Helaman 8

Ang mga propeta nagpamatuod kang Jesukristo

Sa kalibotan diin daghang mga tingog ang nagdani kanato sa daghang mga direksiyon, ang Dios mihatag kanato og mga propeta aron pag-angkla kanato ngadto Kaniya. Sa dihang si Nephi gipangutana sa daotang mga Nephite kon nganong mapintas kaayo siyang manulti mahitungod kanila, siya mipamatuod nga maisogon mahitungod sa Manluluwas. Kini nga leksiyon makatabang kanimo nga makasabot nga ang mga propeta nagpamatuod kang Jesukristo, ug kini makatabang nimo nga mobati sa kamatuoran sa ilang mga pagpamatuod.

Hatagi og gibug-aton kon sa unsang paagi ang mga propeta nagpamatuod ni Jesukristo. Ang nag-unang responsibilidad sa mga propeta mao ang pagpamatuod kang Jesukristo (tan-awa sa Giya ngadto sa mga Kasulatan, “Propeta,” scriptures.ChurchofJesusChrist.org). Itudlo ang mga tudling sa mga kasulatan ug ang uban pang mga propetikanhong pagtulun-an nga nagpamatuod sa balaanong mga hiyas, kinabuhi, ug misyon sa Manluluwas. Dasiga ang mga estudyante sa pagkonsiderar kon sa unsang paagi ang mga propetikanhong mga pagpamatuod nakaimpluwensiya sa ilang kaugalingong pagsabot ug pagpasalamat kang Jesukristo.

Pagpangandam sa estudyante: Ikonsiderar ang pagdapit sa mga estudyante sa pagpangita og usa o labaw pa sa usa ka mga panag-ingnan sa mga propeta ug apostoles nga nagpamatuod kang Jesukristo diha sa usa ka bag-ohay lang nga kinatibuk-ang komperensiya.

Mga Posibleng Kalihokan sa Pagkat-on

Ang pagpamatuod sa usa ka saksi

Ikonsiderar ang pagdala og usa ka nut nga adunay pay panit, sama sa usa ka mani, walnut, o uban pang mga nut. Itago kini sa imong kamot o sa bag. Sultihi ang mga estudyante nga ikaw adunay usa ka butang nga wala pa makita sa mga mata sa tawo o nahikap sa mga kamot sa tawo (ang nut nga naa pay panit). Dapita ang usa ka estudyante sa pagduol ug sa pagtan-aw. Dayon pasultiha kana nga estudyante sa klase kon nagsulti ka ba sa tinuod. Pangutan-a ang mga estudyante kon motuo ba sila kanimo ug nganong mituo sila o nganong dili. Human ninyo hisgoti isip usa ka klase kon ang mga estudyante mituo ba kanimo, ipakita kanila ang nut.

Kadaghanan sa mga tawo wala makakita kang Jesukristo, apan daghan gihapon ang mituo Kaniya.

• Unsa ang pipila ka mga rason kon nganong ang mga tawo mituo ni Jesukristo?

• Unsa ang papel sa mga propeta sa pagtabang kanimo sa pagtuo sa Manluluwas?

Ang pagpamatuod sa mga propeta sa karaang panahon

Ang pangalagad ni propeta Nephi gihisgotan diha sa leksiyon sa Helaman 7–10. Kini nga leksiyon motabang sa mga estudyante sa pagpunting ngadto sa mga pagtulun-an ni Nephi diha sa Helaman 8 mahitungod sa responsibilidad sa mga propeta sa pagpamatuod kang Jesukristo. Aron matabangan ang mga estudyante sa pagribyo alang sa konteksto sa mga pagtulun-an ni Nephi diha sa Helaman 8, ikonsiderar ang pagpamubo sa mosunod nga impormasyon.

Tingali imong mahinumdoman nga si propeta Nephi nanagna ngadto sa daotan nga mga Nephite nga sila pagalaglagon kon sila dili maghinulsol (tan-awa sa Helaman 7:22–29). Daghan sa mga Nephite nasuko kang Nephi tungod sa pagsulti batok sa ilang pagkadaotan (tan-awa sa Helaman 8:1–7). Si Nephi mibadlong niini nga mga katawhan ug misulti kanila nga sila milimod dili lamang sa iyang mga pulong apan sa mga pulong sa nangaging mga propeta, lakip ni Moises, kinsa mipamatuod kang Jesukristo (tan-awa sa Helaman 8:10–13).

