3 Նեփի 12.17–48

«Ես կամենում եմ, որ դուք լինեք կատարյալ»

Հիսուս Քրիստոսն ուսուցանում էր, որ մենք պետք է «լինենք կատարյալ», ինչպես Նա և մեր Երկնային Հայրն են կատարյալ (3 Նեփի 12.48)։ Թեև այս պատվիրանը կարող է դժվար թվալ, այն կարևոր գաղափարներ է տալիս մեր Երկնային Հոր և Հիսուս Քրիստոսի էության մասին։ Այն նաև ուսուցանում է, որ մենք կարող ենք Նրանց նման դառնալ։ Այս դասը նախատեսված է օգնելու ձեզ հասկանալ մեր Երկնային Հորը և Հիսուս Քրիստոսին կատարելապես նմանվելու ձեր ներուժը։

Սեր արտահայտեք և մեծ ակնկալիքներ ունեցեք: Երբ ուսուցիչներն իսկապես սիրում են իրենց ուսանողներին, չափազանց շատ ջանք են ներդնում նրանց առաջընթացի և հաջողության համար և բավարարված չեն լինում նրանց գործադրած ընդամենը մի փոքր ջանքով: Սիրով խրախուսեք ձեր ուսանողներին՝ իրացնելու իրենց ներուժը որպես ուսանողներ և Հիսուս Քրիստոսի աշակերտներ:

Ուսանողի նախապատրաստում․ ուսանողներին առաջարկեք ուսումնասիրել Սուրբ գրքերի ուղեցույցի «Կատարյալ» գրառման առաջին պարբերությունը և պատրաստվել՝ կիսվելու, թե այս սահմանման մեջ ինչն էր նրանց համար ամենակարևորը և ինչու։

Հնարավոր ուսումնական վարժություններ

Նշում․ թեև այս դասն անդրադառնում է 17–47 հատվածներում Հիսուսի ուսուցանած բարձրագույն օրենքի մի քանի ոլորտներին, դասի հիմնական նպատակն է օգնել ուսանողներին հասկանալ վարդապետության սերտման 3 Նեփի 12.48 հատվածում ուսուցանվող ճշմարտությունները։ Եթե ձեր ուսանողների համար օգտակար կլինի բարձրագույն օրենքի ասպեկտների ուսումնասիրությանն ավելի շատ ժամանակ հատկացնելը, կարող եք հանգիստ երկու օր ծախսել այս դասի նյութն ուսումնասիրելու վրա և փոխարինել հետագա որևէ դաս։

«Օժանդակ ուսումնական վարժություններ» բաժնում որոշ գաղափարներ են ներկայացված, որոնք կարող են օգտակար լինել բարձրագույն օրենքի այլ կողմերն ուսուցանելու համար։

Ձեր ներուժը

Ցուցադրեք հետևյալ նկարները կամ այլ նկարներ, որոնցում պատկերված է մի բան, որը դեռևս լիարժեքորեն չի զարգացել։

• Սրանցից յուրաքանչյուրն ի՞նչ կարող է դառնալ, երբ ամբողջովին զարգանա։

• Ի՞նչ է նրանց անհրաժեշտ՝ իրենց ներուժին հասնելու համար։

• Ո՞րն է յուրաքանչյուր զավակի ներուժը Երկնային Հոր ծրագրում։

• Ինչպե՞ս է ձեր աստվածային ներուժը հասկանալն ազդում ձեր որոշումների վրա։ Ինչպե՞ս է այն ազդում ձեր ներքին ինքնազգացողության վրա։

Այսօրվա դասն ուսումնասիրելիս մտածեք, թե որքան եք արդեն աճել ու սովորել ձեր կյանքի ընթացքում և ինչպիսին կարող եք դեռ դառնալ Աստծո օգնությամբ։

Փրկչի հրավերը՝ հասնելու մեր ներուժին

3 Նեփի 12.17–47 հատվածներում Հիսուսը Մորմոնի Գրքի մարդկանց մի քանի օրինակ բերեց Մովսեսի օրենքից։ Նա յուրաքանչյուր օրինակին բարձրագույն օրենքի բացատրություն էր տալիս կամ առաջարկում էր ապրել արդարակեցության ավելի բարձր մակարդակով, որը կարող է օգնել մեզ ավելի լավ հասկանալ, թե Նա և մեր Երկնային Հայրն ինչ են ցանկանում, որ մենք դառնանք։

