Vahe 31
Ko Hono Ikunaʻi ʻe Molonai ʻa Seilahemená
Naʻe loto ʻa Seilahemena, ko e taki ia ʻo e Kau Leimaná, ke nau kei tāufehiʻa pē ki he kau Nīfaí, pea ngaohi kinautolu ko ʻenau kau pōpula.
Naʻe fie maʻu ʻe he kau Nīfaí ʻa honau fonuá mo honau ngaahi fāmilí ke nau tauʻatāina. Pea naʻa nau lotu ke nau lava ʻo lotu mo hū ki he ʻOtuá ʻo fakatatau ki honau lotó.
Naʻe taki ʻe Molonai ʻa e kau tau Nīfaí. ʻI he taimi naʻe haʻu ai ʻa e kau Leimaná ke nau taú, naʻe laka atu ʻa Molonai mo ʻene kau taú ʻo nau fetaulaki ʻi he fonua ko Selesoní.
Naʻe hanga ʻe Molonai ʻo fakamahafu mo teuteuʻi ʻene kau taú ʻaki ha ngaahi meʻatau, mo e pā mo e teunga tau mo e ngaahi teunga matolu.
Naʻe tokolahi ange ʻa e kau tau ʻa e kau Leimaná, ka naʻa nau manavahē ʻi heʻenau mamata ki he teunga tau ʻo e kau Nīfaí—ka naʻe ʻikai lahi honau teunga taú.
Naʻe ʻikai fie tau ʻa e kau Leimaná mo e kau Nīfaí. Naʻa nau hola leva ki he toafá ke nau ʻohofi ha kolo ʻe taha ʻo e kau Nīfaí.
Naʻe fekauʻi ʻe Molonai ha kau asiasi ke nau fakasiosio ʻa e kau Leimaná. Naʻá ne toe kole foki kia ʻAlamā ke ne kole ha tokoni mei he ʻEikí. Naʻe fakahā mai ʻe he ʻEikí ʻa e feituʻu ʻe ʻoho atu ai ʻa e kau Leimaná.
Ka ʻi he maʻu pē ʻe Molonai ʻa e pōpoaki ʻa ʻAlamaá, naʻá ne tuku leva ha kau sōtia ke nau leʻohi ʻa Selesoni, pea naʻe laka atu leva mo hono toé ke fetaulaki mo e kau Leimaná.
Naʻe toitoi ʻa e kau sōtia ʻa e ʻeikitau ko Molonaí ʻi he ongo kauvai ʻo e vaitafe Saitoné, ʻo nau tatali ai ke lamasi ʻa e kau tau ʻa e kau Leimaná.
Naʻe kamata ai ha tau, pea feinga ʻa e kau Leimaná ke nau hola ki he kauvai ʻe tahá, ka ne toe tokolahi foki ʻa e kau Nīfai ia ʻi he tafaʻaki ko iá.
Naʻe tau ʻa Seilahemena mo ʻene kau taú ʻo lahi ange ʻi ha toe taimi ʻi muʻa, pea naʻa teʻia ai ha kau Nīfai tokolahi. Naʻe tangi leva ʻa e kau Nīfaí ki he ʻEikí ke tokoni mai.
Naʻe foaki mai ʻe he ʻEiki ha mālohi ki he kau tau Nīfaí. Naʻe takatakaiʻi ʻa e kau Leimaná, pea fekau ʻe Molonai ke tuku ʻa e taú.
Naʻe fakahā ʻe Molonai kia Seilahemena, ʻoku ʻikai fie fakapoongi ʻe he kau Nīfaí ʻa e kau Leimaná, pe fakapōpulaʻi kinautolu.
Naʻe fakahā ʻe Molonai ʻe ʻikai lava ʻe he kau Leimaná ʻo fakaʻauha ʻa e tui ʻa e kau Nīfaí kia Sīsū Kalaisí. Pea ʻe hokohoko atu hono tokoniʻi ʻe he ʻOtuá ʻa e tau kau Nīfaí ʻo kapau te nau faivelenga maʻu pē.
Naʻe fekau ʻe Molonai kia Seilahemena ke tuku ʻene meʻataú. He ʻikai fakapoongi ʻa e kau Leimaná kapau te nau palōmesi ʻe ʻikai te nau toe tauʻi ʻa e kau Nīfaí.
Naʻe tuku ʻe Seilahemena ʻene meʻataú ʻi muʻa ʻia Molonai, ka naʻe ʻikai te ne palōmesi ange ʻe ʻikai te nau toe tau. Ko ia naʻe hanga leva ʻe Molonai ʻo fakafoki ange ʻene meʻataú, koeʻuhi ke nau hanga ʻo maluʻi ʻaki ʻa kinautolu.
Naʻe ʻoho mai ai ʻa Seilahemena ke fakapoongi ʻa Molonai, ka naʻe hanga ʻe he sōtia Nīfaí ʻo taaʻi ʻa e heletā ʻa Seilahemená ʻo motu.
Naʻe hanga leva ʻe he sōtiá ʻo taaʻi ʻa e ʻulu ʻo Seilahemená, ʻo toʻo hono tumuʻakí, naʻe hanga leva ʻe he sōtiá ʻo toʻo hake ʻa e louʻulú ʻo fakaʻaliʻali atu ʻi heʻene heletaá.
Naʻá ne pehē ange kia kinautolu, ʻe tō ʻa e kau Leimaná ki he kelekelé ʻo hangē ko e tō ʻa e louʻulú, tuku kehe ʻo kapau te nau tuku ʻenau meʻa taú, pea nau palōmesi te nau tauhi ʻa e melinó.
Naʻe haʻu ha kau Leimana tokolahi ʻo tuku ʻenau ngaahi meʻa taú ʻi he vaʻe ʻo Molonaí, pea nau palōmesi ʻe ʻikai te nau toe tau. Naʻe tuku leva ke nau ʻalu tauʻatāina.
Naʻe ʻita lahi ʻa Seilahemena, peá ne fakatupu ʻi he loto ʻo ʻene kau sōtia naʻe toé ke nau toe tau. Naʻe hanga ʻe he kau tau ʻa Molonaí ʻo fakapoongi hanau tokolahi.
Naʻe mamata ai ʻa Seilahemena ʻe fakapongi ia mo hono kakaí, ko ia naʻá ne kole ai kia Molonaí ke fakahaofi kinautolu. Naʻá ne palōmesi ange ʻe ʻikai te nau toe tauʻi ʻa e kau Nīfaí.
Naʻe taʻofi leva ʻe Molonai ʻa e taú, peá ne puke ʻa e ngaahi meʻa tau ʻa e kau Leimaná. Hili haʻanau fuakava ke nau tauhi ʻa e melinó, naʻa nau ʻalu leva kae foki ʻa e kau Nīfaí ki honau ngaahi ʻapí.