Vahe 34
Ko Hilamani mo e Kau Talavou ʻe Toko Ua Afé
Naʻe fuakava ʻa e kakai ʻo ʻĀmoní ki he ʻOtuá he ʻikai pē te nau toe tau. Naʻa nau nofo foki ʻo ofi ki he kau Nīfaí, pea naʻe maluʻi foki kinautolu ʻe he kau Nīfaí.
ʻI he taimi naʻe ʻohofi ai ʻe he fili ʻo e kakai ʻo ʻĀmoní ʻa e kau Nīfaí, ne loto leva ʻa e kakai ʻo ʻĀmoní ke nau maumauʻi ʻenau fuakavá ka nau tokoni ki he kau Nīfaí ʻi he taú.
Ka naʻe ʻikai loto ʻa Hilamani mo e kau taki ʻo e kau Nīfaí ke maumauʻi ʻe he kakai ʻo ʻĀmoní ʻenau fuakava mo e ʻOtuá.
Ka naʻe ʻikai kau ʻa e ngaahi foha kei talavou ʻo e kakai ʻo ʻĀmoní ʻi he fuakava ko ʻení. Ko ia naʻá nau fie tokoni ki he kau tau ʻa e kau Nīfaí ki hono tauʻi ʻo e tauʻatāiná.
Naʻe toko uaafe ʻa e kau talavou ko ʻeni ne nau fili ke tokoni ʻi hono maluʻi honau fonuá. Peá ne nau kole ai kia Hilamani ke hoko ko honau taki.
Naʻa nau loto-toʻa, loto-lahi mo sino mālohi. Pea naʻa nau toe faitotonu mo ala falalaʻanga foki, mo tauhi ki he ngaahi fono ʻa e ʻOtuá.
Naʻe taki leva ʻe Hilamani ʻene kau tau talavou ʻe toko ua afé ki he taú. Naʻá ne ui kinautolu ko hono ngaahi foha, pea naʻa nau ui ia ko ʻenau tamai.
Neongo naʻe teʻeki ke tau ʻa e ngaahi foha ʻo Hilamaní, ka naʻe ʻikai ke nau ilifia. He naʻe akonakiʻi kinautolu ʻe heʻenau ngaahi faʻeé, kapau te nau falala ki he ʻOtuá te ne tokoniʻi kinautolu.
Naʻe fepaki tuʻo lahi ʻa Hilamani mo ʻene konga taú pea mo e kau Leimaná. Pea naʻe tui tala ʻa e kau talavoú ni ki he tuʻutuʻuni kotoa pē ʻa Hilamaní.
Naʻa nau loto-toʻa mo tokoni ke tekeʻi mamaʻo atu ʻa honau filí. Hili ʻenau taú, naʻe ʻilo ʻe Hilamani ne kafo kotoa hono ngaahi fohá, ka naʻe ʻikai ha taha ʻe mole ʻene moʻuí.
Ko ha mana ia. Ka naʻe fiefia ʻa Hilamani. Naʻá ne ʻiloʻi ne maluʻi ʻa e kau talavoú ni tuʻunga ʻi heʻenau tui lahi ki he ʻOtuá.