3 Nephi 11:18–41

Si Jesukristo Mipahayag sa Iyang doktrina

Nakahunahuna ka ba sukad kon unsa nga mga kamatuoran ang gipakigbahin sa mga misyonaryo niadtong ilang gitudloan? Usa sa ilang labing importante nga mga mensahe may kalabotan sa unsay gikinahanglan natong buhaton aron makadawat sa mga panalangin sa kinabuhing dayon. Kini nga mensahe usahay gitawag og ang doktrina ni Kristo (tan-awa sa 2 Nephi 31:21). Ang Manluluwas mitudlo niini nga doktrina ngadto sa mga Nephite sa wala madugay human magpakita ngadto kanila diha sa templo. Kini nga leksiyon makatabang kanimo nga mas makasabot ug makapasabot sa doktrina ni Jesukristo.

Pagdasig sa mga estudyante sa pagpangandam sa pagkat-on. Sa higayon nga andamon sa mga estudyante ang ilang kaugalingon sa pagkat-on, ilang maandam ang ilang mga kasingkasing sa pagdawat sa Espiritu Santo. Ang mga estudyante mahimong mag-andam alang sa klase pinaagi sa pagbasa sa usa ka bloke sa kasulatan, pagpamalandong sa usa ka pangutana, o paghunahuna sa usa ka kasinatian nga ipakigbahin. Pagdapit sa pagpangandam sa estudyante, ug dayon paghimo og mga kahigayonan alang sa mga estudyante aron makita kon sa unsang paagi ang ilang pagpangandam nakaimpluwensiya sa ilang pagkat-on.

Pagpangandam sa estudyante: Dapita ang mga estudyante sa pagkat-on mahitungod sa doktrina ni Kristo sa wala pa ang klase. Mahimo nilang tun-an ang mga pagtulon-an sa Manluluwas diha sa 3 Nephi 11:31–41 o pangitaa ang “doktrina ni Kristo” diha sa Gospel Library nga app o sa ChurchofJesusChrist.org.

Mga Posibleng Kalihokan sa Pagkat-on

Ang mga kalihokan sa pagtuon niini nga leksiyon labing nakagputing sa doktrina ni Jesukristo nga gitudlo diha sa 3 Nephi 11:31–41. Kon gikinahanglan, gamita ang “Dugang nga mga Kalihokan sa Pagkat-on” nga seksiyon aron sa pagtabang sa mga estudyante nga makasabot sa dugang nga mga pagtulon-an sa Manluluwas diha sa 3 Nephi 11 mahitungod sa panagbingkil ug usab sa husto nga paagi sa pagbunyag sa usa ka tawo.

Mahimong usa ka sumusunod ni Jesukristo

Ikonsiderar ang pagdapit og pipila ka estudyante nga i-drama-drama ang mosunod nga senaryo diha atubangan sa klase. Aron mahatagan ang daghang mga estudyante og kahigayonan sa pagpakigbahin, ikonsiderar ang pagbahin kanila ngadto sa gagmay nga mga grupo ug pagdapit kanila nga magpuli-puli sa pagpakigbahin sa ilang mga tubag.

Handurawa nga ikaw adunay usa ka higala kinsa nahimong interesado sa Simbahan. Ang imong higala nagsulti kanimo nga siya adunay usa ka maayo nga pagbati mahitungod sa unsay iyang nakat-onan ug nasinati hangtod karon. Gusto niyang masayran kon unsay sunod nga gikinahanglan niyang buhaton aron mas hingpit nga mosunod sa Manluluwas.

• Unsa kahay imong idapit nga buhaton sa imong higala? Ngano man?

“Kini mao ang akong doktrina”

Wala madugay human ang nabanhaw nga Manluluwas mipakita ngadto sa mga Nephite didto sa yuta sa Bountiful, Siya mitudlo kanila sa Iyang doktrina. Kini nga doktrina, usahay gitawag og “ang doktrina ni Kristo” (2 Nephi 31:21), makatabang nato nga masabtan kon sa unsang paagi kita makasunod ni Jesukristo ug makadawat sa mga panalangin sa kinabuhing dayon. Karong adlawa makabaton ka og oportunidad aron mas makasabot sa doktrina ni Kristo ug makapasabot niini sa imong kaugalingong mga pulong.

Pahibaloa ang mga estudyante nga makabaton sila og kahigayonan sa pag-andam ug pagtudlo og leksiyon mahitungod sa doktrina ni Kristo ngadto sa gagmay nga grupo sa mga klasmeyt. Ipakita ang mosunod nga mga instruksiyon aron ang mga estudyante makatan-aw niini samtang sila nag-andam sa ilang mga leksiyon.

