Vahe 10
Ko Sēkope mo Seilemi
Naʻeʻoange ʻe Nīfai ʻa e ʻū peleti naʻá ne hikí ki hono tehina siʻisiʻí ko Sēkope ki muʻa ke ne pekiá. Naʻe māʻoniʻoni ʻa Sēkope.
Naʻe talaange ʻe Nīfai kia Sēkope ke ne hiki ʻa e ngaahi meʻa ʻe lava ke tokoni ki he kakaí ke nau tui kia Sīsū Kalaisi.
Naʻe foaki ange ʻe Nīfai kia Sēkope ʻa e mafai ke ne hoko ko ha taulaʻeiki ʻi he Siasí mo akoʻi ʻa e kau Nīfaí ʻi he folofola ʻa e ʻOtuá.
Naʻe tokolahi ha kau Nīfai naʻa nau fai angahala he hili ʻa e pekia ʻa Nīfaí. Naʻe akoʻi ʻe Sēkope ʻa e kakaí mo talaange ke nau fakatomala mei hono fai ʻo e ngaahi meʻa ʻoku koví.
Naʻe ʻi ai ha tangata fai angahala ko hono hingoá ko Seilemi, naʻe ʻalu atu ʻi he lotolotonga ʻo e kau Nīfaí, ʻo akoʻi kinautolu ke ʻoua te nau tui kia Sīsū Kalaisi.
Naʻe talaange ʻe Seilemi ki he kakaí ʻoku ʻikai ha taha ia ko Kalaisi. Naʻe tokolahi ʻa e kakai naʻe tui kia Seilemí.
Naʻe akoʻi ʻe Sēkope ʻa e kakaí ke nau tui kia Kalaisi. Naʻe fie maʻu ʻe Seilemi ke fakakikihi mo Sēkope mo fakalotoʻi ia ʻoku ʻikai ke ʻi ai ha Kalaisi.
Naʻe ʻikai ke liliu ʻa e tui ʻa Sēkope kia Sīsū Kalaisí. Naʻá ne mamata ki ha kau ʻāngelo mo fanongo ki he leʻo ʻo e ʻEikí. Naʻá ne ʻiloʻi ʻe hāʻele mai ʻa Sīsū.
Naʻe nofoʻia ʻe he Laumālie Māʻoniʻoní ʻa Sēkope ʻi heʻene fai kia Seilemi ʻene fakamoʻoni ʻo kau kia Sīsū Kalaisí.
Naʻe kole ange ʻa Seilemi ke ne sio ki ha fakaʻilonga. Naʻá ne fie maʻu ke fakamoʻoniʻi ʻe Sēkope ʻoku ʻi ai ha ʻOtua. Naʻá ne fie maʻu ke mamata ki ha mana.
Naʻe ʻikai ke kole ʻe Sēkope ki he ʻOtuá ha fakaʻilonga. Naʻá ne pehē kuo ʻosi ʻiloʻi ʻe Seilemi ʻoku moʻoni ʻa e ngaahi meʻa naʻe akoʻi ʻe Sēkopé.
Naʻe pehē ʻe Sēkope kapau ʻe teʻia ʻe he ʻOtuá ʻa Seilemi, ko e fakaʻilonga ia ʻo e mālohi ʻo e ʻOtuá.
Naʻe tō ki lalo ʻi he taimi pē ko iá ʻa Seilemi. Naʻe ʻikai ke ne lava ʻo tuʻu ʻi ha ngaahi ʻaho lahi.
Naʻe fuʻu vaivai ʻa Seilemi pea naʻá ne ʻiloʻi te ne mate. Naʻá ne ui fakataha leva ʻa e kakaí.
Naʻá ne talaange te ne mate. Naʻá ne talaange ʻoku totonu ke nau tui kia Sīsū Kalaisi.
Naʻe mālōlō ʻa Seilemi ʻi he hili ʻene lea ki he kakaí. Naʻe ongoʻi ʻe he kakaí ʻa e mālohi ʻo e ʻOtuá, pea naʻa nau tō ki he kelekelé.
Naʻe kamata ke fakatomala ʻa e kakaí mo nau lau ʻa e folofolá. Naʻa nau nofo melino mo ʻofa. Naʻe fiefia ʻa Sēkope mo ʻilo kuo tali ʻe he ʻOtuá ʻene ngaahi lotú.