3 Nephi 8–10

Ang Tingog sa Manluluwas diha sa Kangitngit

Sa Amerika, grabeng kalaglagan ug kangitngit ang nagtimaan sa Paglansang sa Manluluwas. Atol nianang tulo ka adlaw sa baga nga kangitngit, si Jesukristo namulong ngadto sa mga tawo. Sauna ug karon, ang natural nga mga katalagman, pag-antos, ug mga pagsulay mahimong mga oportunidad sa pagkat-on ug pagdangop ngadto ni Jesukristo. Kini nga leksiyon mag-ila sa mga kinaiya ni Jesukristo nga makatabang kanimo nga mobati og mas dakong gugma ug pagsalig Kaniya.

Pagdasig sa mga estudyante sa pagtutok ngadto kang Jesukristo. Tabangi ang mga estudyante nga masentro ang ilang pagkat-on sa ebanghelyo ngadto ni Jesukristo aron ang Espiritu Santo makapalig-on sa ilang pagsabot ug pagpasalamat Kaniya. Usa ka paagi sa pagbuhat niini mao ang pagpangutana nga magtabang sa mga estudyante sa pagpangita og ebidensiya sa Iyang gahom, kaluoy, ug maulaong misyon.

Pagpangandam sa estudyante: Dapita ang mga estudyante sa pagbasa sa 3 Nephi 8, maghanduraw unsa kaha kini ka sama nga maanaa atol niini nga mga panghitabo.

Mga Posibleng Kalihokan sa Pagkat-on

“Usa ka kusog nga unos”

Pangutan-a ang mga estudyante kon aduna ba kanila ang nakasuway na nga naanaa sa usa ka makahahadlok, mapintas nga bagyo o nakasinati og laing matang sa natural nga katalagman. Dapita ang usa o duha sa pagpakigbahin kon unsa ang ilang kasinatian, o mahimo nimong ipakigbahin ang usa ka kasinatian nga aduna ka.

Sa dihang si Jesukristo gilansang sa krus didto sa Jerusalem, usa ka makalilisang nga unos ug linog sa Amerika ang mihinungdan sa dakong kalaglagan. Kini nga mga panghitabo nakatuman sa mga panagna ni Samuel ang Lamanite mahitungod sa mga timailhan sa kamatayon sa Manluluwas (tan-awa sa Helaman 14:20–27).

Aron makahibalo mahitungod sa mga detalye niini nga makadaot nga mga panghitabo, basaha ang 3 Nephi 8:5–22. Mahimo usab nimong tan-awon ang bidyo nga , “Si Jesukristo Mipakita didto sa Karaang Amerika,” gikan sa time codes 0:00–3:19. Kini nga bidyo anaa sa ChurchofJesusChrist.org.

• Unsa kaha ang imong hunahunaon o bation kon ikaw nakasinati niini nga mga butanga?

Sa mga katuigan nga nagpaingon niini nga kalaglagan, kadaghanan sa mga Nephite mitalikod gikan sa Ginoo ug misalikway sa mga propeta nga gipadala sa Dios sa pagsangyaw ngadto kanila (tan-awa sa 3 Nephi 7:7–8, 14, 21).

Basaha ang 3 Nephi 8:23–25, mangita kon unsay reaksiyon sa mga naluwas human makasinati niini nga makadaot nga mga panghitabo.

• Unsaon nimo sa paghulagway ang ilang mga pagbati?

Kamatuoran mahitungod ni Jesukristo

Samtang ang mga tawo nagbangotan diha sa kangitngit, ilang nadungog ang tingog ni Jesukristo nga nagsulti ngadto kanila. Iyang ginganlan ang daghang mga siyudad ug gipasabot nga kadtong mga siyudad ug mga katawhan nalaglag tungod sa ilang pagkadaotan. Dayon Siya mitudlo sa mga tawo og daghang importante nga mga kamatuoran mahitungod sa Iyang Kaugalingon.

Agig dugang sa pagpahimo sa mga estudyante og listahan nga gihulagway sa mosunod nga parapo, ikonsiderar usab ang paghimo og listahan nga mahimo nga dayag nga ipakita alang sa imong klase sa tibuok ninyong pagtuon sa 3 Nephi. Mahimo kang mogamit og usa ka dako nga poster board o piraso sa papel aron isulat ang ulohan nga gilista sa ubos sa pinahandag nga pagkasulat [italics]. Sa palibot niini, irekord ang mga nadiskobrehan sa mga estudyante mahitungod ni Jesukristo nga nakaplagan niini nga leksiyon ug sa mosunod nga mga leksiyon.

