Helaman 13, Bahin 2

“Maghinulsol ug Maluwas”

Sa imong panan-aw, kasagaran ba sa mga tawo nakita ang paghinulsol isip usa ka panalangin gikan sa Dios o isip usa ka silot? Ngano man? Si Samuel ang Lamanite nahigugma gani sa mga daotan nga Nephite sa hilabihan nga iyang gibutang ang iyang kinabuhi sa peligro alang sa pagtudlo kanila nga ang paghinulsol usa ka gasa gikan ni Jesukristo nga modala ngadto sa kalipay ug kaluwasan. Kini nga leksiyon gituyo aron sa pagtabang kanimo sa pagbuntog sa bisan unsa nga mga babag sa paghinulsol.

Gamita ang mga pulong sa mga propeta aron hatagan og gibug-atonang doktrina ug mga baroganan. Ang modernong mga propeta ug ang apostoles nagtudlo, nagpasabot ug nagpatin-aw sa doktrina ug mga baroganan nga gitudlo diha sa balaan nga mga kasulatan. Ang paggamit sa mga propetikanhong mga pulong makatabang sa mga estudyante nga mas makasabot ug magkinabuhi sa ebanghelyo ni Jesukristo.

Pagpangandam sa estudyante: Dapita ang mga estudyante sa pagpamalandong kon hain sa mosunod nga mga pulong ang ilang gamiton sa paghulagway sa paghinulsol ug kon ngano: silot, paglaom, panalangin, kausaban, pag-uswag, kasakit.

Mga Posibleng Kalihokan sa Pagkat-on

Ang sakto nga dalan

Mahimong makatabang ang pagsugod sa leksiyon pinaagi sa pagsuhid sa posibleng mga babag nga mahimong atubangon sa mga estudyante sa paghinulsol. Ang mosunod simbolikanhong nagpakita sa kaimportante sa paghinulsol.

Ikonsiderar ang pagpakita niini nga hulagway sa usa ka lanaw samtang gihunahuna sa mga estudyante ang mosunod:

Hunahunaa nga pipila ka mga higala ang naningkamot sa pagpangita sa usa ka hataas nga lanaw sa bukid nga ilang nadungog apan wala gayod mabisita. Samtang nagbiyahe sila sa kamingawan, nakit-an nila ang usa ka tawo nga nag-ingon nga siya nagpuyo sa dapit sa daghang mga katuigan. Iyang gipasidan-an sila nga ang dalan nga ilang gisubay dili paingon ngadto sa lanaw ug delikado sa mga dapit. Siya nagtambag kanila sa pagtalikod ug sa pagsubay pag-usab sa ilang mga lakang ngadto sa laing dalan nga mogiya kanila nga luwas didto.

• Unsa ang pipila ka mga rason nga tingale ang managhigala dili mopatuo sa maong tawo?

Sama sa tawo sa istorya, usahay ang mga propeta makapahimangno kanato sa mga pagpili nga dili modala ngadto sa kalipay, pag-uswag, ug pagbalik ngadto sa Langitnong Amahan. Sila mahimong modasig kanato nga maghinulsol ug mag-usab sa atong kinabuhi.

Ikonsiderar ang pagsulat sa mga tubag sa mga estudyante diha sa pisara sa mosunod nga pangutana:

• Unsa ang pipila ka mga rason nga tingale dili kita maghinulsol?

Aron matabangan ang mga estudyante nga makonektar ang leksiyon sa ilang kahimtang, hatagi sila og panahon sa pagbuhat sa mosunod:

Sa miaging leksiyon, pinaagi sa mga pagtulun-an ni Samuel ang Lamanite ngadto sa mga Nephite, tingale imong nakat-onan nga ang Ginoo maluluy-on nga nagpasidaan sa mga katawhan sa mga sangpotanan sa sala ug mopasaylo niadtong kinsa maghinulsol. Bisan pa man, bisan og nasabtan nato kini nga kamatuoran, dili kita sa kanunay maghinulsol. Samtang magtuon ka niini nga leksiyon, tinguhaa ang tabang sa Ginoo aron mahibalo unsaon pagbuntog sa bisan unsang mga babag sa imong paghinulsol.

Mga Sangpotanan sa sala

Kon mapuslanon kini, hunahunaa ang pagpangutana, “Unsa man ang imong nakat-onan sa miaging leksiyon mahitungod sa atong panginahanglan sa paghinulsol?” Paminaw og maayo sa mga tubag sa mga estudyante, ug gamita ang mosunod nga materyal ingon nga kini mapuslanon.

