3 Nifae 11:12–17

“O Mai ia te A’u”

Ina ua uma ona faalauiloa atu o le Alo Pele o le Tama Faalelagi, na valaaulia e Iesu Keriso ia tagata, e molimau patino atu e faapea na fasiotia o Ia mo agasala a le lalolagi. Sa taitasi ma ō atu ia te Ia ma tagotago i le manu’a sa i Lona itu, ma tulaga o fao i Ona lima ma vae. O lenei lesona e mafai ona fesoasoani ia te oe ia maua pe faamalosia ai lau molimau na puapuagatia Iesu Keriso ma maliu mo oe.

Fesoasoani i tagata aoga e vaai faalemafaufau i mea latou te faitauina. A i ai i tagata aoga se ata vaaia o mea na tutupu ma manatu i tusitusiga paia, o le a sili atu ona latou manatuaina. E faaopoopo atu i le faaaogaina o vitiō, ata, ma isi ala o faasalalauga, mafaufau e valaaulia tagata aoga e vaai faalemafaufau i mea taua na tutupu ma pe na faape’ī le i ai iina. E mafai e lenei mea ona valaaulia le Agaga Paia i a latou suesuega ma fesoasoani i tagata aoga ia lagona le moni ma le taua o mea o loo latou aoaoina.

Sauniuniga a le tagata aoga: Valaaulia tagata aoga e faitau le 3 Nifae 11:12–17 ma vaai faalemafaufau pe faamata o a ni o latou lagona i le faia o lenei fegalegaleaiga patino ma Iesu Keriso.

Gaoioiga e Ono Mafai Ona Aoao Ai

Ia pulea lau molimau

Mafaufau pe faapefea ona faatatau le valaaulia lenei mai ia Peresitene Russell M. Nelson ia te oe.

Ou te augani atu ia te outou ia pulea lau molimau. Galue i ai. Pulea. Tausi i ai. Faafailele ina ia tuputupu ae. Fafaga i upumoni. ’Aua ne’i faaleagaina i filosofia sesē o alii ma tamaitai lē talitonu ona e tuufesili lea pe aisea ua vaivai ai lau molimau. (Russell M. Nelson, “Filifiliga mo le Faavavau” [faigalotu i le lalolagi atoa mo le autalavou matutua, 15 Me, 2022], ChurchofJesusChrist.org)

• Aisea e te manatu e taua ai mo tagata taitoatasi ona “pulea” a latou molimau?

O se tasi o upumoni sili ona taua e mafai ona i ai se molimau o le, o Iesu Keriso o le Alo o le Atua ma le Faaola o le lalolagi. Mafaufau loloto pe aisea e manaomia ai e tagata ona iloa lenei mea e uiga ia te Ia. E mafai ona e suesueina le Ioane 14:6 ma le Mosaea 3:17 e fesoasoani e te iloa ai nisi o nei mafuaaga.

Faasoa atu le mea lenei e fesoasoani ai i tagata aoga e iloilo o latou lagona e uiga i le, ma le molimau ia Iesu Keriso. Faaali atu fesili ma tuu atu i tagata aoga se taimi e tusi ai a latou tali i a latou api faamaumau mo suesuega.

• Pe e te lagonaina e i ai sau molimau ia Iesu Keriso o le Alo o le Atua ma le Faaola o le lalolagi?

• O le a se mea na saofagā atu ia te oe e te lagona ai lagona e pei ona e i ai e uiga i le Faaola?

O nei o le a e suesue ai i se fegalegaleaiga paia a Iesu Keriso ma sa Nifaē. A o e suesue, mafaufau i mea e mafai ona e faia e maua ai pe faamalosia ai lau molimau ia Iesu Keriso.

Ua valaaulia e Iesu Keriso le au sa Nifaē ia tagotago i faailoga o Ona manu’a

Afai e manaomia, valaaulia tagata aoga e toe iloilo mea na latou aoaoina muamua i le fai atu ia i latou e aotele mai mea na tutupu i le 3 Nifae 11:1–11.

