3 Nephi 23

Makugihong Magsiksik sa mga Kasulatan

Si Kristo ug ang mga tawo sa Amerika nagtan-aw sa mga palid nga bulawan

Kumusta ang imong personal nga pagtuon sa kasulatan? Unsa nga kalainan ang mahimo niini sa imong kinabuhi? Sa 3 Nephi 23, gihatagan og gibug-aton ni Jesus ang kaimportante sa pagtipig ug sa pagtuon sa mga kasulatan ug sa mga pulong sa mga propeta. Kini nga leksiyon gituyo aron sa pagtabang kanimo sa pagtuon sa mga pulong sa Ginoo nga mas makugihon.

Pagtabang sa mga estudyante sa pagpalambo sa mga kahanas sa pagtuon. Aron matabangan ang mga estudyante nga magmalamposon sa ilang pagtuon sa kasulatan, tabangi sila sa pagpalambo og lain-laing kahanas sa pagtuon sa kasulatan. Kini nga mga kahanas kinahanglan magtumong sa pagtabang sa mga estudyante sa pagdapit sa Espiritu sa ilang pagtuon, mas makasabot sa mga kasulatan, ug sa pagdiskobre ug sa paggamit sa doktrina ug mga baroganan sa ebanghelyo.

Pagpangandam sa estudyante: Dapita ang mga estudyante nga mogahin og panahon sa pagtuon sa mga kasulatan sa wala pa kini nga leksiyon, maghatag og partikular nga pagtagad sa unsay ilang gibuhat nga naghimo sa ilang pagtuon nga mas makahuloganon. Awhaga sila sa pagtimbang-timbang sa bili ug kalidad sa ilang pagtuon ug sa epekto nga gihatag niini o wala nahatag niini, diha sa ilang mga kinabuhi.

Mga Posibleng Kalihokan sa Pagkat-on

Ang imong personal nga pagtuon sa kasulatan

Sa wala pa ang klase, ikonsiderar ang pagtago og lainlaing mga butang sa tibuok lawak klasehanan. Isulat ang pulong nga “pagpangita” diha sa pisara. Sultihi ang mga estudyante kon unsa ang ilang pangitaon, ug dapita sila sa pagpangita sa daghang mga butang kutob sa mahimo.

• Unsa ang buot ipasabot sa pagpangita?

• Unsa ang makapainteres o makapaikag sa pagpangita?

• Unsa ang mahimong lisod o makapaluya bahin niini?

Ang pagdapit sa Manluluwas

Basaha ang 3 Nephi 23:1–5, mangita alang sa unsay gisugo sa Manluluwas kanato nga pagasiksikon ug ngano.

Dapita ang mga estudyante sa pagpakigbahin sa unsay ilang nakaplagan.

Sa miaging mga kapitulo, ang Manluluwas mikutlo og daghan ni Isaias sa pagtabang ug pagpanalangin sa mga Nephite. (Tan-awa sa 3 Nephi 16:18–20; 20:32, 34–45; 21:8; 22:1–17.)

• Unsa nga mga rason ang gihatag sa Ginoo alang kanato sa pagsiksik sa mga pulong ni Isaias? (tan-awa sa 3 Nephi 23:1–3).

  Mahimo kang mogahin ug pipila ka panahon diha sa klase nga maghisgot sa bili sa mga pagtulun-an ni Isaias. Pananglitan, mahimo nimong hangyoon ang mga estudyante sa pagpakigbahin kon unsay ilang gibati mahitungod sa mga pulong ni Isaias. Mahimong basahon nila ug pamalandongan ang mga bersikulo gikan sa Isaias ug hunahunaon kon nganong kini bililhon nga pagatun-an. Ang mga pananglitan mahimong maglakip sa Isaias 7:14; 9:6–7; 41:10; 49:13–16; 53:1–5; 55:1–3; 61:1–3.

• Sumala sa 3 Nephi 23:5, nganong kinahanglan kitang mopatalinghog sa mga pulong sa Ginoo ug sa mga pulong sa mga propeta?

Paminaw og maayo sa mga tubag sa mga estudyante ug ikonsiderar ang pagsulat niini diha sa pisara.

Usa sa mahinungdanong baroganan nga atong makat-onan niini nga leksiyon mao nga ang Manluluwas nagsugo kanato sa pagpaminaw sa Iyang mga pulong ug sa pagsiksik nga makugihon sa mga pulong sa mga propeta.