Basaha ang Helaman 13:21–23, mangita sa pipila sa mga kinaiya ug mga lihok nga giingon ni Samuel nga kinahanglan nga hinulsolan sa mga tawo. Mahimong mapuslanon ang pagkahibalo nga ang tunglo “[nagdala] og mga paghukom ug sa ilang mga sangpotanan ngadto sa usa ka butang, tawo, o mga katawhan ilabi na tungod sa pagkadili matarong” (Giya ngadto sa mga Kasulatan, “Tunglo, Mga Tunglo,” scriptures.ChurchofJesusChrist.org).

Dapita ang mga estudyante sa pagpakigbahin sa unsay ilang nakaplagan.

• Agig dugang sa mga bahandi, unsa pa ang ubang mga butang nga kita matintal nga “ipahiluna ang [atong] mga kasingkasing” ug “kanunay [gihinumdom]” labaw pa kay sa Ginoo?

Ikonsiderar ang pagpangutana kon ang mga estudyante nakahunahuna og bisan unsang dugang nga mga rason nga ang mga tawo dili maminaw niini nga mga pasidaan ug maghinulsol.

Sa bersikulo 24–30, gipahimangnoan usab ni Samuel ang mga tawo mahitungod sa ilang pagsalikway sa mga propeta.

Basaha ang Helaman 13:31–38, ug tiwasa ang mosunod nga baroganan sa imong kaugalingong mga pulong: Kon kita kanunay nga mosalikway sa mga imbitasyon sa mga propeta sa paghinulsol …

Dapita ang mga estudyante sa pagkompleto sa baroganan diha sa pisara. Usa sa mga paagi nga tingale matiwas nila ang baroganan mao ang kita mag-atubang og kalaglagan ug mobati og pagmahay ug kasubo. Ikonsiderar ang pagpangutana og follow-up nga mga pangutana nga makatabang sa mga estudyante sa pagpalawom sa ilang pagsabot. Pipila niini nga mga pangutana mahimong maglakip sa mosunod: Nganong ang mga sala nga wala nato mahinulsoli sa kataposan mosangpot sa pagmahay? Sa unsang paagi nga ang pagsabot niini nga baroganan makaapekto sa atong tinguha nga maghinulsol?

Usa ka gasa gikan sa Dios

Sama sa gipamatuod ni Samuel sa mga Nephite, “walay makaluwas [kanato] … gawas sa paghinulsol ug hugot nga pagtuo diha sa Ginoong Jesukristo” (Helaman 13:6). Tungod sa Pag-ula sa Manluluwas alang kanato, “kon [kita] maghinulsol ug mobalik ngadto sa Ginoo nga [atong] Dios, [Siya] mopahilayo sa [Iyang] kasuko” (Helaman 13:11).

Samtang magbasa ka sa mosunod nga pamahayag ni Presidente Russell M. Nelson, pangitaa ang mga kamatuoran nga iyang gitudlo nga makatabang kanato sa pagbuntog sa mga babag sa paghinulsol.

Ikonsiderar ang pagbahin sa mga estudyante ngadto sa mga grupo sa tinagutlo ug paghatag sa matag estudyante og kopya sa mosunod nga pamahayag. Dapita ang matag estudyante sa pagbadlis sa butang diha sa unang parapo nga makatabang sa usa ka tawo sa pagbuntog sa babag sa paghinulsol ug sa pagsulat tapad sa parapo og usa ka pagpasabot kon sa unsang paagi kini makatabang.

Pagkahuman ipasa nila ang papel sa laing estudyante ug balikon sa pagbuhat ang proseso alang sa ikaduha nga parapo ug usab alang sa ikatulo nga parapo.

Sa kataposan, dapita ang mga estudyante sa pagbasa sa tanan nga gibadlisan ug gisulat sa ubang mga estudyante.

Daghan ra kaayo ang nagkonsiderar sa paghinulsol isip silot––usa ka butang nga likayan gawas lang sa labing seryoso nga mga sirkumstansiya. Apan kining pagbati nga gisilotan hinimo-himo ni Satanas. Siya mosulay sa pagpugong kanato sa paghunahuna kang Jesukristo, kinsa nagbarog nga andam mogakos, malaomon ug andam nga moalim, mopasaylo, mohugas, mopalig-on, molimpyo, ug mobalaan kanato. …