Basaha ang Helaman 8:13–23, mangita sa unsay gipakigbahin ni Nephi mahitungod ni Moises ug sa ubang nangaging mga propeta. Mahimo nimong markahan ang mga ngalan sa mga propeta nga ginganlan ni Nephi.

• Unsa ang managsama niining tanan nga mga propeta?

Usa ka kamatuoran nga atong makat-onan gikan niini nga mga bersikulo mao nga ang mga propeta nagpamatuod kang Jesukristo.

Si Elder Neil L. Andersen sa Korum sa Napulog Duha ka Apostoles mipahayag:

Ang labing importante nga tahas sa propeta sa Ginoo mao ang pagtudlo kanato sa Manluluwas ug paggiya kanato ngadto Kaniya. …

Ang propeta dili tigpataliwala ninyo ug sa Manluluwas. Hinoon, mobarog siya tupad kaninyo ug motudlo sa dalan paingon sa Manluluwas. Ang labing mahinungdanon nga responsibilidad ug labing bililhon nga gasa sa propeta ngari kanato mao ang iyang tinuod nga pagsaksi, ang iyang sigurado nga kahibalo, nga si Jesus mao ang Kristo. (Neil L. Andersen, “Ang Propeta sa Dios,” Liahona, Mayo 2018, 25, 27)

• Ngano sa imong hunahuna nga ang labing dako nga gasa sa usa ka propeta kanato mao ang iyang pagsaksi kang Jesukristo?

Mga panig-ingnan sa mga propeta nga nagpamatuod kang Jesukristo

Paggahin og panahon sa pagtuon sa pipila sa mga pagpamatuod sa mga propeta kang Jesukristo. Samtang magtuon ka sa ilang mga pagpamatuod, ang Espiritu Santo makapamatuod sa kamatuoran sa ilang mga pulong diha sa imong kasingkasing ug hunahuna.

Dapita ang mga estudyante sa pagkompleto sa usa o duha sa mosunod nga mga kalihokan, o mahimo nimong tugotan ang mga estudyante sa pagpili kon unsang kalihokan ang gusto nilang mahuman. Sa laing paagi, mahimo nimong ibutang ang mga estudyante ngadto sa mga grupo ug hatagan ang matag grupo og usa sa mga kapilian aron kompletohon. Ang mga miyembro gikan sa matag grupo mahimo dayong mopakigbahin kon unsay mipatigbabaw diha kanila sa mga pagpamatuod nga ilang gitun-an.

Kapilian A: Ang mga karaang propeta nagpamatuod mahitungod ni Jesukristo

Ikonsiderar ang pagpakita sa ngalan sa matag usa sa mosunod nga mga propeta nga gihisgotan diha sa Helaman 8:13–23, ang mosunod nga kaubang mga bersikulo, ug usa ka larawan sa matag propeta (kon mahimo) libot sa lawak. Sa higayon nga ang mga estudyante nakatuon na og pipila ka mga pagpamatuod, mahimo nilang irekord ang bisan unsang mga pagbati o mga impresyon nga anaa kanila samtang sila nagtuon ug ipakigbahin kadto nga mga pagbati o mga impresyon ngadto sa usa ka klasmeyt.

Basaha ang dili momenos tulo sa mosunod nga mga pagpamatuod gikan sa mga propeta nga gihisgotan ni Nephi. Paghimo og lista sa unsay gitudlo niini nga mga pagpamatuod diha kanimo mahitungod ni Jesukristo.

• Moises: Exodo 15:2; Deuteronomio 18:15 (tan-awa usab sa 3 Nephi 20:23–24)

• Abraham: Abraham 3:22–24; Ang Hubad ni Joseph Smith, Genesis 15:12

• Isaias: Isaias 7:14; 9:6; 53:3–5

• Jeremias: Jeremias 33:14–16; 50:34

• Lehi: 1 Nephi 1:14–15; 2 Nephi 2:6–8

• Nephi, anak ni Lehi: 1 Nephi 19:9–11; 2 Nephi 25:19, 23–26

Ribyoha ang lista nga imong gisulat. Hunahunaa ang pagrekord sa bisan unsa nga mga panglantaw, mga pagbati, o mga impresyon nga anaa kanimo mahitungod sa Manluluwas samtang nagtuon ka. Isulat ang pipila ka mga kapahayag [sentence] nga nagpasabot sa unsang paagi nga ang imong kinabuhi mahimong lahi kon ang mga propeta wala magtudlo kanato niini nga mga butang mahitungod ni Jesukristo.

