Helamana 13–16

Malamalama i Perofeta a le Alii

O a ni ou lagona ina ua e faalogo i tagata o faaleo ni popolega po o faitioga e uiga i perofeta? A o tu Samuelu le sa Lamana i luga o le pa ma valaau atu i tagata ia salamo, sa fefiloi a latou tali atu i ana upu. E oo foi tagata i tali faapena i perofeta i o tatou aso. O lenei lesona e mafai ona fesoasoani e te malamalama ai i le matafaioi a perofeta ma le auala e mafai ona latou fesoasoani ai ia i tatou.

Fesoasoani i tamaiti aoga e tali atu i fesili mai se tulaga o le faatuatua. A o mafaufau tamaiti aoga i a latou lava fesili ma fesili a isi e uiga i aoaoga faavae ma talitonuga a le Ekalesia, valaaulia i latou e taumafai [e saili] mo le uunaiga a le Agaga. Uunaia tamaiti aoga e manatua mea ua uma ona latou iloa ma saili i tusitusiga paia mo se malamalamaaga faaopoopo. Tuu atu ia i latou se taimi e faataitai ai mea latou te ono fai atu ai i se tasi e ese o latou manatu.

Sauniuniga a le tamaitiiti aoga: Valaaulia tamaiti aoga e o mai saunia e faasoa atu pe na faapefea ona latou iloa sa faatasi le Alii ma Ana perofeta anamua ma o loo i ai nei foi i Ana perofeta o aso nei.

Gaoioiga e Ono Mafai Ona Aoao Ai

Faalagolago i perofeta a le Alii

Ina ia saunia tamaiti aoga e mafaufau e uiga i perofeta, mafaufau e tusi le siata lenei i luga o le laupapa ma palepalealuga tali o se vasega pe valaaulia tamaiti aoga e tusi le ata i a latou api faamaumau mo suesuega ma faamaea taitoatasi pe i ni vaega toalaiti foi.

I tafatafa o le ata o loo suitulaga i vaega taitasi, lisi nisi o mafuaaga e talitonu ma mulimuli ai tagata i perofeta pe le talitonu ma faitioina foi i latou.

Afai na faia e tamaiti aoga le gaoioiga i ni vaega toalaiti pe taitoatasi, valaaulia i latou e faasoa atu o latou manatu.

Faaalu sina taimi e mafaufau loloto ai i mea ua uma ona e aoaoina ma iloa e uiga i perofeta lea e mafai ona fesoasoani ia te oe ma isi ia talitonu ua valaauina i latou e le Atua. Mo se faataitaiga, atonu na e faia se lisi o upumoni e uiga i perofeta a o e suesue e uiga ia Nifae i le Helamana 7–10.

I le Helamana 13, na auina mai ai e le Alii se isi foi perofeta faaopoopo, o Samuelu le sa Lamana. O lenei lesona o se vaaiga aoao i ana aoaoga (tagai Helamana 13–16). A o e suesue, e mafai ona e faaopoopo atu i lau lisi o upumoni e uiga i perofeta. Saili mo ni malamalamaaga ia e mafai ona fesoasoani i se tasi o loo tauivi e talitonu.

E faavae i manaoga o au tamaiti aoga ma uunaiga a le Agaga, filifili pe faapefea ona faia gaoioiga nei. E mafai ona e taulai atu i le tasi pe lua o se vasega ma aotele isi. E mafai ona e vaevaeina tamaiti aoga i ni vaega, tuu atu ia i latou e fai se tasi o [gaoioiga] e tolu, ma lipoti atu i isi tagata uma o le vasega. E mafai ona e tuuina gaoioiga taitasi i luga o se fasipepa i ni nofoaga eseese e faataamilo i le potu ma fai i tamaiti aoga e faasolo taamilo i nofoaga taitasi ma suesue gaoioiga uma e tolu.

Gaoioiga A: Ua talai atu Samuelu i sa Nifae

Faitau le Helamana 13:1–7; 14:9, ma vaavaai mo mea ua faagaeetia ai oe e uiga ia Samuelu.

