Atamai i Aoaoga Faavae: 3 Nifae 11:10–11

“Na Ou Tuu Atu Ai i le Finagalo o le Tamā i Mea Uma mai le Amataga”

I lau suesuega o le 3 Nifae 11, na e aoao ai e uiga i le faaali atu o Iesu Keriso i sa Nifaē. Sa Ia ta’u atu ia i latou ua Ia faataunuuina le finagalo o le Tama Faalelagi e ala i le tauaveina i Ona lava luga o agasala a le lalolagi. O lenei lesona e mafai ona fesoasoani ia te oe e tauloto ai le fuaitau o le atamai i aoaoga faavae ma le fasifuaitau autu o le mau mo le 3 Nifae 11:10–11, faamatala le aoaoga faavae o loo aoao mai i lenei fuaitau, ma faaaoga mataupu faavae o le mauaina o le malamalama faaleagaga i tulaga moni o le olaga.

Tuuina atu o avanoa mo tagata aoga e tuuina mai ai molimau. Ia mautinoa ua malamalama tagata aoga e lē tau amataina se molimau i ni upu faapitoa pe na o faatulagaga aloaia e faasoa atu ai. Fesoasoani ia latou iloa o loo latou molimau atu pe a latou faasoa atu ni faaupuga faigofie, ma faamaoni o mea latou te talitonu ua moni.

Sauniuniga a le tagata aoga: Valaaulia tagata aoga e fai atu i se tagata o le aiga po o se taitai o le Ekalesia e faamatala atu ia i latou pe aisea ua latou filifili ai e mulimuli ia Iesu Keriso.

Gaoioiga e Ono Mafai Ona Aoao Ai

O lenei lesona o le fuaitau o le atamai i aoaoga faavae ua mamanuina e aoaoina pe a mae’a ona fai le lesona o le “3 Nifae 11:1–11,” o le lesona faatatau mo le fuaitau o le atamai i aoaoga faavae o le 3 Nifae 11:10–11. Afai e manaomia le tuu o le lesona lenei o le atamai i aoaoga faavae i se isi vaiaso, ia mautinoa e aoao atu ai foi le lesona faatatau e o faatasi ai i le vaiaso foi lena.

Tauloto ma faamatala

O le fasifuaitau autu o le mau mo le 3 Nifae 11:10–11 o le “Na ou tuu atu ai i le finagalo o le Tamā i mea uma mai le amataga.” Atonu e te makaina le vaega lenei o le fuaupu 11 i se ala faapitoa ia tulaga ese ai mai le vaega o totoe o le fuaiupu.

Fesoasoani i tagata aoga e tauloto le mau faasino ma le fasifuaitau autu o le mau mo le 3 Nifae 11:10–11. O se tasi o auala e faia ai lenei mea o le faaali atu lea o ata nei o Iesu Keriso, lea e faatusa i le faataunuuina e Iesu Keriso o le finagalo o le Tama e ala i le tauaveina i Ona lava luga o a tatou agasala.

Valaaulia tagata aoga e tauloto faatele le mau faasino ma le fuaitau autu o le mau. A o taulotoina e tagata aoga, fautuaina i latou ia lē na o upu e vaai i ai ae ia faapea foi i ata o loo faaali atu. Valaaulia i latou e mafaufau i le uiga o upu a le Faaola o loo latou taulotoina.

I se lesona talu ai, sa outou talanoaina ai le upumoni o loo maua i le 3 Nifae 11:11 faapea na faia e Iesu Keriso le finagalo o le Tama i le tauaveina i Ona lava luga o agasala a le lalolagi.

Vaai faalemafaufau e faapea, ua fai atu se tagata e itiiti se mea na ia iloa e uiga ia Iesu Keriso e aoao atu mea ua e iloa e uiga ia te Ia.

• I le faaaogaina o le faamatalaga o le upumoni ma le fasifuaitau autu o le mau, e faapefea ona e faamatalaina le mea na faia e Iesu Keriso mo i tatou ma aisea e taua ai?

Faataitai le faaaogaina

Toe faamanatu mo sina taimi ia mataupu faavae o le mauaina o le malamalama faaleagaga i parakalafa 5–12 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2023).

Tuu atu i tagata aoga se avanoa e faaali ai o latou malamalama i mataupu faavae o le mauaina o le malamalama faaleagaga. O se tasi o auala e faia ai lenei mea o le faaali atu lea o mataupu faavae e tolu i luga o le laupapa ma valaaulia ni nai tagata aoga e tusi pe faamatala mai mataupu faavae i se fuaiupu se tasi.

O le ata faataitai lenei e mafai ona fesoasoani i tagata aoga e faataitai ai le faaaogaina o mataupu faavae o le mauaina o le malamalama faaleagaga ma le aoaoga faavae o loo aoaoina i le 3 Nifae 11:10–11. Mafaufau e faaali atu le ata faataitai lenei ina ia mafai e tagata aoga ona tapa i ai i le taimi atoa o totoe o le lesona.

