Vahe 30
ʻKo e Naʻinaʻi ʻa Alamā ki Hono Ngaahi Fohá
Naʻe loto mamahi ʻa ʻAlamā koeʻuhi ko e fai angahala ʻa e kakai Nīfaí. Naʻa ne fakamatalaʻi ai ki hono ngaahi fohá taki taha ʻo kau ki he moʻui māʻoniʻoní.
Naʻá ne pehē ki hono foha lahi ko Hilamaní, ke ne falala ki he ʻOtuá. Pea fakamatala ai ʻa ʻAlamā ʻo kau ki he taimi naʻá ne feinga ai ke ne fakaʻauha ʻa e Siasí, pea fekauʻi hifo ai ʻe he ʻOtuá ha ʻāngelo ke taʻofi ia.
Naʻe faingataʻaʻia ʻa ʻAlamā ʻi ha ʻaho ʻe tolu koeʻuhi ko ʻene ongoʻi loto-halaiá. Pea naʻá ne manatuʻi ʻa e ngaahi akonaki ʻa ʻene tamaí ʻo kau kia Kalaisi, peá ne ʻiloʻi ai ʻe lava pē ʻo fakamolemoleʻi ia.
Naʻe lotu ʻa ʻAlamā ke fakamolemoleʻi ia, pea naʻe hanga leva ʻe he fiefiá ʻo fetongi ʻa e mamahi ʻi hono laumālié. Naʻe fakamolemoleʻi ia tuʻunga ʻi heʻene tui kia Sīsū Kalaisi, mo ʻene fakatomalá.
Naʻe kamata mei ai mo hono akoʻi ʻe ʻAlamā ki he kakaí ʻa e ongoongoleleí, koeʻuhí ke ne maʻu ʻa e fiefia naʻá ne ongoʻí. Naʻe tāpuakiʻi ia ʻe he ʻOtuá, tuʻunga ʻi heʻene falala kiate iá.
Naʻe tuku ʻe ʻAlamā kia Hilamani ʻa e ngaahi lekooti toputapú, ʻo ne fakahā ki ai ke ne hoko atu hono tohi ʻa e hisitōlia ʻo hono kakaí.
Naʻe fakahā ʻe ʻAlamā kiate ia, kapau te ne tauhi ʻa e ngaahi fekaú, ʻe tāpuakiʻi ia ʻe he ʻOtuá, mo tokoniʻi ia ʻi hono maluʻi ʻa e ngaahi lekōtí.
Naʻe fakahā foki ʻe ʻAlamā kia Hilamani ke ne lotu ʻi he pongipongi mo e efiafi kotoa pē ʻo fealēleaʻaki mo e ʻOtuá ʻi he meʻa kotoa pē te ke faí, koeʻuhí ke tokoni ʻa e ʻOtuá hono tataki koé.
Naʻe fiefia ʻa ʻAlamā koeʻuhi ko hono foha ko Sipiloní, ʻa ia naʻá ne hoko ko ha faifekau loto-toʻa ki he kau Sōlamí. Naʻe kei tui mālohi pē ʻa Sipiloni hili ʻenau tolomakaʻi iá.
Naʻe fakamanatuʻi ʻe kia Sipiloni, ko Sīsū Kalaisi pē ʻa e hala ʻe lava ʻo fakamoʻui ai iá. Naʻe poupouʻi ʻe ʻAlamā hono fohá ke hokohoko atu ʻene akoʻi ʻa e ongoongoleleí.
Naʻe ʻikai tauhi ʻe he foha ʻo ʻAlamā ko Kolianitoní ʻa e ngaahi fekaú. Naʻe ʻikai te ne faivelenga ʻi heʻene ngāue fakafaifekau lolotonga ʻene akoʻi ʻa e kau Sōlamí.
Naʻe ʻikai tui ʻa e kau Sōlamí ki he ngaahi akonaki ʻa ʻAlamaá, koeʻuhi ko e ngaahi meʻa naʻe fai ʻe Kolianitoní.
Naʻe fakahā ʻe ʻAlamā kia Kolianitoni, ʻe ʻikai lava ha tangata ʻo fufuuʻi ʻene ngaahi angahalá mei he ʻOtuá, pea ʻoku fie maʻu ke ne fakatomala.
Naʻe akoʻi ʻe ʻAlamā ʻa hono fohá, kuo pau ke toetuʻu ʻa e kakai kotoa pē, ka ko e kau māʻoniʻoní pē ʻe nofo mo e ʻOtuá.
Naʻe pehē ʻe ʻAlamā, ko e kuonga ʻeni ke fakatomala ai ʻa e kakaí mo tauhi ki he ʻOtuá.
Naʻá ne fakamanatu kia Kolianitoni, kuo ui ia ko ha faifekau, pea naʻe fekau ʻe ʻAlamā ke toe foki atu ki he kau Sōlamí ʻo malangaʻi ʻa e fakatomalá kia kinautolu.
Naʻe hokohoko atu hono akoʻi ʻa e ongoongoleleí ki he kakaí ʻe ʻAlamā mo hono ngaahi fohá. Naʻa nau malanga ʻi he mālohi ʻo e lakanga fakataulaʻeikí.