• Unsa sa imong hunahuna ang buot ipasabot sa siksika nga makugihon ang mga kasulatan?

Paggahin og panahon sa pagpamalandong sa imong pagtuon sa kasulatan. Kini mahimong maglakip sa personal ug pamilya nga pagtuon ingon man usab sa pagtuon diha sa simbahan ug sa seminary. Gibati ba nimo nga makugihon ka sa pagsiksik sa mga kasulatan? Ngano man o nganong wala?

• Unsa ang pipila ka mga rason nga mahimong lisod ang makugihong pagsiksik sa mga kasulatan?

  Samtang mopakigbahin ang mga estudyante, ikonsiderar ang pagsulat sa ilang mga tubag sa usa ka bahin diha sa pisara. Kon mahimo, mahimo nimong hisgotan ang kalihokan sa pagpangita sa sinugdanan sa leksiyon. Aron mahunahuna ang mga posibleng mga kalisod, mahimong itandi sa mga estudyante ang pagsiksik sa mga kasulatan ngadto sa pagpangita sa mga butang diha sa kalihokan.

  Ang usa ka tubag tingali mao nga mahimong lisod ang paggahin og panahon sa pagsiksik sa mga kasulatan kon kita dili mobati nga kita makakaplag og bisan unsa nga mahinungdanon. O tingali lisod kini sabton o makalaay. Usa sa labing maayo nga mga paagi sa pagbuntog sa daghan niini nga mga kalisod mao ang pagkahibalo kon unsaon sa pagpangita sa mga panglantaw o mga kamatuoran nga makatabang kanato sa atong mga kinabuhi.

• Bisan pa niini nga mga kalisdanan, unsa ang pipila ka mga butang nga imong nahimo, o mahimo, aron makabaton og usa ka makahuloganon nga kasinatian sa pagtuon sa kasulatan?

Samtang motubag ang mga estudyante, paghimo og lista sa pikas bahin sa pisara. Kon mapuslanon, idugang ang mosunod nga mga pananglitan.

Ania ang pipila ka mga pananglitan:

• Pag-ampo sa dili pa ka magtuon.

• Markahi ang mahinungdanon nga mga pulong ug mga hugpong sa mga pulong, ilabina kadtong makatabang kanimo nga mas makaila sa Manluluwas.

• Pangitaa ang mga pulong o hugpong sa mga pulong nga lisod sabton.

• Hunong ug ipamubo ang imong nabasa.

• Paggamit og mga cross-reference aron mas masabtan ang usa ka hilisgotan o doktrina.

Jesukristo nakigsulti kang Nephi mahitungod sa mga rekord

Aron sa pagbansay sa duha niini nga mga kahanas, basaha ang 3 Nephi 23:6–14 ug buhata ang mosunod:

• Ipamubo sa imong kaugalingong mga pulong ang imong nabasa.

• Markahi ang bisan unsa nga mga pulong o hugpong sa mga pulong nga makatabang kanimo nga mas makasabot sa Manluluwas.

  Dapita ang mga estudyante sa pagpakigbahin sa unsay ilang nakaplagan. Aron mahimo kini, mahimo silang magtinabangay nga managpares, nga ang usa ka estudyante mopamubo sa mga bersikulo ug ang lain motudlo sa mga pulong o hugpong sa mga pulong nga makatabang nila nga makasabot sa Manluluwas.

  Kon ang mga estudyante maglisod sa pagpamubo sa ilang nabasa, mahimo nimong ipasabot nga ang Manluluwas mihangyo nga makita ang mga rekord sa mga Nephite. Iyang gihisgotan nga ang panagna ni Samuel mahitungod sa nabanhaw nga mga santos nga nagpakita ngadto sa kadaghanan (tan-awa sa Helaman 14:25) natuman na, apan ang katumanan wala diha sa mga talaan. Ang Manluluwas misugo sa mga Nephite sa pagrekord niini nga asoy.

• Unsa nga mga pulong ang nagklaro nga ang Manluluwas nagpakabana sa unsay nahisulat diha sa kasulatan?

• Sa unsang paagi nga ang pagkahibalo niini mahitungod sa Manluluwas makaapekto kon giunsa nimo pagtuon ang mga kasulatan?

