Atamai i Aoaoga Faavae Iloiloga 18

Malamalama i Aoaoga Faavae

O se tasi o faamoemoega o le atamai i aoaoga faavae o le fesoasoani lea ia te oe ia malamalama atili i aoaoga a le Faaola. O lenei lesona o le a tuuina atu ia te oe se avanoa e faalolotoina ai lou malamalama e uiga i upumoni o loo aoaoina i fuaitau eseese o le atamai i aoaoga faavae o le Tusi a Mamona.

O le fesoasoani i tamaiti aoga e aoao e faafesootai fuaitau o mau. O le fefaasinoa’i po o le faafesootaiina o mau e mafai ona fesoasoani i tamaiti aoga e malamalama atili ai i aoaoga faavae ma mataupu faavae o le talalelei ma vaai ai pe faapefea ona aoaoina i latou i tusi eseese o tusitusiga paia. Fesoasoani i tamaiti aoga e aoao e faaaoga mau faasino ua tuuina atu i vaefaamatalaga ma isi fesoasoaniga mo suesuega. Uunaia i latou e fatu a latou lava sootaga e faaaoga ai lauga o konafesi aoao, tusi lesona ma mekasini a le Ekalesia, ma isi punaoa faatuatuaina.

Sauniuniga a le tamaitiiti aoga: Valaaulia tamaiti aoga e filifili ma le agaga tatalo se fuaitau o le atamai i aoaoga faavae o le Tusi a Mamona lea e mafai ona faamanuiaina ai o latou olaga a o latou suesueina.

Gaoioiga e Ono Mafai Ona Aoao Ai

Atonu e manaomia ona aoao atu se lesona o fuaitau o le atamai i aoaoga faavae e suitulaga i lenei lesona toe faamanatu. Tagai i le faasologa faatulagaina o lesona ua saunia e le faatonu o le eria po o le itulagi po o le taitai faamaopoopo ia mautinoa ai o lesona taitasi o fuaitau o le atamai i aoaoga faavae o le a aoaoina a o faia vasega seminare.

O ai oe?

Vaai faalemafaufau faapea o se tasi faatoa e feiloai i ai sa manao e fia iloa atili e uiga ia te oe. Afai latou te fai atu i tagata taitasi nei e tusi se faamatalaga e tasi le fuaiupu o se mea lelei e uiga ia te oe, o le a sou manatu o le a se mea o le a tusia e tagata taitasi?

Ina ia fesoasoani i tamaiti aoga ia iloa lelei e le tasi le isi ma faateleina le lotogatasi o le vasega, valaaulia tamaiti aoga e tusi i lalo ma auina atu fuaiupu latou te manatu o le a faaaoga e tagata nei e faamatala ai i latou. Faailoa atu ia i latou e mafai ona faitauina leotele a latou pepa. Faitau ni nai pepa i le vasega, ma faatali pe a uma pepa taitasi ina ia vaai ai pe mafai e tamaiti aoga ona faailoa atu po o ai le tagata o le vasega o loo faamatalaina.

1. O lau uo mamae

2. O ou matua po o le tagata o tausia oe

3. O lau epikopo po o le peresitene o le paranesi

• E mafai faapefea e le talanoa atu i tagata eseese e iloa oe ona fesoasoani i se tasi e malamalama atili ai ia te oe?

E faapena foi, o le suesueina ma le faatusatusaina o upumoni o loo maua i le tele o fuaitau o le atamai i aoaoga faavae e mafai ai ona fesoasoani e te malamalama atoatoa ai i le Faaola ma Ana aoaoga faavae nai lo le faalagolago i se fuaitau se tasi.

O le malamalama ai i fuaitau o mau

E mafai e tamaiti aoga ona faamaea gaoioiga nei i luga o le pepa i vaega taitoatolu pe i luga o le laupapa o se vasega.

Tusi se tafatolu lapoa, ma faaigoa ona tulimanu e tolu i mau faasino nei e tolu. Valaaulia tamaiti aoga e tusi i totonu o le tafatolu upumoni ia e faaopoopo e fuaitau taitasi i lo latou malamalama. Ona talanoaina lea pe faapefea ona fesoasoani fuaitau uma e tolu e aoao atu le faagasologa o le mauaina o se molimau.

Faitau le fuaitau o le atamai i aoaoga faavae o le Moronae 10:4–5, ma tusifaamaumau mea ua e aoaoina mai ai.

Ona suesue lea o le 2 Nifae 28:30 ma le Eteru 12:6. Tusifaamaumau mea ua faaopoopo e fuaitau taitasi i lou malamalamaaga o le Moronae 10:4–5. (Atonu e te mafaufau e fefaasinoa’i pe faafesootai nei fuaitau i le tasi ma le isi.)

O le malamalama ai i autu o le talalelei

O le faaaogaina o fuaitau o mau eseese e mafai ona fesoasoani pe a e manao e aoao atili e uiga i se autu patino. Mo se faataitaiga, atonu e te manao e aoao atili e uiga ia Iesu Keriso. Mai le siata lenei, filifili ia le itiiti ifo ma le tolu o fuaitau o le atamai i aoaoga faavae ia o loo aoao mai e uiga ia Iesu Keriso. Faatusatusa mea ua e aoaoina e uiga ia te Ia mai fuaitau taitasi.

Mafaufau e faaali atu le siata lenei.

