Vahe 17
Ko e Hola ʻa e Kakai ʻo ʻAlamaá
Naʻe ngāue ʻa e kakai ʻo ʻAlamaá ʻi heʻenau ngaahi ngoueʻangá ʻi ha ʻaho ʻe taha, pea naʻe hū mai ha kau tau ʻa e kau Leimaná ki honau ngaahi ngataʻanga fonuá.
Naʻe manavahē ʻa e kau Nīfaí ʻo nau hola ki honau koló. Naʻe fakahā ange ʻe ʻAlamā ke nau manatuʻi ʻa e ʻOtuá, pea te ne tokoniʻi kinautolu. Naʻe kamata ai ʻa e kau Nīfai ke nau lotu.
Naʻe fakamolū ʻe he ʻEikí ʻa e loto ʻo e kau Leimaná, pea ʻikai ke nau fakalaveaʻi ʻa e kau Nīfaí. Naʻe hē foki ʻa e kau Leimaná ʻi he toafá ʻi heʻenau feinga ke kumi ʻa e kakai ʻo e Tuʻi ko Limihaí.
Naʻe palōmesi ʻa e kau Leimaná kia ʻAlamā he ʻikai ke nau fakahohaʻasi hono kakaí kapau te ne fakahinohino ange kia kinautolu ʻa e hala ke nau foki ai ki honau fonuá. Naʻe fakahinohinoʻi ange leva ʻe ʻAlamā ʻa e halá.
Ka naʻe ʻikai tauhi ʻe he kau Leimaná ʻenau palōmesí. Naʻa nau hanga ʻo fokotuʻu ha kau leʻo takai ʻi he fonuá, pea naʻe ʻikai kei tauʻatāina ʻa ʻAlamā mo hono kakaí.
Naʻe fokotuʻu ʻe he tuʻi ʻo e kau Leimaná ʻa ʻAmulone ke pule ki he kakai ʻo ʻAlamaá. Ko ʻAmuloné ko e tangata Nīfai pea naʻá ne kau ʻi he kau taulaʻeiki fai angahala ʻa e Tuʻi ko Noá.
Naʻe fakangāueʻi mamafa ʻe ʻAmulone ʻa e kakai ʻo ʻAlamaá. Naʻa nau lotu ʻo kole ha tokoni, ka naʻe pehē ʻe ʻAmulone ʻe fakapoongi ha taha pē ʻe maʻu ʻokú ne lotu. Naʻe hokohoko atu pē ʻa e lotu ʻa e kakaí ʻi honau lotó.
Naʻe ongoʻi ʻe he ʻOtuá ʻa ʻenau lotú peá ne ngaohi ʻa e kakaí ke mālohi, koeʻuhí ke faingofua pē ʻenau ngāué. Naʻe fiefia mo faʻa kātaki ʻa e kakaí.
Naʻe hōifua ʻa e ʻEikí ki he tui faivelenga ʻa e kakaí. Peá ne folofola kia ʻAlamā te ne tokoniʻi kinautolu ke nau hola mei he kau Leimaná.
Naʻe tānaki fakataha ʻe he kakaí ʻenau meʻakaí mo ʻenau fanga manú ʻi he poó. Naʻe ngaohi ʻe he ʻEikí ke mohe maʻu ʻa e kau Leimaná ʻi he pongipongí, koeʻuhí kae hola ʻa ʻAlamā mo hono kakaí mei he koló.
Hili haʻanau fononga ʻi ha ʻaho ʻe hongofulu mā ua, naʻa nau aʻu mai ki he fonua ʻo Seilahemalá, pea naʻe talitali lelei kinautolu ʻe he Tuʻi ko Mōsaiá mo hono kakaí.