Vahe 20
Ko ʻAlamā mo Nēhoa
Naʻe kamata ke akoʻi ha ngaahi meʻa loi ʻe ha fuʻu tangata lahi mo mālohi ko Nēhoa hono hingoá. Naʻá ne pehē ʻe fakamoʻui ʻa e kakai kotoa pē, ʻo tatau ai pē pe ʻoku lelei pe kovi.
Naʻe malanga ʻa Nēhoa ʻo fakafepakiʻi ʻa e Siasi ʻo e ʻOtuá, ka naʻe taukapoʻi ia ʻe ha tangata māʻoniʻoni ko Kitione hono hingoá. Naʻe fakakikihi ʻa Nēhoa mo Kitione, ka naʻe leaʻaki ʻe Kitione ʻa e folofola ʻa e ʻOtuá.
Naʻe ʻita ʻa Nēhoa ʻo ne toʻo ʻene heletaá peá ne fakapoongi ʻa Kitione.
Naʻe ʻomi ai ʻa Nēhoa kia ʻAlamā ke fakamāuʻi. Ka naʻe taukapoʻi fefeka pē ʻe Nēhoa ia.
Naʻe pehē ʻe ʻAlamā ʻoku halaia ʻa Nēhoa ʻi heʻene feinga ke fakaʻauha ʻa e kakaí, mo ʻene akoʻi kinautolu ke nau fai angahalá pea mo ʻene fakapoongi ʻa Kitioné.
Naʻe pehē ʻe ʻAlamā kuo pau ke tauteaʻi ʻa Nēhoa koeʻuhí ko ʻene fakapoongi ʻa Kitioné. Ko e tuʻutuʻuni ʻa e laó, kuo pau ke mate ʻa Nēhoa.
Naʻe ʻave ʻa Nēhoa ki ha kiʻi moʻunga ofi mai ke fakapoongi ai ia. Ka naʻe kei tui pē ha kakai tokolahi ki he ngaahi akonaki kovi ʻa Nēhoá.
Naʻe ʻofa ʻa e kakai ko ʻení ʻi he ngaahi koloa ʻo e māmaní, pea naʻe ʻikai ke nau fie talangofua ki he ngaahi fekau ʻa e ʻOtuá. Naʻa nau taukae ki he kāingalotu ʻo e Siasí mo fakakikihi mo tau mo kinautolu.
Naʻe kei hoko atu pē hono tauhi ʻe he kakai māʻoniʻoní ʻa e ngaahi fekaú, pea ʻikai ke nau lāunga neongo hono fakamamahiʻi kinautolu ʻe he kau muimui ʻo Nēhoá.
Naʻe vahevahe ʻe he kāingalotu ʻo e Siasí ʻa e meʻa kotoa pē naʻa nau maʻú mo e kau masivá, pea tauhi mo e kau mahakí. Naʻe tāpuekina kinautolu ʻe he ʻOtuá, koeʻuhí ko ʻenau tauhi ʻa e ngaahi fekaú.