Atamai i Aoaoga Faavae o le Tusi a Mamona: Alema–Moronae

Tusi Lesona a le Faiaoga o le Tusi a Mamona (2024)

Mau Faasino	Fasifuaitau Autu o le Mau
Mau Faasino Alema 7:11–13	Fasifuaitau Autu o le Mau “Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma.”
Mau Faasino Alema 34:9–10	Fasifuaitau Autu o le Mau “E ao ona faia o se togiola, … o se taulaga e ao ina le gata ma faavavau.”
Mau Faasino Alema 39:9	Fasifuaitau Autu o le Mau “Aua e te toe saili atu i tuinanau o ou mata.”
Mau Faasino Alema 41:10	Fasifuaitau Autu o le Mau “E lei avea lava le amioleaga ma fiafia.”
Mau Faasino Helamana 5:12	Fasifuaitau Autu o le Mau “O luga lava o le papa o lo tatou Togiola … e ao ina oulua atiinaa’e ai lo oulua faavae.”
Mau Faasino 3 Nifae 11:10–11	Fasifuaitau Autu o le Mau “Na ou tuu atu ai i le finagalo o le Tamā i mea uma mai le amataga.”
Mau Faasino 3 Nifae 12:48	Fasifuaitau Autu o le Mau “Ia outou atoatoa e pei lava o aʼu, po o lo outou Tamā o le o i le lagi e atoatoa.”
Mau Faasino 3 Nifae 27:20	Fasifuaitau Autu o le Mau “O mai ia te au ma ia papatiso … ina ia faapaiaina outou i le taliaina o le Agaga Paia.”
Mau Faasino Eteru 12:6	Fasifuaitau Autu o le Mau “Auā tou te le maua se molimau seia uma ona tofotofoina o lo outou faatuatua.”
Mau Faasino Eteru 12:27	Fasifuaitau Autu o le Mau “Afai e o mai tagata ia te au … ona ou faia lea o mea vaivai ia avea ma mea malolosi ia te i latou.”
Mau Faasino Moronae 7:45-48	Fasifuaitau Autu o le Mau “O le alofa mama o le alofa le pona lea o Keriso.”
Mau Faasino Moronae 10:4–5	Fasifuaitau Autu o le Mau “Ole atu ma le loto faamaoni, ma le manatu moni i ai, ma le faatuatua ia Keriso … [ma] o le mana o le Agaga Paia e mafai ona outou iloa ai le moni o mea uma lava.”

© 2023 by Intellectual Reserve, Inc. Ua taofia aiā tatau uma.

• E faapefea e fuaitau taitasi na e filifilia ona fesoasoani ia te oe e malamalama atili ai i le Faaola?

Mafaufau e faaali atu se ata o Iesu Keriso i luga o le laupapa ma valaaulia tamaiti aoga e tusi faataamilo i le ata nisi o mau faasino na latou filifilia ma upumoni na latou mauaina.

O lau filifliga

E alofa le Tama Faalelagi ia te oe ma silafia mea e te manaomia i lou olaga, i le taimi nei ma i le lumanai. Mafaufau e ole atu ia te Ia i le tatalo e fesoasoani ia te oe e filifili se fuaitau po o se autu mai le siata o i luga e suesue i ai. Faaaoga tomai o le faafesootaiina ma le suesueina o autu na e faataitaia i le asō e aoao atili ai e uiga i le fuaitau po o le autu e te filifilia. Atonu e te faaaogaina itulau nei e taiala ai oe.

Afai e te filifili e faamaea le gaoioiga lenei o se vasega, valaaulia le vasega e filifili faatasi po o le fea fuaitau po o le autu o le talalelei latou te mananao e aoao atili i ai.

Ona valaaulia lea o tamaiti aoga e galulue i ni vaega toalaiti e sue le tele o fuaitau o le atamai i aoaoga faavae latou te mafaia i se taimi atofaina.

Ma le mea mulimuli, valaaulia tamaiti aoga e faamatala atu pe faapefea e fuaitau faaopoopo na latou maua ona faateleina lo latou malamalama i le fuaitau filifilia po o le autu.

1. Sue le lisi atoa o fuaitau o le atamai i aoaoga faavae ma fasifuaitau autu o mau o loo maua i le faaiuga o le Pepa Autu o le Atamai i Aoaoga Faavae (2023).

2. Filifili ma faitau se lua pe sili atu o ni fuaitau o le atamai i aoaoga faavae o le Tusi a Mamona ia e fesootai i le fuaitau po o le autu na e filifilia e suesue. Tusi pe faapefea ona faateleina e fuaitau taitasi lou malamalamaaga i le fuaitau po o le autu na e filifilia.

3. Filifili ma faitau se lua pe sili atu o ni fuaitau faaopoopo o le atamai i aoaoga faavae mai isi kosi o tusitusiga paia ia e faaopoopo i lou malamalamaaga o le fuaitau o le Tusi a Mamona po o le autu na e filifilia. Tusi pe faapefea e fuaitau taitasi ona faateleina lou malamalamaaga i le fuaitau o le Tusi a Mamona po o le autu na e filifilia.

Mafaufau loloto pe mafai faapefea e le faaaogaina pea lava pea o mea sa e faataitaia i le asō i au suesuega o tusitusiga paia i le fale ona fesoasoani ia te oe.

Afai e faamaea taitoatasi e tamaiti aoga le gaoioiga na sei mavae atu, valaaulia i latou e faasoa atu i tamaiti aoga o siomia i latou le fuaitau o le Tusi a Mamona po o le autu na latou filifilia ma mea na latou aoaoina mai fuaitau taitasi na latou mauaina.

Afai e lava le taimi, mafaufau e toe fai le gaoioiga lenei, e amata i se isi fuaitau po o se autu.