Kapilian B: Ang mga propeta sa ulahing mga adlaw nagpamatuod ni Jesukristo

Aron matabangan ang mga estudyante nga makompleto kini nga kapilian, ikonsiderar ang paghatag og mga kapanguhaan, sama sa daghang mga kopya sa mga edisyon sa kinatibuk-ang komperensiya sa magasin nga Liahona.

Ikonsiderar ang pagpakigbahin sa pipila ka mga pagpamatuod sa mga propeta nga gihisgotan diha sa seksiyon nga “Komentaryo ug Background nga Impormasyon” kon gikinahanglan.

Pangita og duha o labaw pa sa duha ka mga panig-ingnan sa mga propeta o apostoles sa ulahing mga adlaw nga nagpamatuod ni Jesukristo. Mahimong gikan kini sa usa ka bag-ohay lang nga kinatibuk-ang komperensiya o gikan sa kasaysayan sa Simbahan. Ikonsiderar ang paggamit sa ChurchofJesusChrist.org o sa Gospel Library nga app sa imong pagpangita. Mahimo ka usab nga mobasa o maminaw sa “Ang Buhi nga Kristo: Ang Pagpamatuod sa mga Apostoles” anaa sa ChurchofJesusChrist.org.

Kon mahuman na ang mga estudyante sa ilang kalihokan, dapita sila sa pagpakigbahin sa mga panig-ingnan nga ilang nakaplagan sa mga propeta nga nagpamatuod kang Jesukristo. Siguroha nga mahatagan ang daghang mga estudyante og kahigayonan sa pagpakigbahin. Tingali makatabang ang pagpangutana sama sa “Hain nga pagpamatuod sa mga propeta ang nakadani kanimo?” o “Ngano sa imong hunahuna nga importante kini nga daghang mga propeta ang nagpamatuod mahitungod kang Jesukristo?”

Kon itugot sa panahon, mahimong mapuslanon usab alang sa mga estudyante ang pagpakigbahin sa ilang kaugalingong mga pagpamatuod kang Jesukristo.

Komentaryo ug Background nga Impormasyon

Helaman 8:19–20. Kinsa sila si Zenos, Zenock, ug Ezias, ug asa ako mahimong makabasa mahitungod kanila?

Sila si Zenos, Zenock, ug Ezias mao ang mga propeta nga gihisgotan sa Basahon ni Mormon. Ang ilang mga pagtulun-an ug mga pagpamatuod moabot unta gikan sa mga palid nga tumbaga, nga wala nato karon. Ang mga propeta sa Basahon ni Mormon nakatala nga ang matag usa kanila nagpamatuod mahitungod ni Jesukristo (tan-awa sa 1 Nephi 19:10; Alma 33:15–16; 34:7; Helaman 8:19–20). Si propeta Jacob miila kang Zenos isip tagsulat sa sambingay sa kahoy nga oliba (tan-awa sa Jacob 5:1–77).

Asa nako makita ang pipila ka mga pagpamatuod sa mga propeta sa ulahing mga adlaw?

“Espesyal nga mga Saksi ni Kristo”: Usa ka koleksiyon sa mga bidyo diin ang matag miyembro sa Unang Kapangulohan ug sa Korum sa Napulog Duha ka Apostoles mipakigbahin sa ilang pagsaksi kang Jesukristo (anaa sa ChurchofJesusChrist.org)

“Living Apostles Testify of Jesus Christ” (2:16): Usa ka hugpong sa pagpamatuod sa mga propeta sa modernong panahon kang Jesukristo (anaa sa ChurchofJesusChrist.org)

Unsay akong makat-onan mahitungod ni Jesukristo gikan sa mga propeta sa Basahon ni Mormon?

Si Presidente Russell M. Nelson mitudlo:

Kon mobasa ka sa basahon ni Mormon, isentro ang unang pagtagad sa mahinungdanong tawo diha sa basahon—sugod sa unang kapitulo hangtod sa kataposan—ang Ginoong si Jesukristo, Anak sa Buhi nga Dios. …

… Nakita sa panan-awon ni [Nephi] ang Manunubos sa kalibotan, sa Iyang yutan-ong pangalagad, ug sa Iyang Pagpalansang sa Krus. …

