3 Nephi 12–16

Kinatibuk-ang Pagpasabot

Sa pagtudlo sa mga tawo sa yuta sa Bountiful, si Jesus nagpahayag sa daghang mga panalangin nga atong madawat ug sa mga paagi nga kita mahimong mas mahisama Kaniya diha sa usa ka wali nga susama sa Iyang Wali sa Bungtod. Iya dayong gitabangan ang mga tawo nga masabtan ang Iyang gugma ug ang Iyang tinguha sa pagpundok sa tanang mga anak sa Dios.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang kinahanglan nga andamon daan alang sa matag leksiyon.

3 Nephi 12:1–16

Katuyoan sa leksiyon: Kini nga leksiyon makatabang sa mga estudyante nga makaandam sa pagdawat sa mga panalangin nga gisulti sa Manluluwas samtang sila maningkamot nga mosunod sa Iyang tambag.

• Pagpangandam sa estudyante: Aron matabangan nga maandam ang mga kasingkasing sa mga estudyante nga magtuon sa Wali sa Manluluwas diha sa 3 Nephi, nga susama kaayo sa Iyang Wali sa Bungtod, ikonsiderar ang pagdapit kanila sa pagpamalandong niini nga pamahayag gikan ni Presidente Joseph Fielding Smith (1876–1972). Siya miingon nga ang Wali sa Bungtod mao ang “ pinakatalagsaon [nga wali] nga sukad nasangyaw, sigon sa atong nahibaloan” (Mga Pagtulun-an sa mga Presidente sa Simbahan: Joseph Fielding Smith [2013], 267).

• Sulod nga ipakita: Usa ka yano nga drowing sa usa ka hapin [cover] sa dili tinuod nga magasin nga adunay ulohan sama sa Kalibotanong Kalamposan nga Magasin; usa ka yano nga drowing sa hapin [cover] sa Liahona nga magasin

• Sugyot sa pagtudlo sa videoconference: Kon ang mga estudyante nagtuon sa mga pakigpulong sa komperensiya gikan sa mga lider sa Simbahan, mahimo nimong tugotan sila sa pagpakigbahin sa ilang mga screen aron ipunting ang piho nga mga bahin sa mga pakigpulong nga makahuluganon ngadto kanila.

3 Nephi 12:17–48

Katuyoan sa leksiyon: Kini nga leksiyon gituyo aron matabangan ang mga estudyante nga masabtan ang ilang potensiyal nga mahimong hingpit sama sa atong Amahan sa Langit ug ni Jesukristo.

• Pagpangandam sa estudyante: Dapita ang mga estudyante sa pagtuon sa unang parapo ubos sa entry nga “Hingpit” diha sa Giya ngadto sa mga Kasulatan ug motambong nga andam sa pagpakigbahin kon unsa ang ilang nakita nga labing makahuloganon mahitungod niini nga kahulogan ug kon ngano.

• Mga hulagway nga ipakita: Mga hulagway sa usa ka liso, usa ka itoy, ug usa ka masuso

• Mga materyal alang sa mga estudyante: Gagmayng piraso sa papel alang sa mga estudyante aron masulatan

• Sugyot sa pagtudlo pinaagi sa videoconference: Sa pagsugod sa leksiyon, agig dugang sa pagpakita sa mga hulagway sa liso, itoy, ug masuso, mahimo nimong ipakita ang mga hulagway sa usa ka hingkod nga punoan sa kahoy, usa ka hingkod nga iro, ug si Jesus o ang Langitnong Amahan. Pagkahuman nga ipakita ang unang tulo ka mga hulagway, mahimo nimong matabangan ang mga estudyante nga mahanduraw ang ilang potensiyal pinaagi sa pagpakita sa dugang nga mga hulagway.

Doktrinal nga Kahanas: 3 Nephi 12:48

Katuyoan sa leksiyon: Kini nga leksiyon makatabang sa mga estudyante sa pagsag-ulo sa pakisayran ug sa mahinungdanon nga hugpong sa mga pulong sa kasulatan sa 3 Nephi 12:48, mapasabot ang doktrina nga gitudlo niini nga tudling, ug magamit ang mga baroganan sa pag-angkon og espirituhanong kahibalo sa tinuod nga mga sitwasyon sa kinabuhi.

