Vahe 9

Ko ha ʻApi Foʻou ʻi he Fonua ʻo e Talaʻofá

Naʻe folau ʻi he tahí ʻa e vaka naʻe folau ai ʻa e fāmili ʻo Līhaí ʻo nau tūʻuta ki he fonua ʻo e talaʻofá. Naʻe fokotuʻu ai ʻe he kakaí honau ngaahi fale fehikitakí.

1 Nīfai 18:23

Naʻa nau teuteuʻi ʻa e kelekelé mo tō ai ʻa e ngaahi tengaʻi ʻakau naʻa nau ʻomí.

1 Nīfai 18:24

Naʻa nau ʻilo ha faʻahinga manu kehekehe ʻi heʻenau fefonongaʻaki holo ʻi honau fonua foʻoú. Naʻa nau toe maʻu foki ai mo ha koula, siliva, mo ha kopa.

1 Nīfai 18:25

Naʻe folofola ʻa e ʻEikí kia Nīfai ke ngaohi ha ʻū peleti ukamea ke tohi ai. Naʻá ne toe tohi foki mo e ngaahi folofola ʻa e ʻOtuá.

1 Nīfai 19:1, 3

Naʻe fakaʻau ke toulekeleka ʻa Līhai. Naʻe naʻinaʻi ʻa Līhai ki hono ngaahi fohá ke nau talangofua ki he ngaahi fekau ʻa e ʻOtuá, ki muʻa peá ne toki pekiá. Naʻá ne toe tāpuakiʻi foki hono ngaahi makapuná.

2 Nīfai 1:14, 16; 2 Nīfai 4:3–11

Naʻe ʻita ʻa Leimana mo Lēmiuela kia Nīfai ʻi he hili ʻa e pekia ʻa Līhaí ʻo na fakaʻamu ke fakapoongi ia. Naʻe ʻikai ke na loto ke hoko hona tehina ko Nīfaí ko ha taki kiate kinaua.

2 Nīfai 4:13; 2 Nīfai 5:2–3

Naʻe folofola ʻa e ʻEikí kia Nīfai ke ne ʻave ʻa e kakai faitotonú ki he toafá. Naʻa nau fononga ʻi ha ngaahi ʻaho lahi pea faifai ʻo nau aʻu ki ha fonua ʻo nau ui ko Nīfai.

2 Nīfai 5:5–8

Naʻe talangofua ʻa e kakai naʻe muimui ʻia Nīfaí ki he ʻOtuá. Naʻa nau ngāue mālohi pea naʻe tāpuekina ʻa kinautolu. Naʻe akoʻi ʻe Nīfai hono kakaí ke nau langa ʻaki ʻa e papá mo e ukameá. Naʻa nau langa ha temipale fakaʻofoʻofa.

2 Nīfai 5:10–11, 15–16

Naʻe ui ʻa e kau muimui ‘o Leimana mo Lemiuelá ko e kau Leimaná.

2 Nīfai 5:14

Naʻe ʻikai ke talangofua ʻa e kau Leimaná ki he ʻOtuá pea naʻe motuhi atu ʻa kinautolu mei Hono ʻaó. Naʻe ʻikai lava ke nofoʻia kinautolu ʻe he Laumālie ʻo e ʻEikí kae ʻoua kuo nau fakatomala.

2 Nīfai 5:20; ʻEta 2:15

Naʻe fonu ʻa e kau Leimaná ʻi he anga-pauʻu pea naʻa nau faʻa tau mo e kau Nīfaí.

2 Nīfai 5:24, 34