3 Nifae 8–10

O Le Siufofoga o le Faaola i le Pouliuli

I le atu Amerika, o le tele o le faatafunaga ma le pogisa na faailogaina ai le faasatauroga o le Faaola. I se taimi i aso e tolu o le mafiafia o le pogisa, sa fetalai atu ai Iesu Keriso i tagata. O taimi ua mavae ma taimi nei, o mala faalenatura, mafatiaga, ma tofotofoga e mafai ona avea ma avanoa e aoao ai ma liliu atu ia Iesu Keriso. O lenei lesona o le a faailoa ai uiga o Iesu Keriso e mafai ona fesoasoani ia te oe e lagona ai le alofa sili atu mo Ia ma faalagolago ai ia te Ia.

Faamalosiauina o tagata aoga e taulai atu ia Iesu Keriso. Fesoasoani i tagata aoga e faatotonugalemu lo latou aoaoina o le talalelei ia Iesu Keriso ina ia mafai ai e le Agaga Paia ona faamalosia lo latou malamalama ma le talisapaia o Ia. O se tasi auala e faia ai lenei mea o le fai atu lea o fesili o le a fesoasoani i tagata aoga e vaavaai ai mo faamaoniga o Lona mana, alofa mutimutivale, ma le misiona togiola.

Sauniuniga a le tagata aoga: Valaaulia tagata aoga e faitau le 3 Nifae 8, ma vaai faalemafaufau pe ono faape’ī le i ai i le taimi o nei mea na tutupu.

Gaoioiga e Ono Mafai Ona Aoao Ai

O se afā tele

Fesili i tagata aoga pe i ai se tasi o i latou sa i ai i se afā taufaafefe, ma matautia pe na oo foi i se isi ituaiga o faalavelave faalenatura. Valaaulia se toatasi pe toalua e faasoa mai pe na faape’ī ō laua aafiaga, pe e mafai foi ona e faasoa atu sau aafiaga na i ai.

Ina ua faasatauroina Iesu Keriso i Ierusalema, o se afā ma se mafuie matautia i le atu Amerika na mafua ai le faatafunaga tele. O nei mea na tutupu na faataunuuina ai valoaga a Samuelu le sa Lamanā e uiga i faailoga o le maliu o le Faaola (tagai Helamana 14:20–27).

Ina ia aoao e uiga i auiliiliga o nei mea faataumaoi na tutupu, faitau le 3 Nifae 8:5–22. E mafai foi ona e matamata i le vitiō, “Jesus Christ Appears in the Ancient Americas,” mai le faailo taimi 0:00–3:19. O loo maua lenei vitiō i le ChurchofJesusChrist.org.

• Faamata o a ni ou mafaufauga po o ni lagona pe ana e oo i nei mea?

I tausaga e tau atu i lenei faatafunaga, o le toatele o sa Nifaē na liliuese mai le Alii ma tutuliese perofeta na auina atu e le Atua e talai atu ia i latou (tagai 3 Nifae 7:7–8, 14, 21).

Faitau le 3 Nifae 8:23–25, ma vaavaai pe na faapefea ona tali atu tagata na faasaoina ina ua uma ona oo i nei mea faataumaoi na tutupu.

• O le a faapefea ona e faamatalaina o latou lagona?

Upumoni e uiga ia Iesu Keriso

A o faanoanoa tagata i le pogisa, sa latou faalogoina le siufofoga o Iesu Keriso o fetalai atu ia i latou. Sa ia ta’ua igoa o le tele o aai ma faamalamalama atu o nā aai ma tagata na faaumatia ona o lo latou amioleaga. Ona Ia aoaoina lea o tagata i le tele o upumoni taua e uiga ia te Ia lava.

E faaopoopo atu i le faia e tagata aoga o le lisi o loo faamatalaina i le parakalafa lenei, mafaufau foi e fatu se lisi e mafai ona iloa gofie mo lau vasega i lau suesuega atoa o le 3 Nifae. E mafai ona e faaaogaina se pepa lautele po o se fasipepa e tusi ai le ulutala o loo lisi faatusilima atu i lalo. I lenei mea, tusi ai mea na maua e tagata aoga e uiga ia Iesu Keriso i le taimi o le lesona lenei ma i lesona e sosoo mai ai.