• Mai le faataitaiga a Samuelu, o le a se mea na e aoaoina e uiga i perofeta? (Mafaufau e faaopoopo soo se upumoni na e mauaina i lau lisi.)

O se tasi o upumoni atonu na e maitauina e faapea, o le sāvali a se perofeta e le o sana lava lea; e mai le Alii. Mafaufau e faailoga fasifuaitau i le Helamana 13:5, 7; 14:9 lea e lagolagoina lenei upumoni. Atonu foi e te manao e faitau le Helamana 7:29 ma le Mataupu Faavae ma Feagaiga 1:38; 21:4–5 o ni mau fefaasinoa’i ma faafesootai i latou i fuaiupu i le Helamana 13.

• E mafai faapefea e le malamalama i lenei upumoni ona aafia ai le ala tatou te faalogo ai i perofeta?

• E mafai faapefea ona fesoasoani pe a tatou lagona le faaosoosoina e masalosalo pe faitioina i latou?

Mafaufau e tuuina atu ni nai kopi o le lomiga o le konafesi aoao aupito lata mai o le Liahona mo tamaiti aoga e faamaea ai le gaoioiga lenei.

Faaalu ni nai minute e iloilo ai se vaega o se lauga o le konafesi aoao talu ai nei mai le perofeta. Mafaufau i le Alii ma Ona popolega mo oe. Taumafai e faitau le lauga e peiseai o se savali mai le Alii. Saunia se tasi o mea nei:

• Saili se fasifuaitau patino po o se aoaoga e te talitonu na musuia e le Alii. Faasoa atu pe aisea.

• Faamatala mea e mafai ona e faia e maua ai se molimau patino e faapea o se savali mai le perofeta e mai le Alii ia.

Gaoioiga E: Ua tali atu sa Nifae i perofeta

Faitau le Helamana 13:24–29; 14:10, ma vaavaai mo uiga faaalia o sa Nifae e faasaga i perofeta.

• O a ni upumoni e mafai ona e faailoaina i nei fuaiupu e uiga i perofeta?

Atonu ua e maitauina se upumoni e talitutusa ma lenei: o perofeta a le Alii e le lauiloa i e amioleaga. Atonu e te manao e faamaumau lenei upumoni i tafatafa o nei fuaiupu.

• O a ni auala e te vaaia ai lenei upumoni i o tatou aso?

• E mafai faapefea e i latou o e faitioina ma teena perofeta ona avea ma “taitai valelea ma tauaso”? (Helamana 13:29).

• Afai tatou te le o atu i le Faaola ina ia salamo ma faaleleia, e faapefea ona faapei [lena] o le filifilia o le “pouliuli nai lo le malamalama”? (Helamana 13:29).

Na aoao mai Peresitene Spencer W. Kimball (1895–1985):

O perofeta … e le mafai ona [latou] suia le savali a le Alii ina ia lagona ai e tagata le toafimalie. E matua sili atu lo latou agalelei ua le avea ai ma ni e matua sauā. Ou te matua faafetai lava ona e le moomoo perofeta i le lauiloa. (Spencer W. Kimball, “Listen to the Prophets,” Ensign, May 1978, 77)

Vaai faalemafaufau faapea ua talitonu se tasi e tatau ona latou “fai soo se mea e mananao i ai o [latou] loto” (Helamana 13:27). O se taunuuga, latou te le fiafia pe a valaaulia i latou e perofeta ia salamo. E faavae i mea ua e aoaoina, saunia se tali i lenei popolega po o faitioga.

Mafaufau e valaaulia tamaiti aoga e faasoa atu se vaega se tasi o la latou tali i le vasega. Ona fesili atu lea po o ai e mafai ona faaopoopo i lena tali. Faaauau pea seia talitonu le vasega ua latou fesoasoani i le popolega.