Aron matabangan ka sa pag-organisar niini nga mga kamatuoran, paghimo og ulohan diha sa imong journal sa pagtuon nga giulohan og: Pagkat-on mahitungod ni Jesukristo diha sa 3 Nephi. Mahimo kang maggahin og ubay-ubay nga panid sa imong journal sa pagtuon aron makadugang ka og mga kamatuoran niini nga listahan atol sa imong pagtuon sa pangalagad sa Manluluwas taliwala sa mga Nephite sa mosunod nga pipila ka mga semana.

Seguroha nga hatagan og igong panahon ang mga estudyante aron makabaton og makahuluganon nga kasinatian sa pagtuon sa mga pulong sa Manluluwas sa mosunod nga mga bersikulo. Mahimong mapuslanon ang pagpatukar og matinahuron nga instrumental nga musika ug tugotan sila nga magtuon sa tinagsa.

Mahimo usab nimong bahinon ang mga estudyante ngadto sa gagmay nga mga grupo ug sangonan ang matag grupo sa pagtuon ug paghisgot sa usa sa mosunod nga mga tudling sa kasulatan: 3 Nephi 9:13–18; 3 Nephi 9:19–22; 3 Nephi 10:4–7; ug 3 Nephi 10:8–12. Ang mga miyembro gikan sa matag grupo mahimong dapiton sa pagpakigbahin kon unsay ilang nakat-onan mahitungod ni Jesukristo gikan sa mga bersikulo nga ilang gitun-an.

Basaha ang 3 Nephi 9:13–22 ug 10:4–12, mangita sa unsay gitudlo ni Jesukristo niini nga mga tawo mahitungod sa Iyang Kaugalingon. Isulat kini nga mga kamatuoran ubos sa ulohan diha sa imong journal sa pagtuon.

Human ang mga estudyante adunay igong panahon sa pagtuon, hisgoti ang unsay ilang nakat-onan. Hatagi ang pipila sa mga estudyante og kahigayonan sa pagpakigbahin sa ilang mga hunahuna ug mga gibati mahitungod ni Jesukristo. Gamit og mga pangutana sama sa mosunod aron tabangan sa paggiya kini nga panaghisgot.

• Unsa man ang gitudlo sa Manluluwas mahitungod sa Iyang kaugalingon nga mahinungdanon kaayo kanimo? Ngano man?

  Mahimong makaila ang mga estudyante og daghang mga kamatuoran mahitungod ni Jesukristo. Mahimong gustohon nimo ang pagseguro nga ang mga estudyante makamatikod sa mosunod: ang bukton sa kaluoy ni Jesukristo gitunol ngari kanato (3 Nephi 9:14); si Jesukristo mao ang kahayag ug kinabuhi sa kalibotan (3 Nephi 9:18); si Jesukristo naghangyo nga kita mohalad ngadto Kaniya og usa ka masulub-on nga kasingkasing ug usa ka mahinulsolon nga espiritu (3 Nephi 9:20); si Jesukristo nagtinguha sa pagpundok ug pagpanalipod kanato (3 Nephi 10:4–7).

  Ikonsiderar ang pagsulat diha sa pisara niining mga kamatuoran. Mahimo nimong dapiton ang mga estudyante sa pagpangita og ubang mga asoy diha sa mga kasulatan diin si Jesukristo nagpakita og usa o labaw pa sa mga kamatuoran nga ilang nahibaloan mahitungod Kaniya.

  Alang sa mga ideya kon unsaon nimo paggahin og dugang panahon sa pipila sa piho nga mga pagtulun-an sa Manluluwas gikan niini nga mga bersikulo, tan-awa ang seksiyon nga “Dugang nga mga Kalihokan sa Pagkat-on”.

• Sa unsang paagi ang mga kamatuoran nga imong nakat-onan mahitungod ni Jesukristo makaapektar sa imong gugma ug pagsalig diha Kaniya?

• Unsa nga mga sitwasyon ang imong nasinati, o tingali imong masinati, diin ang paghinumdom sa usa o labaw pa niini nga mga kamatuoran mahimong mahinungdanon?

Pagpamatuod sa mga kamatuoran nga imong nahisgotan karon. Awhaga ang mga estudyante nga magpadayon sa pagpangita og importante nga mga kamatuoran mahitungod ni Jesukristo samtang nagpadayon sila sa pagtuon sa Iyang pangalagad taliwala sa mga Nephite.

Komentaryo ug Background nga Impormasyon

Mapasaylo ba gayod ako ni Jesukristo kon nakahimo ko og dagkong mga sayop?

