3 Nephi 11:12–17

“Duol Kamo ngari Kanako”

Human ipaila nga Hinigugma nga Anak sa Langitnong Amahan, si Jesukristo midapit sa mga katawhan nga mosaksi sa personal nga Siya gipatay tungod sa mga sala sa kalibotan. Tagsa-tagsa sila nga miduol Kaniya ug mibati sa samad sa Iyang kilid ug sa mga marka sa lansang sa Iyang mga kamot ug tiil. Kini nga leksiyon makatabang kanimo nga makaangkon o makapalig-on sa imong pagpamatuod nga si Jesukristo nag-antos ug namatay alang kanimo.

Pagtabang sa mga estudyante nga mahanduraw ang ilang nabasa. Kon ang mga estudyante adunay biswal nga hulagway sa mga panghitabo sa kasulatan ug mga ideya, mas mahinumdoman nila kini. Agig dugang sa paggamit og mga bidyo, mga hulagway, ug uban pang media, ikonsiderar ang pagdapit sa mga estudyante sa paghanduraw sa mahinungdanon nga mga panghitabo ug kon unsa kaha ang pamati nga maanaa didto. Kini makadapit sa Espiritu Santo sa diha ilang pagtuon ug makatabang sa mga estudyante nga mobati sa kamatuoran ug sa kaimportante sa ilang nakat-onan.

Pagpangandam sa estudyante: Dapita ang mga estudyante sa pagbasa sa 3 Nephi 11:12–17 ug sa paghanduraw kon unsa kaha ang ilang bation nga aduna niini nga personal nga pakig-uban kang Jesukristo.

Mga Posibleng Kalihokan sa Pagkat-on

Pag-ako sa responsibilidad sa inyong pagpamatuod

Hunahunaa kon sa unsang paagi ang mosunod nga pagdapit gikan ni Presidente Russell M. Nelson magamit nganha kanimo.

Ako mangamuyo kaninyo sa pag-ako sa responsibilidad sa inyong pagpamatuod. Trabahoa kini. Angkona kini. Atimana kini. Amomaha kini aron motubo kini. Palamboa kini gamit ang kamatuoran. Ayaw kini hugawi sa sayop nga mga pilosopiya sa dili matuohon nga mga lalaki ug mga babaye ug dayon matingala nganong nagkahuyang ang inyong pagpamatuod. (Russell M. Nelson, “Mga Pagpili alang sa Kahangtoran” [tibuok kalibotan nga debosyonal alang sa mga young adult, Mayo 15, 2022], ChurchofJesusChrist.org)

• Ngano kaha sa imong hunahuna nga importante alang sa matag tawo ang “pag-ako sa responsibilidad” sa ilang pagpamatuod?

Usa sa labing importante nga mga kamatuoran nga kita makaangkon sa pagpamatuod mao nga si Jesukristo mao ang Anak sa Dios ug ang Manluluwas sa kalibotan. Pamalandongi kon nganong ang mga tawo kinahanglan mahibalo niini mahitungod Kaniya. Mahimo nimong tun-an ang Juan 14:6 ug ang Mosiah 3:17 aron matabangan ka nga makita ang pipila niini nga mga rason.

Ipakigbahin ang mosunod aron matabangan ang mga estudyante nga masusi ang ilang mga pagbati ug pagpamatuod mahitungod kang Jesukristo. Ipakita ang mga pangutana ug hatagi ang mga estudyante og panahon aron irekord ang ilang mga tubag diha sa ilang mga journal sa pagtuon.

• Mibati ka ba nga ikaw adunay pagpamatuod ni Jesukristo isip Anak sa Dios ug Manluluwas sa kalibotan?

• Unsa ang nakatabang nimo sa pagbati sa imong gibati mahitungod sa Manluluwas?

Karong adlawa ikaw magtuon sa sagrado nga pakig-uban ni Jesukristo uban sa mga Nephite. Samtang magtuon ka, hunahunaa kon unsa ang imong mabuhat aron makaangkon o makapalig-on sa imong pagpamatuod ni Jesukristo.

Si Jesukristo nagdapit sa mga Nephite sa pagbati sa mga marka sa Iyang samad

Kon gikinahanglan, dapita ang mga estudyante sa pagrebyo sa unsay ilang nakat-onan sa nangagi pinaagi sa paghangyo kanila sa pagpamubo sa mga panghitabo diha sa 3 Nephi 11:1–11.

Hinumdomi nga samtang usa ka grupo sa mga Nephite nagpundok didto sa yuta sa Bountiful, ang Nabanhaw nga Ginoo mikunsad gikan sa langit. Siya mipahayag nga Siya mao si Jesukristo ug nga Siya mihimaya sa Amahan pinaagi sa pag-antos alang sa mga sala sa kalibotan (tan-awa sa 3 Nephi 11:1–11). Ang panon sa katawhan naglangkob sa mga lalaki, mga babaye, ug mga bata, gibanabana nga mga 2,500 ka mga tawo (tan-awa sa 3 Nephi 17:25).

