Vahe 44
Ko Hono Tāpuakiʻi ʻe Sīsū Kalaisi ʻa e Fānau Īkí
Naʻe folofola ʻa Sīsū ki he kau Nīfaí ke ʻomi ʻenau fānaú īkí kiate ia. Naʻe takatakaiʻi ia ʻe he fānaú.
Naʻe fekau ʻe he Fakamoʻuí ki he kakaí ke nau tūʻulutui ʻi he kelekelé. Hili iá, naʻe tūʻulutui foki mo ia ke lotu ki he Tamai Hēvaní.
Naʻe pehē fau hono lahi mo fakaofo ʻa e lotu naʻe fai ʻe he Fakamoʻuí, ko ia naʻe ʻikai lava ke hiki ia. ʻI he fanongo ʻa e kakai Nīfaí ki aí, naʻe fonu honau lotó ʻi he fiefia.
Hili e lotu ʻa Sīsuú, naʻá ne folofola ange: “ʻOku mou monūʻia koeʻuhí ko hoʻomou tuí. Pea ko ʻeni vakai, ʻoku kakato ʻa ʻeku fiefiá.”
Naʻá ne tangi he naʻá ne fonu ʻi he ʻofa pea mo e fiefia lahi.
Ko ia naʻá ne fua taha taha hake ʻa e fānau īkí ʻo ne tāpuakiʻi kinautolu. Naʻá ne tāpuekina kinautolu ki he Tamai Hēvaní peá ne toe tangi foki.
Naʻá ne folofola ki he kakai Nīfaí ʻo pehē, “Vakai ki hoʻomou fānau īkí.”
Naʻe mamata ʻa e kakaí ki he ʻalu hifo mei he langí ha kau ʻāngelo takatakaiʻi ʻa e fānau īkí. Naʻe takatakaiʻi foki ʻa e fānau īkí mo e kau ʻāngeló ʻe ha afi mei he langí.