3 Nephi 15–16

“Usa ka Pundok ug Usa ka Magbalantay”

Sa dihang si Jesukristo mitudlo sa mga tawo diha sa yuta sa Bountiful, Iyang gipakita ang Iyang gugma alang sa matag tawo. Ang matag usa gidapit sa pag-duol ug sa pagsinati sa Iyang gugma alang sa ilang kaugalingon (tan-awa sa 3 Nephi 11). Iya dayon silang gitabangan nga makasabot nga Iyang gibati ang samang gugma alang sa tanang anak sa Dios. Siya nagtinguha sa matag tawo sa bisan asa nga maihap uban sa Iyang mga karnero. Kini nga leksiyon gituyo aron matabangan ka nga mabati ang tinguha sa Manluluwas sa pagpundok kanimo ug sa tanan ngadto Kaniya.

Pagpalambo og usa ka palibot nga madinawaton ug adunay pagtahod. Paningkamoti nga mahibaloan ang bahin sa background ug kahimtang sa matag estudyante. Makatabang ka sa mga estudyante nga mobati nga nahisakop pinaagi sa pagdapit kanila nga ipakigbahin ang ilang talagsaon nga mga panglantaw ug ipahibalo kanila nga ang ilang mga kontribusyon gihatagan og bili.

Pagpangandam sa estudyante: Dapita ang mga estudyante sa pagpamalandong kon unsaon nila sa pagtubag niini nga pangutana: “Unsa nga ebidensiya ang imong nakita nga gusto sa Manluluwas nga pundokon ang tanan ngadto Kaniya?”

Mga Posibleng Kalihokan sa Pagkat-on

Mga ngalan ug mga titulo ni Jesukristo

Ikonsiderar ang pagbutang og hulagway ni Jesukristo diha sa tunga sa pisara. Pagdapit sa mga estudyante sa pagtinabangay diha sa gagmay nga mga grupo aron makita kon pila ka nagkalain-laing mga ngalan ug mga titulo alang Kaniya ang ilang mahinumdoman o mapalgan sulod sa duha ngadto sa tulo ka minuto. Dayon dapita ang matag grupo sa pagpili og usa sa Iyang mga ngalan o mga titulo nga gusto nilang ipakigbahin sa klase. Ang mosunod mao ang pipila ka mga ehemplo gikan sa Basahon ni Mormon.

Hinumdomi: Kon ang imong mga estudyante makabenepisyo gikan sa mas aktibo nga pag-apil, tan-awa ang “alternatibong pagsugod sa leksiyon” diha sa “Dugang nga mga Kalihokan sa Pagkat-on” nga seksiyon.

• Agalon sa ubasan (Jacob 5:4)

• Bato (Helaman 5:12)

• Kahayag (3 Nephi 11:11)

• Unsa ang usa sa imong paborito nga mga ngalan o mga titulo alang Kaniya? Unsa ang gitudlo niini kanimo mahitungod Kaniya?

Ang mga karnero sa Manluluwas

Diha sa 3 Nephi 15–16, si Jesus nagpadayon sa pagtudlo sa mga tawo duol sa templo diha sa yuta sa Bountiful. Human ipasabot nga ang balaod ni Moises natuman diha Kaniya, Siya mipakigbahin og usa ka titulo alang sa Iyang Kaugalingon nga makatabang kanato nga makasabot sa atong relasyon ngadto Kaniya.

Basaha ang 3 Nephi 15:17 ug ikonsiderar ang pagmarka sa titulo nga gihatag ni Jesus alang sa Iyang Kaugalingon.

Ikonsiderar ang pag-ilis sa hulagway ni Jesukristo diha sa pisara ngadto sa hulagway Kaniya isip usa ka magbalantay sa karnero, sama sa anaa sa sinugdanan niini nga leksiyon. Dapita ang mga estudyante sa hilom nga pagpamalandong sa Iyang tahas isip atong Magbalantay gamit ang mga aghat [prompts] sama sa anaa sa mosunod nga parapo.

Kita sa kasagaran gitandi ngadto sa mga karnero nga sa kanunay nahisalaag gikan ni Jesus ug nawala ug nagkatibulaag. Pamalandong sa makadiyot kon kana nga analohiya tukma ba usahay sa imong kinabuhi. Aduna bay mga higayon nga nahisalaag ka gikan sa imong Magbalantay, si Jesukristo, o aduna ka bay mga minahal nga nahisalaag?

