Vahe 26

Ko e Kakai ʻo ʻĀmoní

Naʻe akoʻi ʻe he ngaahi foha ʻo Mōsaiá ʻa e ongoongoleleí ki he kau Leimaná. Naʻe lau afe ha kau Leimana naʻa nau fakatomala ʻo kau ki he Siasí.

ʻAlamā 23:4–5

Naʻe ui ʻa e kau Leimana ko ia naʻa nau kau ki he Siasí, ko e Kau ʻAnitai-Nīfai-Līhaí, pe ko e kakai ʻo ʻĀmoní. Naʻa nau hoko ko ha kakai lelei, mo faʻa ngāue.

ʻAlamā 23:17–18; ʻAlamā 27:26

Naʻe ʻita ʻa e kau Leimana ko ia naʻe ʻikai te nau fakatomalá ki he kakai ʻo ʻĀmoní, pea nau teuteu ke tau mo kinautolu.

ʻAlamā 24:1–2

Naʻe ʻilo ʻe he kakai ʻo ʻĀmoní ʻe haʻu ʻa e kau Leimaná ʻo fakapoongi kinautolu, ko ia ne nau fakapapau ai ʻe ʻikai te nau fakafepakiʻi kinautolu. Naʻa nau fakatomala mei he fakapoongi ʻo e kakaí.

ʻAlamā 24:5–6

Naʻa nau tanu ʻenau ngaahi meʻataú ʻi ha luo loloto he kelekelé, pea nau fuakava mo e ʻOtuá ʻe ʻikai te nau toe lilingi toto.

ʻAlamā 24:17–18

ʻI he aʻu mai ʻa e kau Leimana fai angahalá mo kamata ke fakapoongi kinautolu, naʻe punou pē ʻa e kakai ʻo ʻĀmoní ki he kelekelé.

ʻAlamā 24:21

Naʻe vakai ʻa e kakai Leimana fai angahalá ʻe ʻikai fakafepakiʻi kinautolu ʻe he kakai ʻo ʻĀmoní, ko ia naʻe kamata leva ke tuku ʻenau fakapoongi kinautolú.

ʻAlamā 24:23–24

Naʻe lotomamahi ʻa e kau Leimaná ʻi heʻenau tāmaté. Naʻa nau laku ʻenau ngaahi meʻataú pea nau kau mo e kakai ʻo ʻĀmoní. Naʻa nau pehē ʻe ʻikai te nau toe tau.

ʻAlamā 24:24–27

Naʻe tokolahi mo e kakai Leimana naʻa nau haʻu ʻo fakapoongi ʻa e kakai ʻo ʻĀmoní. Naʻe ʻikai pē te nau fakafepakiʻi kinautolu, pea naʻe toe fakapoongi ai ha tokolahi kehe.

ʻAlamā 27:2–3

Naʻe lotu ai ʻa ʻĀmoni ke maʻu ha tokoni, he naʻe ʻikai loto ia ke fakaʻauha ʻa e kakai ko ʻeni naʻá ne ʻofaʻí. Naʻe folofola mai ʻa e ʻEikí ke ʻave hono kakaí mei he fonuá.

ʻAlamā 27:4–5, 10–12

Naʻe foaki ʻe he kakai Nīfai ʻi Seilahemalá ʻa e fonua ʻo Selesoní moʻonautolu, pea nau maluʻi foki mo honau ngaahi kaungā-meʻá ni.

ʻAlamā 27:22–23