3 Nephi 12:1–16

“Bulahan Kamo”

Ang Langitnong Amahan ug si Jesukristo gusto nga mopanalangin kanato. Makaseguro kita nga samtang mosunod kita sa Ilang tambag, madawat nato ang Ilang mga panalangin sumala sa Ilang panahon ug sa Ilang paagi. Sa dihang nagtudlo sa mga Nephite, si Jesus mipahayag sa daghang mga panalangin nga atong madawat. Kini nga leksiyon makatabang kanimo nga maandam nga madawat ang mga panalangin nga gisulti sa Manluluwas samtang ikaw maningkamot nga mosunod sa Iyang tambag.

Pagpunting sa Langitnong Amahan ug ni Jesukristo ingon nga tinubdan sa atong mga panalangin. Samtang nagtuon sa mga kasulatan ug naghisgot sa gisaad nga mga panalangin, hatagi og gibug-aton nga ang Langitnong Amahan ug si Jesukristo mao ang tinubdan niadto nga mga panalangin.

Pagpangandam sa estudyante: Aron matabangan nga maandam ang mga kasingkasing sa mga estudyante nga magtuon sa Wali sa Manluluwas diha sa 3 Nephi, nga susama kaayo sa Iyang Wali sa Bungtod, ikonsiderar ang pagdapit kanila sa pagpamalandong niini nga pamahayag gikan ni Presidente Joseph Fielding Smith (1876–1972). Siya miingon nga ang Wali sa Bungtod mao ang “pinakatalagsaon [nga wali] nga sukad nasangyaw, sigun sa atong nahibaloan” (Mga Pagtulun-an sa mga Presidente sa Simbahan: Joseph Fielding Smith [2013], 267).

Mga Posibleng Kalihokan sa Pagkat-on

Bulahan

Aron matabangan ang mga estudyante sa paghunahuna kon unsa gayod ang buot ipasabot sa bulahan, ikonsiderar ang pagdrowing og usa ka yano nga hapin [cover] sa magasin diha sa pisara. Panganli ang magasin og sama sa Kalibotanong Kalamposan nga Magasin ug isulat ang ngalan sa gi-feature nga artikulo sa isyu “Ang Lima ka Labing Bulahan nga Tawo sa Tuig.”

Dapita ang mga estudyante sa pagduol sa pisara ug sa pagsulat og pipila ka mga panalangin diha sa hapin [cover] sa magasin nga gilaoman nila nga tutokan sa artikulo.

Pagdrowing og susama nga hapin [cover] sa magasin nga adunay pareho nga gi-feature nga artikulo diha sa pikas nga bahin sa pisara, apan niining higayona hinganli ang magasin og Liahona. Dapita ang mga estudyante sa pagsulat og pipila ka mga panalangin nga gilaoman nila nga tutokan sa artikulo sa magasin sa Simbahan.

• Unsa ang piho nga mga panalangin ang gilaoman nimo nga tutokan sa artikulo isip sukdanan sa pagpili sa mga tawo?

Karon hunahunaa ang usa ka artikulo sa magasin nga Liahona nga adunay parehas nga ulohan.

• Unsa ang piho nga mga panalangin ang gilaoman nimo nga hisgotan sa artikulo ingon nga ang labing dako nga mga panalangin nga maangkon ni bisan kinsa?

• Ngano sa imong hunahuna nga ang Manluluwas ug ang Iyang Simbahan nagtudlo kanato sa pagbutang sa labing taas nga bili ngadto sa lain nga mga panalangin kay sa gitinguha sa kadaghanan sa kalibotan?

Sa 3 Nephi 12–14, si Jesukristo mitudlo sa mga Nephite og usa ka wali nga susama kaayo sa Iyang Wali sa Bungtod diha sa Bag-ong Tugon. Si Presidente Joseph Fielding Smith (1876–1972) miingon nga ang Wali sa Bungtod mao ang “pinakatalagsaon [nga wali] nga sukad nasangyaw, sigun sa atong nahibaloan” (Mga Pagtulun-an sa mga Presidente sa Simbahan: Joseph Fielding Smith [2013], 267).

Karon, samtang nagtuon ka sa bahin sa wali sa Manluluwas nga gitawag og Kabulahanan, makabaton ka og kahigayonan nga makat-on og mga paagi nga ang Langitnong Amahan ug si Jesukristo nagtinguha sa pagpanalangin kanimo. Si Presidente Harold B. Lee (1899–1973) nagtumong sa Kabulahanan [Beatitudes] sa Manluluwas ingon nga “ang konstitusyon alang sa usa ka hingpit nga kinabuhi” ug mipasabot nga “sa iyang Wali sa Bungtod ang Agalon naghatag kanato ingon og usa ka pagpadayag sa iyang kaugalingong kinaiya, nga hingpit, … ug sa pagbuhat sa ingon naghatag kanato sa usa ka sundanan alang sa atong kaugalingon nga mga kinabuhi” (Decisions for Successful Living [1973], 56–57). Samtang magtuon ka, pamalandongi kon nganong ang mga panalangin nga gitanyag ni Kristo niini nga wali mas bililhon pa kay sa bisan unsa sa mga panalangin nga ikatanyag sa kalibotan.

