Vahe 18
Ko e Fakatomala ʻa ʻAlamā ko e Siʻí
Naʻe fokotuʻu ʻe he Tuʻi ko Mōsaiá ʻa ʻAlamā ke hoko ko e taki ʻi he Siasí. Naʻe fili leva ʻe ʻAlamā ha kau tangata kehe ke nau tokoni ki hono akoʻi e kau Nīfaí.
Naʻe hohaʻa ʻa ʻAlamā mo e Tuʻi ko Mōsaiá koeʻuhí he ne fakamamahiʻi ʻe he kau taʻe tuʻí e kāingalotu ʻo e Siasí, tuʻunga heʻenau tuí.
Naʻe ʻi ai ha foha ʻo ʻAlamā naʻe ui pē ko ʻAlamā. Naʻe ʻikai tui ʻa ʻAlamā ko e Siʻí ia ki he ngaahi akonaki ʻene tamaí pea naʻe fai angahala.
Naʻe fakatupu moveuveu ʻa ʻAlamā mo e ngaahi foha ʻe toko fā ʻo e Tuʻi ko Mōsaiá ki he Siasí. Naʻa nau fakalotoʻi ʻa e kakaí ke liʻaki ʻa e Siasí pea mo fai angahala.
Naʻe lotu heni ʻa ʻAlamā ke lava hono fohá ʻo ako ʻa e moʻoní mo fakatomala.
Naʻe hokohoko atu ʻa e feinga ʻa ʻAlamā ko e Siʻí pea mo e ngaahi foha ʻo e Tuʻi ko Mōsaiá ke fakaʻauha ʻa e Siasí.
Naʻe hā mai heni ha ʻāngelo kia kinautolu ʻi ha ʻaho ʻe taha. Naʻe lea leʻo lahi ʻa e ʻāngeló kia kinautolu pea naʻe ngalulululu ai e kelekelé.
Naʻe manavahē lahi ʻa e kau talavou ʻe toko nimá ni ʻo nau tō ki he kelekelé. Naʻe ʻikai mahino kia kinautolu ʻa e lea naʻe tomuʻa fai ange ʻe he ʻāngeló.
Naʻe hā mai ʻa e ʻāngeló ko ha tali ia ki he lotu ʻa e kāingalotu ʻo e Siasí. Naʻe fehuʻi ʻe he ʻāngeló kia ʻAlamā ko e Siʻí pe ko e hā hono ʻuhinga ʻokú ne fakafepakiʻi ai ʻa e Siasí.
Naʻe ngalululu ʻa e kelekelé ʻi he fekau ʻe he ʻāngeló kia ʻAlamā ko e Siʻi ke taʻofi leva ʻene feinga ke fakaʻauha ʻa e Siasí.
Naʻe toe tō ʻa ʻAlamā ko e Siʻi mo e ngaahi foha ʻo Mōsaiá ki he kelekelé. Kuo nau mamata ki ha ʻāngelo, pea naʻa nau ʻilo kuo luluʻi ʻe he mālohi ʻo e ʻOtuá ʻa e kelekelé.
Naʻe fuʻu ofo lahi ʻa ʻAlamā ko e Siʻí ko ia naʻe ʻikai te ne toe lava ai ʻo leá. Naʻe vaivaia lahi hono sinó ʻo ʻikai te ne toe lava ke ueʻi hono nimá.
Naʻe hanga ʻe he ngaahi foha ʻo Mōsaiá ʻo fua ʻa ʻAlamā ko e Siʻí ʻo ʻave ki heʻene tamaí, mo fakahā kiate ia ʻa e meʻa naʻe hoko kia kinautolú.
Naʻe fiefia ʻa ʻAlamā. Naʻá ne ʻilo kuo tali ʻe he ʻOtuá ʻene ngaahi lotú.
Naʻe ui ʻe ʻAlamā ha kakai tokolahi ke nau mamata ki he meʻa kuo fai ʻe he ʻEikí ki hono fohá mo e ngaahi foha ʻo Mōsaiá.
Naʻe ʻaukai ʻa ʻAlamā mo e kau taki kehe ʻo e Siasí, mo nau lotu ʻo kole ki he ʻOtuá ke tokoniʻi ʻa ʻAlamā ko e Siʻí ke ne toe mālohi.
Naʻe ʻosi ha ʻaho ʻe ua mo e pō ʻe ua, pea toki lava ʻa ʻAlamā ko e Siʻí ʻo lea mo ngaue.
Naʻá ne fakahā ki he kakaí kuó ne fakatomala mei heʻene ngaahi angahalá, pea kuo fakamolemoleʻi ia ʻe he ʻOtuá.
Naʻá ne akoʻi kuo pau ke māʻoniʻoni ʻa e tokotaha kotoa pē koeʻuhí ke lava ʻo hū ki he puleʻanga ʻo e ʻOtuá. Naʻá ne toe fakahā ʻa e mamahi lahi naʻá ne tofanga ai koeʻuhí ko ʻene ngaahi angahalá.
Naʻe fiefia ʻa ʻAlamā ko e Siʻí koeʻuhí he naʻe ʻosi fakatomala pea kuo fakamolemoleʻi ia ʻe he ʻOtuá. Kuó ne ʻiloʻi ʻa e ʻofa ʻa e ʻOtuá ki aí.
Naʻe kamata ʻa ʻAlamā ko e Siʻi mo e ngaahi foha ʻo e Tuʻi ko Mōsaiá ke nau akoʻi ʻa e moʻoní ʻi he fonuá kotoa, mo fakahā ki he kakai kotoa pē ʻa e ngaahi meʻa kuo nau mamata mo fanongo ki aí.
Naʻa nau feinga ke fakatonutonu ʻa e hala kuo nau faí. Naʻa nau fakamatalaʻi ʻa e folofolá ki he kakaí, mo akoʻi kia kinautolu ʻo kau kia Sīsū Kalaisi.
Naʻe tāpuakiʻi ʻe he ʻOtuá ʻa ʻAlamā ko e Siʻi pea mo e ngaahi foha ʻo Mōsaiá ʻi heʻenau akoʻi ʻa e ongoongoleleí. Naʻe tokolahi ha kakai naʻa nau fanongo kia kinautolu mo tui foki.