Որպեսզի ուսանողները տեսնեն Հիսուսի ուսուցանած բարձրագույն օրենքի օրինակները, կարող եք դասարանը բաժանել երեք խմբի և յուրաքանչյուր խմբի հանձնարարել կարդալ սուրբ գրքի 3 Նեփի 12.21–22, 27–29 և 38–42 հատվածներից մեկը և փնտրել եղանակներ, որոնցով Փրկիչն առաջարկում է մեզ զարգանալ դեպի մեր ներուժը։ Ուսանողներին առաջարկեք կիսվել, թե այս հատվածներում Փրկիչն ինչպես է առաջարկում մեզ ապրել արդարակեցության ավելի բարձր մակարդակով։ Կարող եք օգնել ուսանողներին մտածել օրինակներ, թե մեր օրերում ինչպես կարող ենք հնազանդվել այս օրենքներին։

• Այդ ուսմունքներն ինչպե՞ս կարող են օգնել մեզ ավելի շատ նմանվել Երկնային Հորը և Հիսուս Քրիստոսին։

Կարդացեք 3 Նեփի 12.48 հատվածը և փնտրեք, թե որն է այն լիարժեք ներուժը, որը Հիսուս Քրիստոսը գիտի, որ կա յուրաքանչյուրիս մեջ։

3 Նեփի 12.48 հատվածը վարդապետության սերտման հատված է։ Վարդապետության սերտման հատվածները կարող եք նշել աչքի ընկնող ձևով, որպեսզի հեշտ գտնեք դրանք: Հաջորդ դասին դուք հնարավորություն կունենաք որևէ հարցի կամ իրավիճակի համար կիրառել այս հատվածում ուսուցանված վարդապետությունը:

Այս հատվածն ուսուցանում է մեզ, որ Հիսուս Քրիստոսը ցանկանում է, որ կատարյալ կերպով Նրան և մեր Երկնային Հորը նմանվենք։

Կարող եք հանձնարարել ուսանողներին ներքևում՝ թղթի թերթիկների վրա գրել առաջին հարցի պատասխանները և շրջել թերթիկները։ Դասի վերջում կարող եք կարդալ նրանց հարցերից կամ մտահոգություններից մի քանիսը և թույլ տալ ուսանողներին պատասխանել իրենց սովորածի հիման վրա։

• Ըստ ձեզ՝ մարդիկ ի՞նչ հարցեր կամ մտահոգություններ կարող են ունենալ այս ուսմունքի վերաբերյալ։ Ինչո՞ւ։

• Ի՞նչն է ձեզ հույս կամ վստահություն տալիս, որ հնարավոր է նմանվել Երկնային Հորը և Հիսուս Քրիստոսին։

• Այս ճշմարտությունն ի՞նչ կապ կարող է ունենալ դասի սկզբում ներկայացված նկարների հետ։

Երկնային Հոր և Հիսուս Քրիստոսի կատարյալ սերը

Դառնալ կատարյալ նշանակում է նմանվել Երկնային Հորը և Հիսուս Քրիստոսին։ Այս գլխում Քրիստոսի ուսուցանած բարձրագույն օրենքը կարող է օգնել մեզ հասկանալ Երկնային Հոր և Հիսուս Քրիստոսի բնավորությունն ու հատկանիշները։ Երբ ավելի լավ հասկանանք, թե ով են Նրանք, կարող ենք ձգտել նմանվել Նրանց և հույս ունենալ, որ Նրանք համբերատարությամբ կօգնեն մեզ մեր առաջընթացին ձգտելիս։

Կարդացեք 3 Նեփի 12.43–45 հատվածները և Տասներկու Առաքյալների Քվորումից երեց Ջեֆրի Ռ. Հոլլանդի հետևյալ խոսքերը և փնտրեք, թե ինչ են նրանք ուսուցանում Երկնային Հոր և Հիսուս Քրիստոսի սիրո մասին։