Manatua a o faapotopotoina se vaega o sa Nifaē i le laueleele o Nuumau, sa afio ifo le Alii Toetu mai le lagi. Sa Ia tautino atu o Ia o Iesu Keriso ma sa Ia faamamaluina le Tama e ala i le puapuagatia mo agasala a le lalolagi (tagai 3 Nifae 11:1–11). O le motu o tagata na aofia ai tane, fafine, ma tamaiti, sa faitaulia pe tusa ma le 2,500 tagata (tagai 3 Nifae 17:25).

Faitau le 3 Nifae 11:12–15, ma vaavaai mo le uluai valaaulia a le Alii Toetu i tagata. E mafai foi ona tou matamata i le “Jesus Christ Appears in the Ancient Americas,” o loo maua i le ChurchofJesusChrist.org, mai le faailo taimi 13:29 i le 16:03.

A o e suesue, taumafai e vaai faalemafaufau ia te oe lava o se vaega o le motu o tagata. O le vaai faalemafaufau i mea na tutupu po o manatu mai tusitusiga paia e mafai ona valaaulia ai le Agaga Paia i lau suesuega. Tusifaamaumau soo se manatu po o lagona e oo mai ia te oe a o e suesue, mafaufau loloto, ma vaai faalemafaufau.

Tuu atu i tagata aoga se taimi ia lava e suesue ai, vaai faalemafaufau, ma tusifaamaumau o latou manatu. O fesili e pei o nei e mafai ona fesoasoani i tagata aoga e maua ai le faamanuiaina i le vaai faalemafaufau:

• A o e mafaufau ia te oe lava i le malumalu i Nuumau, e faapefea ona e vaai faalemafaufau i lou siosiomaga a o e faalogo i le siufofoga o Iesu Keriso o tautino mai, “O mai ia te a’u”? (3 Nifae 11:14).

• O le a se vaaiga o e vaai faalemafaufau i ai i fofoga o le Faaola a o e suesueina tulaga o fao i ona lima ma vae?

• O le a sou manatu i lagona o tagata a o latou vaai atu i le Faaola ma fegalegaleai ma Ia “taitoatasi”? (3 Nifae 11:15).

• O a vaega o lenei tala na e filifili e vaai faalemafaufau i ai? O a nisi o ou mafaufauga ma lagona a o e faia?

• O a ni mea o aoao mai e nei fuaiupu ia te oe e uiga i le finagalo o le Alii mo i tatou taitoatasi?

O le mataupu faavae lenei e tasi e mafai ona tatou aoao mai i lenei tala paia: Ua valaaulia a’u e Iesu Keriso ia maua se molimau patino o Ia o le Faaola o le lalolagi. Mafaufau e tusi lenei mataupu faavae i au tusitusiga paia po o lau api faamaumau mo suesuega.

I le talanoa ai e uiga i le valaaulia patino ma le auaunaga a le Faaola i totonu o sa Nifaē, na aoao mai ai Epikopo Gérald Caussé o le Au Epikopo Pulefaamalumalu:

O lenei vaaiga maoae o le taulaiga sili lea o le Tusi a Mamona. O le “tala fiafia” atoa o le talalelei o loo i ai i lenei ata o le Faaola o loo faaloaloa atu ma le agalelei Ona “aao o le alofa mutimutivale” [Alema 5:33] e valaaulia ai tagata taitoatasi ia o mai ia te Ia ma maua faamanuiaga o Lana Togiola. …

… E pei lava ona valaaulia e Iesu soo taitoatasi o sa Nifaē ia tagotago i Ona manu’a, sa faapea foi ona Ia maliu mo i tatou taitoatasi, patino, e peiseai na o oe po o a’u le tagata na i ai i le lalolagi. Ua Ia tuuina mai ia i tatou se valaaulia patino ia o atu ia te Ia ma utuvai mai faamanuiaga ofoofogia o Lana Togiola. (Gerald Causse, “O Se Molimau Ola o le Keriso Soifua,” Liahona, Me 2020, 39–40)

Valaaulia ni tali se tele i le fesili lea. E mafai foi e tagata aoga ona faasoa mai mea na fesoasoani ia i latou e maua ai se molimau ia Iesu Keriso. Mafaufau e faasoa atu mea na fesoasoani ia te oe e maua ai foi se molimau.

• O a nisi o auala e mafai ona tatou maua ai a tatou lava molimau o Iesu Keriso o le Faaola o le lalolagi?