1. Tun-i ang mga pagtulun-an sa Manluluwas mahitungod sa Iyang doktrina diha sa 3 Nephi 11:31–41.

2. Kon tinguhaon, pagtuon og dugang nga mga pagtulun-an mahitungod sa doktrina o ebanghelyo ni Jesukristo, sama sa 2 Nephi 31:17–21 o 3 Nephi 27:19–22. Mahimo usab nimong pangitaon ang “doktrina ni Kristo” diha sa Gospel Library nga app o sa ChurchofJesusChrist.org.

3. Pag-andam og tulo ngadto sa lima ka minuto nga leksiyon mahitungod sa doktrina ni Kristo. Gamita ang template nga gihatag sa ubos aron sa pagtabang kanimo sa pag-andam sa imong latid [outline]. Mahimo nimong handurawon nga ikaw usa ka misyonaryo nga nag-andam niini nga leksiyon alang sa usa ka tawo nga imong gitudloan. O tingali maghunahuna ka mahitungod sa usa ka tawo nga imong kaila ug mangandam nga kintahay mopakigbahin ka og leksiyon ngadto kaniya.

Pag-apod-apod og mga kopya sa template sa leksiyon ngadto sa mga estudyante. Hatagi sila og igong panahon sa pag-andam sa ilang mga leksiyon.

Seguroha nga maghatag og mga alternatibo sa mga estudyante nga tingali mabalaka kaayo sa pagtudlo og kusog. Ang mga kapilian naglakip sa pagpasa sa ilang latid sa leksiyon o makigtinabangay kauban ang usa ka pares nga mas komportable o eksperyensiyado sa pagtudlo. Mahimong makatabang sa mga estudyante kon maghatag ka og mubo nga panig-ingnan kon unsaon sa pag-andam og mubo nga leksiyon.

Plano sa Leksiyon sa Ang Doktrina ni Kristo

Manwal sa Magtutudlo sa Basahon ni Mormon (2024)—“3 Nephi 11:18–41: Si Jesukristo Mipahayag sa Iyang Doktrina”

1. Gikan sa unsay imong nakat-onan ug gitun-an, pagsulat og usa ka pagpamubo kabahin sa doktrina ni Kristo.

2. Isulat ang duha o tulo ka pangutana nga mahimo nimong ipangutana aron matabangan kadtong imong gitudloan nga makasabot ug maghunahuna og mas lawom mahitungod sa doktrina ni Kristo.

3. Ihulagway kon nganong gibati nimo nga importante nga sundon kining mga pagtulun-an sa Manluluwas. Kon mahimo, ilakip ang mga kasinatian nga imong nasinati nga nagpakita kon sa unsang paagi kining mga pagtulun-an nakapanalangin sa imong kinabuhi.

4. Pagsulat og usa o duha ka pagdapit nga mahimo nimong ipaabot aron matabangan kadtong imong gitudloan sa paggamit sa unsay ilang nakat-onan mahitungod sa doktrina ni Kristo.

5. (Opsiyonal) Paghunahuna og usa ka butang o kalihokan aron matabangan kadtong imong gitudloan nga mas makasabot sa doktrina ni Kristo.

© 2024 by Intellectual Reserve, Inc. All rights reserved.

Human ang mga estudyante adunay igong panahon sa pagpangandam, hatagi sila og kahigayonan nga itudlo ang ilang mga leksiyon ngadto sa ilang mga kapares o sa gagmay nga mga grupo. Pagbantay nga dili pugson ang mga estudyante kinsa nabalaka kaayo sa pagtudlo og kusog sa ilang mga leksiyon. Mahimo nimong dapiton ang pipila ka andam nga mga estudyante sa pagtudlo ngadto sa tibuok klase.

Kon ang mga estudyante nakahuman na sa pagtudlo, tingali adunay panahon sa paghisgot kon unsay ilang nakat-onan. Ikonsiderar ang pagsulat sa mosunod nga kamatuoran diha sa pisara: aron sa pagsulod sa gingharian sa Dios, kinahanglan kitang mosunod sa doktrina sa Manluluwas pinaagi sa pagbaton og hugot nga pagtuo Kaniya, paghinulsol, pagpabunyag, pagdawat sa Espiritu Santo, ug paglahutay hangtod sa kataposan.