Ես երախտապարտ եմ՝ իմանալու, որ, չնայած իմ թերություններին, գոնե Աստված կատարյալ է, և գոնե Նա կարող է սիրել իր թշնամիներին, քանի որ շատ հաճախ մեր մեջ գտնվող «բնական տղամարդու» և կնոջ պատճառով ես և դուք երբեմն այդ թշնամին ենք։ Որքան երախտապարտ եմ ես, որ գոնե Աստված կարող է օրհնել նրանց, ովքեր չարամտորեն օգտագործում են Իրեն, քանի որ առանց այդպես վարվելու ցանկության կամ մտադրության մենք բոլորս երբեմն չարամտորեն օգտագործում ենք Նրան։ (Ջեֆրի Ռ. Հոլլանդ, «Արդ դուք կատարեալ եղիք, ի վերջո», Լիահոնա, նոյեմբեր 2017 թ․, 41)։

• Ինչո՞ւ է մխիթարիչ այն միտքը, որ Երկնային Հայրը և Հիսուս Քրիստոսը սիրում են Իրենց թշնամիներին և օրհնում են նրանց, որոնք չարամտորեն օգտագործում են Նրանց։

• Նրանց սերը, օգնությունը և համբերությունը ինչպե՞ս կարող են հույս տալ ձեզ, որ մի օր հասնեք կատարելության։

Կատարելությունը մի գործընթաց է, որը հնարավոր է միայն Հիսուս Քրիստոսի միջոցով

Բնական է մտածել, թե արդյո՞ք հնարավոր է կատարյալ դառնալ։ Եթե մենք փորձեինք ինքնուրույն հասնել կատարելության, կամ եթե կատարելության հասնեինք մեր մահկանացու կյանքի ընթացքում, դա անհնար կլիներ։

Կարդացեք Վարդապետություն և Ուխտեր 76.69–70 և Մորոնի 10.32–33 հատվածները և փնտրեք, թե ինչն է հնարավոր դարձնում կատարյալ դառնալը։ Կարող եք այս հատվածները խաչաձև կապել 3 Նեփի 12.48 հատվածի հետ։

• Նրանք, որոնք ի վերջո կատարյալ են դարձել, ինչի՞ շնորհիվ են կարողացել անել դա։

Եթե ուսանողները դժվարանան պատասխանել նախորդ հարցին, անպայման բացատրեք, որ միայն Հիսուս Քրիստոսի միջոցով մենք կարող ենք կատարյալ դառնալ։ Առանց Նրա հնարավոր չէ։ Երբ մենք ամեն օր ապաշխարում ենք և անընդհատ ձգտում ենք հոգևոր աճ ունենալ, մենք դառնում ենք կատարյալ Քրիստոսում։

Կարդացեք Վարդապետություն և Ուխտեր 93.11–13 հատվածները և փնտրեք, թե այդ հատվածներն ինչո՞վ են ավելացնում Հիսուս Քրիստոսի կատարելության մասին մեր հասկացողությունը։

• Ինչո՞ւ է կարևոր հասկանալ, որ նույնիսկ Հիսուս Քրիստոսի կատարելությունն էր գործընթաց։

Նախագահ Ռասսել Մ. Նելսոնը կատարելության սահմանման և գործընթացի մասին ուսուցանել է հետևյալը․

Նկատի ունեցեք, որ [կատարյալ] բառը չի ենթադրում «ազատում սխալներից»։ …

Մենք չպետք է շփոթվենք, եթե կատարելությանն ուղղված մեր անկեղծ ջանքերն այժմ ծանր [դժվարին] և անվերջանալի են թվում։ Կատարելությունն ընթացքի մեջ է։ Այն լիովին կարող է իրագործվել միայն Հարությունից հետո և միայն Տիրոջ միջոցով։ Այն սպասում է բոլոր նրանց, ովքեր սիրում են Նրան և պահում են Նրա պատվիրանները: (Ռասսել Մ. Նելսոն, «Կատարելությանը սպասելիս», Ensign, նոյեմբեր 1995, 86, 88)

• Այս խոսքերն ի՞նչ են ավելացնում կատարելության վերաբերյալ ձեր հասկացողությանը։

Դասի այս վերջին հատվածում ուսանողները հնարավորություն ունեն արտահայտելու Աստծո նման կատարյալ դառնալու մեր ներուժի մասին իրենց ընկալումը։

Որպես դա անելու եղանակներից մեկը, նրանք կարող են կարդալ հարցերից ու մտահոգություններից մի քանիսը, որոնք ուսանողներն ավելի վաղ դասի ընթացքում գրել են։ Հնարավորություն տվեք ուսանողներին կիսվելու, թե իրենց սովորածն ինչպես կարող են կիրառել յուրաքանչյուր հարցի կամ մտահոգության համար։