Basaha ang 3 Nephi 11:12–15, mangita sa unang pagdapit sa Nabanhaw nga Ginoo ngadto sa mga katawhan. Mahimo usab nimong tan-awon ang “Si Jesukristo Mipakita didto sa Karaang Amerika,” anaa sa ChurchofJesusChrist.org, gikan sa time code 13:29 hangtod sa 16:03.

Samtang magtuon ka, paningkamoti nga mahanduraw ang imong kaugalingon isip kabahin sa panon. Ang paghanduraw sa mga panghitabo o mga ideya gikan sa mga kasulatan makadapit sa Espiritu Santo sa imong pagtuon. Irekord ang bisan unsang mga hunahuna o mga pagbati nga moabot kanimo samtang ikaw nagtuon, namalandong, ug naghanduraw.

Hatagi ang mga estudyante og igong panahon sa pagtuon, paghanduraw, ug pagrekord sa ilang mga hunahuna. Ang mga pangutana sama sa mosunod makatabang sa mga estudyante nga magmalamposon sa paghanduraw:

• Samtang naghunahuna ka sa imong kaugalingon nga anaa didto sa templo sa Bountiful, unsaon nimo sa paghulagway ang imong palibot dihang nadungog nimo ang tingog ni Jesukristo nga nagpahayag, “Duol kamo ngari kanako”? (3 Nephi 11:14).

• Unsa nga panagway ang imong mahanduraw sa nawong sa Manluluwas samtang imong susihon ang mga marka sa lansang sa iyang mga kamot ug tiil?

• Unsa sa imong hunahuna ang gibati sa mga tawo sa dihang ilang nakita ang Manluluwas ug nakigsulti Kaniya sa “tagsa-tagsa”? (3 Nephi 11:15).

• Unsa nga mga bahin niini nga asoy ang imong gipili nga mahanduraw? Unsa ang pipila sa imong mga hunahuna ug mga pagbati sa pagbuhat sa ingon?

• Unsa ang gitudlo niini nga mga bersikulo diha kanimo mahitungod sa tinguha sa Manluluwas alang sa matag usa kanato?

Ang mosunod usa ka baroganan nga atong makat-onan gikan niining sagrado nga asoy: si Jesukristo nagdapit kanako sa pagdawat og personal nga pagpamatuod nga Siya mao ang Manluluwas sa kalibotan. Ikonsiderar ang pagrekord niini nga baroganan diha sa imong mga kasulatan o diha sa imong journal sa pagtuon.

Naghisgot sa personal nga pagdapit ug pangalagad sa Manluluwas taliwala sa mga Nephite, si Bishop Gérald Caussé sa Presiding Bishopric mitudlo:

Kining talagsaon nga talan-awon mao ang labing mahinungdanong talan-awon diha sa Basahon ni Mormon. Ang tibuok nga “maayong balita” sa ebanghelyo anaa niining imahe sa Manluluwas nga malumong mipatuyhad sa Iyang “mga bukton sa kaluoy” [Alma 5:33] aron pagdapit sa matag indibidwal nga moduol Kaniya ug modawat sa mga panalangin sa Iyang Pag-ula. …

Sama sa pagdapit ni Jesus sa matag usa sa Nephite nga mga disipulo nga mobati sa Iyang mga samad, namatay Siya alang sa matag usa kanato, sa personal nga paagi, sama nga kamo o ako ra ang tawo sa yuta. Iyang gipadangat kanato ang personal nga pagdapit nga moduol Kaniya ug mogamit sa talagsaong mga panalangin sa Iyang Pag-ula. (Gerald Causse, “Usa ka Buhi nga Saksi sa Buhi nga Kristo,” Liahona, Mayo 2020, 39–40)

Pagdapit og daghang mga tubag sa mosunod nga pangutana. Mahimo usab ipakigbahin sa mga estudyante kon unsa ang nakatabang kanila nga makaangkon og pagpamatuod mahitungod kang Jesukristo. Ikonsiderar usab ang pagpakigbahin kon unsa ang nakatabang kanimo nga makaangkon og pagpamatuod.

• Unsa ang pipila ka mga paagi nga kita makabaton og atong kaugalingon nga pagpamatuod nga si Jesukristo mao ang Manluluwas sa kalibotan?

Kon gikinahanglan, pagpakigbahin og asoy gikan sa mga kasulatan o sa pakigpulong sa kinatibuk-ang komperensiya nga naghulagway kon sa unsang paagi ang mga indibidwal nakaangkon og pagpamatuod sa Manluluwas. Ang mga ehemplo diha sa mga kasulatan mahimong maglakip sa babayeng Samaritanhon diha sa atabay (Juan 4:1–29), amahan ni Hari Lamoni (Alma 22:1–18), o Alma nga Batan-on (Alma 36:5–23).