Mahimo nimong gamiton ang mga pangutana sama sa mosunod sa panahon sa imong panaghisgot:

• Ngano sa imong hunahuna nga kini nga doktrina usa sa unang mga butang nga gitudlo sa Manluluwas sa mga Nephite?

• Ngano man paminaw nimo nga kini nga mga baroganan ug mga ordinansa gikinahanglan aron makapanunod sa gingharian sa Dios?

• Unsa ang imong mabuhat aron himoon kining mga baroganan ug mga ordinansa nga mas importante nga bahin sa imong kinabuhi?

Pagsukod sa Kaugalingon

Kon adunay panahon human sa pagpakigbahin sa mga estudyante sa ilang mga leksiyon, mahimo silang mamalandong og mga paagi aron magamit ang doktrina ni Kristo ngadto sa ilang kinabuhi sa matag adlaw. Ikonsiderar ang pagpakigbahin sa mosunod nga pagsukod ug sa paghatag sa mga estudyante sa panahon sa hilom nga pagsusi sa ilang mga kaugalingon:

Sa imong pagtapos sa leksiyon, paggahin og pipila ka gutlo aron mamalandong unsaon nimo sa paggamit ang doktrina ni Kristo sa imong kinabuhi sa matag adlaw. Ang mosunod nga pagsukod sa kaugalingon makatabang kanimo sa pag-ila sa mga paagi nga kasamtangan nimong gipuy-an ang doktrina sa Manluluwas, ingon man usab ang mga paagi nga mahimo kang molambo.

Tubaga ang matag usa sa mosunod nga mga pamahayag gamit ang usa niining mga tubag: “kanunay,” “usahay,” o “talagsa ra.”

1. Nagpakita ako og hugot nga pagtuo diha ni Jesukristo pinaagi sa pagpaningkamot sa paghupot sa mga sugo ug pagsalig nga Siya makatabang kanako sa pagbuntog sa akong mga hagit.

2. Naghinulsol ako matag adlaw sa akong mga sayop ug nagtinguha sa gahom sa Manluluwas sa pagtabang nako nga mahimong mas mahisama Kaniya.

3. Naningkamot ako sa pagtuman sa akong mga pakigsaad sa bunyag ug sa matag semana nagbag-o niana nga paningkamot pinaagi sa pag-ambit sa sakramento sa takos nga paagi.

4. Nagdapit ako sa Espiritu Santo sa akong kinabuhi pinaagi sa kanunay nga pag-ampo ngadto sa Langitnong Amahan ug pagtuon ug nagtinguha sa paglihok sa espirituwal nga mga pag-aghat.

Dasiga ang mga estudyante sa pagtino og usa ka aspeto sa doktrina sa Manluluwas nga mahimo nilang mas hingpit nga puy-an sa ilang mga kinabuhi ug dayon sa paghimo og plano sa pagbuhat niini. Pagpamatuod sa mga kamatuoran nga imong nahisgotan. Dasiga ang mga estudyante sa pagpangita og mga oportunidad sa pagpakigbahin niini nga mga pagtulun-an ngadto sa uban.

Komentaryo ug Background nga Impormasyon

Unsa kamahinungdanon sa doktrina ni Kristo?

Si Elder D. Todd Christofferson sa Korum sa Napulog Duha ka Apostoles mitudlo:

Kini ang atong mensahe, ang bato nga atong tukuran, ang pundasyon sa tanan dinha sa Simbahan. Sama sa tanang naggikan sa Dios, lunsay kini nga doktrina, tin-aw, sayon sabton—bisan sa usa ka bata. Sa kalipay, atong gidapit ang tanan sa pagdawat niini. (D. Todd Christofferson, “Ang Doktrina ni Kristo,” Liahona, Mayo 2012, 86)

Si Presidente Russell M. Nelson mitudlo:

Ang putli nga doktrina ni Kristo gamhanan. Kini makapausab sa kinabuhi sa tanan kinsa makasabot niini ug magtinguha sa paggamit niini sa iyang kinabuhi. Ang doktrina ni Kristo makatabang kanato sa pagkaplag ug pagpabilin sa dalan sa pakigsaad. Ang pagpabilin nianang higpit apan maayong pagkahan-ay nga dalan sa kaulahian mopasarang kanato nga makadawat sa tanan nga ang Dios aduna. Walay butang nga mas dako pa og bili kay sa tanan nga anaa sa atong Amahan! (Russell M. Nelson, “Putli nga Kamatuoran, Putli nga Doktrina, ug Putli nga Pagpadayag,” Liahona, Nob. 2021, 7)

Unsa kaha ang pagbati nga makadungog sa Manluluwas nga nagpahayag sa Iyang doktrina?

