3 Nephi 11:1–11

“Ako mao si Jesukristo”

Samtang ang mga Nephite nagpundok libot sa templo naghisgot mahitungod sa mga timailhan sa kamatayon ni Jesukristo, ang Manluluwas “nanaog ug mibarog sa ilang taliwala” (3 Nephi 11:8). Siya mitudlo kanila sa Iyang misyon ug sa tanan nga Iyang nabuhat alang kanila. Kini nga leksiyon makatabang sa pagdugang sa imong gugma ug pagpasalamat alang kang Jesukristo tungod sa kong kinsa Siya ug unsa ang Iyang nabuhat alang kanimo.

Paghatag og bili sa tanan nga mga estudyante. Kon ang mga estudyante sa nagkalainlaing mga kagikan mobati nga gihigugma ug gidawat, mas dako ang kalagmitan nga sila mopakigbahin sa ilang mga panglantaw ug mga kasinatian sa klase. Paningkamot nga makamugna og pagbati nga nahisakop sa matag estudyante. Pangita og mga paagi sa pagpahayag sa sinsero nga Kristohanong gugma ngadto sa tanan nga mga estudyante, ilabi na niadtong tingali naglisod.

Pagpangandam sa estudyante: Dapita ang mga estudyante nga mangita og kasulatan o pamahayag gikan sa usa ka lider sa Simbahan nga motabang kanila nga mas makasabot kon unsa ang nahimo ni Jesukristo alang kanila.

Mga Posibleng Kalihokan sa Pagkat-on

Kini nga leksiyon nagtutok sa mga panghitabo ug mga pagtulun-an nga narekord diha sa 3 Nephi 11:1–11. Ang dugang nga leksiyon magtutok sa mga kasinatian sa mga katawhan uban sa Manluluwas sama sa narekord sa 3 Nephi 11:12–17. Kon wala kay panahon sa pagtudlo sa duha ka leksiyon nga magbulag, ikonsiderar ang pantan-aw sa “3 Nephi 11:12–17” nga leksiyon alang sa mga ideya nga imong ikalakip niini nga leksiyon.

Paghunahuna sa mahitabo sa umaabot

Ikonsiderar ang pagpakigbahin sa usa ka kasinatian gikan sa mga tuig sa imong pagkabata o pagkatin-edyer sa dihang nagpaabot ka kaayo sa usa ka butang. Ang mga ehemplo mahimong maglakip sa usa ka importante nga panghitabo sa kultural o pangpaugnat sa kusog o usa ka butang nga ikaw naghinam-hinam sa pagdawat. Tabangi ang mga estudyante nga masabtan kon unsa ang imong gibati sa panahon nga nagsingabot na kini nga gutlo ug kon unsa ang gibati sa kataposan nga makasinati niini. Mahimo dayon nimong dapiton ang mga estudyante nga mopakigbahin sa daklit ngadto sa laing estudyante mahitungod sa panahon nga sila nagpaabot sa usa ka butang.

Diha sa Basahon ni Mormon, atong mahibaloan nga usa ka hitabo nga gipaabot sa mga Nephite sulod sa daghang mga kaliwatan mao ang pag-abot sa Anak sa Dios dinhi sa yuta. Gikan sa panahon nga si Lehi ug si Sariah midala sa ilang mga anak ngadto sa kamingawan gawas sa Jerusalem, sila nasayod nga sa 600 ka tuig ang Dios mopadala sa Iyang Anak ingon nga “usa ka Manluluwas sa kalibotan” (1 Nephi 10:4).

Human ipakigbahin ang sunod nga kapahayag , ikonsiderar ang pagdapit og pipila ka estudyante nga magpuli-puli sa pagbasa og kusog sa mga kasulatan nga gilista diha sa mga parentesis.

Sila usab nakasabot nga si Jesukristo moabot sa umaabot taliwala sa mga Nephite diha sa gisaad nga yuta (tan-awa sa 1 Nephi 12:6; 2 Nephi 26:1; Alma 45:9–10). Sa 3 Nephi 11, atong mabasa ang mahitungod niining dugay nang gipaabot nga pagpakita.

Dili tanan sa mga Nephite ug sa mga Lamanite ang adunay tukma nga pagsabot kabahin ni Jesukristo. Ingon man usab, karon ang mga tawo adunay sayop nga pagsabot mahitungod ni Jesukristo, ug ang uban gani milimod sa Iyang pagkaanaa. Ang uban nagtuo nga si Jesus usa ka maayong lider apan wala modawat nga Siya ang Anak sa Dios.

