“Doktrinal nga Kahanas: 3 Nephi 12:48—‘Mahimo nga Hingpit Sama nga Ako, o ang Inyong Amahan Kinsa Anaa sa Langit Hingpit,’” Manwal sa Magtutudlo sa Basahon ni Mormon (2024)
“Doktrinal nga Kahanas: 3 Nephi 12:48,” Manwal sa Magtutudlo sa Basahon ni Mormon
Doktrinal nga Kahanas: 3 Nephi 12:48
“Mahimo nga Hingpit Sama nga Ako ingon, o ang Inyong Amahan Kinsa Anaa sa Langit Hingpit”
Sa imong pagtuon sa 3 Nephi 12, imong nakat-onan ang pagkahimong hingpit sama ni Jesukristo ug sa Langitnong Amahan. Kini nga leksiyon makatabang sa mga estudyante sa pagsag-ulo sa pakisayran ug sa mahinungdanon nga hugpong sa mga pulong sa kasulatan sa 3 Nephi 12:48, mapasabot ang doktrina nga gitudlo niini nga tudling, ug magamit ang mga baroganan sa pag-angkon og espirituhanong kahibalo sa tinuod nga mga sitwasyon sa kinabuhi.
Paghimo og usa ka aktibo nga palibot sa pagkat-on.Samtang nangandam ka og mga leksiyon ug nakighalubilo sa mga estudyante, pangita og mga paagi sa pagdapit sa mga estudyante nga aktibong mosalmot. Ang mga pananglitan naglakip sa pagdapit sa mga estudyante sa pagsulat diha sa pisara, pagpapresentar sa ilang nakat-onan ngadto sa klase, o pagpapili gikan sa lainlaing mga kapilian sa pagtuon. Ang pagbuhat sa ingon makatabang sa mga estudyante nga moapil sa pagkat-on ug makatabang nila nga mas maduol sa Manluluwas.
Pagpangandam sa estudyante: Dapita ang mga estudyante sa pagsag-ulo sa 3 Nephi 12:48 sa dili pa motambong sa klase. Mahimo nimo silang dapiton sa pagpraktis sa pagsaysay [recite] sa kasulatan gikan sa panumdoman ngadto sa ubang mga sakop sa klase sa panahon nga nagsingabot na ang klase, personal man, pinaagi sa pagmensahe, o sa ubang paagi.
Mga Posibleng Kalihokan sa Pagkat-on
Kini nga leksiyon sa tudling sa doktrinal nga kahanas gidesinyo nga itudlo human sa leksiyon sa “3 Nephi 12:17–48,” nga mao ang leksiyon sa konteksto alang sa tudling sa doktrinal nga kahanas sa 3 Nephi 12:48. Kon gikinahanglang ibalhin kini nga leksiyon sa tudling sa doktrinal nga kahanas sa laing semana, seguroha nga itudlo usab ang tukma nga pangkonteksto nga leksiyon nianang semanaha.
Ipasabot ug isag-ulo
Sa miaging leksiyon, imong nakat-onan ang mosunod nga kamatuoran: Si Jesukristo gusto nga kita mahimong hingpit sama Kaniya ug sa atong Amahan sa Langit.
Handurawa nga ikaw adunay usa ka higala kinsa nagtuo nga ang Dios walay mga gilaoman kanato gawas sa pagkamaayo ug pagtahod sa uban.
-
Unsaon nimo pagpasabot ang 3 Nephi 12:48 sa paagi nga makadugang sa pagsabot sa imong higala?
Ikonsiderar ang paghatag og panahon sa mga estudyante sa pagsulat sa ilang mga tubag sa miaging pangutana. Kon mahuman na sila, pagdapit og pipila ka boluntaryo nga mopaambit diha sa klase kon unsay ilang gisulat, -ipadrama-drama ang panag-istoryahanay, o ipakigbahin ang ilang tubag ngadto sa usa ka partner. Samtang ang mga estudyante motubag, siguroha nga sila makasabot nga ang Langitnong Amahan ug si Jesukristo naglaom nga kita maningkamot nga mahisama Kanila, nga ang kahingpitan posible lamang pinaagi sa tabang sa Manluluwas, ug nga ang Pag-ula ni Jesukristo naghimo sa kahingpitan nga posible sa umaabot bisan pa sa atong mga sala ug mga kasaypanan.