Ang mga Kabulahanan [Beatitudes] sa Amerika

Basaha ang 3 Nephi 12:1–12 ug markahi ang pulong nga “bulahan” ug ang bisan unsa nga mga panalangin nga imong makaplagan nga gilatid sa Manluluwas niini nga mga bersikulo. Timan-i nga ang pulong nga “bulahan” niini nga mga bersikulo nagpasabot nga bulahan kaayo o pinalabi sa Dios.

Ikonsiderar ang pagdapit sa mga estudyante sa pag-ihap kon kapila nila nakita ang pulong nga “bulahan” ug sa pagpakigbahin sa mga panalangin nga ilang napalgan.

• Ikonsiderar ang tanan nga mga panalangin nga gilatid sa Manluluwas niini nga mga bersikulo, unsa ang gisulti niini kanimo mahitungod Kaniya ug sa Iyang Amahan?

Usa ka kamatuoran nga atong makat-onan gikan niini nga tudling mao nga ang Langitnong Amahan ug si Jesus nalipay sa pagpanalangin kanato samtang kita naningkamot sa pagsunod sa Ilang tambag.

Basaha ang 3 Nephi 12:1–2 ug ikonsiderar ang pagmarka kon unsay gisugo sa Manluluwas nga atong buhaton kon magtinguha kita sa mga panalangin nga gitanyag Niya ug sa Iyang Amahan kanato.

Ikonsiderar ang pag-awhag sa mga estudyante sa pagtubag sa mosunod nga mga pangutana diha sa ilang mga journal sa pagtuon sa dili pa magdapit og mga boluntaryo nga mopakigbahin sa ilang mga tubag ngadto sa klase. Ang mga estudyante mahimo usab nga mopakigbahin ngadto sa usa ka pares o sa gagmay nga grupo.

• Ngano kaha sa imong hunahuna nga ang Dios mopanalangin niadtong kinsa “mopatalinghog sa mga pulong sa napulog duha nga [Iyang] gipili”? (3 Nephi 12:1).

• Sa unsang paagi ang Dios mipanalangin kanimoo sa uban nga imong nailhan tungod sa pagpatalinghog sa mga pulong sa mga propeta ug apostoles?

Kon itugot sa panahon, dapita ang mga estudyante sa pagpangita og bag-ohay lang nga pakigpulong sa kinatibuk-ang komperensiya gikan sa mga miyembro sa Unang Kapangulohan o sa Korum sa Napulog Duha ka Apostoles ug sa pagpakigbahin og mga paagi nga sa ilang hunahuna kita gipanalanginan sa pagpatalinghog sa piho nga mga pagtulun-an nga ilang nakaplagan.

Pagtinguha og mga panalangin

Sa dili pa basahon sa mga estudyante ang mosunod nga mga bersikulo, ikonsiderar ang pagdrowing og duha ka kolum diha sa pisara nga adunay mga panalangin gikan sa mga bersikulo nga gilista diha sa usa ka kolum ug ang mga binuhatan o kondisyon nga mosangpot niadto nga mga panalangin nga gilista nga wala mahan-ay diha sa laing kolum. Dapita ang mga estudyante sa pagsulay sa pagpares sa mga panalangin ngadto sa tagsa-tagsa niini ka mga binuhatan o mga kondisyon. Dayon mahimo nilang gamiton ang 3 Nephi 12:3–12 aron susihon ang ilang mga tubag.

Basaha pag-usab ang 3 Nephi 12:3–12 , niining higayona mangita kon hain nga mga kondisyon ang gilambigit sa Manluluwas ngadto sa matag panalangin. Ikonsiderar ang pagmarka niini nga mga kondisyon sa lahi nga paagi gikan sa kon giunsa nimo pagmarka ang mga panalangin, sama sa paggamit og lainlaing mga kolor o paglingin imbis nga i-highlight.

Alang sa alternatibong ideya sa pagtudlo sa Kabulahanan [Beatitudes], tan-awa ang kalihokan nga “tsart sa mga Kabulahanan ” nga anaa sa “Dugang nga mga Kalihokan sa Pagkat-on” niini nga leksiyon.

