3 Nephi 8–11

Kinatibuk-ang Pagpasabot

Sa Amerika, grabeng kalaglagan ug kangitngit ang nagtimaan sa Paglansang sa Krus sa Manluluwas. Atol nianang tulo ka adlaw sa baga nga kangitngit, si Jesukristo namulong ngadto sa mga tawo. “Siya nanaog ug mibarog sa ilang taliwala” (3 Nephi 11:8). Siya mitudlo kanila sa Iyang misyon ug sa tanan nga Iyang nabuhat alang kanila. Iyang gidapit ang mga tawo sa personal nga pagsaksi nga Siya gipatay alang sa mga sala sa kalibotan. Tagsa-tagsa sila nga miduol Kaniya ug mibati sa samad sa Iyang kilid ug sa mga marka sa lansang sa Iyang mga kamot ug tiil. Dayon Iyang gipahayag ang Iyang doktrina ngadto kanila.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang kinahanglan nga andamon daan alang sa matag leksiyon.

3 Nephi 8–10

Katuyoan sa leksiyon: Kini nga leksiyon mag-ila sa mga kinaiya ni Jesukristo nga makatabang sa mga estudyante nga mobati og mas dakong gugma ug pagsalig Kaniya.

• Pagpangandam sa estudyante: Dapita ang mga estudyante sa pagbasa sa 3 Nephi 8, maghanduraw unsa kaha kini ka sama ang maanaa atol niini nga mga panghitabo.

• Bidyo: “Si Jesukristo Mipakita didto sa Karaang Amerika” (16:43; tan-awa gikan sa time code 0:35 hangtod sa 3:19)

• Sugyot sa pagtudlo sa videoconference: Niini nga leksiyon, ang mga estudyante magsugod og listahan sa mga butang nga ilang nakat-onan mahitungod kang Jesukristo. Kini nga listahan magkadaghan samtang nagpadayon sila sa pagtuon sa Iyang pangalagad sa karaang Amerika. Ikonsiderar ang paghimo og usa ka hiniusa [collective] nga listahan sa klase nga magamit sa umaabot nga mga leksiyon. Kini mahimong usa ka elektronikong dokumento o kutay sa diskusyon nga mahimong ma-access ug dugangan sa mga estudyante.

3 Nephi 11:1–11

Katuyoan sa leksiyon: Kini nga leksiyon makatabang nga madugangan ang gugma ug pagpasalamat sa mga estudyante alang kang Jesukristo tungod sa kon kinsa Siya ug unsa ang Iyang nabuhat alang kanila.

• Pagpangandam sa estudyante: Dapita ang mga estudyante nga mangita og kasulatan o pamahayag gikan sa usa ka lider sa Simbahan nga motabang kanila nga mas makasabot kon unsa ang nahimo ni Jesukristo alang kanila.

• Mga bidyo: “Si Jesukristo Mipakita didto sa Karaang Amerika” (16:43; tan-awa gikan sa time code 11:19 hangtod sa 13:29)

• Sulod nga ipakita: Mga pakisayran sa kasulatan alang sa mga estudyante aron tun-an dapit sa kataposan sa leksiyon

• Sugyot sa pagtudlo pinaagi sa videoconference: Ikonsiderar ang paggamit sa whiteboard feature aron ilista ang unsay nakat-onan sa mga estudyante mahitungod kang Jesukristo gikan sa pagtuon sa 3 Nephi 11:1–11. Kini makatabang sa mga estudyante sa pagdugang ngadto sa listahan diin sila gidapit sa pagsugod diha sa miaging leksiyon.

Doktrinal nga Kahanas: 3 Nephi 11:10–11

Katuyoan sa leksiyon: Kini nga leksiyon makatabang sa mga estudyante sa pagsag-ulo sa tudling sa doktrinal nga kahanas ug sa mahinungdanon nga hugpong sa mga pulong sa kasulatan sa 3 Nephi 11:10–11, mapasabot ang doktrina nga gitudlo niini nga tudling, ug magamit ang mga baroganan sa pag-angkon og espirituhanong kahibalo sa tinuod nga mga sitwasyon sa kinabuhi.