Ua amata ona faaalu e Jessica le tele o le taimi ma se vaega o uo fou. E lē mulimuli nei uo ia Iesu Keriso, ae ua ia matauina e foliga mai latou te maua pe le fiafia e aunoa ma le faailoaina o le Atua i o latou olaga. Ua aoaoina Jessica ia talitonu ma mulimuli ia Iesu Keriso. Sa ia faafesootaia i taimi uma le fiafia ma le usiusitai ia Iesu Keriso, ae ua amata ona ia mafaufau po o le a le taua o le mulimuli ia te Ia.

O mataupu faavae o le mauaina o le malamalama faaleagaga e mafai ona fesoasoani i se tulaga e pei o le tulaga a Jessica.

Iloilo manatu faavae ma fesili faatasi ai ma se vaaiga e faavavau

Ina ia fesoasoani ia te oe ia iloa le ala e mafai ai e Jessica ona iloilo lona popolega ma se vaaiga e faavavau, kopi le siata lea i lau api faamaumau mo suesuega. Ona faatumu lea o le siata i le lisiina o mafuaaga uma ma taunuuga e mafai ona e mafaufau i ai mo koluma uma e lua. Ia mautinoa e aofia ai manatu mai le 3 Nifae 11:10–11 a o e faatumuina le koluma i le itu taumatau.

E mafai ona galulue faatasi tagata aoga i ni vaega toalaiti e faauma le siata lenei, pe e mafai foi ona outou faatumuina faatasi le siata o se vasega.

Fesoasoani i tagata aoga ia lagona le malupuipuia e faailoa mai ai o latou manatu. Afai e manaomia e tagata aoga se fesoasoani i le faatumuina o le siata, e mafai ona e fai atu ni fesili fitoitonu, e pei o nei: O a ni mafuaaga atonu na i ai ia Jessica na manao ai e ola atili e pei o lana vaega o uo fou? O a ni taunuuga pupuu ma uumi o lenei filifiliga? O le a se mea ua e iloa e uiga ia Iesu Keriso o le a aoga ai le mulimuli ia te Ia? O a ni faamanuiaga e ono oo i ai Jessica e ala i le filifili e mulimuli ia Iesu Keriso?

	Mulimuli i Isi	Mulimuli ia Iesu Keriso
O Mafuaaga:	Mulimuli i Isi	Mulimuli ia Iesu Keriso
O Taunuuga:	Mulimuli i Isi	Mulimuli ia Iesu Keriso

A uma ona faatumu e tagata aoga le siata, valaaulia i latou e faasoa mai mea na latou aoaoina. E mafai ona faaaoga le fesili lenei o se vaega o le talanoaga:

• Na faapefea ona fesoasoani le mafaufau e uiga i filifiliga a Jessica i le ala lenei?

  O fesili nei e mafai ona fesoasoani i tagata aoga e iloa ai pe mafai faapefea ona fesoasoani isi mataupu faavae o le mauaina o le malamalama faaleagaga i le tulaga o Jessica.

• E faaopoopo atu i le 3 Nifae 11:10–11, o a isi punaoa paia ua filifilia e mafai ona fesoasoani ia Jessica e malamalama ai i le taua o le mulimuli ia Iesu Keriso?

  A o talanoaina e tagata aoga le fesili na muamua atu, e mafai ona faaopoopo atu o latou malamalamaaga fou i le vaega talafeagai o le koluma lona lua o a latou siata. Afai e manaomia e tagata aoga le fesoasoani i le sailia o punaoa paia, e mafai ona e faasino atu i latou i mau e pei o le Ioane 14:6; Galuega 4:12; ma le 2 Nifae 25:20.

• O le a se mea e mafai ona fai e Jessica e faateleina ai lona faatuatua ia Iesu Keriso ma atili naunau ai e mulimuli ia te Ia?

Mafaufau pe mafai faapefea e mea ua e aoaoina i le asō ona faamanuiaina ai lou olaga po o le olaga o se tasi e te iloa. Faatino uunaiga faaleagaga atonu na e maua i le taimi o le lesona.

Iloiloga o le atamai i aoaoga faavae

I le taimi o se lesona i le lumanai, faaali atu se ata se tasi pe lua o le faaali atu o Iesu Keriso i a sa Nifaē. Fai i tagata aoga e tauloto mai le fuaitau o le atamai i aoaoga faavae ma le fuaitau autu o le mau e fesootai ma lenei ata. Afai e manaomia e tagata aoga se fesoasoani, tusi ni faamatalaga i luga o le laupapa e faaosofia ai o latou manatuaga. Mo se faataitaiga, e mafai ona e tusia le 3 _______ 11:10– ____: “Na Ou _______________ i le finagalo o le _____________ i Mea _____ mai le ________________.”