Walay laing mas makapagawasnon, mas makapahamili, o mas importante sa atong kaugalingong paglambo kay sa usa ka kanunay, adlaw-adlaw nga paghatag og gibug-aton sa paghinulsol. Ang paghinulsol dili usa ka panghitabo; usa kini ka proseso. Mao kini ang yawe ngadto sa kalipay ug kalinaw sa hunahuna. Kon inubanan sa hugot nga pagtuo, ang paghinulsol moabli sa atong agianan ngadto sa gahom sa Pag-ula ni Jesukristo. …

Kon kita mopili nga maghinulsol, kita mopili nga mag-usab! Atong gitugotan ang Manluluwas nga mousab kanato ngadto sa labing maayo nga bersiyon sa atong mga kaugalingon. Kita mopili nga molambo sa espirituhanon ug makadawat sa hingpit nga kalipay––ang hingpit nga kalipay sa katubsanan diha Kaniya. Kon kita mopili nga maghinulsol, kita mopili nga mas mahisama ni Jesukristo! (Russell M. Nelson, “Kita Makabuhat og Mas Maayo pa ug Mahimong Mas Maayo,” Liahona, Mayo 2019, 67)

Dapita ang mga estudyante sa pagpakigbahin kon unsay ilang nakat-onan gikan sa ilang pagtuon o sa pagtuon sa uban. Kon mapuslanon, ipangutana ang pipila sa mosunod nga mga pangutana.

• Sa unsang paagi nga ang pamahayag ni Presidente Nelson nagtabang sa usa ka tawo sa pagbuntog sa mga babag sa paghinulsol?

• Unsa nga mga resulta sa paghinulsol nga gihisgotan ni Presidente Nelson ang labing gitinguha nimo? Ngano man?

• Unsa ang gitudlo ni Presidente Nelson mahitungod sa Manluluwas nga makatabang sa usa ka tawo nga magduha-duha sa paghinulsol?

Paghinulsol

Tingali adunay dugang nga mga babag sa paghinulsol nga wala matubag ni Presidente Nelson, o tingali nagkinahanglan kita og dugang nga tabang o mga tubag. Paggahin og pipila ka minuto sa pagtuon sa gasa sa paghinulsol, pagpangita sa mga tubag sa mga pangutana nga aduna ka o sa mga kamatuoran nga makatabang kanimo sa pagbuntog sa mga babag nga imong giatubang sa paghinulsol. Ang mga kapanguhaan nga makatabang kanimo nagalakip sa “Hinulsol, Paghinulsol” diha sa Giya ngadto sa mga Kasulatan ug “Si Jesukristo Motabang Kaninyo” diha sa Alang sa Kalig-on sa mga Kabatan-onan: Usa ka Giya sa Paghimo og mga Pagpili (booklet, 2022).

• Unsa man ang imong nakat-onan nga makatabang kanimo?

• Sa unsang paagi ang Manluluwas makatabang kanato sa tibuok proseso sa paghinulsol?

Dapita ang mga estudyante sa pagpakigbahin kon unsay ilang nakat-onan. Kon ang mga estudyante adunay dugang nga mga pangutana, dapita ang klase sa pagsulay sa pagtubag niini gamit ang mga kasulatan ug ang mga pagtulun-an nga ilang gitun-an o pinaagi sa pagpakigbahin og angay nga mga kasinatian. Ipakigbahin usab ang imong mga hunahuna.

Basaha ang mga mosunod nga pagdapit gikan ni Presidente Nelson:

Mainampoong magtinguha sa pagsabot unsay makapugong sa inyong paghinulsol. Ilha unsa ang nagpugong kaninyo sa paghinulsol. Ug dayon, pag-usab! Paghinulsol! Kitang tanan makabuhat og mas maayo pa ug mahimong mas maayo pa kaysa kaniadto. (Russell M. Nelson, “Kita Makabuhat og Mas Maayo pa ug Mahimong Mas Maayo,” Liahona, Mayo 2019, 68)

Paggahin og panahon sa pagpamalandong ug sa pag-ampo ug sa pagsulat kon unsay imong gibati nga gusto sa Langitnong Amahan nga imong buhaton aron sa paghinulsol.

Pagpamatuod sa mga panalangin nga gitanyag sa Manluluwas niadtong modawat sa Iyang pagdapit sa paghinulsol.

Komentaryo ug Background nga Impormasyon

Unsa kaha kon mobati ko nga layo na kaayo ko og naabtan sa gisubayng sayop nga dalan aron mobalik?