• Pagpangandam sa estudyante: Dapita ang mga estudyante sa paghangyo og usa ka miyembro sa pamilya o lider sa Simbahan aron sa pagpasabot kon nganong gipili nila nga mosunod kang Jesukristo.

• Hulagway: Jesukristo nagpakita sa templo

• Sulod nga ipakita: Tsart mahitungod sa pagsunod sa uban o pagsunod kang Jesukristo

• Sugyot sa pagtudlo pinaagi sa videoconference: Agig dugang sa pagpakigbahin og mga rason gikan sa tsart aron matabangan si Jessica nga modesisyon sa pagsunod kang Jesukristo, mahimong hangyoon ang mga estudyante nga gamiton ang ilang mga palibot. Ikonsiderar ang pagdapit kanila sa pagpakita og usa ka butang diha sa ilang panimalay nga makatabang kanila sa paghinumdom sa ilang pasalig sa pagsunod kang Jesukristo ug sa mga panalangin nga ilang nadawat pinaagi sa pagbuhat niini.

3 Nephi 11:12–17

Katuyoan sa leksiyon: Kini nga leksiyon makatabang sa mga estudyante nga makabaton o makapalig-on sa ilang pagpamatuod nga si Jesukristo mao ang ilang personal nga Manluluwas.

• Pagpangandam sa estudyante: Dapita ang mga estudyante sa pagbasa sa 3 Nephi 11:12–17 ug sa paghanduraw kon unsa kaha ang ilang bation nga aduna niini nga personal nga pakig-uban kang Jesukristo.

• Mga bidyo: “Choices for Eternity” (31:24; tan-awa gikan sa time code 26:05 hangtod sa 26:28); “Si Jesukristo Mipakita didto sa Karaang Amerika” (16:43; tan-awa gikan sa time code 13:29 hangtod sa 16:03)

• Sugyot sa pagtudlo pinaagi sa videoconference: Atol sa leksiyon, ikonsiderar ang pagdapit sa mga estudyante sa paghanduraw sa mga panghitabo nga narekord diha sa 3 Nephi 11:12–15. Awhaga sila nga pagngon ang ilang mga mikropono ug ang ilang mga camera aron makatarong sila og apil sa kalihokan ug mobati nga mas komportable. Human sa usa ka gitakda nga gidugayon sa panahon, dapita sila sa pag-on og balik sa ilang mga mikropono ug mga camera ug sa pagpakigbahin sa ilang mga hunahuna ug mga impresyon.

3 Nephi 11:18–41

Katuyoan sa leksiyon: Kini nga leksiyon makatabang sa mga estudyante nga mas makasabot ug makapasabot sa doktrina ni Jesukristo.

• Pagpangandam sa estudyante: Dapita ang mga estudyante sa pagkat-on mahitungod sa doktrina ni Kristo sa wala pa ang klase. Mahimo nilang tun-an ang mga pagtulon-an sa Manluluwas diha sa 3 Nephi 11:31–41 o pangitaa ang “doktrina ni Kristo” diha sa Gospel Library nga app o sa ChurchofJesusChrist.org.

• Mga handout: “Ang Plano sa Leksiyon sa Ang Doktrina ni Kristo”

• Sulod nga ipakita: Mga pangutana sa pagsukod sa kaugalingon nga anaa sa kataposan sa leksiyon

• Sugyot sa pagtudlo pinaagi sa videoconference: Mahimong dapiton ang mga estudyante nga buot mopakigbahin sa ilang leksiyon ngadto sa tibuok klase. Mahimo ka usab mogamit og mga breakout room ug modapit sa mga estudyante sa pagtudlo sa ilang mga leksiyon ngadto sa gagmay nga grupo.