Presidente Boyd K. Packer (1924–2015) sa Korum sa Napulog Duha ka Apostoles mipasabot:

Ang mga sulat naggikan niadtong nakahimo og dagkong mga kasaypanan. Nangutana sila, “Mapasaylo pa ba gayod ako?”

Ang tubag kay oo!

Ang ebanghelyo nagtudlo kanato nga ang kahupayan gikan sa kasakit ug kahasol sa konsensiya maangkon pinaagi sa paghinulsol. Gawas niadtong pipila kinsa human mahibalo sa kahingpitan mibiya aron maalaot, walay kinaiya, walay pagkaadik, walay rebelyon, walay kalapasan, walay kasaypanan ang dili maapil sa saad sa hingpit nga kapasayloan. (Boyd K. Packer, “The Brilliant Morning of Forgiveness,” Ensign, Nov. 1995, 19)

Si Elder Jeffrey R. Holland sa Korum sa Napulog Duha ka Apostoles mitudlo:

Ang Dios wala kaayo maghunahuna kon unsay nanghitabo sa inyong kagahapon apan siya naghunahuna kon unsa kamo karon ug, uban sa Iyang tabang, unsay gusto ninyong mahitabo. (Jeffrey R. Holland, “Ang Labing Maayo Moabot Pa,” [Liahona, Ene. ,2010], 21, speeches.byu.edu)

3 Nephi 9:20. Unsa ang gipasabot sa pagbaton og usa ka masulub-on nga kasingkasing ug mahinulsolon nga espiritu?

Si Presidente Ezra Taft Benson (1899–1994) nagtudlo sa mosunod mahitungod sa usa ka masulub-on nga kasingkasing ug mahinulsulon nga espiritu:

Ang tinuod nga paghinulsol naglakip og kausaban sa kasingkasing ug dili lamang kausaban sa kinaiya (tan-awa sa Alma 5:13). Kabahin niining dako nga kausaban sa kasingkasing mao ang pagbati og diosnon nga kasubo alang sa atong mga sala. Kini ang gipasabot sa usa ka masulub-on nga kasingkasing ug mahinulsolon nga espiritu. Ang mga gasa sa Dios igo sa pagtabang kanato sa pagbuntog sa matag sala ug kahuyang kon kita lamang moduol ngadto Kaniya alang sa panatabang. Labing kasagaran sa paghinulsol dili maglakip og mahinuklugong pagkausab, apan hinoon usa ka sunod-sunod nga paagi, dili mausab, ug makanunayon nga paglihok paingon sa pagka-diosnon. (Teachings of Ezra Taft Benson [1988], 71.)

Si Elder Bruce D. Porter (1952–2016) sa Seventy mitudlo:

Ang hingpit nga pagpaubos sa Manluluwas sa Mahangturong Amahan mao ang hingpti nga ehemplo sa masulub-on nga kasingkasing ug mahinulsolon nga espiritu. Ang ehemplo ni Kristo nagtudlo kanato nga ang usa ka masulub-on nga kasingkasing usa ka mahangtoron nga kinaiya sa pagka-dios. Kon ang atong mga kasingkasing masulub-on, hingpit kita nga bukas ngadto sa Espiritu sa Dios ug mahibalo sa atong pagsalig Kaniya sa tanan nga anaa nato ug sa tanan nga kita mao. Ang sakripisyo nga gikinahanglan usa ka sakripisyo sa garbo sa tanan nga matang. Sama sa daling mahulma nga lapok sa mga kamot sa batid nga tighimo og banga, ang masulub-on og kasingkasing mahulma ug maporma sa mga kamot sa Agalon. …

… Kadtong kinsa adunay usa ka masulub-on nga kasingkasing ug usa ka mahinulsulon nga espiritu andam nga mobuhat sa bisan unsa ug sa tanan nga pangayoon sa Dios kanila, nga walay pagsupak. Mohunong kita sa pagbuhat sa kaugalingon natong paagi ug magkat-on sa paagi sa Dios. (Bruce D. Porter, “Usa ka Masulub-on nga Kasingkasing ug Mahinulsolon nga Espiritu,” Liahona, Nob. 2007, 32)

Dugang nga mga Kalihokan sa Pagkat-on

3 Nephi 9:14. “Ang akong bukton sa kaluoy gitunol nganha kaninyo”

Ikonsiderar ang pagdapit sa mga estudyante sa paghunahuna mahitungod sa mga tawo nga mibiya gikan sa Dios tungod sa sayop nga pagsabot nga tingali aduna sila mahitungod Kaniya o sa Iyang mga pagbati ngadto kanila. Ang mga tubag sa mga estudyante mahimong ilista diha sa pisara. Dayon dapita ang mga estudyante sa pagbasa sa 3 Nephi 9:13–14, 22, mangita og mga pulong gikan sa Manluluwas nga makatabang sa pagtul-id niining bakak nga mga pagsabot o mga ideya. Kini nga mga pulong o mga hugpong sa mga pulong mahimo usab nga isulat diha sa pisara. Dapita ang mga estudyante sa paghisgot kon sa unsang paagi ang pagsabot sa mga pulong sa Manluluwas niini nga mga bersikulo makaimpluwensiya sa ilang kinaiya human sila makahimo og kasaypanan.

