Vahe 11
Ko ʻĪnosi
Ko e foha ʻo Sēkope ʻa ʻĪnosi. Naʻá ne tauhi ʻa e ʻū lauʻi peletí, pea naʻá ne tohi ki ai ʻi he hili ʻa e pekia ʻene tamaí.
Naʻe ʻalu ʻa ʻĪnosi ki he vao ʻakaú ʻo fai haʻane tuli manu. Naʻá ne fakakaukau ai ki he ngaahi akonaki ʻa ʻene tamaí, pea naʻá ne fakaʻamu ke fakamolemoleʻi ʻa ʻene ngaahi angahalá.
Naʻe tūʻulutui ai ʻa ʻĪnosi ʻo lotu ki he ʻOtuá. Naʻá ne lotu ʻi he ʻahó kakato, pea naʻe kei fai pē ʻene lotú ʻo aʻu ki he poʻulí.
Naʻe fakahā ʻe he ʻOtuá kia ʻĪnosi, kuo fakamolemoleʻi ʻene ngaahi angahalá koeʻuhí ko ʻene tui kia Sīsū Kalaisí.
Naʻe fie maʻu ʻe ʻĪnosi ke tāpuakiʻi ʻe he ʻEikí ʻa e kau Nīfaí. Naʻá ne lotua ai ʻa kinautolu, pea folofola mai ʻa e ʻEikí te ne tāpuakiʻi ʻa kinautolu kapau te nau talangofua ki heʻene ngaahi fekaú.
Naʻe toe loto foki ʻa ʻĪnosi ke tāpuakiʻi ʻe he ʻEikí ʻa e kau Leimaná. Naʻá ne lotu ʻi ha tui lahi, pea naʻe talaʻofa ai ʻa e ʻEikí te ne fai ʻa ia kuo kole ʻe ʻĪnosi meiate Iá.
Pea neongo ʻa e tauʻi ʻe he kau Leimaná ʻa e kau Nīfaí mo feinga ke fakaʻauha ʻenau ngaahi lekōtí, naʻe lotu ʻa ʻĪnosi ke nau hoko ko ha kakai māʻoniʻoni.
Naʻe lotu ʻa ʻĪnosi ke maluʻi ʻa e ngaahi lekooti naʻá ne tauhí. Naʻe talaʻofa ʻa e ʻEikí ʻe toki ʻi ai ha taimi te ne ʻoange ai ki he kau Leimaná ʻa e ngaahi akonaki ʻoku ʻi he ngaahi lekōtí.
Naʻe malanga ʻa ʻĪnosi ki he kau Nīfaí. Naʻá ne loto ke nau tui ki he ʻOtuá mo tauhi ʻene ngaahi fekaú.
Naʻe feinga ʻa e kau Nīfaí ke nau akoʻi ʻa e ongoongoleleí ki he kau Leimaná, ka naʻe ʻikai ke nau fie fanongo ki ai. Naʻe fehiʻa ʻa e kau Leimaná ia ʻi he kau Nīfaí.
Naʻe fakaʻaongaʻi ʻe ʻĪnosi ʻene moʻuí ke ne akoʻi ʻa e kakaí ʻo kau kia Sīsū pea mo e ongoongoleleí. Naʻá ne tauhi ki he ʻOtuá mo ʻofa kiate ia ʻi he kotoa hono ngaahi ʻahó.