Aron motan-aw og paghulagway sa mga panghitabo nga gihulagway diha sa 3 Nephi 11:18–41, tan-awa ang “Si Jesukristo Nagtudlo ug Mihatag og Gahom sa Pagbunyag” (7:08).

Dugang nga mga Kalihokan sa Pagkat-on

3 Nephi 11:27. “Subay niini nga paagi kamo mobunyag”

Mitudlo si Jesukristo og importanteng mga kamatuoran mahitungod kon unsaon sa pagpahigayon ang bunyag. Aron matabangan ang mga estudyante nga mas makasabot niini nga mga pagtulun-an, ikonsiderar ang pagpakigbahin sa mosunod nga senaryo:

Handurawa nga ikaw naghisgot og relihiyon ngadto sa usa ka higala nga usa ka miyembro sa usa ka lahi nga Kristiyanong simbahan. Ang imong higala adunay pipila ka mga pangutana mahitungod sa imong mga gituohan, lakip ang unsay imong gituohan mahitungod sa bunyag. Siya miingon nga siya nakabasa mahitungod sa bunyag diha sa Biblia. Bisan pa niana, siya naglibog sa nagkalainlaing mga ideya mahitungod sa mga butang sama sa kon ang bunyag ba mahinungdanon, kinsa ang makabunyag, ug unsaon sa pagpahigayon sa bunyag.

Ikonsiderar ang pagbahin sa mga estudyante sa managpares ug sa pagdapit kanila sa pagdrama-drama sa senaryo. Sa laing paagi, ang duha ka estudyante mahimong magdrama-drama sa senaryo diha atubangan sa klase. Awhaga ang mga estudyante sa paggamit sa mosunod nga mga pakisayran sa kasulatan aron matubag ang mga pangutana sa ilang higala mahitungod sa bunyag:

• 3 Nephi 11:18–22

• 3 Nephi 11:23–27

• 3 Nephi 11:33–34

3 Nephi 11:29. “[Ang] espiritu sa panagbingkil dili gikan kanako”

Kon ang mga estudyante makabenepisyo gikan sa pagkat-on og dugang mahitungod sa paglikay sa panagbingkil, mahimo silang mobasa sa 3 Nephi 11:28–30. Dayon hisgoti ang mga pangutana sama sa mosunod:

• Kanus-a ang kataposang higayon nga ikaw nakasaksi o nalambigit sa usa ka panaglalis? Unsay resulta?

• Ngano sa imong hunahuna nga si Satanas nagpunting pag-ayo sa paghatag og hinungdan sa panagbingkil?

• Unsaon nato sa pagsunod ang ehemplo sa Manluluwas ug sa paglikay sa panagbingkil?

Ikonsiderar ang pagbahin sa mga estudyante ngadto sa gagmay nga mga grupo ug hatagi ang matag grupo og blangko nga papel. Hangyoa ang mga estudyante nga magdrowing og usa ka simbolo sa paghunong sa tunga sa panid ug isulat ang “hunonga ang panagbingkil” diha sa simbolo. Dapita ang mga estudyante sa paghisgot sa ilang mga grupo sa mga paagi nga malikayan nato ang panagbingkil sa lainlaing aspeto sa atong kinabuhi. Awhaga sila sa pagsulat sa ilang mga tubag diha sa papel sa palibot sa ilang mga simbolo sa paghunong ug sa pagpangandam sa pagpakigbahin.

Gihumol diha sa doktrina ni Kristo

Aron sa paghisgot og dugang pa mahitungod kon sa unsa nga paagi ang doktrina ni Kristo makapanalangin sa kinabuhi sa mga estudyante, mahimo nimong ipakigbahin ang mga pagtulun-an gikan sa pakigpulong ni Elder David A. Bednar “Kinahanglang Matawo Kamo Pag-usab”( Liahona, Mayo 2007, 19–22). Mahimo nimong ipakita sa mga estudyante ang usa ka atsara ug dapiton sila sa pagpasabot sa proseso sa paghimo og atsara o ipakigbahin ang pagpasabot ni Elder Bednar sa proseso sa paghimo og atsara. Mahimo nimong ipakigbahin ang tambag ni Elder Bednar mahitungod kon sa unsa nga paagi ang “kompleto nga paghumol” diha sa doktrina ni Kristo makatabang kanato nga mahimong sama sa Manluluwas, sama nga ang kompleto nga paghumol diha sa asinon nga tubig makatabang sa usa ka pepino nga mahimong usa ka atsara.