Պատկերացրեք, որ ձեզ խնդրել են ձեր հաջորդ երիտասարդների միջոցառման ժամանակ երկուսից երեք րոպե տևողությամբ հոգևոր միտք արտահայտել։ Ձեր ղեկավարները խնդրում են ձեզ կիսվել ձեր մտքերով այն մասին, թե 3 Նեփի 12.48 հատվածի ուսմունքն ինչու պետք է մեզ հույս տա։ Գրի առեք ձեր մտքերը: Ներառեք հետևյալ հարցերի պատասխանները․

• Ի՞նչ է նշանակում դառնալ կատարյալ։ Դա ի՞նչ չի նշանակում։

• Ինչպե՞ս է այն, ինչ գիտեք Երկնային Հոր և Հիսուս Քրիստոսի մասին, հուսադրում ձեզ, որ կդառնաք Նրանց նման։

Կարող եք կիսվել ձեր վկայությամբ, որ յուրաքանչյուր ուսանող որպես Աստծո զավակ իր ինքնությունն ունի և ներուժ՝ նմանվելու մեր Երկնային Հորն ու Հիսուս Քրիստոսին, ժամանակի ընթացքում և Նրանց օգնությամբ։

Բացատրական և պատմական տեղեկություններ

Ի՞նչ է պատահում, եթե ես զգում եմ, որ չեմ կարող ապրել այնպես, ինչպես Փրկիչն է ակնկալում։

Նախկինում Առաջին Նախագահությունից նախագահ Դիտեր Ֆ․ Ուխդորֆն ուսուցանել է.

Come, Join with Us

Ոմանք, հնարավոր է, ասեն. «Ես չեմ կարծում, որ կարող եմ ապրել ըստ ձեր չափանիշների»:

Դա գալու ավելի մեծ առիթ է: Եկեղեցին նախատեսված է սնուցելու անկատար, մաքառող և ուժասպառ մարդկանց: Այն լի է մարդկանցով, որոնք ողջ սրտով ցանկանում են պահել պատվիրանները, նույնիսկ եթե նրանք դեռ չեն սերտել դրանք (Դիտեր Ֆ. Ուխդորֆ, «Եկե´ք, միացե՛ք մեզ», Լիահոնա, նոյեմբեր 2013թ., 23):

Տասներկու Առաքյալների Քվորումից երեց Ջեֆրի Ռ. Հոլլանդը խորհուրդ է տվել.

«Եկեք այնպիսին, ինչպիսին կաք», - սիրող Հայրն ասում է մեզանից յուրաքանչյուրին, բայց ավելացնում է. «Մի ծրագրեք մնալ այնպիսին, ինչպիսին կաք»: Մենք ժպտում ենք և հիշում, որ Աստված վճռական է, որ մեզ դարձնի ավելին, քան մենք պատկերացնում ենք, որ կարող ենք լինել: (Ջեֆրի Ռ. Հոլլանդ, «Երգած և չերգած երգերը», Լիահոնա, մայիս, 2017թ., 51)

Մարգարե Ջոզեֆ Սմիթը (1805–1844) ուսուցանել է.

Երբ բարձրանում եք աստիճանով, պետք է սկսեք ցածրից և բարձրանաք քայլ առ քայլ, մինչև հասնեք վերև. այդպես է նաև ավետարանի սկզբունքների դեպքում․ պետք է սկսեք առաջինից և առաջ գնաք, մինչև սովորեք վեհացման բոլոր սկզբունքները։ Սակայն դրանք սովորելու համար շատ ժամանակ կպահանջվի, նույնիսկ՝ վարագույրից այն կողմ եղած ժամանակը: Հնարավոր է, որ բոլոր բաները չըմբռնենք այս աշխարհում. մեծ աշխատանք է մեր փրկության և վեհացման մասին սովորելը՝ նույնիսկ գերեզմանից այն կողմ: (Եկեղեցու նախագահների ուսմունքները. Ջոզեֆ Սմիթ [2007], 268)

Ի՞նչ է կատարելապաշտությունը, և ինչպե՞ս կարող եմ արձագանքել դրան։

Տասներկու Առաքյալների Քվորումից երեց Ջերիթ Վ. Գոնգն ուսուցանել է.