• Ngano sa imong hunahuna nga importante alang kanato ang pagbaton og tukma nga pagsabot kon kinsa si Jesukristo?

• Unsa ang makatabang kanato nga mas makasabot kon si kinsa si Jesukristo ug kon unsay Iyang nabuhat alang kanato?

Sa dihang si Jesukristo mipakita ngadto sa mga Nephite, Siya ug ang Langitnong Amahan mihimo og importante nga mga pamahayag mahitungod kon si kinsa Siya. Sa imong pagtuon karong adlawa, hatagig pagtagad kon unsay gusto sa Langitnong Amahan ug ni Jesukristo nga imong mahibaloan kon kinsa ang Manluluwas ug unsay Iyang nabuhat alang kanimo.

Sa miaging leksiyon, tingali nagsugod ka sa paghimo og lista sa mga butang nga imong nangakat-onan mahitungod ni Jesukristo diha sa imong pagtuon sa ikatulong Nephi. Kon ikaw wala pa magsugod og usa ka listahan, pagsugod og usa diha sa imong journal sa pagtuon, ug pagdugang niini sa kinatibuk-an sa leksiyon.

Ang dugang mga detalye mahitungod sa lista nga gihisgotan sa miaging parapo makita sa leksiyon “3 Nephi 8–10.”

Jesukristo mipakita sa mga Nephite

Basaha ang 3 Nephi 11:1–11, mangita og mga detalye mahitungod sa pagpakita ni Jesukristo sa usa ka grupo sa mga tawo nga nagpundok sa templo sa yuta sa Bountiful. Mahimo usab nimong tan-awon ang “Si Jesukristo Mipakita didto sa Karaang Amerika” gikan sa time code 11:19–13:29. Kini nga bidyo anaa sa ChurchofJesusChrist.org. 

• Unsay mipatigbabaw kanimo gikan sa imong pagtuon niining mga bersikulo?

• Kon anaa pa ka didto, unsa ang pipila ka mga pulong ang imong gamiton aron sa paghulagway kon unsay imong gihunahuna o gibati? Ngano man?

Si Elder Jeffrey R. Holland sa Korum sa Napulog Duha ka Apostoles mihulagway sa pagpakita ni Jesukristo ug sa unsay Iyang gisulti sa mga tawo niining paagiha:

Kana nga pagpakita ug kana nga pamahayag mao ang labing mahinungdanong panghitabo, diha sa tibuok kasaysayan sa Basahon ni Mormon. …

Ang tanan naghisgot bahin kaniya; nanganta bahin kaniya, nangandoy bahin kaniya, ug nag-ampo alang sa iyang pagpakita—apan siya dinhi gayod sa pagkatinuod. Ang labing nindot nga mga panahon! Ang Dios nga mihimo sa matag ngitngit nga kagabhion ngadto sa mahayag nga kabuntagon miabot na. (Jeffrey R. Holland, Christ and the New Covenant: The Messianic Message of the Book of Mormon [1997], 250–51)

Ang unang mga pulong ni Jesukristo nga gisulti ngadto sa mga Nephite makatabang kanato nga makasabot kon si kinsa Siya ug kon unsay Iyang nabuhat alang kanato.

Basaha pag-usab ang 3 Nephi 11:10–11, maghatag og pagtagad sa mga pulong ug mga hugpong sa mga pulong nga gigamit ni Jesukristo sa paghulagway sa Iyang kaugalingon ug sa unsay Iyang nabuhat alang kanato. Seguroha nga idugang kini nga mga kamatuoran diha sa listahan sa imong journal sa pagtuon.

Ang 3 Nephi 11:10–11 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas dali ra nimo kining makit-an. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.

• Unsa nga mga kamatuoran ang imong nakat-onan mahitungod ni Jesukristo?

• Hain niini nga mga kamatuoran ang imong nakita nga labi ka makahuluganon? Ngano man?

Si Jesukristo mibuhat sa kabubut-on sa Amahan

Usa sa mga kamatuoran nga atong makat-onan gikan niini nga mga bersikulo mao nga si Jesukristo mibuhat sa kabubut-on sa Amahan pinaagi sa pagdala diha sa Iyang Kaugalingon sa mga sala sa kalibotan.

