Vahe 13
Ko Sēnifi
Naʻe mavahe ʻa Sēnifi mo ha kau Nīfai ʻe niʻihi mei honau ʻapí ʻi Seilahemala, ʻo nau fononga ki he fonua ko Nīfaí, ʻa ia naʻe nofo ai honau kakai ʻi muʻá.
Naʻa nau ʻiloʻi ʻoku nofo ai ʻa e kau Leimaná. Naʻe ʻalu ʻa Sēnifi mo ha toko fā ʻo ʻene kau tangatá ʻo fakataufolofola ki he tuʻí. Naʻa nau kole ki he Tuʻi ko Leimaná pē ʻe ngofua ke nau nofo ʻi hono fonuá.
Naʻe talaange ʻe he Tuʻi ko Leimaná te nau maʻu hano kolo ʻe ua. Naʻá ne loto ke nau nofo ʻi he fonuá, koeʻuhí ke ne fakapōpulaʻi kinautolu.
Naʻe langa ʻe Sēnifi mo hono kakaí honau ngaahi falé mo ngaohi ha ngaahi ʻā ʻi honau ngaahi koló. Naʻa nau tō ha faʻahinga kehekehe ʻo e kelení mo e ngaahi ʻakau fuá. Naʻe toe ʻi ai foki mo haʻanau fanga manu.
Naʻe talaange ʻe he Tuʻi ko Leimaná ki hono kakaí e tupulaki ʻa e ivi ʻo e kau Nīfaí. Naʻe ʻalu ai ha kau Leimana tokolahi ʻo ʻohofi ʻa e kau Nīfaí mo kaihaʻasi ʻenau fanga monumanú mo ʻenau ngoué.
Naʻe hola heni ʻa e kau Nīfaí ki he kolo ko Nīfaí. Naʻe fakamahafu ʻe Sēnifi hono kakaí ʻaki ha ngaahi kaufana mo ha ngaahi ngahau, ngaahi heletā, ngaahi hele piko, ngaahi pōvai, mo ha ngaahi makatā. Naʻa nau ʻalu atu leva ke tauʻi ʻa e kau Leimaná.
Naʻe lotu ʻa e kau Nīfaí ki he ʻOtuá, ki muʻa ke nau taú, ʻo kole ha tokoni. Naʻe tāpuakiʻi ʻe he ʻOtuá ʻa e kau Nīfaí ʻaki ha mālohi makehe, pea naʻa nau ikunaʻi ʻa e kau Leimaná.
Hili ʻa e taú, naʻe fokotuʻu takai ʻe Sēnifi ha kau leʻo ʻi he fonuá. Naʻá ne loto ke maluʻi hono kakaí mo ʻenau fanga monumanú mei he kau Leimaná.
Naʻe nofo melino ai ʻa e kau Nīfaí ʻi ha ngaahi taʻu lahi. Naʻe ngāue mālohi ʻa e kakai tangatá ʻi he ngaahi ngoué, pea naʻe ngaohi ʻe he kakai fefiné ha ngaahi tupenu mo tuitui mei ai honau valá.
ʻI he pekia ʻa e Tuʻi ko Leimaná, naʻe hoko leva hono fohá ʻo tuʻi. Naʻe toe fekauʻi mai ʻe he tuʻi foʻoú ʻene kau taú ke tauʻi ʻa e kau Nīfaí.
Naʻe toe maʻu ai ʻe he kau Nīfaí ha ivi mei he ʻEikí. Naʻa nau fakapoongi ha kau Leimana tokolahi, pea naʻe feholaki ʻa e toengá.