Vahe 2
Ko e Fakatokanga ʻa Līhai ki he Kakaí
Ko e tokolahi ʻo e kakai naʻa nau moʻui ʻi Selūsalema ʻi he taʻu ʻe 600 ki muʻa ʻi he ʻaloʻi ʻo Kalaisí naʻa nau fai angahala. Naʻe ʻomi ʻe he ʻOtuá ha kau palōfita ke tala kia kinautolu ke nau fakatomala, ka naʻe ʻikai ke nau fie fanongo.
Ko Līhaí ko ha palōfita. Naʻá ne lotu ke lava ʻa e kakaí ʻo fakatomala. Lolotonga ʻene lotú, naʻe hā mai ha pou maama. Naʻe folofola ʻa e ʻOtuá pea mo fakahā ha ngaahi meʻa lahi kia Līhai.
Naʻe foki ʻa Līhai ki hono ʻapí pea naʻá ne maʻu ha meʻa-hā-mai. Naʻá ne mamata ʻoku takatakai ha kau ʻāngelo tokolahi ʻi he ʻOtuá. Naʻe hiva ʻa e kau ʻāngeló mo fakamālō kiate Ia.
Naʻe mamata ʻa Līhai ʻi he meʻa-hā-mai naʻe ʻoange kiate iá ki ha tohi pea ʻoku fakahā ai ʻa e ngaahi meʻa ʻe hoko ʻi he kahaʻú. Naʻá ne lau ai ʻe fakaʻauha ʻa Selūsalema koeʻuhí ko e fai angahala ʻa e kakaí.
Naʻe fakahā ʻe Līhai ki he kakaí ʻe fakaʻauha ʻa Selūsalema. Naʻá ne toe fakahā foki mo e hāʻele mai ʻa Sīsuú. Naʻe ʻita ai ʻa e kakaí mo nau feinga ke fakapoongi ʻa Līhai, ka naʻe hanga ʻe he ʻEikí ʻo maluʻi ia.