• Sa unsang paagi nga ang pagsabot sa mga pagbati ni Jesus ngadto sa Iyang nagkatibulaag nga mga karnero makaimpluwensiya sa paglaom sa usa ka tawo sa pagbalik ngadto Kaniya?

“Lain nga Karnero”

Ikonsiderar ang pagpakita sa mosunod nga hulagway aron matabangan ang mga estudyante nga mahanduraw ang usa ka “toril.”

Ang mga magbalantay sa mga karnero sa adlaw sa Manluluwas sa kasagaran nagmugna og sirado nga “toril,” sama sa usa niini nga hulagway, aron sa pagbantay sa ilang mga karnero nga luwas gikan sa mga manunukob ug uban pang mga kakuyaw. Ang Simbahan sa Manluluwas usa ka ehemplo sa usa ka toril diin Siya nanalipod kanato gikan sa mga kakuyaw sa kalibotan.

Ikonsiderar ang pagpakita sa mosunod nga duha ka pakisayran sa kasulatan ug sa mga pangutana nga nagsunod sa matag usa niini. Mahimo nimong bahinon ang mga estudyante nga managparesan aron sa pagbasa sa mga tudling ug sa paghisgot sa kauban nga mga pangutana.

Juan 10:14–16 (Si Jesus nagsulti ngadto sa Iyang “mga karnero” sa karaang Israel)

• Unsa sa imong hunahuna ang gipasabot nga si Jesus nakaila sa Iyang mga karnero ug sila nakaila Kaniya?

3 Nephi 15:13–17, 21 (Si Jesus nagsulti ngadto sa Iyang “mga karnero” sa karaang Amerika)

• Sa unsang paagi ang Juan 10:16 ug ang 3 Nephi 15:21 may kalabotan sa usag usa?

Human mahisgoti sa mga estudyante ang miaging pangutana, mahimo nimo silang bahinon ngadto sa managpares aron sa pagdrama-drama. Mahimo silang maghanduraw nga naghatag og usa ka Basahon ni Mormon ngadto sa usa ka higala nga lahi og tinuohan kinsa andam sa pagdawat niini kon sila makapakita nga ang mga tawo sa Basahon ni Mormon gihisgotan diha sa Biblia. Ang mga estudyante mahimong mogamit sa Juan 10:16 ug sa 3 Nephi 15:21 sa pagpasabot nga si Jesus nagtumong sa mga katawhan sa Basahon ni Mormon sa dihang Siya nagtudlo sa Iyang mga tinun-an sa Jerusalem. Paminaw sa mga pagpasabot sa mga estudyante, ug tabangi sila kon gikinahanglan.

Dayon ipakita ang mosunod nga pakisayran ug ang pangutana alang sa mga managpares aron pagahisgotan.

3 Nephi 16:1–3 (Kini nga “mga karnero” naglakip sa “nawala nga mga tribo sa Israel” [3 Nephi 17:4].)

• Unsa ang gitudlo kanimo sa sugo sa Langitnong Amahan mahitungod Kaniya niini nga mga bersikulo?

Ang Maayong Magbalantay

Usa ka kamatuoran nga atong makat-onan gikan niini nga mga kapitulo mao nga ang Langitnong Amahan ug si Jesukristo nagtinguha sa pagpundok sa tanan ngadto sa toril sa Manluluwas.

• Unsa nga modernong mga kapeligrohan nga si Jesus nanalipod kanato diha sa Iyang toril?

Mahimo nimong isulat diha sa pisara ang pipila ka mga kapeligrohan nga gihisgotan sa mga estudyante.

Basaha ang 1 Nephi 22:25, 28 ug ang 3 Nephi 16:11–13, mangita og mga paghulagway sa buhat sa pagpundok sa atong Magbalantay sa atong panahon.

• Unsa nga mga pulong ug hugpong sa mga pulong ang naghulagway kon kinsa ang gusto sa atong Magbalantay nga pagapundokon? Unsa ang gikinahanglan gikan kanato aron madawat ang Iyang mahigugmaong pagdapit?