Pagpraktis og epektibo nga pagtuon sa kasulatan

Paggahin og pipila ka minuto sa pagpraktis sa pagsiksik sa mga kasulatan sa makugihong paagi. Mahimo nimong pilion ang pagtuon sa usa ka kapitulo o sa pagsiksik sa mga bersikulo mahitungod sa usa ka hilisgotan nga gusto nimong mahibaloan pa. Gamita ang labing menos usa ka kahanas sa kasulatan nga imong gihunahuna o nadiskobrehan sa lista sa ibabaw.

Hatagi og igong panahon ang mga estudyante sa pagbasa ug sa pagpamalandong. Pagdapit og mga estudyante nga mopakigbahin og usa ka butang nga ilang gitun-an nga makahuloganon kanila ug unsa nga mga kahanas ang ilang gigamit. Ang mosunod nga mga pangutana gituyo aron sa pagtabang sa usa ka panaghisgotan.

• Unsa nga paagi sa pagtuon ang imong gigamit? Ngano kaha nga kini makatabang kanimo sa pagtuon nga mas makugihon?

• Unsa ang imong nakat-onan mahitungod sa Manluluwas nga wala pa nimo masabti kaniadto?

• Hain niini nga mga kahanas ang mahimong imong gamiton sa imong umaabot nga pagtuon sa kasulatan? Unsaon man nimo kini sa pagbuhat?

Sa umaabot nga semana, pamalandongi ang imong nakat-onan karon. Pagpili og usa ka paagi nga mahimo nimong mapaningkamotan ang pagsiksik sa mga kasulatan nga mas makugihon. Ikonsiderar kon sa unsang paagi kini makatabang kanimo sa imong kinabuhi.

Komentaryo ug Background nga Impormasyon

Unsa ang pipila ka mga panalangin nga mahimong moabot gikan sa pagtuon sa mga kasulatan?

Si Elder Richard G. Scott (1928–2015) sa Korum sa Napulog Duha ka Apostoles mitudlo:

Elder Richard G. Scott

Ang pagpamalandong sa usa ka tudling sa kasulatan mahimong yawe nga makaabli sa pagpadayag ug giya ug inspirasyon sa Espiritu Santo. Ang kasulatan makahupay sa nahasol nga kalag, makahatag og kalinaw, paglaom, ug pagpahiuli sa pagsalig sa abilidad sa usa ka tawo sa pagbuntog sa mga hagit sa kinabuhi. Kini dunay kusog nga gahom nga moayo sa emosyonal nga mga hagit kon dunay hugot nga pagtuo sa Manluluwas. Makapadali kini sa pisikal nga pagkaayo. (Richard G. Scott, “Ang Gahom sa Kasulatan,” Liahona, Nob. 2011, 6–7)

Sa unsang paagi nga ang pagbasa sa Basahon ni Mormon makatabang sa akong pamilya?

Si Presidente Henry B. Eyring sa Unang Kapangulohan mitudlo:

Presidente Henry B. Eyring

Pinaagi sa Basahon ni Mormon ang Ginoo makatudlo usab kanato mahitungod sa pagpakig-uban ug pagserbisyo sa mga tawo. Kini nga libro nagpadayag sa kabubut-on sa Ginoo alang sa kinabuhi sa pamilya sa usa ka paagi nga ang ubang mga kasulatan wala gani naghisgot. Nagtuo ako nga kini kadaghanan tungod sa makapaikag nga istruktura niini. Kini mahitungod sa mga pamilya; kini mahitungod sa mga relasyon sa mga tawo. Nagsugod kini sa mga pamilya, natapos kini sa mga pamilya, ug nakat-on kita sa paghigugma niini nga mga pamilya. (Henry B. Eyring, “A Discussion on Scripture Study,” Liahona, Hulyo 2005, 22)

Unsaon nako sa pagpauswag sa akong kaugalingon nga pagtuon sa kasulatan?

Si Elder David A. Bednar sa Korum sa Napulog Duha ka Apostoles mitudlo:

Elder David A. Bednar

Usa sa labing maayong mga paagi sa pagpaduol ngadto Kaniya ug sa pagkat-on ug mahisama ni Ginoong Jesukristo mao ang kanunay nga pagtuon sa balaan nga mga kasulatan––kada adlaw nga “magbusog sa mga pulong ni Kristo” (2 Ne. 32:3).