• Pagpangandam sa estudyante: Dapita ang mga estudyante sa pagsag-ulo sa 3 Nephi 12:48 sa dili pa motambong sa klase. Mahimo nimo silang dapiton sa pagpraktis sa pagsaysay [recite] sa kasulatan gikan sa panumduman ngadto sa ubang mga sakop sa klase sa panahon nga magsingabot na ang klase,sa personal man, pinaagi sa pagmensahe, o sa ubang paagi.

• Mga materyal alang sa mga estudyante: Katunga nga mga panid sa papel

• Sugyot sa pagtudlo pinaagi sa videoconference: Alang sa bahin sa leksiyon nga “Ipasabot ug isag-ulo” mahimo kang mag-andam og usa ka dokumento nga adunay mga hugpong sa mga pulong sa kasulatan nga gisulat sa nagkalainlaing kanto sama sa gihulagway sa leksiyon. Mahimo dayon nimong ipakigbahin ang imong screen ug ipahikap sa mga estudyante ang mga hugpong sa mga pulong sa eksakto nga pagkasunod-sunod gamit ang mouse sa kompyuter. Papasa ang usa ka hugpong sa mga pulong og anam-anam, ug dapita ang mga estudyante sa pagbalik sa proseso sa paghikap sa screen gamit ang cursor ug sa pagsulti sa mga pulong hangtod nga ang dokumento mablangko. Mahimo ka usab mag-andam og daghang mga dokumento nga adunay mga hugpong sa mga pulong sa kasulatan nga gisulat sa nagkalainlaing mga kanto ug tagsa-tagsa nga ipakita ang matag dokumento, nga naghatag sa mga estudyante og higayon sa pagpangita sa han-ay sa mga pulong ug sa pagsulti sa mga mahinundanon nga hugpong sa mga pulong.

3 Nephi 13–14

Katuyoan sa leksiyon: Ang katuyoan niini nga leksiyon mao ang pagtabang sa mga estudyante nga makaila og mga baroganan gikan sa mga pagtulun-an sa Manluluwas ug makita ang ilang kalabotan sa ilang kinabuhi karon.

• Pagpangandam sa estudyante: Ikonsiderar ang pagdapit sa mga estudyante sa pagpangita ug sa pagtambong sa klase nga andam sa pagpakigbahin og pamahayag sa hinungdan-ug-epekto [cause-and-effect] nga ilang makita diha sa ilang personal nga pagtuon sa kasulatan. Mahimong gisulti kini gamit ang mga pulong nga kon ug nan, o ang tudling mahimo ra nga yano nga naghulagway kon unsang mga kapilian ang modala ngadto sa unsang mga sangpotanan.

• Sugyot sa pagtudlo pinaagi sa videoconference: Human ang mga estudyante adunay panahon sa paggamit sa mga pagtulun-an sa Manluluwas sa pagporma og mga pamahayag sa hinungdan-ug-epekto, dapita sila sa pag-post sa ilang mga pamahayag sa chat. Kini motugot sa mga estudyante sa pagkakita sa tanan nga mga pamahayag samtang sila naghisgot kon sa unsang paagi nga ang mga pagtulun-an sa Manluluwas may magamit gihapon karon.

3 Nephi 15–16

Katuyoan sa leksiyon: Kini nga leksiyon gituyo aron matabangan ang mga estudyante nga mabati ang tinguha sa Manluluwas nga mapundok sila ug ang tanan ngadto Kaniya.

• Pagpangandam sa estudyante: Dapita ang mga estudyante sa pagpamalandong kon unsaon nila sa pagtubag niini nga pangutana: “Unsa nga ebidensiya ang imong nakita nga gusto sa Manluluwas nga pundokon ang tanan ngadto Kaniya?”

• Mga hulagway: Duha ka hulagway ni Kristo (usa Niya isip magbalantay); usa ka hulagway sa toril

• Sulod nga ipakita: Mga Tudling sa Juan 10 ug 3 Nephi 15, 16 nga may kaubang mga pangutana

• Sugyot sa pagtudlo pinaagi sa videoconference: Sa sinugdanan sa leksiyon, ikonsiderar ang paghatag og pipila ka minuto sa mga estudyante aron mangita sa ilang paboritong hulagway sa Manluluwas isip magbalantay. Tugoti ang mga estudyante nga ipakigbahin ang ilang screen samtang ilang ipasabot kon unsay ilang nagustohan mahitungod sa hulagway nga ilang napilian ug kon unsay gitudlo niini ngadto kanila mahitungod kang Kristo.