Talamuʻakí

Ki he Tokotaha Lau Tohí

ʻOku fakataumuʻa maʻau ʻa hono hiki ʻo e ngaahi talanoa ko ʻeni mei he Tohi ʻa Molomoná. Naʻe toʻo ʻa e ngaahi talanoá mei ha tohi ʻoku toputapu, koeʻuhí ʻoku mei he Tamai Hēvaní ia. ʻI he taimi te ke lau ai ʻa e ngaahi talanoá ni, manatuʻi ʻoku fekauʻaki ia mo ha kakai moʻoni naʻa nau nofo ʻi ʻAmelika ʻi he kuonga muʻá.

Hili haʻo lau ʻa e ngaahi talanoa mei he tohí ni, te ke loto ke ke lau kinautolu mei he Tohi ʻa Molomoná. ʻOku hiki ʻi lalo ʻi he fakatātaá takitaki, ʻa e feituʻu te ke lava ʻo ʻilo ai ʻa e talanoá ʻi he Tohi ʻa Molomoná. ʻE lava ʻo tokoniʻi koe ʻe hoʻo tangataʻeikí, faʻeé, faiakó pe ko hao kaungāmeʻa.

Kapau ʻoku ʻikai mahino kiate koe ha ʻuhinga ʻo ha foʻi lea, kumi ʻi he konga ʻi mui ʻi he tohí ʻi he “Ngaahi Foʻi lea ke ʻIló.” ʻOku toe maʻu foki ai mo ha ngaahi fakamatala ʻo kau ki he kakai mo e ngaahi feituʻu ʻoku fai ki ai ʻa e ngaahi fakamatala ʻi he Tohi ʻa Molomoná.

Ki he Ngaahi Mātuʻá mo e Kau Faiakó

ʻE tokoni atu ʻa e tohí ni ʻi hoʻo akoʻi ʻa e folofolá. Vahevahe hoʻo fakamoʻoni ki he Tohi ʻa Molomoná, peá ke poupouʻi kinautolu ʻokú ke akoʻí ke nau fekumi ke maʻu haʻanau takitaha fakamoʻoni. ʻE hanga ʻe haʻo lau kiate kinautolu ʻa e ngaahi talanoa ʻoku nau manako taha ai ʻi he Tohi ʻa Molomoná ʻo fakatupulaki ʻenau ʻiló.