Vahe 42

Ko e Ngaahi Fakaʻilonga ʻo Hono Tutuki ʻo Kalaisí

Naʻe ʻosi ha taʻu ʻe tolungofulu mei he taimi naʻe mamata ai ʻa e kakaí ki he ngaahi fakaʻilonga ʻo hono ʻaloʻi mai ʻo Sīsū Kalaisí.

3 Nīfai 8:2

Naʻa nau siofi leva ha fakaʻilonga ʻo ʻene pekiá: ʻa e fakapoʻuli ko ia ʻi he ʻaho ʻe tolú.

3 Nīfai 8:3

Naʻe ʻikai ke tui ha niʻihi ia ʻe hoko mai ʻa e fakaʻilongá. Pea nau fakafekiki kinautolu mo e niʻihi naʻe tui ki aí.

3 Nīfai 8:4

ʻI ha ʻaho ʻe taha ne tō mai ai ha fuʻu matangi mālohi. Naʻe mālohi ʻaupito ʻa e havilí.

3 Nīfai 8:5–6

Naʻe tapa ʻa e ʻuhilá, pea ngalulu ʻa e māmaní ʻi he maná.

3 Nīfai 8:6–7

Naʻe vela ʻa e kolo ko Seilahemalá. Pea ngoto hifo ki kilisitahi ʻa e kolo ko Molonaí. Naʻe tanumia mo e kolo ko ia ko Molonaihaá.

3 Nīfai 8:8–10

Naʻe luluʻi ʻe ha mofuike ʻa e māmaní kotoa. Naʻe maumau ʻa e ngaahi halá, pea holofa mo e ngaahi falé.

3 Nīfai 8:12–15

Naʻe feʻunga mo ha houa ʻe tolu ʻa e matangí mo e mofuiké.

3 Nīfai 8:19

ʻI he tolona ʻa e matangí pea ʻosi mo e mofuiké, naʻe fakapoʻulilōlō ʻa e funga ʻo e fonuá. Naʻe ʻikai ke toe ʻi ai ha maama. Pea naʻe lava pē ke ongoʻi ʻe he kakaí ia ʻa e fuʻu fakapoʻuli ko ʻení.

3 Nīfai 8:19–20

Naʻe fakapoʻuli tuʻu ʻi ha ʻaho kakato ʻe tolu. Naʻe ʻikai lava ke ulo ʻa e teʻelangó ia. Pea ʻikai ke toe lava ʻa e kakaí ʻo sio ki he laʻaá, fetuʻú mo e māhiná.

3 Nīfai 8:21–23

Naʻe tangi ʻa e kakaí koeʻuhí ko e fakapoʻulí, lahi ʻo e fakaʻauhá mo e mate naʻe hokó. Naʻa nau ongoʻi tautea ko e ʻikai ke nau fakatomala mei heʻenau ngaahi angahalá.

3 Nīfai 8:23–25

Hili iá naʻa nau fanongo ki he leʻo ʻo Sīsū Kalaisí.

3 Nīfai 9:1, 15

Naʻe fakamatalaʻi ʻe Sīsū e fakaʻauha lahi naʻe hoko ʻi he funga fonuá. Naʻá ne pehē kuo ʻauha ai ʻa e kau fai angahalá.

3 Nīfai 9:12–13

Naʻá ne folofola ʻo pehē ʻoku fie maʻu ke fakatomala ʻa kinautolu ko ia naʻe haó, pea kapau te nau fakatomala mo haʻu kiate ia, te ne tāpuakiʻi kinautolu.

3 Nīfai 9:13–14

Naʻe ʻohovale ʻa e kakaí, ko ia naʻe tuku ʻenau tangí. Naʻe lōngonoa e fonuá ʻo feʻunga mo ha ngaahi houa lahi.

3 Nīfai 10:1–2

Naʻe toe folofola ʻa Sīsū ʻo pehē, kuó ne feinga maʻu pē ke tokoniʻi kinautolu. Pea te nau kei lava pē ke foki hake kiate ia ʻo kapau te nau fakatomala.

3 Nīfai 10:3–6

Hili e ʻaho ʻe tolú, naʻe tolona atu leva ʻa e fakapoʻulí. Naʻe fakafetaʻi ʻa e kakaí ki he ʻEikí mo fiefia.

3 Nīfai 10:9–10