Vahe 8
Kolosi ʻi he Tahí
Naʻe folofola ʻa e ʻEikí kia Līhai ke fakaheka hono fāmilí ki he vaka kuo nau foʻú. Naʻa nau fakaheka ki ai ha ngaahi fuaʻiʻakau, kakanoʻi manu, pea mo ha huhuʻaʻi hone mo e tengaʻi ʻakau ke tō ʻi he fonua ʻo e talaʻofá.
Naʻe hanga ʻe he ngaahi matangi mālohí ʻo puhi ʻa e vaká ki he fonua ʻo e talaʻofá.
Naʻe kamata ke fai angahala ʻa Leimana, Lēmiuela, mo ha niʻihi kehe. Naʻa nau ʻita ʻi he taimi naʻe taʻofi ai kinautolu ʻe Nīfaí, pea nau haʻi ʻaki ia ha ngaahi maea.
Naʻe ʻikai toe ngāue ʻa e Liahoná, koeʻuhí ko ʻenau fai angahalá. Naʻe hanga ʻe ha ngaahi matangi mālohi ʻo puhi fakafoki ʻa e vaká ʻi ha ʻaho ʻe tolu.
Naʻe kole ʻe Līhai kia Leimana mo Lēmiuela ke vete ʻa Nīfai, ka naʻe ʻikai te na fanongo ki ai. Naʻe loto mamahi lahi ʻa Selaia mo Līhai ʻo kamata ke na puke.
Naʻe tangi ʻa e uaifi mo e fānau ʻa Nīfaí. Naʻa nau kole kia Leimana mo Lēmiuela ke vete ʻa Nīfai, ka naʻe ʻikai ke na loto ki ai.
Naʻe toe fuʻu kovi ange ʻa e matangí ʻi he ʻaho hono faá. Naʻe kamata ke ngoto ʻa e vaká.
Naʻe ʻilo ʻe Leimana mo Lēmiuela ko ha fekauʻi mai ʻe he ʻOtuá ʻa e matangí. Naʻá na manavahē telia naʻa nau melemo.
Naʻe fakatomala ʻa Leimana mo Lēmiuela peá na vete ʻa Nīfai. Neongo naʻe fufula hono vaʻé mo hono nimá mei he maeá, ka naʻe ʻikai pē ke lāunga ʻa Nīfai.
Naʻe toʻo leva ʻe Nīfai ʻa e Liahoná, pea naʻe kamata ke toe ngāue. Naʻe lotu ʻa Nīfai, pea naʻe malū ʻa e matangí. Naʻe kamata ke nonga ʻa e tahí.
Naʻe tuʻu ʻa Nīfai ʻi he foheʻuli ʻo e vaká, pea naʻe kamata ke toe folau fakahangatonu ki he fonua ʻo e talaʻofá.