Afai e manaomia, faasoa atu se tala mai tusitusiga paia po o se lauga o le konafesi aoao lea e faapupula mai ai le ala na maua ai e tagata taitoatasi se molimau i le Faaola. O faataitaiga i tusitusiga paia e mafai ona aofia ai le fafine Samaria i le vaieli (Ioane 4:1–29), tamā o le Tupu o Lamonae (Alema 22:1–18), po o Alema le Itiiti (Alema 36:5–23).

“Osana!”

Sa matua aafia lava sa Nifaē i a latou fegalegaleaiga patino ma le Faaola.

Faitau le 3 Nifae 11:16–17, ma vaavaai pe na faapefea ona tali atu le motu o tagata ina ua mavae lo latou aafiaga ma le Alii Toetu.

Atonu e fesoasoani le iloa o le osana o se upu Eperu o lona uiga “laveai nei” po o le “faamolemole laveai i matou.” O loo faaaogaina i tusitusiga paia uma o se faailoaga o viiga ma aioiga ma ua avea o se faamanatuga o le Mesia i tupulaga uma (tagai Bible Dictionary, “Hosanna”; Taiala i Tusitusiga Paia, “Osana,” scriptures.ChurchofJesusChrist.org).

O mea nei o le a fesoasoani ia te oe e faaalu ai se taimi e faailoa atu ai ou lagona e uiga i le Faaola po o le suesue e uiga i isi o e na faasoa mai a latou molimau e uiga ia te Ia.

O gaoioiga nei ua faamoemoe e fesoasoani ai i tagata aoga e faailoa mai a latou lava molimau e uiga ia Iesu Keriso pe aoao mai i molimau a isi. Faaali atu filifiliga nei ina ia mafai e tagata aoga ona tagai i ai i le taimi atoa o le lesona. Ia saoloto e fetuunai filifiliga ina ia fetaui lelei ma manaoga o au tagata aoga.

1. Faasoa atu lau molimau patino ia Iesu Keriso e ala i le tusia o se tusi i se tasi e te lagona e mafai ona manuia ai.

2. Filifili se fuaiupu i tusitusiga paia po o se viiga e faamatala ai ou lagona pe o ai Iesu Keriso ma mea sa Ia faia mo oe. Tusi se faamalamalamaga puupuu pe aisea e anoa ai lenei fuaiupu po o le viiga ia te oe.

3. Tusi se solo po o ni upu i se pese e faamatala ai ou lagona e uiga ia Iesu Keriso.

4. Suesue i le molimau a se isi tagata e uiga ia Iesu Keriso. Aotele mea sa e suesueina ma pe o a ni ou lagona i lena tala. O faataitaiga e mafai ona aofia ai le Alema 26:1–16, 35–37 po o le “O Le Keriso Soifua: O Le Molimau a le Au Aposetolo” (ChurchofJesusChrist.org).

Valaaulia ni nai tagata aoga naunau e faasoa mai mea na latou faia mo le gaoioiga talu ai. Faafetai ia i latou mo lo latou naunau e auai. Molimau atu i upumoni sa outou talanoaina ma faamalosiau i tagata aoga e faaauau pea ona faia taumafaiga e maua pe faamalosia ai a latou molimau ia Iesu Keriso.

Manatu ma Talaaga o Faamatalaga

3 Nifae 11:14. E mafai faapefea ona ou “[alu atu]” i le Faaola?

Na aoao mai Peresitene Russell M. Nelson:

O le filifiliga e o mai ia Keriso e lē o se mea tau i se nofoaga faaletino; ae o se mea e tau i le tautinoga faaletagata lava ia. E mafai e tagata uma o le Ekalesia ona maua aoaoga faavae, sauniga, ki o le perisitua, ma faamanuiaga o le talalelei, e tusa lava po o a o latou nofoaga. (Russell M. Nelson, “O Le Lumanai o le Ekalesia: Sauniaina o le Lalolagi mo le Afio Faalua Mai o le Faaola,”Liahona, Ape. 2020, 15)

E mafai faapefea e se molimau patino ia Iesu Keriso ona tosina ai lo’u olaga?