Mapalawman pa nato ang atong pagsabot niini nga kamatuoran pinaagi sa pagtan-aw pag-ayo sa mga hugpong sa mga pulong nga gigamit ni Jesukristo sa paghulagway sa Iyang nabuhat. Kopyaha ang mosunod nga mga hugpong sa mga pulong gikan sa 3 Nephi 11:11 diha sa imong journal sa pagtuon nga adunay luna tapad niini o sa ubos niini aron masulatan.

Ipakita ang mosunod nga mga pamahayag ug ang listahan sa mga pakisayran sa kasulatan diha sa pisara. Mahimo nimong ibutang ang mga estudyante sa gagmay nga mga grupo ug i-assign sila sa pagtuon sa pipila sa mga pakisayran sa kasulatan nga gilista. Mahimong magrekord sila diha sa ilang mga journal sa pagtuon ug maghisgot kon sa unsang paagi ang mga bersikulo nga ilang gitun-an makapalawom sa ilang pagsabot sa usa o sa daghan pa sa mga hugpong sa mga pulong gikan sa 3 Nephi 11:11.

• Ako nakainom gikan sa pait nga kopa nga gihatag sa Amahan ngari kanako.

• [Akong] gihimaya ang Amahan sa pagpas-an sa mga sala sa kalibotan.

• Ako mituman sa kabubut-on sa Amahan sa tanan nga mga butang gikan sa sinugdanan.

• Lucas 22:42–44

• Mosiah 3:7

• Mosiah 15:5–7

• Alma 7:11–12

• Doktrina ug mga Pakigsaad 19:16–19

• Doktrina ug mga Pakigsaad 45:3–4

• Moises 4:1–2

Tugoti ang mga estudyante sa paghisgot sa ilang mga panglantaw gikan niini nga kalihokan sa pagtuon alang sa matag hugpong sa mga pulong.

Pagkahuman niini nga diskusyon, ikonsiderar ang pagpakita sa mosunod nga mga pangutana ug dapita ang mga estudyante sa pagrekord sa ilang mga tubag sa usa o daghan pa niini diha sa ilang mga journal sa pagtuon.

• Unsa ang gusto nimong isulti sa mga tawo mahitungod ni Jesukristo base sa unsay imong gibati karon?

• Unsa ang gusto nimong buhaton sa imong kinabuhi tungod sa unsay imong nasabtan o gibati mahitungod ni Jesukristo?

• Nganong angay natong sundon si Jesukristo sa tibuok natong kinabuhi?

Ikonsiderar ang pagdapit og pipila ka andam nga mga estudyante sa pagpakigbahin sa ilang mga tubag niini nga mga pangutana. Pagpamatuod sa mga kamatuoran nga imong nahisgotan mahitungod ni Jesukristo karon.

Komentaryo ug Background nga Impormasyon

3 Nephi 10:18. Aduna bay timailhan kon kanus-a ang Manluluwas miabot sa Amerika kalabot sa dihang Siya gilansang sa krus?

Gisultihan kita nga ang mga kalaglagan sa Amerika sa panahon sa kamatayon sa Manluluwas nahitabo sa ikaupat nga adlaw sa unang bulan sa ikakatloan ug upat nga tuig (3 Nephi 8:5), ug ang Nabanhaw nga Ginoo mipakita ngadto sa mga Nephite sa “kataposan sa ikakatloan ug upat nga tuig” (3 Nephi 10:18). Kini nagpasabot nga ang pagpakita sa Nabanhaw nga Ginoo ngadto sa mga Nephite nahitabo pipila ka bulan human sa Iyang kamatayon ug Pagkabanhaw (Tan-awa sa Bruce R. McConkie, The Mortal Messiah: From Bethlehem to Calvary, 4 vols. [1981], 4:307).

3 Nephi 11:11. Sa unsang paagi ang ehemplo ni Jesukristo sa pag-inom sa mapait nga kopa makatabang kanako?

Si Elder Jeffrey R. Holland sa Korum sa Napulog Duha ka Apostoles midasig:

[Ambit] sa sakramento matag semana, ug [kupot] gayod sa makapahingpit nga mga saad sa Pag-ula ni Jesukristo. [Tuo] sa mga milagro. Ako nakasaksi og daghan niini nga miabot dihang ang tanang indikasyon nag-ingon nga wala nay paglaom. Ang paglaom dili gayod mawala. Kon kadtong mga milagro dili dayon mahitabo o sa hingpit o dili gayod mahitabo, hinumdomi ang mismong ehemplo sa kalisod sa Manluluwas.Kon ang mapait nga kopa dili mapasa, inom niini ug magmalig-on, nga magsalig sa malipayong mga adlaw nga moabot. (Jeffrey R. Holland, “Sama sa Usa ka Sudlanan nga Nabuak,” Liahona, Nob. 2013, 41)

Ngano nga kabubut-on kini sa Langitnong Amahan alang kang Jesukristo ang pagdala diha sa Iyang Kaugalingon sa mga sala sa kalibotan?