Panagtigom sa toril sa Manluluwas

Samtang magtuon ka niini nga seksiyon, paghunahuna og usa ka higala nga wala karon makapahimulos sa hingpit nga mga panalangin nga gitanyag sa Manluluwas niadtong anaa sa Iyang toril (ang Simbahan). Mahimong nahisalaag sila gikan sa Iyang Simbahan, o tingale wala pa sila mabunyagan.

Basaha ang mosunod nga mga tudling sa kasulatan ug ang pamahayag ni Elder Dale G. Renlund sa Korum sa Napulog Duha ka Apostoles. O mahimo nimong tan-awon ang bidyo nga “Ang Atong Maayong Magbalantay,” anaa sa ChurchofJesusChrist.org, gikan sa time code 3:13 hangtod sa 4:44. Pangitaa ang mga butang nga gusto nimo nga mahibaloan sa imong higala bahin sa atong Magbalantay.

• Alma 5:60

• Juan 10:11

• Isaias 53:4–6

Isip ang Maayong Magbalantay, gitan-aw ni Jesukristo ang sakit sa Iyang karnero isip usa ka kahimtang nga nagkinahanglang tambalan, atimanon, ug kaluy-on. Kini nga magbalantay, ang atong Maayong Magbalantay, nakakaplag og kalipay sa pagkakita sa Iyang masakiton nga karnero nga milambo ngadto sa pagkaayo. …

Ang mortal nga pangalagad sa Manluluwas sa pagkatinuod gihulagway pinaagi sa gugma, kapuangod, ug kaluoy. Wala niya lakawa nga supak sa buot ang abugon nga kadalanan sa Galilea ug Judea, miatras sa pagkakita sa mga makasasala. Wala Niya sila likayi sa hingpit nga kalisang. Wala, Siya nakigsalo uban nila. Siya mitabang ug mipanalangin, mibayaw ug milig-on, ug gihulipan ang kahadlok ug kawalay kadasig og paglaom ug hingpit nga kalipay. Sama sa tinuod nga magbalantay nga Siya mao, gitinguha ug gipangita Niya kita aron itanyag ang kahupayan ug paglaom. (Dale G. Renlund, “Ang Atong Maayong Magbalantay,”Liahona, Mayo 2017, 30)

• Unsa ang gusto nimo nga mahibaloan sa imong higala mahitungod sa atong Magbalantay gikan niini nga mga tudling ug gikan sa pamahayag ni Elder Renlund? Ngano man?

• Unsa ang pipila ka ehemplo sa paagi sa Manluluwas sa pagpundok sa mga tawo ngadto Kaniya? (Mahimong naglakip niini sa usa ka tawo nga imong nailhan sa personal, mga tawo gikan sa mga kasulatan, o bisan ikaw.)

Ikonsiderar ang pagtapos sa klase pinaagi sa pagkanta, pagpamati, o pagbasa sa himno “Gimahal sa Magbalantay” (Mga Himno, nu. 134). Dapita ang mga estudyante sa paghunahuna kon unsa ang gibati sa Manluluwas mahitungod kanila. Dayon dapita sila sa pagpakigbahin kon sa unsang paagi sila nahibalo nga ang mga liriko sa himno nagtudlo sa kamatuoran (base sa unsay ilang gibati, nakita, o nasinati).

Paghatag sa imong pagpamatuod sa tinguha sa Manluluwas sa pagpundok sa tanan ngadto Kaniya.

Komentaryo ug Background nga Impormasyon

Unsaon nato sa pagsulod sa panon sa Dios?

Elder Randy D. Funk sa Seventy mitudlo:

Adunay usa lamang ka paagi nga moipon ngadto sa panon sa Dios ug adunay usa lamang ka paagi aron maluwas. Kini pinaagi kang Jesukristo.

Kita makakat-on kon unsaon sa pag-ipon ngadto sa panon gikan sa pulong sa Dios, nga mao ang doktrina nga gitudlo ni Jesukristo ug sa Iyang mga propeta. Kon kita mosunod sa doktrina ni Kristo ug moipon ngadto sa panon pinaagi sa hugot nga pagtuo ni Jesukristo, paghinulsol, pagpabunyag ug kompirmasyon, ug padayon nga kamatinud-anon, si Alma misaad og upat ka piho nga personal nga mga panalangin. Kamo mahimong (1) “matubos sa Dios,” (2) “malakip uban niadto nga diha sa unang pagkabanhaw,” (3) “makabaton og kinabuhi nga dayon,” ug (4) ang Ginoo “mobubo sa kabuhong sa iyang Espiritu diha kaninyo.”” [Mosiah 18:9, 10]. (Randy D. Funk, “Moipon ngadto sa Panon sa Dios,” Liahona, Mayo 2022, 120)

Unsa ang gitanyag sa Manluluwas niadtong mosulod sa Iyang panon?

