Vahe 50
Ko e Mavahe ʻa e Kau Sēletí mei Pēpelí
Ko ha ongo tangata māʻoniʻoni ʻa Sēleti mo hono tokouá, ʻa ia naʻá na nofo ʻi he kolo ko Pēpelí. Naʻá na moʻui ʻi ha ngaahi taʻu ʻe lau teau ki muʻa ʻi he kau Nīfaí.
Naʻe tokolahi ha kakai fai angahala ʻi Pēpeli. Ne nau langa ha taua ke feinga ke aʻu hake ai ki he langí. Naʻe houhau ʻa e ʻEikí ʻo ne veuveuki ʻenau leá.
Naʻe kole ʻe Sēleti ki hono tokouá ke ne lotu ki he ʻEikí ʻo kole ke ʻoua naʻa veuveuki e lea ʻa hona fāmilí mo hona ngaahi kaungā-meʻá.
Naʻe lotu leva ʻa e tokoua ʻo Sēletí, peá ne tali ʻe he ʻEikí ʻene lotú. Ko ia naʻe kei femahinoʻaki ai pē ʻa Sēleti mo hono tokouá, hona ongo fāmilí mo hona ngaahi kaungā-meʻá.
Naʻe folofola mai ʻa e ʻEikí ki he tokoua ʻo Sēletí, ke ne hanga ʻo tānaki hono fāmilí mo e ngaahi kaungā-meʻá ʻo nau mavahe mei he fonuá. Naʻa nau ʻave kotoa ʻenau fanga monumanú, mo e ngaahi faʻahinga tengaʻi ʻakau kehekehe kotoa pē.
Naʻe folofola ʻa e ʻEikí te ne hanga ʻo tataki ʻa e kau Sēletí ki he fonua ʻo e talaʻofá.
Naʻe puke ʻe he kau Sēletí ha fanga manu puna mo ha fanga ika ʻo ʻave mo kinautolu.
Ne nau ʻave mo ha ngaahi fuifui hone.
Naʻe fononga ʻa e kau Sēletí ki he toafá. Ne folofola ʻa e ʻEikí kiate kinautolu mei ha konga ʻao, ʻo fakahā ange e hala ke nau fou aí.
Naʻe folofola ʻa e ʻEikí kiate kinautolu, ko e kakai ʻoku nau nofoʻi ʻa e fonua ʻ o e talaʻofá kuo pau ke nau tauhi ki he ʻOtuá ka ʻikai ʻe fakaʻauha kinautolu.
Naʻe fokotuʻu ʻe he kau Sēletí honau ngaahi fale fehikitakí ʻi he matātahí. Naʻa nau nofo ʻi he matātahi ʻo feʻunga mo ha taʻu ʻe fā.