Vahe 35
Ko e ʻEikitau ko Molonaí mo Peiholani
Naʻe fiefia ʻa e ʻEikitau ko Molonaí ke fanongo kuo toe hamu ʻe Hilamani mo ʻene kau taú ʻa e konga lahi ʻo e ngaahi konga fonua ʻo e kau Nīfaí mei he kau Leimaná.
Ka naʻe fie maʻu ʻe Hilamani mo ʻene kau taú ha tokoni. He naʻe ʻikai tokolahi feʻunga ʻa honau kau tangatá ke maluʻi ʻa e ʻū koló.
Naʻe fai ai ʻe Molonai ha tohi kia Peiholani, ko e tuʻi fakamaau mo e kōvaná. Naʻá ne kole ke toe fakatokolahi mai ʻa e kau sōtiá ke nau tokoni ki he konga tau ʻa Hilamaní.
Naʻe ʻohofi ʻe he kau Leimaná ha kolo ʻo e kau Nīfai ʻa ia naʻe ʻosi maʻu mai ʻe Hilamaní. Naʻa nau fakapoongi ai ha kau Nīfai tokolahi pea kapusi ʻa e toengá mei he koló.
Naʻe toe fai ʻe Molonai ha tohi kia Peiholani, he naʻá ne ʻita ʻi he puleʻanga ʻo e kau Nīfaí koeʻuhí he naʻe teʻeki ke nau ʻomai ha tokoni.
Naʻe tohi ʻe he ʻEikitau ko Molonaí, kuo mole ha moʻui ʻa ha tokolahi koeʻuhí ko e ʻikai fie ʻoange ʻe Peiholani ha kau sōtia ke tokoni ange kia kinautolu.
Kapau naʻe ʻikai ʻoange fakavavevave ʻe Peiholani ha kau tangata mo ha meʻakai, ne mei pehē hano ʻomi ʻe Molonai ʻene kau taú ki Seilahemala ʻo fakamālohiʻi ʻa Peiholani ke tokoni ange kia kinautolu.
Naʻe faifai pea maʻu ʻe Molonai ha tohi meia Peiholani. Naʻá ne pehē ai ʻokú ne loto mamahi koeʻuhí ko e faingataʻaʻia ʻa Molonai mo ʻene kau taú.
Naʻe fakahā ai ʻe Peiholani kia Molonai ʻoku ʻi ai ha kiʻi kulupu ʻo e kau Nīfai fai angahalá ʻa ia ʻoku ui ko e kau tangata ʻa e tuʻí, kuo ʻikai ke nau toe fie maʻu ia ke ne hoko ko honau tuʻi fakamaau. Kuo nau fakamālohiʻi ai ia mo hono kau muimuí ki tuʻa mei Seilahemala.
Naʻá ne toe pehē ʻokú ne tātānaki haʻane kau tau ke nau feinga ke toe maʻu ʻa Seilahemala
Naʻe fokotuʻu ʻe he kau tangata ʻa e tuʻí ha tuʻi ke hoko ko honau taki pea kuo nau kau fakataha mo e kau Leimaná.
Naʻe ʻikai ke ʻita ʻa Peiholani ia ʻi he meʻa naʻe tohi ʻe Molonaí. He naʻe fie maʻu foki ʻe he tuʻi fakamāú ke tauʻatāina mo e kau Nīfaí.
Naʻá ne kole kia Molonai ke ne ʻomi mo ia ha kau tangata toko siʻi ke tokoni kiate ia, peá ne toe pehē kapau ʻe lava ʻe Molonai ʻo tānaki ha kau tangata toko lahi ange ʻi heʻene haʻú, te nau lava ke toe fakafoki mai ʻa Seilahemala.
Naʻe fiefia ʻa e ʻEikitau ko Molonaí ʻi he kei anga-tonu ʻa Peiholani ki hono fonuá pea mo ʻene kei fie maʻu ʻa e tauʻatāina maʻa hono kakaí.
Naʻe ʻalu leva ʻa Molonai pea mo ha niʻihi tokosiʻi pē ke feʻiloaki mo Peiholani. Naʻa nau ʻave mo kinautolu ʻa e fuka ʻo e tauʻatāiná, pea naʻe kau mai ha kau tangata ʻe lauafe kia kinautolu ʻi he lolotonga ʻo ʻenau fononga atú.
Naʻe laka atu ʻa e kau tau ʻa Molonai mo Peiholaní ki Seilahemala ʻo nau fakapoongi ʻa e tuʻi ʻo e kau Nīfai fai angahalá, mo puke pōpula ʻene kau tangatá.
Naʻe ʻoatu leva ʻe Molonai ha meʻakai mo ha kau tangata ʻe toko tahamano uaafe ke tokoni ki he kau tau ʻa e kau Nīfaí, ʻa ia ne nau tekeʻi ki tuʻa ʻa e kau Leimaná. Naʻe toe hoko leva ha melino ki he funga ʻo e fonuá.