Vahe 21
Ko e Kau ʻAmelikaí
Ko ha tangata poto mo fai angahala ʻa ʻAmelikai, naʻe loto ke hoko ko e tuʻi ʻo e kau Nīfaí. Naʻe tokolahi hono kau muimuí.
Naʻe ʻikai loto ʻa e kau Nīfai māʻoniʻoní ke hoko ʻa ʻAmelikai ko hanau tuʻi. Naʻa nau ʻilo ko hono lotó ke fakaʻauha ʻa e Siasi ʻo e ʻOtuá.
Naʻe fakatahataha ʻa e kau Nīfaí ʻi ha fanga kiʻi kulupu ke nau fakakaukauʻi pe ʻoku totonu ke hoko ʻa ʻAmelikai ko hanau tuʻi. Naʻe tokolahi ha kakai naʻe ʻikai ke nau loto ke hoko ʻa ʻAmelikai ko hanau tuʻi.
Naʻe ʻita heni ʻa ʻAmelikai mo hono kau muimuí. Naʻa nau sītuʻa ai mei he kau Nīfaí, pea nau fokotuʻu ʻa ʻAmelikai ke hoko ko honau tuʻi, pea ui kinautolu ko e kau ʻAmelikai. Naʻe tuʻutuʻuni leva ʻe ʻAmelikai ke nau tauʻi ʻa e kau Nīfaí.
Naʻe teuteu ʻa e kau Nīfai anga-tonú ke maluʻi kinautolu ʻaki ha ngaahi kaufana mo e ngahau, heletā, pea mo ha ngaahi meʻatau kehe pē.
Naʻe ʻoho mai ʻa e kau ʻAmelikaí, ka naʻe fakapoongi hanau tokolahi ʻe he kau Nīfai naʻe taki ʻe ʻAlamaá he naʻe tokoniʻi kinautolu ʻe he ʻEikí. Naʻe hola ai hono toe ʻo e kau ʻAmelikaí.
Naʻe fekau ʻe ʻAlamā ha kau mataki ke nau asiasi ki he kau ʻAmelikaí. Naʻa nau foki mai ʻo pehē kuo nau fakataha mo e kau tau tokolahi ʻa e kau Leimaná pea ʻoku nau ʻohofi ʻa e kau Nīfai ʻoku nau nofo ofi ki Seilahemalá.
Naʻe lotu ʻa e kau Nīfaí, pea naʻe toe tokoniʻi kinautolu ʻe he ʻOtuá. Naʻa nau fakapoongi ha tokolahi ʻo e kau sōtia ʻo e kau tau Leimana mo ʻAmelikaí.
Naʻe fehangahangai ʻa ʻAlamā mo ʻAmelikai ʻaki ʻena ongo heletaá. Naʻe lotu ʻa ʻAlamā ke fakahaofi ʻene moʻuí, pea foaki ʻe he ʻOtuá ha ivi mālohi kiate ia ʻo ne fakapoongi ai ʻa ʻAmelikai.
Naʻe tuli ʻe he kau Nīfaí ʻa e kau Leimaná mo e kau ʻAmelikaí ki he toafá. Naʻe mate ha tokolahi honau kau kafó, pea keina kinautolu ʻe he fanga manu kaivaó.
Naʻe fakaʻilongaʻi kulokula ʻa e kau ʻAmelikaí ʻo hangē ko e kau Leimaná, koeʻuhí ke fakakakato ʻa e kikité. Naʻe taʻofi ʻe he kau ʻAmelikaí ʻa kinautolu mei he ngaahi tāpuaki ʻo e ongoongoleleí.