Si Elder Ulisses Soares sa Korum sa Napulog Duha ka Apostoles mitudlo:

Si Kristo mabinationg mituman sa kabubut-on sa Amahan pinaagi sa Iyang walay kataposan ug maluluy-on nga sakripisyo. Gibuntog Niya ang ka-lala sa pisikal ug espirituhanong kamatayon, nga gipaila ngadto sa kalibotan pinaagi sa Pagkapukan, nagtanyag kanato sa mahimayaong posibilidad sa mahangtorong kaluwasan.

Si Jesukristo mao lamang ang Tawo nga makahimo sa pagtuman niining mahangtoron ug hingpit nga sakripisyo alang natong tanan. Siya gipili ug giorden nang daan didto sa Halangdong Konseho sa Langit, bisan sa wala pa maporma ang kalibotan. (Ulisses Soares, “Jesukristo: Ang Tig-atiman sa Atong Kalag,” Liahona, Mayo 2021, 82)

Dugang nga mga Kalihokan sa Pagkat-on

3 Nephi 11:3. “Sila nakadungog og usa ka tingog”

Ang mga estudyante mahimong makabenepisyo gikan sa panaghisgot mahitungod sa pagkat-on unsaon sa pagpaminaw sa tingog sa Dios pinaagi sa Espiritu Santo. Tingali mahimo ka magsugod sa klase pinaagi sa pagsulti og hilom kaayo aron ang mga estudyante kinahanglan nga maminaw aron madungog ang imong gisulti. Mahimong makatabang usab alang sa mga estudyante ang pag-ila sa mga babag sa pagpamati sa tingog sa Dios nga nagsulti kanila. Ang 3 Nephi 11:1–7 naghulagway kon unsa ang gikinahanglang buhaton sa mga Nephite aron makadungog sa Dios nga nagpaila ni Jesukristo. Dapita ang mga estudyante sa pagpangita sa mga baroganan nga mahimong makatabang kanila sa ilang pagpaninguhasa pagpaminaw sa Dios nga nakigsulti kanila. Ikonsiderar ang paggamit sa pakigpulong ni Presidente Nelson nga “Paminaw Kaniya” (​Liahona, Abril 2020) o usa o daghan pa sa mga pagpamatuod gikan sa ubang mga lider sa Simbahan gikan sa “Paminaw Kaniya” nga koleksiyon sa bidyo, nga makita sa ChurchofJesusChrist.org.

3 Nephi 11:11. Leksiyon nga naggamit og butang aron sa pagtudlo nga si Jesukristo miinom sa mapait nga kopa

Dapita ang mga estudyante sa paglista sa mga sagol nga mahimong sagolon aron makahimo og labing “mapait” nga imnonon nga ilang mahunahunaan. Ikonsiderar ang pagdala sa pipila ka mga sagol nga magamit sa mga estudyante aron sa pagpuno sa usa ka tasa. Tabangi ang mga estudyante sa pagtandi niini nga tasa ngadto sa mapait nga kopa nga giinom ni Jesukristo, ang Iyang pag-antos ug kamatayon. Dapita sila sa paghisgot kon nganong sa ilang hunahuna kini nga paghulagway gigamit sa pagtudlo kanato mahitungod sa maulaong sakripisyo ni Jesukristo.

3 Nephi 11:11. Leksiyon nga naggamit og butang aron sa pagtudlo nga si Jesukristo mibuhat sa kabubut-on sa Amahan sa tanan nga mga butang

Ikonsiderar ang paghatag og mga instruksiyon sa matag lakang sa usa ka proyekto sa origami ug sa paghisgot sa kamahinungdanon sa matag lakang aron makab-ot ang tumong sa kataposan. Mahimo nimong dapiton ang mga estudyante sa paghisgot kon nganong mahinungdanon nga si Jesukristo masinugtanon sa kabubut-on sa Langitnong Amahan “sa tanan nga mga butang.” Mahimo nimong gamiton ang pamahayag gikan ni Elder Ulisses Soares diha sa seksiyon nga “Komentaryo ug Background nga Impormasyon” aron matabangan ang mga estudyante nga mobati og pasalamat sa hingpit nga pagkamasulundon ni Jesukristo.