu ʻi heʻenau ngaahi laó.
Naʻe ʻi ai ha niʻihi ia ʻo e kakaí naʻa nau tui ki he kau fakamaau angakoví. Ka naʻe tui pē ʻa e niʻihi ia kia Nīfai; naʻa nau ʻiloʻi ko ha palōfita ia pea naʻá ne leaʻaki ʻa e moʻoní.
Naʻe fakahā ʻe Nīfai ki he kakaí kuo nau angatuʻu ki he ʻOtuá pea ʻe vavé ni ʻa hono tauteaʻi kinautolu kapau he ʻikai te nau fakatomala.
Naʻe fakahā ange ʻe Nīfai ki he kakaí ke nau ō ʻo kumi ʻa honau tuʻi fakamāú. Pea ʻokú ne tokoto ʻi hono totó, kuo fakapoongi ia ʻe hono tokouá ʻa ē ʻoku feinga ke maʻu ʻa e nofoʻanga fakamāú.
Pea lele ai ha kau tangata ʻe toko nima ʻo kinautolu ki he nofoʻanga ʻo e fakamaauʻangá. Naʻe ʻikai te nau tui ko e palōfita ʻa Nīfai ʻa e ʻOtuá.
ʻI he taimi naʻa nau mamata ai kia Sisolomé, ko e fakamaau lahí, ʻoku tokoto ʻi hono totó, naʻa nau tō ki he kelekelé ʻi he ilifia. Kuo nau ʻiloʻi ʻeni tā ko e palōfita ʻa Nīfai.
Naʻe ʻosi ʻiloʻi ʻe he kau tamaioʻeiki ia ʻa Seisolamí ʻa e fakapoó pea nau lele ke fakahā ia ki he kakaí. Pea ʻi heʻenau foki maí, naʻa nau ʻilo ʻa e kau tangata ʻe toko nimá ʻoku nau tokoto ai.
Naʻe pehē ʻe he kakaí ia ko e kau tangata ʻe toko nimá ni naʻa nau fakapoongi ʻa Seisolamí.
Naʻa nau puke kinautolu ʻo lī ki he fale fakapōpula, pea fanongonongo holo ʻi he koló kuo fakapoongi ʻa e fakamāú, pea ʻoku ʻi he fale fakapōpulá ʻa e kau fakapoó.
ʻI he ʻaho hono hokó naʻe tefua atu ʻa e kakaí ki he feituʻu naʻe teu ke telio ai ʻa e tuʻi fakamaau lahí. Pea ʻeke ange leva ʻe he kau fakamaau ko ia naʻe ʻi he ngoueʻanga ʻa Nīfaí pe ko e fē ʻa e kau tangata ʻe toko nimá.
Naʻe kole ʻa e kau fakamāú ke nau mamata ki he kau fakapoó.
Naʻe ʻiloʻi ʻe he kau fakamāú ko e toko nima ia ne nau lele ki he nofoʻanga ʻo e tuʻi fakamāú mei he ngoueʻanga ʻa Nīfaí.
Pea ʻi he taimi naʻe fakahā ange ai ʻe he kau tangata ʻe toko nimá naʻe hoko ʻo hangē tofu pē ko hono fakahā mai ʻe Nīfaí, naʻe hanga leva ʻe he kau fakamāú ʻo tukuakiʻi ʻa Nīfai ʻo pehē naʻá ne fekau ha taha ke ne fakapoongi ʻa Sisolome.
ʻI he ʻiloʻi ʻe he kau tangata ʻe toko nimá ko ha palōfita ʻa Nīfaí, naʻa nau fakafekiki ai mo e kau fakamāú. Ka naʻe ʻikai fie fanongo ʻa e kau fakamāú ia. Pea nau hanga ʻo ʻai ke haʻi ʻa Nīfai.
Naʻe atu ʻe he kau fakamāú kia Nīfai ha paʻanga mo pehē te nau fakahaofi ʻene moʻuí ʻo kapau te ne pehē ko ia naʻá ne ʻai ke fakapoongi ʻa e tuʻi fakamaau lahí. Ka naʻe ʻikai tali ai ʻe Nīfaí.
Naʻe fakahā ange ʻe Nīfai ki he kau fakamāú ke nau fakatomala mei heʻenau ngaahi angahalá. Peá ne fakahā ange ke nau ō ki he fale ʻo Seianitumí, ko e tokoua ʻo Seisolamí.
Naʻe fakahā ange ʻe Nīfai ke nau toe fehuʻi ange kia Seianitumi pe naʻá na feinga ke fakapoongi ʻa Seianitumi. Pea te ne toe tali “ʻikai” ki heni.
Hili iá naʻe fehuʻi ange ʻe he kau fakamāú kia Seianitumi kapau ko ia naʻá ne fakapoongi hono tokouá. Pea te ne toe tali ange “ikai,” ka te nau maʻu ha toto ʻi he kapa ʻo hono kofu tuʻá.
Naʻe fakahā ange ʻe Nīfai ʻe tetetete mo tea hono matá, pea te ne vete leva ʻa ʻene fakapoongi hono tokouá.
Naʻe ō leva ʻa e kau fakamāú ki he fale ʻo Seianitumí, pea naʻe hoko ʻa e meʻa kotoa pē ʻo hangē ko e meʻa naʻe leaʻaki ʻe Nīfaí. Naʻe tuku ange leva ʻa Nīfai mo e kau tangata ʻe toko nimá.
ʻI he taimi naʻe mavahe ai ʻa e kakaí meia Nīfaí, naʻe ʻi ai ha niʻihi ne nau pehē ko ha palōfita ia, pea pehē ʻe ha niʻihi ko ha ʻOtua ia. Ka naʻá ne foki ki hono falé ʻoku kei loto mamahi pē koeʻuhí ko ʻenau fai angahalá.