Pagpili og usa ka panalangin gikan niini nga mga bersikulo nga gusto nimong maangkon. Hatagi og pagtagad ang binuhatan o kondisyon nga mogiya ngadto niana nga panalangin. Pagtuon niana nga binuhatan o kondisyon pinaagi sa paggamit sa anaa nga mga kapanguhaan, sama sa Giya ngadto sa mga Kasulatan, Gospel Library app, o mga footnote.

Ikonsiderar ang pagdapit sa mga estudyante sa paglibot sa lawak, mangita sa uban kinsa nagtuon og lahi nga mga tudling, ug mopakigbahin sa ilang mga tubag sa mosunod nga mga pangutana.

• Unsa ang imong nakat-onan mahitungod kon unsay gikinahanglan niadtong kinsa nagtinguha sa panalangin nga imong gitun-an?

• Sa unsang paagi gipakita sa Manluluwas kana nga binuhatan o kondisyon? Sa unsang paagi ang Iyang ehemplo makatabang kanimo aron mas masabtan kon unsaon nimo sa pagtinguha niana nga panalangin?

Hinumdomi nga tungod kay ang Langitnong Amahan nahigugma kanato, Siya mopanalangin kanato sumala sa Iyang panahon ug sa Iyang paagi. (Tan-awa sa Doktrina ug mga Pakigsaad 88:64.)

Kon gibati nimo nga ang imong mga estudyante mahimong mogamit og dugang nga pagdasig aron mosalig sa Ginoo ug sa Iyang tukma nga panahon, mahimo usab nimong ipakigbahin ang pamahayag gikan ni Presidente Dallin H. Oaks diha sa “Komentaryo ug Background nga Impormasyon” nga seksiyon.

Karon nga naila na nimo ang panalangin nga imong gitinguha ug nakat-onan kon unsaon kini pagdapit diha sa imong kinabuhi, paghimo og plano kon unsaon nimo sa pagtinguha sa pagkab-ot niana nga panalangin. Ang mosunod nga mga pangutana mahimong makatabang:

• Unsa ang piho nga mga butang nga imong mahimo aron sa pagtinguha sa pagkab-ot niana nga panalangin?

• Kanus-a ka magplano nga magsugod?

• Unsa nga mga babag ang mahimong mag-ali sa dalan, ug unsaon man nimo sa pagbuntog niini?

Mahimong makatabang ang pagpakigbahin kon giunsa nimo pagkakita sa bisan unsa niini nga mga panalangin diha sa imong kinabuhi ug sa imong pagpamatuod sa tinguha sa Manluluwas sa pagpanalangin kanato.

Komentaryo ug Background nga Impormasyon

Ngano man nga ang mga panalangin sa Dios dili kanunay moabot sa paagi nga atong gilaoman?

Si Presidente Dallin H. Oaks sa Unang Kapangulohan mitudlo:

Ang hugot nga pagtuo nagpasabot og pagsalig—pagsalig sa kabubut-on sa Dios, pagsalig sa Iyang paagi sa pagbuhat sa mga butang, ug pagsalig sa Iyang gitakda nga panahon. …

Tinuod gayod, dili kita makaangkon og tinuod nga hugot nga pagtuo sa Ginoo kon wala usab ang hingpit nga pagsalig sa kabubut-on sa Ginoo ug sa tukma nga panahon sa Ginoo. (Dallin H. Oaks, “Timing,” Ensign, Okt. 2003, 12)

Unsa ang makatabang kanako nga mas masabtan ang mga Kabulahanan [Beatitudes]?

Ang mga Kabulahanan [The Beatitudes]