Ang mahinungdanon nga hugpong sa mga pulong sa kasulatan sa 3 Nephi 12:48 mao ang “Mahimo nga hingpit sama nga Ako ingon, o ang inyong Amahan kinsa anaa sa langit hingpit.” Gamita ang mosunod nga pamaagi, o lain nga imong pilion, aron makatabang kanimo sa pagsag-ulo sa pakisayran ug sa mahinungdanon nga hugpong sa mga pulong sa kasulatan.
Pagpili sa bisan unsa nga pamaagi sa pagtabang sa mga estudyante sa pagsag-ulo sa mga mahinungdanon nga hugpong sa mga pulong ug sa pakisayran alang niini nga tudling. Ang mosunod nga kalihokan maoy usa ka pananglitan sa usa ka paagi nga mahimo nimo kini:
Alang sa kalihokan, hatagi ang matag estudyante og katunga sa papel ug dasiga sila sa pagsulat sa mga hugpong sa mga pulong sa bisag-asa nga mga kanto sa ilang papel. Kon nahuman na nila ang kalihokan sa ilang kaugalingon nga papel, mahimo nilang ibaylo ang mga papel sa ubang mga estudyante ug balikon ang kalihokan.
Isulat ang “3 Nephi 12:48” diha sa tunga sa usa ka piraso nga papel. Sa usa ka kanto sa panid, isulat ang mga pulong nga “Mahimo nga hingpit.” Sa laing kanto, isulat ang “sama nga ako ingon.” Sa laing kanto, isulat ang “o ang inyong Amahan kinsa anaa sa langit.” Sa kataposan nga kanto, isulat ang “hingpit.” Sulayi ang pagsag-ulo sa pakisayran sa kasulatan ug sa mahinungdanon nga hugpong sa mga pulong sa kasulatan pinaagi sa paghikap gamit ang imong lapis o sa imong tudlo sa matag hugpong sa mga pulong sa han-ay, sugod sa pakisayran sa tunga. Makatabang kini ang pagsulti sa mga pulong sa makusog samtang gihikap nimo kini. Human sa pagbuhat niini sa pipila ka mga higayon, sulayi ang pagsulti og balik sa pakisayran ug sa tibuok hugpong sa mga pulong gikan sa panumdoman.
Pagbansay sa paggamit
Bahina ang klase ngadto sa mga grupo sa tinagutlo. Dapita ang matag estudyante sa pagpili og usa ka baroganan sa pag-angkon ug espirituhanong kahibalo (tan-awa sa Mahinungdanon nga Dokumento sa Doktrinal nga Kahanas [2023], “Pag-angkon og Espirituhanong Kahibalo,” mga parapo 5–12). Hangyoa ang mga estudyante sa pagrebyo og daklit sa baroganan ug dayon ipasabot kini ngadto sa ilang grupo.
Gamita ang mosunod nga senaryo aron sa pagtabang kanimo sa paggamit sa mga pagtulun-an sa Manluluwas diha sa 3 Nephi 12:48 ug sa baroganan sa pag-angkon og espirituhanong kahibalo.
Batia ang pagkagawasnon nga bag-ohon ang ngalan o bag-ohon ang sitwasyon aron mas matubag ang mga panginahanglan sa imong mga estudyante.
Si Juan usa ka batan-ong lalaki nga nagtuo sa Dios. Bisan pa man, adunay pipila ka mga bahin sa ebanghelyo nga dili niya gusto nga hunahunaon. Usa niini mao ang pahimangno sa Manluluwas nga mahimong hingpit. Naningkamot siya sa paghimo og mga kausaban ug mahimong mas mahisama ni Kristo apan nagpadayon sa pagkasipyat. Gibati niya nga napakyas na siya, busa ang kahingpitan alang kaniya imposible.
Aron makadugang og kalainan sa mosunod nga mga kalihokan sa pagtuon, ikonsiderar ang pagtuon sa seksiyon nga “Lihokon inubanan sa hugot nga pagtuo” niini nga leksiyon isip usa ka klase ug ang ubang mga seksiyon diha sa gagmay nga mga grupo o sa mga managpares. Mahimo dayon tubagon sa mga estudyante ang kataposang pangutana nga magtinagsa.