Ina ia fesoasoani e faatulaga nei upumoni, fatu se ulutala i lau api faamaumau mo suesuega e faaautuina: Aoao e uiga ia Iesu Keriso i le 3 Nifae. Atonu e te manao e faaleoleo ni itulau se tele i lau api faamaumau mo suesuega ina ia mafai ona e faaopoopoa i ai upumoni i lenei lisi i le taimi o lau suesuega o galuega a le Faaola i sa Nifaē i nai vaiaso o lumanai.

Ia mautinoa e lava se taimi e tuu atu i tagata aoga e maua ai se aafiaga anoa i le suesueina o upu a le Faaola i fuaiupu nei. Atonu e aoga le tātā o ni musika migao ma faataga i latou e suesue taitoatasi.

E mafai foi ona e vaevaeina tagata aoga i ni vaega toalaiti ma tofi vaega taitasi e suesue ma talanoaina se tasi o fuaitau o mau nei: 3 Nifae 9:13–18; 3 Nifae 9:19–22; 3 Nifae 10:4–7; ma le 3 Nifae 10:8–12. E mafai ona valaaulia tagata mai vaega taitasi e faasoa mai mea na latou aoaoina e uiga ia Iesu Keriso mai fuaiupu sa latou suesueina.

Faitau le 3 Nifae 9:13–22 ma le 10:4–12, ma vaavaai mo mea na aoao atu e Iesu Keriso i nei tagata e uiga ia te Ia lava. Tusi upumoni nei i lalo o le ulutala i lau api faamaumau mo suesuega.

Afai ua lava se taimi o tagata aoga e suesue ai, ona talanoa lea i mea na latou aoaoina. Tuu atu i le toatele o tagata aoga se avanoa e faasoa mai ai o latou malamalamaaga ma lagona e uiga ia Iesu Keriso. Faaaoga fesili e pei o fesili nei e fesoasoani e taiala ai lenei talanoaga.

• O le a se mea na aoao mai e le Faaola e uiga ia te Ia lava lea sa sili ona taua ia te oe? Aisea?

  E mafai e tagata aoga ona faailoa mai ni upumoni se tele e uiga ia Iesu Keriso. Atonu e te manao ia mautinoa ua matau e tagata aoga mea nei: Ua faaloaloa mai le aao o le alofa mutimutivale o Iesu Keiso ia i tatou (3 Nifae 9:14); O Iesu Keriso o le malamalama ma le ola o le lalolagi (3 Nifae 9:18); Ua fetalai mai Iesu Keriso ina ia tatou ofo atu ia te Ia se loto momomo ma se agaga salamo (3 Nifae 9:20); E finagalo Iesu Keriso e faapotopoto ma puipui i tatou (3 Nifae 10:4–7).

  Mafaufau e tusi upumoni nei i luga o le laupapa. E mafai ona e valaaulia tagata aoga e sue isi tala i tusitusiga paia o loo faapupula mai ai e Iesu Keriso se tasi pe sili atu foi o upumoni ua latou faailoa mai e uiga ia te Ia.

  Mo ni manatu pe faapefea ona e faaaluina se taimi tele i nisi o aoaoga patino a le Faaola mai nei fuaiupu, tagai i le vaega o “Gaoioiga Faaopoopo e Aoao Ai”.

• E mafai faapefea e upumoni ua e aoaoina e uiga ia Iesu Keriso ona aafia ai lou alofa ma le faalagolago ia te Ia?

• O a ni tulaga na e i ai, pe atonu o e i ai, lea o le a taua ai le manatuaina o se tasi pe sili atu o nei upumoni?

Molimau atu i upumoni na outou talanoaina i le asō. Faamalosiau i tagata aoga e faaauau pea ona vaavaai mo upumoni taua e uiga ia Iesu Keriso a o faaauau pea ona latou suesue i Lana galuega i totonu o sa Nifaē.