Կատարելություն բառը … երբեմն սխալմամբ ընկալվում է որպես՝ երբեք սխալ չանել: Գուցե դուք կամ ձեր ծանոթներից մեկը փորձում է լինել կատարյալ հենց այս ձևով: Այդպիսի կատարելությունը միշտ թվում է անհասանելի, քանզի նույնիսկ լավագույն ջանքերը կարող են ավարտվել հուսահատությամբ: Մենք ապարդյուն փորձում ենք կառավարել մեր հանգամանքները և մեզ շրջապատող մարդկանց: Մենք տառապում ենք մեր թուլություններից ու սխալներից: Իրականում որքան ավելի շատ ենք փորձում հասնել կատարելության, այնքան ավելի հեռու է այն թվում։ …

Կատարյալ լինելու սխալ ընկալումը կարող է բերել կատարելապաշտության, երբ մարդը ցանկանում է լավը լինել և վերածում է այդ ցանկությունը հենց հիմա կատարյալ լինելու անիրական ակնկալիքի։ Երբեմն կատարելապաշտությունը ծնվում է այն զգացումից, որ միայն նրանք, ովքեր կատարյալ են, արժանի են սիրո կամ, մենք արժանի չենք երջանիկ լինելու, եթե մենք կատարյալ չենք: (Ջերիթ Վ. Գոնգ, «Ինչպես դառնալ կատարյալ Քրիստոսի մեջ», Ensign, հուլիս 2014 թ․, 14–15, 17)։

Դիտեք «Կատարելապաշտություն․ արդյո՞ք ես երբևէ բավականաչափ լավը կլինեմ» (4:33) տեսանյութը։

Perfectionism: Will I Ever Be Good Enough?

Օժանդակ ուսումնական վարժություններ

Կատարելությունը որպես գործընթաց

Այն բանի իմացությունը, որ այս կյանքում մենք չենք հասնելու լիարժեք կատարելության, կարող է օգնել ուսանողներին խուսափել հուսահատության զգացումից։ Կարող եք հանձնարարել ուսանողներին համեմատել Մատթեոս 5.48 և 3 Նեփի 12.48 հատվածները՝ տեսնելու, թե հնագույն Իսրայելում հրեաներին ուղված Հիսուսի ուսմունքն ինչով էր տարբերվում նրանից, ինչ Նա ասաց նեփիացիներին։ Կարող եք հարցնել ուսանողներին, թե ինչ են սովորում այն փաստից, որ մինչ Իր մահն ու հարությունը Հիսուսն Իրեն դեռևս չէր համարում կատարելության օրինակ։

Ազնվություն և շիտակություն

Կարող եք հարցնել ուսանողներին, թե ինչ են ասում մարդիկ, երբ ցանկանում են ընդգծել, որ իրենց ասած ինչ-որ բանը ճիշտ է։ Հին Կտակարանի ժամանակներում Տիրոջ անունով երդում տալու միջոցով մարդիկ ցույց էին տալիս խոստումը պահելու իրենց բացարձակ վճռկանությունը։ Ուսանողները կարող են կարդալ 3 Նեփի 12.33–37 հատվածները և փնտրել Հիսուսի ուսուցանած բարձրագույն օրենքն այն մասին, թե ինչպես դրսևորել ազնվություն և շիտակություն։ Երկնային Հորը և Հիսուս Քրիստոսին ավելի նմանվելու համար Փրկիչն ուսուցանում էր, որ «այո»-ն պետք է նշանակի «այո», իսկ «ոչ»-ը պետք է նշանակի «ոչ»՝ առանց ձեր ազնվությունն ապացուցելու համար երդում տալու։

Ինչո՞ւ է կարևոր ձեզ համար իմանալ, որ Երկնային Հայրը և Հիսուս Քրիստոսը ամբողջովին շիտակ են ու ճշմարիտ։

Աստծո երկար տառապանքը

Որպես Երկնային Հոր և Հիսուս Քրիստոսի կատարելությունը ցույց տալու եղանակներից մեկը, ուսանողներին հանձնարարեք կարդալ 3 Նեփի 12.38–42 հատվածները և փնտրել, թե ըստ Փրկչի ուսմունքի մենք ինչպես պետք է արձագանքենք, երբ մեր հանդեպ չարիք գործեն։ Ուսանողներին հարցրեք, թե այս հատվածներում Երկնային Հոր և Հիսուս Քրիստոսի որ հատկանիշների համար են նրանք երախտապարտ, և ինչպես կարող ենք մենք այդպես մի փոքր ավելի նմանվել Նրանց։