Pakisayran	Hiyas
Pakisayran 3 Nephi 12:3	Hiyas Kabos sa espiritu. Ang pagkamapainubsanon, o “ang pag-ila sa mapasalamatong pagdepende sa Ginoo—ang pagsabot nga ang [usa] kanunay nga nanginahanglan sa Iyang suporta. Ang pagkamapainubsanon mao ang pag-ila nga ang mga talento ug mga abilidad mga gasa gikan sa Dios” (True to the Faith: A Gospel Reference [2004], 86).
Pakisayran 3 Nephi 12:4	Hiyas Magbangutan. Ang pagbati ug pagpadayag sa kasubo mahitungod sa usa ka butang. Ang tawo mahimong magmasulub-on tungod sa mga pagsulay sa mortalidad nga nasinati nila ug sa ubang tawo. Ang tawo mahimo sab nga magmasulub-on tungod sa kasub-anan para sa sala.
Pakisayran 3 Nephi 12:5	Hiyas Maaghop. Ang “matinahoron sa Dios, matarong, mapainubsanon, matudloan, ug mapailobon ubos sa pag-antos” (Giya ngadto sa mga Kasulatan, “Maaghop, Pagkamaaghop,” scriptures.ChurchofJesusChrist.org).
Pakisayran 3 Nephi 12:6	Hiyas Gigutom ug Giuhaw sa pagkamatarong. Ang pagbaton og dakong tinguha nga masayod ug mobuhat sa kabubut-on sa Dios.
Pakisayran 3 Nephi 12:7	Hiyas Maluloy-on. Ang “pagkamanggiloy-on, matinahoron, mapasayloon, malumo, ug mapailobon, bisan pa kon nakahibalo ka sa mga kasaypanan sa ubang tawo” (True to the Faith, 103).
Pakisayran 3 Nephi 12:8	Hiyas Putli nga kasingkasing. Ang pagkalakip niadtong kinsa “nahigugma sa Ginoo, kinsa nagtinguha nga mosunod Kaniya ug motuman sa Iyang mga sugo, kinsa naningkamot nga magpuyo og mahiyason nga kinabuhi ug matinud-anong molahutay hangtod sa kataposan. Ang mga maputli og kasingkasing mao kadtong makapugong sa ilang mga hunahuna aron magpabiling gawasnon ang ilang kaugalingon gikan sa imoral nga mga pantasya ug mga binuhatan” (Sheldon F. Child, “Words of Jesus: Chastity,” Ensign, Ene. 2003, 44).
Pakisayran 3 Nephi 12:9	Hiyas Tigpasiugda sa kalinaw. “[Ang] pagtabang sa mga tawo sa pag-ila kon unsay komon kanila sa higayon nga ang uban nagtan-aw sa mga kalainan” (Henry B. Eyring, “Pagkat-on diha sa Priesthood,” Liahona, Mayo 2011, 63).
Pakisayran 3 Nephi 12:10–12	Hiyas Gigukod tungod sa ngalan ni Kristo. Andam sa pagsunod ug pagpanalipod ni Jesukristo ug sa Iyang mga pagtulun-an, bisan kon ang usa mahimong bugalbugalan o daogdaogon tungod sa pagbuhat sa ingon.

Dugang nga mga Kalihokan sa Pagkat-on

“Bulahan ang mga tigpasiugda sa kalinaw”

Aron matabangan ang mga estudyante nga mas makasabot kon unsay kahulugan sa mahimong usa ka tigpasiugda sa kalinaw, ikonsiderar ang paghatag kanila og lima ka minuto sa pagtuon sa pakigpulong nga “Pagsunod kang Jesus: Pagkahimong Magbubuhat og Kadaitan” ni Elder Neil L. Andersen sa Korum sa Napulog Duha ka Apostoles. Dayon dapita sila sa pagpakigbahin sa unsay ilang nakat-onan bahin sa pagkahimong usa ka tigpasiugda sa kalinaw.

Tsart sa mga Kabulahanan

Hatagi ang matag estudyante og kopya sa tsart sa mga Kabulahanan nga makita sa “Komentaryo ug Background nga Impormasyon” nga seksiyon niini nga leksiyon. Bahina ang mga estudyante ngadto sa gagmay nga mga grupo ug i-assign sila og usa o duha sa mga Kabulahanan nga nalista diha sa tsart. Dapita ang mga estudyante sa pag-andam og mubo nga presentasyon bahin sa natahas kanila nga (mga) Kabulahanan. Ang ilang mga presentasyon mahimong maglakip sa ilang gitahas nga mga bersikulo, impormasyon gikan sa tsart, ug uban pang mga panglantaw nga ilang naangkon samtang nagtuon sila ug namalandong sa gitahas kanila nga (mga) Kabulahanan. Ang mga estudyante mahimo usab nga mopakigbahin og mga ehemplo gikan sa kinabuhi sa Manluluwas sa kahimtang o hiyas nga gihulagway diha sa ilang (mga) bersikulo.

“Himoa nga ang inyong kahayag mohayag”

Pagpakita og mga hulagway sa asin, usa ka siyudad, ug usa ka nagsiga nga kandila. Pangutan-a ang mga estudyante kon unsay kalabotan sa matag usa niini sa mga miyembro sa Simbahan. Dapita ang mga estudyante sa pagbasa sa 3 Nephi 12:13–16 aron sa pagpangita og tubag.

Pangutan-a ang mga estudyante sa mosunod nga mga pangutana: Hain sa mga analohiya ang labing makahuluganon alang kanimo? Kanus-a nga ang pagkakita sa maayong mga buhat sa usa ka tawo nakatabang kanimo sa paghigugma o pagtinguha nga mas mailhan ang imong Amahan sa Langit?

Aron matabangan ang mga estudyante nga mas masabtan kon unsa ang kahayag nga ilang ipadan-ag, dapita sila sa pag-cross-reference sa bersikulo 16 ngadto sa 3 Nephi 18:24 ug sa pagpakigbahin kon unsay nadugang niana nga bersikulo ngadto sa ilang pagsabot sa atong kahayag.