Palihog tan-awa nga migamit ako sa pulong nga pagtuon ug dili ang pulong nga pagbasa. Ang pagtuon ug pagbusog nagsugyot sa pagpokus ug sa kadasig nga molabaw sa kaswal nga pagbasa o dinalidali nga pagtuon. Ang pagtuon ug pagbusog, gisundan sa sinsero nga pag-ampo ug makanunayong paggamit sa mga kamatuoran ug sa mga baroganan nga atong nakat-onan, moresulta og personal nga determinasyon, espirituhanong pasalig [commitment], ug sa masanag nga kahayag sa pagpamatuod. Ang pagtuon, pagkat-on, pag-ampo, ug ang paggamit sa mga kamatuoran sa ebanghelyo sa tukmang paagi mao ang importanteng mga elemento sa proseso sa pagduol ngadto sa Manluluwas. (David A. Bednar, “Tungod kay Kita Nakakita Kanila,” Liahona, Abr. 2006, 18)

Dugang nga mga Kalihokan sa Pagkat-on

3 Nephi 23:1. “Mahinungdanon ang mga pulong ni Isaias”

Kini nga kalihokan makapadasig sa mga estudyante sa pagtuon sa mga pulong ni Isaias. Ang mga estudyante mahimong mobasa sa 3 Nephi 20:11; 23:1, diin ang Manluluwas misugo kanato sa pagsiksik sa mga pulong ni Isaias. Ang mga estudyante mahimo usab nga mobasa sa 1 Nephi 19:23; 2 Nephi 6:5; 25:7–8, mangita og dugang nga mga rason sa pagtuon sa Isaias.

Dayon dapita ang mga estudyante sa pagsiksik diha sa mga pagtulun-an ni Isaias alang sa mga panglantaw nga mahinungdanon ngadto kanila. Ang pipila ka mga ehemplo mao ang Isaias 1:18; 9:6; 26:3–4; 40:31; 41:10; 48:17; 53:3–5; 55:1, 8–9.

Pagpasiugda sa seminary

Samtang ang mga estudyante naghisgot kon unsaon sa pagsiksik sa mga kasulatan sa makugihong paagi, dayga ang ilang pagtambong sa seminary ug ang pagtuon sa mga kasulatan diha sa klase. Usa sa mga katuyoan sa seminary mao ang pagtabang sa mga batan-on nga mas maduol ngadto sa Manluluwas pinaagi sa mga kasulatan. Ikonsiderar ang pagpangutana, “Sa unsang paagi ang seminary nakatabang kanimo sa pagsiksik sa mga kasulatan sa mas makugihong paagi?”

Pagrekord sa espirituhanon nga mga kasinatian

Kon mapuslanon ang pagtutok sa pagrekord sa espirituwal nga mga kasinatian, pagdala og journal, o pagpakita og mga hulagway o bidyo sa mga handomanan gikan sa imong kinabuhi. Mahimo usab nimong hangyoon ang mga estudyante sa pagdala sa ilang kaugalingong mga journal, litrato, o bidyo ngadto sa klase aron ipakigbahin. Pangutana kon nganong ang pagrekord sa mga kasinatian importante.

Dapita ang mga estudyante sa pagbasa sa 3 Nephi 23:6–13, mangita sa kasinatian nga napakyas ang mga Nephite sa pagrekord. Tabangi ang mga estudyante sa pag-ila sa kamatuoran nga ang pagrekord sa espirituwal nga mga kasinatian makatabang sa pagpalig-on sa atong hugot nga pagtuo ug sa hugot nga pagtuo sa uban.

Ikonsiderar ang pagpakigbahin sa kasinatian ni Presidente Henry B. Eyring nga nagrekord og espirituhanong mga kasinatian nga iyang gipakigbahin diha sa iyang pakigpulong nga “O Hinumdumi, Hinumdumi” (Liahona, Nob. 2007, 66–69). O mopakigbahin og ehemplo gikan sa kang Elder Neil L. Anderson nga “Mga Espirituhanong Panumduman nga Angay Hinumduman”(Liahona, Mayo 2020, 18–22) ug basaha ang kataposang duha ka parapo sa pakigpulong.

Hatagi ang mga estudyante og panahon sa pagrekord sa ilang kaugalingong espirituwal nga mga kasinatian. Tabangi sila nga makaamgo nga ang espirituhanong mga kasinatian tingali dili sobra ka drama ra kaayo o makapahingangha, apan hinoon yano kaayo ug, sa samang higayon, mahinungdanon kaayo. Dapita ang mga estudyante sa pagpakigbahin kon nganong ang pagrekord sa personal nga espirituwal nga mga kasinatian makapalig-on sa atong hugot nga pagtuo ug sa hugot nga pagtuo sa uban.