Vahe 6
Ko e Misi ʻa Līhaí
Naʻe fakahā ʻe Līhai ki hono fāmilí ʻo kau ki ha meʻa-hā-mai mahuʻinga naʻá ne maʻu ʻi haʻane misi. Naʻe fiefia ʻa Līhai ʻia Nīfai mo Samu ka naʻe loto mamahi ʻia Leimana mo Lēmiuela ʻi heʻene misí.
Naʻe mamata ʻi heʻene misí ki ha tangata ʻokú ne tui ha kofu tōtōlofa hinehina naʻá ne tala ange ke muimui ange ʻiate ia. Naʻe muimui ʻa Līhai ʻi he tangatá ki ha feituʻu fakapoʻupoʻuli mo maʻomaʻonganoa.
Hili ʻene fononga ʻi he fakapoʻulí ʻi ha ngaahi houa lahi, naʻe lotu ʻa Līhai ʻo kole ha tokoni.
Naʻá ne mamata ki ha fuʻu ʻakau ʻoku fua hinehina. Naʻe ʻai ʻe he fuaʻi-ʻakau huʻamelie ko ʻení ʻa e kakai naʻa nau kai aí ke nau fiefia.
Naʻe kai ʻa Līhai ʻi he fua ʻo e ʻakaú, pea naʻe fakafonu ʻaki ia ʻa e fiefiá. Naʻá ne fakaʻamu ke kai hono fāmilí ʻi he fua ʻo e ʻakaú koeʻuhí he naʻá ne ʻiloʻi te ne ngaohi foki mo kinautolu ke nau fiefia.
Naʻe mamata ʻa Līhai ki ha vaitafe ʻoku tafe ofi atu ki he fuʻu ʻakaú. Naʻá ne mamata ʻi he matavai ʻo e vaitafé kia Selaia, Samu mo Nīfai.
Naʻe ui ʻe Līhai hono uaifí mo hono ngaahi fohá ke nau ō ange ʻo kai ʻi he fua ʻo e ʻakaú. Naʻe ʻalu ʻa Selaia, Samu mo Nīfai ʻo ʻahiʻahiʻi ʻa e fua ʻo e ʻakaú, ka naʻe ʻikai ke ʻalu ʻa Leimana mo Lēmiuela ia.
Naʻe toe mamata ʻa Līhai ki ha vaʻa ukamea pea mo ha hala fāsiʻi mo lausiʻi ʻoku fakatau atu ki he fuʻu ʻakaú.
Naʻá ne mamata ki ha fuʻu kakai tokolahi ʻoku nau lue pe fakahangatonu atu ʻi he halá. Tuʻunga ʻi he fuʻu ʻao fakapoʻulí, naʻe ʻi ai ai hanau niʻihi ne hē mei he halá ʻo nau pulia.
Naʻe piki maʻu hanau niʻihi ki he vaʻa ukameá pea naʻa nau hao atu ʻi he fakapoʻulí ki he fuʻu ʻakaú. Naʻa nau kai ai ʻi he fuaʻi ʻakaú.
Naʻe hanga ʻe he kakai ko ē naʻa nau ʻi he fuʻu fale lahi ʻi he kauvai ʻe taha ʻo e vaitafé ʻo manukiʻi kinautolu naʻa nau kai ʻi he fua ʻo e ʻakaú. Naʻe mā hanau niʻihi naʻe kai ʻi he ʻakaú pea nau liʻaki ai ʻa e fuʻu ʻakaú.
Naʻe mamata ʻa Līhai ki ha fuʻu kakai tokolahi ʻi heʻene misí. Naʻe ʻi ai hanau niʻihi naʻa nau pikimaʻu ki he vaʻa ukameá pea tutui atu ʻi he fakapoʻulí ki he fuʻu ʻakaú. Naʻa nau kai ʻi he fuaʻiʻakaú. Naʻe ʻalu hanau niʻihi ki he fuʻu fale lahí pea melemo ha niʻihi ʻi he vaitafé pe puli. Naʻe ʻikai ke kai ʻa Leimana mo Lēmiuela ʻi he fua ʻo e ʻakaú. Naʻe hohaʻa ʻa Līhai fekauʻaki mo kinaua pea feinga ke tokoniʻi ke na talangofua ki he ngaahi fekau ʻa e ʻOtuá.