Susihon ang mga konsepto ug mga pangutana inubanan sa mahangtorong panglantaw
Ang Mahinungdanon nga Dokumento sa Doktrinal nga Kahanas nagtudlo nga kon mag-atubang sa mahagiton nga isyu, mahimo natong “maporma og usab ang pangutana (aron makita sa laing paagi ang pangutana) ug matan-aw ang mga ideya basi sa sumbanan sa kamatuoran nga gihimo sa Ginoo kay sa pagdawat sa mga ideya o mga pagbana-bana nga gihimo sa kalibotan” (pahina 3). Ang mosunod nga mga pangutana makatabang niini nga proseso.
-
Sa imong hunahuna sa unsang paagi gitan-aw sa Ginoo ang kahingpitan nga lahi sa paagi sa pagtan-aw sa kadaghanan sa kalibotan?
-
Sa unsang paagi nga ang atong kahibalo sa plano sa kaluwasan ug sa Pag-ula ni Jesukristo nagtabang kanato nga mas masabtan unsay gitudlo sa Manluluwas diha sa 3 Nephi 12:48?
Tinguhaa ang dugang nga panabot pinaagi sa balaanong gitudlo nga mga tinubdan
-
Unsaon nimo sa paggamit ang imong nakat-onan sa 3 Nephi 12:48 mahitungod sa pagkahingpit aron sa pagtubag sa kabalaka ni Juan?
Ikonsiderar ang pagdapit sa mga estudyante sa pagpangita og mga kasulatan o mga pamahayag gikan sa mga lider sa Simbahan nga makatabang ni Juan nga mas makasabot sa pagtulon-an sa Manluluwas diha sa 3 Nephi 12:48. Kon nagkinahanglan og tabang ang mga estudyante, mahimo nimong isugyot ang pipila sa mga kasulatan sa ubos.
Aduna usab mga pakigpulong sa komperensiya sa seksiyon nga “Dugang nga mga Kalihokan sa Pagkat-on” nga mahimong makatabang.
-
Sa unsang paagi ang mga panglantaw nga imong nakaplagan makatabang sa problema ni Juan?
Lihokon inubanan sa hugot nga pagtuo
Basaha ang mga parapo 5–7 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas, mangita kon unsa ang mahimo ni Juan sa paglihok diha sa hugot nga pagtuo.
-
Sa imong hunahuna, hain niining mga pagtulon-an ang makatabang kang Juan? Ngano man?
-
Unsa kaha ang iampo ni Juan mahitungod niini nga makatabang sa iyang sitwasyon?
-
Unsay imong ikasugyot nga buhaton ni Juan aron “mabuhi pinaagi sa hugot nga pagtuo” hangtod nga makadawat siya og dugang nga pagsabot mahitungod sa iyang potensiyal nga mahimong hingpit?
Ikonsiderar nga ipatubag sa mga estudyante ang mosunod nga pangutana sa tagsa-tagsa diha sa ilang mga journal sa pagtuon.
-
Sa unsang paagi ang unsay imong nakat-onan sa 3 Nephi 12:48 mahitungod sa pagkahingpit makaimpluwensiya sa imong kaugalingong mga pagbati ug mga binuhatan?
Rebyo sa doktrinal nga kahanas
Ikonsiderar ang pagdrowing og papel diha sa pisara ug isulat ang pakisayran sa kasulatan 3 Nephi 12:48 sa sentro ug ang mga hugpong sa mga pulong sa matag kanto sama sa kalihokan sa pagsag-ulo niini nga leksiyon ubos sa ulohan “Ipasabot ug isag-ulo.” Itudlo ang matag usa sa mga hugpong sa mga pulong sa eksakto nga pagkasunod ug ipasulti sa mga estudyante ang mga hugpong sa mga pulong nga magdungan. Pagpapas og usa ka hugpong sa mga pulong ug balika ang kalihokan. Padayon sa pagpapas ug pagsubli hangtod nga ang tanang mga hugpong sa mga pulong ug ang pakisayran sa kasulatan napapas na.