Vahe 45
Ko Hono Akoʻi ʻe Sīsū Kalaisi ʻo kau ki he Sākalamēnití mo e Lotú
Naʻe fekau ʻe Sīsū Kalaisi ʻene kau ākongá ke nau ʻomi ha mā mo ha uaine. Naʻá ne folofola ki he kau Nīfaí ke nau tangutu ʻi he kelekelé.
ʻI he foki mai ʻa e kau ākongá, naʻe hanga ʻe he Fakamoʻuí ʻo pakipaki iiki ʻa e maá mo tāpuakiʻi ia. Naʻá ne ʻoange ki heʻene kau ākongá ʻa e maá mo e uainé, pea nau toki tufaki ia ki he kakaí.
Naʻe folofola ʻa Sīsū ko kinautolu ʻoku nau toʻo ʻa e sākalamēnití ʻoku nau fuakava maʻu ai pē ke manatu kiate ia mo ʻene feilaulaú. Hili iá te nau maʻu ʻa hono Laumālié.
Naʻe tāpuakiʻi ʻe Sīsū Kalaisi ʻa e uainé ʻo ʻoange ki he kau ākongá, pea toki tufaki ʻe he kau ākongá ki he kakaí.
Naʻe folofola ʻa Sīsū ko kinautolu ʻoku maʻu e sākalamēnití ʻoku nau fuakava ke tauhi ʻene ngaahi fekaú.
Naʻe toe folofola ʻa Sīsū ki heʻene kau ākongá, ko ia kotoa pē ʻoku toʻo ʻa e sākalamēnití pea manatu kiate iá te ne maʻu ʻa hono Laumālié.
Naʻá ne fakahā ki he kau ākongá ʻe tāpuakiʻi kinautolu kapau te nau tauhi ʻene ngaahi fekaú.
Naʻá ne fakahā kiate kinautolu ke nau lotu maʻu pē, ʻo hangē ko ʻenau mamata ki heʻene lotú.
Naʻe folofola ʻa e Fakamoʻuí ki he kau Nīfaí ke nau lotu ki he Tamai Hēvaní ʻi hono huafá. Naʻá ne toe fekau foki ke nau lotu mo honau ngaahi fāmilí.
Naʻá ne folofola ʻo pehē ʻoku totonu ke faʻa fakataha maʻu pē ʻa e kakaí. ʻOku totonu ke nau talitali lelei ʻa e niʻihi kehé ʻi heʻenau ngaahi fakatahaʻangá, lotua kinautolu, pea hoko ko ha faʻifaʻitakiʻanga lelei.
Naʻe foaki ʻe he Fakamoʻuí ʻa e mālohi ʻo e Laumālie Māʻoniʻoní ki heʻene kau ākongá. Naʻe hanga ʻe ha konga ʻaó ʻo fakapuliki ʻa e kakaí, kae lava pē ʻa e kau ʻaposetoló ʻo mamata ki he hāʻele hake ʻa Sīsū Kalaisi ki he langí.