“Hosanna!”

Ang mga Nephite naimpluwensiyahan pag-ayo sa ilang personal nga mga pakig-uban sa Manluluwas.

Basaha ang 3 Nephi 11:16–17, mangita kon giunsa pagtubag sa kadaghanan human sa ilang kasinatian uban sa Nabanhaw nga Ginoo.

Mahimong makatabang ang pagkahibalo nga ang hosanna maoy Hebreohanong pulong nga nagkahulogang “luwasa karon” o “palihog luwasa kami.” Gigamit kini sa tibuok Kasulatan isip usa ka pagpadayag sa pagdayeg ug pag-ampo ug nahimong usa ka kasaulogan sa Mesiyas sa tanang katuigan (tan-awa sa Giya ngadto sa mga Kasulatan, “Hosanna,” scriptures.ChurchofJesusChrist.org).

Ang mosunod makatabang kanimo nga mogahin og panahon sa pagpahayag sa imong mga pagbati mahitungod sa Manluluwas o magtuon mahitungod sa uban nga mipakigbahin sa ilang mga pagpamatuod mahitungod Kaniya.

Ang mosunod nga mga kalihokan gituyo aron matabangan ang mga estudyante sa pagpahayag sa ilang kaugalingong mga pagpamatuod mahitungod kang Jesukristo o magkat-on gikan sa mga pagpamatuod sa uban. Ipakita ang mga kapilian aron ang mga estudyante makatan-aw niini sa panahon sa kalihokan. Mobati nga gawasnon nga ipahiangay ang mga kapilian aron mas matubag ang mga panginahanglan sa imong mga estudyante.

1. Ipakigbahin ang imong personal nga pagpamatuod mahitungod kang Jesukristo pinaagi sa pagsulat og usa ka sulat ngadto sa usa ka tawo nga imong gibati nga makabenepisyo niini.

2. Pagpili og usa ka bersikulo diha sa mga kasulatan o usa ka himno nga naghulagway sa imong mga pagbati mahitungod kon kinsa si Jesukristo ug unsay Iyang nabuhat alang kanimo. Pagsulat og mubo nga pagpasabot kon nganong makahuloganon kanimo kining bersikulo o himno.

3. Pagsulat og usa ka balak o mga liriko sa usa ka awit nga naghulagway sa imong mga gibati mahitungod ni Jesukristo.

4. Tun-i ang pagpamatuod sa laing tawo mahitungod kang Jesukristo. Ipamubo kon unsa ang imong gitun-an ug kon sa unsang paagi kana nga asoy nakapabati kanimo. Ang mga ehemplo mahimong maglakip sa Alma 26:1–16, 35–37 o “Ang Buhi nga Kristo: Ang Pagpamatuod sa mga Apostoles” (ChurchofJesusChrist.org).

Pagdapit og pipila ka mga estudyante nga buot mopakigbahin kon unsa ang ilang gibuhat sa miaging kalihokan. Pasalamati sila sa ilang kaandam nga moapil. Pagpamatuod sa mga kamatuoran nga imong nahisgotan ug dasiga ang mga estudyante sa pagpadayon sa paghimo og mga paningkamot aron sa pagbaton o pagpalig-on sa ilang pagpamatuod ni Jesukristo.

Komentaryo ug Background nga Impormasyon

3 Nephi 11:14. Unsaon nako sa “pagduol [ngadto]” sa Manluluwas?

Si Presidente Russell M. Nelson mitudlo:

Ang pagpili sa pagduol ngadto kang Kristo wala magdepende kon asa ka nagpuyo; nagdepende kini sa indibidwal nga pasalig. Ang tanang miyembro sa Simbahan makapahimulos sa doktrina, mga ordinansa, mga yawe sa pagkapari, ug mga panalangin sa ebanghelyo, bisan asa pa ang ilang nahimutangan. (Russell M. Nelson, “Ang Umaabot sa Simbahan: Pag-andam sa Kalibotan alang sa Ikaduhang Pag-anhi sa Manluluwas,”Liahona, Abr. 2020, 9)

Sa unsang paagi nga ang usa ka personal nga pagpamatuod kang Jesukristo makaimpluwensiya sa akong kinabuhi?

