Vahe 25
Ko Hono Akoʻi ʻe ʻĒlone ʻa e Tamai ʻa Lāmonaí
Naʻe hanga ʻe he Laumālié ʻo tataki ʻa ʻĒlone mo hono kaungā-ngāué ki he fonua ʻo Nīfaí ke akoʻi ʻa e tamai ʻa Lāmonaí, ʻa ia ko e tuʻi ki he kau Leimaná kotoa.
Naʻe fakahā ʻe ʻĒlone ki he tuʻí ko e tehina ia ʻo ʻĀmoni. Naʻe fakakaukau foki ʻa e tuʻí ki he ʻofa ʻa ʻĀmoní mo e ngaahi meʻa naʻá ne leaʻaki kiate iá.
Naʻe fehuʻi ʻe ʻĒlone ki he tuʻí pe ʻoku tui ki he ʻOtuá. Naʻe pehē ange ʻe he tuʻí ʻoku ʻikai te ne fakapapauʻi, ka naʻá ne pehē ʻe lava ke tui kapau ʻe pehē ʻe ʻĒlone ʻoku ʻi ai ha ʻOtua. Naʻe fakapapauʻi ʻe ʻĒlone ki he tuʻí ʻoku moʻui ʻa e ʻOtuá.
Naʻe lau ʻe ʻĒlone ʻa e folofolá ki he tuʻí. Naʻá ne akoʻi kiate ia ʻo kau ki he Fakatupu ʻo e māmaní, hinga ʻa ʻĀtamá, mo e misiona ʻo Sīsū Kalaisí.
Naʻe fehuʻi ʻe he tuʻí, ko e hā ha meʻa ʻoku fie maʻu ke ne fai kae lava ke ne maʻu ʻa e Laumālie Māʻoniʻoní pea mo teuteu ke nofo mo e ʻOtuá. Naʻe hōifua ʻa e tuʻí ke ne fai ha faʻahinga pē, ʻo aʻu ki haʻane tuku ange hono puleʻangá.
Naʻe pehē ʻe ʻĒlone ki he tuʻí ʻoku fie maʻu ke ne fakatomala kakato mei heʻene angahalá. ʻOku fie maʻu ke ne fai ha lotu mo tui ki he ʻOtuá.
Naʻe lotu ʻa e tuʻí ke ne ʻiloʻi pe ʻoku ʻi ai koā ha ʻOtua. Naʻá ne pehē te ne liʻaki ʻene ngaahi angahalá kotoa pē.
Naʻe tō ʻa e tuʻí ki he kelekelé ʻo hangē ʻoku maté. Naʻe mamata ki ai ʻa e kuiní, naʻá ne pehē kuo fakapoongi ia ʻe ʻĒlone mo hono kāingá.
Naʻe fekau ʻe he kuiní ki heʻene kau tamaioʻeikí ke nau fakapoongi ʻa ʻĒlone mo hono kāingá, ka naʻa nau ilifia kinautolu ia. Ko ia ne fekau leva ʻe he kuiní ke kumi ha kakai te nau lava ʻo fakapoongi iá.
Kimuʻa ke fakataha mai ha fuʻu kakai tokolahi mo fakatupu moveuveú, naʻe puke mai ʻe ʻĒlone ia ʻa e nima ʻo e tuʻí ʻo ne pehē ange, “Tuʻu hake,” pea naʻe tuʻu hake ʻa e tuʻí.
Naʻe hanga ʻe he tuʻí ʻo fakafiemālieʻi hono uaifi loto manavaheé, mo ʻene kau tamaioʻeikí, peá ne akoʻi kia kinautolu ʻa e ongoongoleleí. Naʻa nau tui kotoa pē kia Sīsū Kalaisi.