Ang uban pang bantogan nga mga propeta sa Basahon ni Mormon—sa ilang kaugalingon nga paagi ug panahon—nagpamatuod sa pagkabalaan ni Ginoong Jesukristo. Taliwala kanila mao ang igsoon nga lalaki ni Jared, Zenock, Neum, ug Zenos. Ang mga pagpamatuod kang Jesukristo nga nauna pa sa Iyang pagkatawo sa Bethlehem gitala usab gikan ni Hari Benjamin, Abinadi, Alma nga Tigulang, Alma nga Batan-on, Amulek, mga anak nga lalaki ni Mosiah, Kapitan Moroni, sa managsoong mga lalaki nga sila si Nephi ug Lehi, ug ni Samuel ang Lamanite. Sa daw walay kataposan nga han-ay sa propetikanhong mga pamahayag—mga pagpamatuod sa “tanang balaang propeta” [Jacob 4:4] alang sa “usa ka daghan nga mga kaliboan nga mga katuigan sa dili pa ang iyang pag-anhi” [Helaman 8:18]—ang Basahon ni Mormon naghimo og ligdong nga deklarasyon nga si Jesus mao ang Kristo, ang atong Manluluwas ug Manunubos. (Russell M. Nelson, “Ang Pagpamatoud sa Basahon ni Mormon,” Ensign,, Nob. 1999, 69)

Dugang nga mga Kalihokan sa Pagkat-on

Pagpanalipod sa mga Pagtulon-an ni Jesukristo ug sa Iyang mga Propeta

Sa dihang si Nephi gikuwestiyon sa daotan nga mga Nephite, ang uban misugod sa pagpanalipod kaniya (tan-awa sa Helaman 8:7–8). Mahimong ilhon sa mga estudyante ang mga panag-ingnan sa mga tawo nga ilang kaila kinsa maisogon ug walay kahadlok sa paghatag sa ilang mga pagpamatuod kang Jesukristo ug sa Iyang mga propeta. Mahimo usab silang maghanduraw [imagine] og mga sitwasyon nga tingale ilang maatubang diin kinahanglan nilang panalipdan ang mga propeta, ang Simbahan, ug ang Manluluwas.

Cross-reference nga kalihokan alang sa opsiyon A

Ang kahanas sa pagsumpay [link] sa mga kasulatan makatabang sa mga estudyante sa pagkonektar sa mga importante nga mga ideya. Ikonsiderar ang pagdapit sa mga estudyante sa pagpangita og panag-ingnan sa usa ka propeta nga nagpamatuod kang Jesukristo sa matag usa sa upat ka mga libro sulod sa atong sumbanan nga mga kasulatan [standard works]. Mahimo dayon nimong ipakita kanila kon unsaon sa pagsumpay sa mga tudling nga magkauban (pananglitan, pinaagi sa pagsulat sa mga pakisayran sa kasulatan diha sa mga margin o pinaagi sa paggamit sa link nga function sa Gospel Library nga app). Ang mga estudyante makapakli sa unang tudling nga ilang nakit-an ug isumpay kini sa ikaduhang tudling nga ilang nakit-an. Dayon pwede nilang ablihan ang sunod nga tudling ug isumpay kini ngadto sa ikatulo nga tudling ug sa uban pa.

Kong nasumpay-sumpay na sa mga estudyante ang tanan nilang mga tudling, dapita sila sa pagpili og usa ka hilisgotan o ulohan nga mahimo nilang isulat diha sa ilang mga kasulatan alang niana nga cross reference (pananglitan, “tahas sa usa ka propeta” o “ang mga propeta nagpamatuod kang Kristo”).

Ubang mga propeta nga nagpamatuod kang Jesukristo

Mahimong mapuslanon alang sa mga estudyante ang pagpangita og ubang mga propeta diha sa mga kasulatan kinsa nagpamatuod mahitungod ni Jesukristo, agig dugang sa mga propeta nga gihisgotan ni Nephi diha sa Helaman 8. Adunay daghang panig-ingnan sa tibuok sumbanan nga mga kasulatan [standard works], lakip na ni Adan (tan-awa sa Moises 6:51–52, 57), Enoch (tan-awa sa Moises 7:47), Noe (tan-awa sa Moises 8:23–24), Hari Benjamin (tan-awa sa Mosiah 3:5–11, 17), Abinadi (tan-awa sa Mosiah 15:5–9), Alma nga Batan-on (tan-awa sa Alma 7:7–13), Pedro (tan-awa sa Buhat 4:8–12), ug Pablo (tan-awa sa Buhat 26:22–23). Mahimo nimong ipakigbahin kini nga mga pakisayran sa kasulatan sa mga estudyante o dapiton sila sa pagpangita og ilang kaugalingong mga panag-ingnan diha sa mga kasulatan.