Si Presidente M. Russell Ballard sa Korum sa Napulog Duha ka Apostoles mitudlo:

Sa yanong pagkasulti, ang pagpamatuod—tinuod nga pagpamatuod, nagagikan sa Espiritu ug gikompirmar sa Espiritu Santo—makapausab og mga kinabuhi. Makapausab kini sa inyong panghunahuna ug unsay inyong gibuhat. Makapausab kini unsay inyong isulti. Makaapektar kini sa kada prayoridad nga inyong himoon ug sa kada pagpili nga inyong himoon. Ang pagbaton og tinuod ug malungtarong pagpamatuod sa ebanghelyo ni Jesukristo mao ang “espirituhanon nga … natawo sa Dios,” “[modawat] sa iyang larawan diha sa inyong mga panagway,” ug aron makasinati og “dako nga kausaban sa inyong mga kasingkasing” (Alma 5:14). (M. Russell Ballard, “Lunsay nga Pagpamatuod,” Liahona, Nob. 2004, 40)

Unsa ang mahinungdanon mahitungod sa mga samad ug mga marka sa nabanhaw nga lawas sa Manluluwas?

Si Elder Gerrit W. Gong sa Korum sa Napulog Duha ka Apostoles mitudlo:

Nagdapit kanato ang Manluluwas sa kanunay nga paghinumdom Kaniya sama sa Iyang kanunay nga paghinumdom kanato.

Sa Bag-ong Kalibotan, ang atong nabanhaw nga Manluluwas midapit sa mga anaa didto sa pagduol, tinagsa-tagsa, sa paghikap sa ilang mga kamot ngadto sa Iyang kilid ug bation ang mga marka sa lansang sa Iyang mga kamot ug tiil.

… Palihog ikonsiderar sa unsang paagi nga ang hingpit, nabanhaw nga lawas sa atong Manluluwas nagdala gihapon sa mga samad sa Iyang kilid ug sa marka sa mga lansang sa Iyang mga kamot ug tiil.

Sa mga panahon sa kasaysayan, ang mortal nga mga tawo silotan sa kamatayon pinaagi sa paglansang sa krus. Apan ang atong Manluluwas lamang, si Jesukristo, mogakos kanato nga nagdala gihapon sa mga marka sa Iyang putli nga gugma. Siya lamang ang nakatuman sa panagna nga gipataas diha sa krus aron ang matag usa kanato Iyang mapaduol, pinaagi sa ngalan, ngadto Kaniya [tan-awa ang 3 Nephi 27:14].

Ang atong Manluluwas nag-ingon:

“Oo, kini sila mahikalimot tingali, apan Ako dili gayod makalimot kanimo.

“Ania karon, Ako na ikaw nga gisilsil sa mga palad sa akong mga kamot” [Isaias 49:15–16]. (Gerrit W. Gong, “Kanunay nga Mohinumdom Kaniya,” Liahona, Mayo 2016, 110)

Dugang nga mga Kalihokan sa Pagkat-on

Pagpangalagad ngadto sa usa ka tawo

Samtang nagtuon sa 3 Nephi 11:12–15, ikonsiderar ang ehemplo sa Manluluwas sa pagpangalagad ngadto sa mga tawo sa tinagsa. Mahimo nimong dapiton ang mga estudyante sa paghunahuna og dugang mga asoy sa kasulatan mahitungod ni Jesus nga nangalagad sa personal nga paagi. Hangyoa ang mga estudyante sa paghunahuna kon sa unsang paagi si Jesukristo nagpadayon sa pagpangalagad kanato sa tinagsa karon. Awhaga ang mga estudyante sa pagsunod sa ehemplo sa Manluluwas sa pagtabang sa nanginahanglan sa tinagsa.

“Buhi ang Manunubos Ko, Niini Nasayod Ako”

Samtang naghisgot ka sa kamahinungdanon sa pag-angkon og personal nga pagpamatuod ni Jesukristo, makatabang ang pag-awit o pagpaminaw sa himno nga “Buhi ang Manunubos Ko, Niini Nasayod Ako” (Mga Himno, nu. 80). Mahimo nimong ipakigbahin ang mosunod nga asoy nga naghulagway sa pipila ka kasinatian ni Samuel Medley, kinsa nagsulat sa mga liriko niini nga himno.

Samtang nagserbisyo sa British Navy kaniadtong 1759, ang tiil ni Samuel grabe nga nasamdan. Giingon sa doktor nga kinahanglan kini putlon. Si Samuel, nga dili relihiyosong tawo, migahin sa kagabhion sa pagpamalandong sa mga pagtulun-an mahitungod ni Jesukristo ug nag-ampo nga maluwas ang iyang kinabuhi ug tiil. Pagkabuntag, miarang-arang ang tiil ni Samuel nga wala na kinahanglana nga putlon. Si Samuel migahin sa nahibilin sa iyang kinabuhi isip usa ka matinud-anon nga Kristiyano (tan-awa sa “I Know That My Redeemer Lives,” What‘s New with The Tabernacle Choir [blog], Pebrero 12, 2014, thetabernaclechoir.org).