3 Nephi 9:18. “Ako ang kahayag ug ang kinabuhi sa kalibotan”

Samtang imong gidapit ang mga estudyante sa pagbasa sa mga pulong sa Manluluwas diha sa 3 Nephi 9:18, dapita sila sa paghunahuna mahitungod kon ngano nga ang Iyang mensahe nahimong hilabihan ka makahuluganon ngadto sa mga Nephite sa pisikal nga palibot diin sila nahimutang. Mahimo usab nimong hisgotan kon nganong ang Kahayag sa Kalibotan usa ka angay nga titulo alang kang Jesukristo. Ikonsiderar ang pagdapit sa mga estudyante sa pagtuon sa pipila o sa tanan sa mosunod nga mga kasulatan aron sa pagpalawom sa ilang pagsabot niini nga kamatuoran: Juan 8:12; 3 Nephi 18:16, 24; Doktrina ug mga Pakigsaad 6:21; 88:7–13.

3 Nephi 9:20. “Usa ka masulub-on nga kasingkasing ug mahinulsolon nga espiritu”

Mahimong makatabang ang pagpahinumdom sa mga estudyante nga sa wala pa moanhi ang Manluluwas sa yuta, ang Iyang mga sumusunod gisugo sa paghalad og mga mananap isip kabahin sa balaod ni Moises. Kini nga mga sakripisyo nagsimbolo sa umaabot nga sakripisyo sa Anak sa Dios (tan-awa sa Moises 5:5–8).

Dapita ang mga estudyante sa pagbasa sa 3 Nephi 9:19–20, mangita sa bag-ong sugo nga gihatag sa Manluluwas nga may kalabotan sa sakripisyo. Aron matabangan ang mga estudyante nga makasabot sa hugpong sa mga pulong nga “kamo mohalad og usa ka sakripisyo ngari kanako nga usa ka masulub-on nga kasingkasing ug usa ka mahinulsolon nga espiritu” (3 Nephi 9:20), ikonsiderar ang paggamit sa pamahayag ni Elder Bruce D. Porter diha sa “Komentaryo ug Background nga Impormasyon” nga seksiyon.

Hisgoti kon nganong ang mga estudyante naghunahuna nga ang Manluluwas mohangyo kanato sa paghalad og masulub-on nga kasingkasing ug mahinulsolon nga espiritu ngadto Kaniya isip sakripisyo. Awhaga sila sa paghunahuna og mga kasinatian diin sila mibati og masulub-on nga kasingkasing ug mahinulsolon nga espiritu ug unsay nagtabang kanila nga mobati niana nga paagi. Mahimong makatabang usab ang pagpakigbahin sa imong kaugalingon nga mga panig-ingnan.

Ang mosunod nga pamahayag ni Elder Neal A. Maxwell (1926-2004) sa Korum sa Napulog Duha ka Apostoles mahimong gamiton isip kabahin niini nga panaghisgotan:

“Ang tinuod, personal nga sakripisyo dili gayod ang pagbutang og hayop sa altar. Hinoon, mao kini ang kaandam nga ibutang ang hayop sa sulod kanato [ang kinaiyanhon nga tawo] diha sa altar ug pasagdan nga masunog kini!” (Neal A. Maxwell, “Deny Yourselves of All Ungodliness,” Ensign, Mayo 1995, 68).

3 Nephi 10:6. “Kapila ba Ako magtigom kaninyo”

Ikonsiderar ang pagpakita sa mosunod nga hulagway ug sa pagdapit sa mga estudyante sa pagtan-aw niini samtang sila nagtuon sa 3 Nephi 10:4–7. Unsa nga mga kamatuoran kaha sa imong hunahuna ang gilaoman ni Jesukristo nga masabtan ug mabati sa mga tawo mahitungod Kaniya gikan niini nga mga bersikulo? Ngano kaha nga tingale kini nga mga kamatuoran mahimong makahuluganon kanimo kon ikaw makasinati og mga panahon sa kalisdanan?