Manatu ma Talaaga o Faamatalaga

Faamata o le a faamagalo moni a’u e Iesu Keriso pe a ou faia ni mea sesē tetelē?

Sa faamamafa mai e Peresitene Boyd K.Packer (1924–2015) o le Korama a Aposetolo e Toasefululua:

E oo mai ni tusi ia i latou na faia ni measese matuia. Latou te fesili mai: “Pe mafai ea ona faamagaloina a’u?”

O le tali o le ioe!

Ua aoaoina i tatou e le talalelei e mafai ona maua le mapusaga mai mafatiaga ma ta’usalaga e ala i le salamo. E leai se amio, leai se tuinanau, leai se fouvalega, leai se solitulafono, leai se agasala e le aofia ai i le folafolaga o le faamagaloga atoatoa, vagana ai ni nai tagata toaitiiti o e ua filifili le malaia ina ua uma ona maua se malamalama atoatoa. (Boyd K. Packer, “O Le Taeao Pupula o le Faamagaloga,” Ensign, Nov. 1995, 19)

Na aoao mai Elder Jeffrey R. Holland o le Korama a Aposetolo e Toasefululua:

E lē popole tele lava le Atua po o fea sa e i ai ae popole o Ia po o fea o loo e i ai ma, faatasi ai ma Lana fesoasoani, o fea le mea o e naunau e te alu i ai. (Jeffrey R. Holland, “The Best Is Yet to Be,” [Brigham Young University devotional, Jan. 13, 2009], 27, speeches.byu.edu)

3 Nifae 9:20. O le a le uiga o le i ai o se loto momomo ma se agaga salamo?

Na aoao mai e Ezra Taft Benson (1899–1994) le mea lenei e faatatau i se loto momomo ma se agaga salamo:

O le salamo moni e aofia ai le liua o le loto a e lē na o le suia o amioga (tagai Alema 5:13). O se vaega o lenei suiga tele o le loto o le lagonaina lea o le tiga faaleatua mo a tatou agasala. O le uiga lenei o se loto momomo ma se agaga salamo. Ua lava meaalofa a le Atua e fesoasoani ai ia i tatou e faatoilalo agasala ma vaivaiga uma pe afai tatou te liliu atu ia te Ia mo se fesoasoani. O le tele o le salamo e lē aofia ai ni suiga maoae pe iloga, ae o lea laasaga ma lea laasaga, o se gaoioiga tumau ma faifai pea agai atu i le amioatua. (Aoaoga a Ezra Taft Benson [1988], 71.)

Na faamalamalama mai e Elder Bruce D. Porter (1952–2016) o le Fitugafulu:

O le gauai atoatoa atu o le Faaola i le Tama Faavavau, o le uiga tonu lea o se loto momomo ma se agaga salamo. O faataitaiga a Keriso ua aoao mai ai ia i tatou o le loto momomo o se uiga e faavavau o le tulaga faaleatua. A momomo o tatou loto tatou te nofouta lelei i le Agaga o le Atua ma iloa lo tatou faalagolago ia te Ia, i mea uma ua tatou maua ma o tatou tagata uma. O le taulaga e oo mai i lenei tulaga, o se taulaga o le faamaualuga i ona tulaga uma. E pei o le omea e mamanu gofie i lima o se faiipu atamai, e mafai ona galueaiina ma faaleleia se tagata loto momomo i aao o le Matai. …

… O i latou ua i ai se loto momomo ma se agaga salamo e naunau e fai soo se mea ma mea uma e fetalai mai ai le Atua ia i latou, e aunoa ma le tetee pe lē fiafia. E tuu lo tatou faia o mea i a tatou lava ala ae aoao e faia i le ala a le Atua. (Bruce D. Porter, “O Se Loto Momomo ma se Agaga Salamo,” Liahona, Nov. 2007, 32)

