Vahe 16
Ko e Hola ʻa e Tuʻi ko Limihaí mo hono Kakaí
Naʻe fokotuʻu ʻe he kau Nīfaí ʻa Limihai ke hoko ko hanau tuʻi foʻou. Ko e foha ʻo e Tuʻi ko Noá ʻa Limihai, ka naʻe ʻikai fai angahala ia ʻo hangē ko ʻene tamaí. Ko ha tangata lelei ia.
Naʻe feinga ʻa Limihai ke fakamelino mo e kau Leimaná, ka naʻe leʻohi maʻu pē ʻe he kau Leimaná ʻa e kau Nīfaí, pea nau tuʻutuʻuni fefeka foki kiate kinautolu.
Naʻe mamata ʻa Limihai ʻi ha ʻaho ʻe taha ki ha kau muli ʻi honau tuʻa koló. Naʻá ne fekau leva ke puke kinautolu. Ko e kau muli ko ʻení ko ha kau Nīfai ia mei Seilahemala.
Ko e hingoa honau takí ko ʻĀmoni. Naʻe fiefia ʻa e Tuʻi ko Limihaí ke mamata kiate ia. Naʻá ne ʻiloʻi ʻe tokoni ʻa ʻĀmoni ki hono kakaí ke nau hola mei he kau Leimaná.
Naʻe fakatahaʻi mai ʻe Limihai hono kakaí. Naʻá ne fakamanatu kia kinautolu ʻa e ʻuhinga hono tuku pōpula kinautolu ʻe he kau Leimaná, ko e tupu mei heʻenau fai angahalá.
Naʻá ne fakahā ki hono kakaí ke nau fakatomala, falala ki he ʻOtuá, pea talangofua ki he ngaahi fekaú. Ka hili ia, ʻe tokoni leva ʻa e ʻOtuá kia kinautolu ke nau hao.
Naʻe ʻiloʻi ʻe he kau Nīfaí ʻoku konā maʻu pē ʻa e kau Leimana ʻoku nau leʻo ʻa e koló ʻi he poʻulí.
ʻI he pō ko iá, naʻe ʻave ʻe he Tuʻi ko Limihaí ha uaine lahi ange ko ha meʻaʻofa ki he kau leʻó.
Naʻe lava ʻa e Tuʻi ko Limihaí mo hono kakaí ʻo fakalaka atu pea hola mei he kau leʻo kuo nau mate konaá.
Naʻe taki atu ʻe ʻĀmoni ʻa e Tuʻi ko Limihaí mo hono kakaí ʻi he toafá ki he fonua ko Seilahemalá, pea naʻe talitali fiefia kinautolu.