Na aoao mai Peresitene M. Russell Ballard o le Korama a Aposetolo e Toasefululua:

E faigofie ona faaupu, o le molimau—molimau moni lava, e tuuina mai i le Agaga ma faamaonia e le Agaga Paia—e suia ai olaga. E suia ai le auala e te mafaufau ai ma mea o loo e faia. E suia ai faamatalaga o loo e faia. E aafia ai faamuamua uma e te setiina ma filifiliga uma e te faia. O le i ai o se molimau moni ma tumau o le talalelei a Iesu Keriso o le “faaleagaga … fanauina i la le Atua,” e “[talia] ona foliga i o outou mata,” ma ia oo i se “liuga tele i o outou loto” (Alema 5:14). (M. Russell Ballard, “Molimau Mama Atoatoa,” Liahona, Nov. 2004, 40)

O le a le mea e taua e uiga i manu’a ma faailoga i le tino toetu o le Faaola?

Na aoao mai Elder Gerrit W. Gong o le Korama o Aposetolo e Toasefululua:

Ua valaaulia i tatou e lo tatou Faaola ia manatua pea o Ia e pei ona Ia manatua pea i tatou.

I le Lalolagi Fou, sa valaaulia ai e lo tatou Faaola i latou na i ai e o mai, taitoatasi, e tuu atu o latou lima i Lona itu ma tagotago i tulaga o fao i Ona vae ma i Ona lima.

… Faamolemole mafaufau i le auala o loo i ai pea manu’a i Lona itu ma tulaga o fao i Ona lima ma vae i le tino toetu atoatoa o le Faaola.

E i ai taimi i le talafaasolopito, na fasiotia ai tagata e ala i le faasatauroina. Ae ua na o lo tatou Faaola, o Iesu Keriso, e opomauina i tatou a o i ai pea faailoga o Lona alofa mama. Ua na o Ia e faataunuuina le valoaga o le sii ae i luga o le satauro ina ia mafai ona Ia aumai i tatou uma taitoatasi, i o tatou igoa, ia te Ia [see 3 Nifae 27:14].

Ua tautino mai lo tatou Faaola:

“Ioe, atonu e galo ia te i latou, ae o le a lē galo ia te a’u oe.

“Ua ou taia lou faatusa i ou alofilima” [Isaia 49:15-16]. (Gerrit W. Gong, “Ia Manatua Pea o Ia,” Liahona, Me 2016, 110)

Gaoioiga Faaopoopo e Aoao Ai

Auauna atu i le tasi

A o suesueina le 3 Nifae 11:12–15, mafaufau e faamamafa atu le faataitaiga a le Faaola o le auauna atu i tagata taitoatasi. E mafai ona e valaaulia tagata aoga e mafaufau i tala faaopoopo o tusitusiga paia e uiga i le auauna atu o Iesu i se auala patino. Fai i le vasega e mafaufau pe o faapefea ona faaauau e Iesu Keriso ona auauna mai ia i tatou taitoatasi i aso nei. Faamalosiau i le vasega e mulimuli i le faataitaiga a le Faaola o le fesoasoani atu ia i latou e lē tagolima taitoatasi.

“Ou Te Iloa o Loo Soifua Lo’u Faaola”

A o outou talanoaina le taua o le mauaina o se molimau patino ia Iesu Keriso, atonu e fesoasoani le usuina pe faalogologo i le viiga “Ua Ou Iloa Lo’u Faaola” (Viiga, nu. 77). E mafai ona e faasoa atu le tala lenei o loo faamatala ai nisi o aafiaga o Samuel Medley, o lē na tusia upu o lenei viiga.

A o auauna ai i le Fuāvaa a Peretania i le 1759, sa matuai manu’a leaga ai le vae o Samuelu. Sa fai mai se fomai e tatau ona tipi. O Samuelu, sa lei avea ma se tagata lotu, sa faaaluina le po e mafaufau loloto ai i aoaoga e uiga ia Iesu Keriso ma tatalo mo lona ola ma lona vae ina ia faasaoina. O le taeao na sosoo ai, na faaleleia atili ai le vae o Samuelu ma sa lē manaomia ai ona tipiina. Sa faaalu e Samuelu lona olaga atoa o se Kerisiano faamaoni (tagai “I Know That My Redeemer Lives,” What’s New with The Tabernacle Choir [blog], Feb. 12, 2014, thetabernaclechoir.org).