Gaoioiga Faaopoopo e Aoao Ai

3 Nifae 9:14. “Ua faaloaloa atu ia te outou lou lima alofa mutimutivale,”

Mafaufau e valaaulia tagata aoga e mafaufau e uiga i manatu sesē o tagata o ē ua liliu ese mai le Atua e uiga ia te Ia po o Ona lagona ia i latou. E mafai ona tusi tali a tagata aoga i luga o le laupapa. Ona valaaulia lea o tagata aoga e faitau le 3 Nifae 9:13–14, 22, ma vaavaai mo upu mai le Faaola e mafai ona fesoasoani e faasa’o ai nei vaaiga po o manatu sesē. O nei upu po o fasifuaitau e mafai foi ona tusia i luga o le laupapa. Valaaulia tagata aoga e talanoaina pe mafai faapefea e le malamalama i upu a le Faaola i nei fuaiupu ona tosina ai a latou amio pe a uma ona latou faia ni mea sesē.

3 Nfiae 9:18. “O au o le malamalama ma le ola o le lalolagi”

A o e valaaulia tagata aoga e faitau upu a le Faaola i le 3 Nifae 9:18, valaaulia i latou e mafaufau pe aisea na ono faapitoa ai le anoa o Lana sāvali ia sa Nifaē i le siosiomaga faaletino sa latou i ai. E mafai foi ona outou talanoa pe aisea ua avea ai le Malamalama o le Lalolagi o se faalagiga talafeagai mo Iesu Keriso. Mafaufau e valaaulia tagata aoga e suesue nisi po o mau uma nei e faaloloto ai lo latou malamalama i lenei upumoni: Ioane 8:12; 3 Nifae 18:16, 24; Mataupu Faavae ma Feagaiga 6:21; 88:7–13.

3 Nifae 9:20. “Le loto momomo ma le agaga salamo”

Atonu e fesoasoani le faamanatu i tagata aoga a o lei afio mai le Faaola i le lalolagi, sa poloaiina Ona soo e ositaulagaina manu o se vaega o le tulafono a Mose. O nei osigataulaga sa o ni faatusa o le taulaga i le lumanai a le Alo o le Atua (tagai Mose 5:5–8).

Valaaulia tagata aoga e faitau le 3 Nifae 9:19–20, ma vaavaai mo se poloaiga fou na tuuina mai e le Faaola e faatatau i taulaga. Ina ia fesoasoani i tagata aoga ia malamalama i le fasifuaitau “ia outou osi mai mo se taulaga ia te au le loto momomo ma le agaga salamo” (3 Nifae 9:20), mafaufau e faaaoga le saunoaga a Elder Bruce D. Porter i le vaega “Faamatalaga ma Talaaga”.

Talanoaina pe aisea e manatu ai tagata aoga o le a fetalai mai le Faaola ia i tatou e ofo atu se loto momomo ma se agaga salamo ia te Ia o se taulaga. Faamalosiau ia i latou e mafaufau i aafiaga na latou oo i ai lea na latou lagonaina ai se loto momomo ma se agaga salamo ma le mea na fesoasoani ia i latou e lagona ai faapena. Atonu e aoga foi le faasoa atu o au lava faataitaiga.

E mafai ona faaaoga le saunoaga lenei mai ia Elder Neal A. Maxwell (1926–2004) o le Korama a Aposetolo e Toasefululua, o se vaega o lenei talanoaga:

“O le osigataulaga moni a le tagata lava ia, sa lē o le tuuina o se manu i luga o le fatafaitaulaga. Nai lo lena, o se naunautaiga e tuu le manu o loo i totonu o i tatou [le tagata o le lalolagi] i luga o le fatafaitaulaga ina ia faaumatia!” (Neal A. Maxwell, “Deny Yourselves of All Ungodliness,” Ensign, Me 1995, 68).

3 Nifae 10:6. “Ua faafia ea ona ou manao e faapotopoto mai outou”

Mafaufau e faaali atu le ata lenei ma valaaulia tagata aoga e vaavaai i ai a o latou suesueina le 3 Nifae 10:4–7. O a upumoni e te manatu ua faamoemoe Iesu Keriso o le a malamalama ma lagonaina e tagata e uiga ia te Ia mai nei fuaiupu? Aisea e ono anoa ai nei upumoni mo oe pe a e oo i taimi o faigata?