Si Elder Jeffrey R. Holland sa Korum sa Napulog Duha ka Apostoles mitudlo:

Si Elder Dieter F. Uchtdorf sa Korum sa Napulog Duha ka Apostoles miingon:

Si Satanas gusto nga kita maghunahuna nga kon kita makasala nakalabang na kita sa usa ka “punto nga wala nay pagbalik”—nga ulahi na kaayo aron sa pag-usab sa atong padulngan. …

Si Kristo miabot aron sa pagluwas kanato. Kon sayop nga dalan ang atong gitaak, ang Pag-ula ni Jesukristo makahatag kanato sa kaseguroan nga ang sala dili usa ka punto nga wala nay pagbalik. Ang luwas nga pagbalik posible kon atong sundon ang plano sa Dios alang sa atong kaluwasan. (Dieter F. Uchtdorf, “Punto sa Luwas nga Pagbalik,” Liahona, Mayo 2007, 99)

Nganong ang mga propeta maisugon kaayo sa pagdapit sa mga tawo nga maghinulsol?

Si Presidente Boyd K. Packer (1924–2015) sa Korum sa Napulog Duha ka Apostoles mipasabot:

Adunay mga higayon nga ang mga ginikanan ug kita kinsa nangulo sa Simbahan kinahanglan mohatag og higpit nga gugma kon ang pagkapakyas sa pagtudlo ug sa pagpasidaan ug sa pagdisiplina mao ang paglaglag.

Wala kami maghimo sa mga lagda; kini gipadayag ingon nga mga sugo. Kami dili hinungdan ni kami makapugong sa mga sangpotanan kon kamo molapas sa mga moral nga balaod (tan-awa sa Doktrina ug mga Pakigsaad 101:78). Bisan pa sa pagsaway o pagsupak, kinahanglan kami magtudlo ug kinahanglan kami magpasidaan. (Boyd K. Packer, “Ye Are the Temple of God,” Ensign, Nob. 2000, 74)

Si Elder D. Todd Christofferson sa Korum sa Napulog Duha ka Apostoles mitudlo:

Mahimo ba akong maghulat ug maghinulsol sa ulahing bahin na lang sa kinabuhi?

Si Presidente Henry B. Eyring sa Unang Kapangulohan mitudlo:

Dili kana maalamon. Ako kang sultihan kon ngano. Una, ang mga tawo nga naglangay sa paghinulsol mahimong mahutdan sa panahon. Ug ikaduha, sila makakaplag og dugang nga kasakit sa dugang nga sala, dili ang kalipay nga ilang gilaoman apan dili makakaplag. (To Draw Closer to God: A Collection of Discourses [1997], 65)

Basaha ug pamalandongi ang Alma 34:32–34.

Dugang nga mga Kalihokan sa Pagkat-on

Ang pagkadaotan dili mosangpot ngadto sa kalipay

Pagdrowing og lainlaing mga agianan diha sa pisara nga nagpadulong sa lainlaing mga direksiyon. Sulati ang kataposan sa usa sa mga agianan og walay kataposan nga kalipay ug ang kataposan sa matag usa sa uban pang mga agianan og pagmahay ug kasubo.

Dapita ang mga estudyante sa pagbasa sa Helaman 13:32–39 samtang naghunahuna sa mga agianan diha sa pisara. Ipahibalo kanila nga kini nga mga bersikulo usa ka panagna nga gihatag ni Samuel kon unsa ang bation sa mga Nephite usa ka adlaw kon sila mopadayon sa ilang kasamtangang daotan nga mga agianan. Tabangi ang mga estudyante sa pag-ila og usa ka kamatuoran gikan sa bersikulo 38 sama sa dili kita makabaton og kalipay pinaagi sa pagsunod sa kadaotan. Ang mga estudyante mahimong mo-cross reference o mokonektar sa bersikulo 38 ngadto sa Alma 41:10.

Dapita ang mga estudyante sa pagpakigbahin og mga paagi nga ang mga tawo sa atong panahon mapakyas sa pagpangita og kalipay pinaagi sa pagsunod sa kadaotan. Pinaagi sa paggamit sa mga komentaryo sa mga estudyante, sulati ang lainlaing mga agianan diha sa pisara nga mosangpot sa pagmahay ug kasubo. Dayon dapita ang mga estudyante sa pagbasa sa Mga Panultihon 16:20 ug sa Mosiah 2:41, mangita kon unsa ang modala ngadto sa kalipay. Pinaagi sa paggamit sa unsay ilang nakaplagan, sulati ang dalan diha sa pisara og mahangtorong kalipay. Dayon ang mga estudyante mahimong mopakigbahin sa mga paagi nga sila misalig sa Ginoo o mituman sa Iyang mga sugo ug kon sa unsang paagi kadtong mga pagpili miresulta sa kalipay sa ilang kinabuhi.