Si Elder Randy D. Funk sa Seventy miingon:

Sulod sa panon sa Dios, atong masinati ang Iyang mabinantayon, maamumahon nga pag-atiman ug mapanalanginan nga mobati sa Iyang matubsanong gugma. Siya miingon, “Gikulit ko ang imong ngalan diha sa akong mga palad; ang imong mga paril kanunay kong gibantayan.”[Isaiah 49:16]. Ang atong Manluluwas nakahibalo ug nagpakabana sa atong mga sala, mga sakit, mga kasakit, ug sa tanan nga dili makiangayon sa kinabuhi. Ang tanan mahimong makadawat niini nga mga panalangin, kon sila “matinguhaon sa pag-ipon” [Mosiah 18:8] ug mopili nga magpabilin diha sa panon. (Randy D. Funk, “Moipon ngadto sa Panon sa Dios,” Liahona, Mayo 2022, 119)

Dugang nga mga Kalihokan sa Pagkat-on

Alternatibo nga pagsugod sa leksiyon

Sa dili pa ang klase, mahimo nimong itago ang pipila ka mga litrato o ngalan sa lainlaing mga tawo nga imong gihigugma sa palibot sa klasehanan [classroom]. Sila mahimong gikan sa mga sakop sa pamilya, mga sakop sa ward, o imong mga estudyante. Usab, ipakita sa pisara ang hulagway ni Jesukristo isip usa ka magbalantay sa karnero, sama nianang anaa sa sinugdanan niini nga leksiyon.

Hangyoa ang mga estudyante sa pagtabang sa pagpangita sa tanan nimong “nagkatibulaag” nga mga minahal ug ibutang kini sa pisara duol sa hulagway sa Manluluwas. Awhaga sila sa pagpangita sa matag usa kanila tungod sa unsay ilang bili diha kanimo. (Apan ayaw itugot nga kini nga kalihokan magdugay.)

Ang Iyang karnero maminaw sa Iyang tingog

Ikonsiderar ang pagpakita sa bidyo nga “#Paminaw Kaniya: Si Presidente Nelson Nagdapit Kanato sa Pagpaminaw sa Tingog sa Ginoo” gikan sa time code 0:00 hangtod sa 1:35.

Dapita ang mga estudyante sa pagmarka sa mga hugpong sa mga pulong diha sa matag usa sa mosunod nga mga bersikulo nga naghisgot sa karnero ni Kristo nga naminaw sa Iyang tingog: 3 Nephi 15:17, 21, 24; 16:2–3.

Dayon dapita ang mga estudyante sa pagpakigbahin og nagkalainlaing mga paagi nga atong mapaminaw ang tingog sa Maayong Magbalantay.

Mahimo nimong ipasabot nga kita makapaminaw sa Iyang tingog pinaagi sa Espiritu Santo (tan-awa sa 3 Nephi 16:6).

Ikonsiderar ang pagpakita og usa o labaw pa sa usa sa mubo nga mga bidyo sa Simbahan nga adunay hashtag nga #Paminaw Kaniya gikan sa koleksiyon nga “Paminaw Kaniya”.

Pagpundok sa Israel

Aron matabangan ang mga estudyante sa pagsabot sa mga pagtulun-an mahitungod sa pagpundok sa Israel niini nga mga kapitulo, ikonsiderar ang paggamit sa 3 Nephi 16:4–5, 11–13 sa pagpakita nga ang Israel natigom samtang ang mga tawo gidala ngadto sa kahibalo sa ilang Manunubos ug sa Iyang ebanghelyo. Mahimo nimong hisgotan kon sa unsang paagi ang Manluluwas mibisita sa nagkalainlaing mga pundok nga sakop sa balay ni Israel ug kon sa unsang paagi silang tanan nailhan sa Amahan (tan-awa sa 3 Nephi 17:4).

Dapita ang mga estudyante sa pagpakigbahin og mga paagi nga makatabang sila sa Manluluwas sa pagpundok sa Israel.