Gaoioiga I: Ua faasaoina e le Alii ia Samuelu

Mafaufau e faaali atu le ata o Samuelu le sa Lamana o loo lauga mai i luga o le pa, o loo maua i le amataga o le lesona.

Vaai toto’a i le ata mai le amataga o le lesona. O loo faaalia ai le mea na tupu i le faaiuga o le lauga a Samuelu.

Faitau le Helamana 16:1–8, ma vaavaai ma faailoga faamaoniga o le upumoni e faapea, o le mana o le Atua e faatasi ma Ana perofeta. (Mafaufau e faaopoopo lenei upumoni i lau lisi.)

• O le a se faamaoniga na e vaaia sa faatasi le Atua ma Samuelu?

E ui e le o perofeta uma e puipuia i lenei ala, ae e puipuia e le Atua Ana perofeta seia maea la latou galuega (tagai Mosaea 13:1–4; Mataupu Faavae ma Feagaiga 122:9).

Afai e faia lenei gaoioiga o se vasega, mafaufau e faaali atu ata nei. Afai e talafeagai, faamatala otooto ia tala e fesootai i ai.

Filifili se perofeta se toatasi mai tusitusiga paia po o le talafaasolopito o le Ekalesia. Lisi mai faamaoniga e faapea sa i ai le Atua i lena perofeta. Mafaufau e faasino atu i faataitaiga nei a Noa, Mose, Peteru, ma Iosefa Samita.

(tagai Kenese 7:7, 10–13, 17, 23)

(tagai Esoto 14:21–30)

(tagai Galuega 12:4–11)

(tagai Iosefa Samita—Talafaasolopito 1:15–25)

Lisi nei loa faamaoniga e faapea o loo faatasi foi le Atua ma Ana perofeta o aso nei. O faataitaiga e mafai ona aofia ai le ala na fesoasoani ai aoaoga po o valaaulia a perofeta o aso nei ia i tatou e taulimaina faigata o o tatou taimi.

Afai e manaomia, mafaufau e faasoa atu se tasi pe sili atu o faataitaiga nei:

• Na oo mai le folafolaga i le aiga a o lei vaaia e le toatele se manaoga.

• Sa faatinoina e Peresitene Russell M. Nelson le mataupu aoaoina o le Sau, Mulimuli Mai ia te A’u, lea na folasia mai ai se faataitaiga e totonugalemu-i-le-aiga ma lagolagoina-e-le-Ekalesia mo le suesueina o tusitusiga paia, ia Oketopa 2018, a o lei faamalosia e le faama’i pipisi o le KOVITI-19 le toatele e tapuai i le aiga mo ni vaitaimi faaumiumi.

• Aisea e ono fesoasoani ai le manatua o nei faamaoniga?

E pei o le nuu o Nifae, ua ia i tatou le mana e filifili ai pe tatou te taliaina aoaoga a le perofeta pe tali atu i faitioga ma le ita. I lau api faamaumau mo suesuega, tusi ai mea ua e aoaoina e uiga i perofeta ma po o a ni ou lagona e uiga ia i latou. A o faaauau pea ona e suesue i mea na aoao atu e Samuelu le sa Lamana i lenei vaiaso, saili ma le agaga tatalo e aoao mai ma faaaoga ana aoaoga musuia.

Molimau atu e uiga i le Alii ma Ana perofeta. Mafaufau e valaaulia tamaiti aoga naunautai e faasoa atu foi a latou molimau.

Manatu ma Talaaga o Faamatalaga

E faapefea ona fetalai mai le Alii e ala mai i Ana perofeta ma isi i aso nei?

Na tuuina mai e Elder Neil L. Andersen o le Korama a Aposetolo e Toasefululua le molimau lenei:

Ou te tuu atu la’u molimau e faapea o Iesu o le Keriso, o loo Ia taitaia mataupu o lenei galuega paia, ma o le konafesi aoao o se tasi lea o taimi taua tele Na te tuuina mai ai faatonuga i Lana Ekalesia ma patino ia i tatou.

