Vahe 32
Ko e ʻEikitau ko Molonaí mo e Fuka ʻo e Tauʻatāiná
ʻE feinga ʻa ʻAmalekaia ke ne fakaʻauha ʻa e siasi ʻo e ʻOtuá, pea toʻo e tauʻatāina ʻa e kakaí, kapau te ne hoko ko e tuʻi.
Naʻe ʻita ʻa e ʻeikitau ko Molonaí ʻa ia ko e taki e kau tau Nīfaí, heʻene fanongo ʻoku feinga ʻa ʻAmalekaia ke hoko ko e tuʻí.
Naʻe hanga ʻe Molonai ʻo haeʻi hono kofú ʻo ngaohi mei ai ha fuka. Naʻá ne tohi ai ha pōpoaki ko e fakamanatu ki he kakaí ke maluʻi ʻenau tui fakalotú, tauʻatāiná, pea mo e melinó.
Naʻe ʻai ʻe Molonai ʻa e fuká ki ha vaʻakau peá ne ui ia ko e tohi fakaʻilonga ʻo e tauʻatāiná. Naʻá ne toʻo leva ia hili ʻene tui hono teunga taú, peá ne tūʻulutui ʻo lotu.
Naʻá ne kole ki he ʻOtuá ke ne maluʻi ʻa kinautolu ʻoku nau tui kia Sīsū Kalaisí, peá ne lotua ke ʻi he fonuá ʻa e melinó, ʻo ne ui ia ko e fonua ʻo e tauʻatāiná.
Naʻe ʻalu leva ʻa Molonai ki he kakaí. Naʻá ne taʻalo ʻa e fuka ʻo e tauʻatāiná, peá ne ui ki he kakaí ke nau haʻu ʻo tokoniʻi ia ʻi hono maluʻi ʻenau tauʻatāiná.
Naʻe haʻu ʻa e kakaí mei he ngaahi tapa kehekehe ʻo e fonuá. Naʻa nau palōmesi te nau tauhi ʻa e ngaahi fekau ʻa e ʻOtuá, pea nau tuku ke maluʻi honau tauʻatāiná.
Naʻe manavahē ʻa ʻAmalekaia heʻene vakai ki he kakai Nīfai tokolahi kuo nau haʻu ke maluʻi ʻenau tauʻatāiná. Naʻá ne ʻalu leva mo e kakai naʻe muimui kiate iá ʻo kau fakataha mo e kau Leimaná.
Naʻe feinga ʻa Molonai mo ʻene kau taú ke taʻofi ʻa kinautolu, ka naʻe hola ʻa ʻAmalekaia mo ha niʻihi tokosiʻi ʻo ʻene kau tangatá.
Naʻe fekau ʻe Molonai ke fokotuʻu ha fuka ʻo e tauʻatāiná ʻi he taua kotoa pē ʻi he fonua ʻo e kau Nīfaí. Naʻe nofo tauʻatāina leva ʻa e kau Nīfaí, pea kamata ke nau maʻu ʻa e melino ʻi he fonuá.