… Tatou te tulimatai atu e faalogo i “le finagalo o le Alii, … o le mafaufau lea o le Alii, … o le siufofoga lea o le Alii, ma o le mana lea o le Atua mo le faaolataga” (Mataupu Faavae ma Feagaiga 68:4). Tatou te faalagolago i le folafolaga a le Alii: “Pe i lo’u lava leo po o le leo o a’u auauna, ua tutusa lava” (Mataupu Faavae ma Feagaiga 1:38). …

Ou te folafola atu a o e saunia lou agaga ma e sau ma tulimatai atu o le a e faalogo i le siufofoga o le Alii, o le a oo atu manatu ma lagona i lou mafaufau ia ua faapatinoina faapitoa lava mo oe. (Neil L. Andersen, “Faalogoina o le Siufofoga o le Alii i le Konafesi Aoao” [na o tusiga faatekinolosi], Liahona, Mat. 2019, ChurchofJesusChrist.org)

Sa talanoa Elder Robert D. Hales (1932–2017) o le Korama a Aposetolo e Toasefululua e uiga i upu a Samuelu ma faatusatusaina i latou i upu a perofeta soifua.

Aisea e matautia ai le teena o upu a perofeta?

Sa aoao mai Peresitene Henry B. Eyring o le Au Peresitene Sili:

Pe a tatou teena le fautuaga lea e sau mai le Atua, tatou te le filifili e tutoatasi i aafiaga o loo i fafo atu. Tatou te filifilia se isi aafiaga. Tatou te teena le puipuiga a se Tama oi le Lagi e atoatoa ona alofa, e mamana uma, e silafia mea uma, o lē o lona faamoemoega atoa, e faapei [ona finagalo ai i] Lona Alo Pele, ia tuuina mai ia i tatou le ola e faavavau, e tuuina mai ia i tatou mea uma ua ia te Ia, ma toe avatu i tatou i [lona afioaga] o ni aiga i aao o Lona alofa. I le teenaina o Lana fautuaga, tatou te filifili ai le aafiaga a se isi malosiaga, o lona faamoemoega o le faia lea ia tatou pagatia ma o lona manao o le ita. (Henry B. Eyring, “Finding Safety in Counsel,” Ensign, Me 1997, 25)

Gaoioiga Faaopoopo e Aoao Ai

O se gaoioiga faaopoopo

Afai o le a aoga mo lau vasega, mafaufau e faaaofia ai le gaoioiga lenei:

Gaoioiga O: E toatele sa Nifae ua teena upu a perofeta

O le isi auala e taulima ai masalosaloga po o faitioga [e faasaga i] perofeta o le mafaufau loloto lea po o fea e ono taunuu i ai. E ui lava i aoaoga ma molimau mamana a Samuelu le sa Lamana, e toatele sa lei talitonu. Faitau fuaiupu nei ma tali a latou fesili o loo avatu faatasi ai ia iloa ai le mea na tupu ina ua aluese Samuelu:

• Helamana 16:13–14. O a ni mea se lua na amata ona faataunuuina?

• Helamana 16:15–20. Aisea na le talitonu ai tagata i valoaga a perofeta e uiga ia Iesu Keriso?

• Helamana 16:21–23. O fea na taunuu i ai lo latou le talitonu?

O se tasi o mataupu faavae e mafai ona tatou aoaoina e faapea, pe a tatou teena molimau a le Alii, ua tatou faatagaina Satani e pulea o tatou loto.

Ina ia malamalama i lenei mataupu faavae, faitau le saunoaga a Peresitene Henry B. Eyring i le “Manatu ma Talaaga o Faamatalaga.”

Fatu ni ata faataitai se lua. I se tasi, tusi e uiga i se tasi e filifili ma le filiga ma le faamaoni e mulimuli i upu a perofeta. I le isi, tusi e uiga i se tasi e faia faaiuga e teena ai upu a perofeta. Ia aofia ai po o fea e te manatu e taitai atu i ai e nei filifiliga ia tagata taitoatasi.